الحلقة 21
#قمر_تحكي
اول ما فقت دورت بعينيا عالبيت الي كنت فيها ما عرفتش كيفاه وصلت لهنا و لا قداه تعدا عليا وقت وانا عالحالة هاذي .. حاولت نقوم اما راسي كان رزين وبدني فاشل يديا كانت مغطية بالفاصمة حسيت روحي مهدودة وما عنديش لا طاقة و لا قوة غمضت عينيا حبيت نرتاح اكثر وننسى الي صار اما حليتهم فيسع عالباب الي تحل هزيت راسي و ريتو هو داخل للحظة سرحت فيه و في الي عشتو معاه البارح ، كلامو الكل تعدا بين عينيا ما عرفتش كيفاه عرف بلاصتي وقتها و لا علاه انقذني من الموت ، حاولت نهز روحي ونقوم اما منعني كيف قرب مني وشدني يحكي
" خلييك مرتاحة "
نطرت يديا منو قحرتلو نحكي " سيبني رد بالك تمسني مرة اخرى "
وخر بخطواتو لتالي يحكي" باهي مانيش بش نمسك اما خليك مرتاحة حتى يجيك الطبيب "
" مانحبش .. نحب نروح امي وخالتي اكيد متحيرين عليا "
" ماتخافش انا بعثتلهم خبر انك هنا شوي و يكونو حذاك غير انت ارتااح تو وماتخمم في شي قمر هاني انا موجود "
"امشي من هنا ما حاجتيش بيك حذايا.. النفس الي ناخذو معاك من نفس البقعة يخنقني "
بعد عليا اكثر وقعد عالكرسي الي مقابلني غزرلي يحكي " مستحيل كان نخليك وحدك تو .. مش بعد الي ريتو البارح "
تصرفو و كلامو حسيتهم وتروني كيفاه سمح لروحو يتصرف هكا جيت بش نجاوبو اما قص عليا الباب الي تحل و دخول الطبيب " شنية تحس في روحك مدموازال قمر "
" لباس دكتور .. جوست حاسة روحي دايخة"
" طبيعي تحس هكاكا بدنك ياسر تاعب وناقص ماكلة.. هاني بش نعطيك شوي فيتامينات واضب عليهم مع الدواء و تو ترجع لباس "
" وقتاه انجم نخرج ؟"
" اليوم تنجم المهم ارتاح و كول مليح والا بش تتعب اكثر من هكا "
هزيتلو براسي باهي.. خرج الطبيب تلفت ليه نحكي " مش قتلي امي و خالتي جايين وينهم نحب نخرج من هنا "
" تهنى شوي ويكونو حذاك "
ما جاوبتوش و دورت بوجهي لناحية لأخرى مانيش فاهمة معنى وجودو حذايا و لا لاقيا جواب لتصرفاتو الي يراه مايقولش هو الي جاء و طلب مني نتنازل و نعرس بريان .. كلامو و غزرتو كانو متبدلين لدرجة اني ماعقلتوش اما اكيد هاذي لعبة جديدة منهم و مستحيل كان نصدق منو اي كلمة.
هزيت راسي على صوتو يحكي " قمر ميسالش نحكيو شوي "
تلفتلو من غير حتى كلمة قرب مني شوي يحكي " البارح وين عرفت الي انت تنازلت صدقني قمر انا ما فيباليش الي صار مع مدام وجيهة "
خذيت نفس نحكي " الموضوع وفا و الي حبيتو عليه صاار سي ليث "
" الموضوع ماوفاش قمر .. انا البارح بعد ما عرفت بقيت نلوج عليك بش نحكي معاك .. صدقني قمر كل كلمة قلتهالك البارح كانت بلحق .. انا مستعد نعاونك و ناقف معاك "
" علاه بش نصدق واحد كيفك .. قلتهالك البارح و نعاود نقولهالك انت كيفهم ومستحيل كان ناثق فيك سي ليث .. أصلا ما نستغربش كان الي تعمل فيه هذا الكل لعبة جديدة منكم و الي تخدم عندهم باعثينك ليا مرة أخرى"
عدا بيديه على وجه و عطاني بظهرو عاود تلفتلي ووجه احمر يحكي " نعرف روحي غلطت اما مانيش كيفهم .. هاك قلت نخدم عندهم اما مانيش بش نكمل في الحكاية المسخة هاذي .. قمر صدقني انا هنا على خاطرك .. حتى كيف تعرس بريان مهمش بش يخليوك رايضة .. هوما خايفين منك لدرجة نواين يبعدوك منا .. خايفين من رفيقة و ماتعرفش كيفاااه ينجمو يسكتوها"
حسيت نفس تقطع عليا من كلامو نسيت الوجايع و تنطرت قدامو نحكي " ش شنوة ؟؟ على شنوة ناوين انتوما هاني رضختلكم هاني عملت الي تحبو عليه .. "
حسيت بترهويجة كنت بش نطيح اما لقفني هو شدني و دور يديه على ظهرلي رجعني للفرش بقيت نطاوع فيه مالقيتش قوة بش نبعدو عطاني نشرب و بعد عليا شوي.. هبطت راسي نبكي و نتكلم " يا ريتك خليتني متت البارح .. ياريتك خليتني نرتاح .. "
" موتك راحة ليهم هوما مش ليك انت .. رد بالك تعطيهم الفرصة هاذي "
جاء قدامي و طبس يحكي " قمر .. عرسك بريان مش بش يحميك منهم و لا يحمي داركم .. تراجع عالخطوة هاذي و صدقني انا معاك مستحيل كان نخليهم يضروك "
" كيفااه تحبني نصدقك و ناثق فيك ؟؟؟ علاه بش نصدق كلامك هذا سي ليث.. "
" خاطرني مش كيفهم .. من نهارت الي قابلتك ووصلتك للحالة هاكي و انا ضميري يأنب فيا و انا عايش في جهنم.. مستعد نصلح غلطتي و نعاونك حتى كان نعرف اني بش ناقف ضدهم .. نعرف صعيب تاثق فيا ويمكن مستحيل.. اما ماعندكش حل اخر قمر انا بش نبقى وراك كان حبيت و لا ما حبيتش .. غلطت كيف خليتهم عملو فيك هكا و مانيش ناوي نعاود غلطتي .. مستحيل نخليهم يضرو الانسانة الوحيدة الي بقاتلك.. و مانيش بش نسمحلهم ينفيوك من بلادك و يسرقو منك اخر حاجة قعدتلك"
بقيت نغزرلو للحظة حبيت نصدقو و نطمان اني لقيت شكون ياقف معايا شكون ما يخلينيش وحدي .. انسان يمحيلي الخوف الي سيطر عليا ..
مسحت دموعي و رديت النفس نحكي " كيفاه بش تحمينا منهم .. كيفاه بش تمنع العرس هذا ؟؟ كيفاه بش تمنعهم انهم يبعدوني؟؟ ماعنديش مهرب منهم صدقني"
" قمر عرس بيااا"
هزيت راسي معاه بقيت نغزرلو معرفتش شنية نجاوبو حسيت روحي ضعت في الطلب متاعو .. كل مرة نلقى روحي في متاهة جديدة و مفماش منها خروج ..
حاسة اني في دوامة وكل شي داير بيا غريب و معادش فاهمة شي .. حياتي صارت تحت قراراتهم و رحمتهم سلبو مني حتى حق الإختيار .
قام من قدامي و قعد جنبي يحكي " عرسنا بش يكون عالاوراق و لفترة معينة .. كيف تولي مرتي مستحيل يقربولك و الا نخليهم يبعدوك لأي بلاصة ..كيف تولي مرتي بش تصير في حمايتي انت و داركم .. أول ما توفى الحكاية ونعرف الي انت بش تكون بخير .. نطلقو .. صدقني قمر هذا هو الحل .. خمم مليح في كلامي و انسى فكرة ريان خاطرها بش تضرك اكثر "
غمضت عينيا وبقيت ساكتة احساسي يقلي صدق كلامو ولو شوي .. في الحالات الكل ماعاد عندي ما نخسر .. اما ديما حل ارحم من حل اني نعرس بليث ارحملي من اني نعيش مع ريان نرضى بالموت وهو لا
حليت عينيا على صوت خالتي رفيقة الي دخلت تجري مع امي قربتلي عنقتني و تحكي معايا و انا مخي كان سارح مع كلام ليث حاسة روحي بين نارين .. بقيت حايرة و مش عارفة اناهي الوجهة الي نمشي فيها
فقت من سرحتي على خالتي الي تحكي " شبي بنتي شصارلك .. خليتنا متحيرين عليك " غزرت لليث وكملت تحكي " شصارلها احكي "
هزيت عينيا فيه خفت لا يحكي عالحالة الي لقاني فيها البارح اطمنت شوي كيف سمعتو يحكي
" ما تخافش لقيتها في دارها وين ما بعثتني انت كانت دايخة طول جبتها للكلينيك ..مانجمتش نخليها وحدها و نجيكم وماعنديش رقمكم .. على هذاكا استنيت لصباح بش بعثتلكم الشوفور "
كمل حكى و قام من حذايا غزرلي يحكي " خمم في كلامي قمر و كلمني، نستناك .. انشالله لباس مرة اخرى" ما خلانيش نجاوبو هز روحو وخرج
تكلمت امي مستغربة " شنوة يحب منك !! في شنوة بش تخمم !"
بلعت ريقي و دورت عينيا علاهم الزوز نحكي " قلي خلينا نعرسو "
صاحت خالتي رفيقة تحكي " كيفااااه ؟؟ علاه طلب منك هكا ؟؟ هوما جبروه مش هكا ؟؟"
هزيت براسي لا ودموعي هبطت نحكي " لاااا .. قالي الي هوما مش ناوين يسيبوني .. حتى كيف نعرس بريان ناوين يبعدوني منا .. بش ينفيوني من بلادي .."
قربت مني خالتي عنقتني " اششش يزي من البكا .. ما تخافش قمر مستحيل كان نخليهم يبعدوك عليا"
" صدقني مانيش خايفة على روحي انا خايفة عليك انت و امي .. ليث وعدني انو بش ياقف معانا"
" كيفاه تصدقو قمر ؟؟ نسيت الي هو معاهم ؟؟ "
" مانسيتش .. اما انا مجبورة خالتي .. كان ما نعرسش بليث بش ترصيلي مع رياان .. في الحالات الكل لازمني نختاار.. ثنيتي مسكرة ومفماش حل اخر "
بعدتني علاها و شدتني من اكتافي تحكي" نحب نعرف السبب الي يخليك مجبورة انك تختار ؟؟؟"
هربت عينيا من علاها نحكي " امااان خالتي يزي راني تعبت .. كل شي على عينيك فما الف سبب يخليني مجبورة .. لازمني نقرر "
" و شنوة القرار الي بش يخليك ترتاح اه ؟؟ انك تعيش مع الي اغتصبك و الا تعيش مع الي هددك؟؟ بش تبقى تحت رحمتهم هكا ترضى لروحك ؟؟"
قمت من حذاها نصيح و نبكي " يزييي خالتي حرااام علييك راني تعبت تعرف شمعناها تعبت حسو بيا حتى شوي .. وصلت معايا لهناااا مانيش متحملة حتى كلمة حتى النفس مش حاملتو.. حتى الموت رافضتني معادش لاقيا الراحة في حياتييي .."
قربت مني هي وامي يهديو فيا و تحكي " بااهي ماتعملش هكا .. اعمل الي يريحك و قرر في عقلك اما خليك عارفة انا بش نبقى وراك و القرار الي بش تاخذو بش نواجهوه مع بعضنا مستحيل نخليك وحدك "
هزيتلها براسي باهي و رجعت للفراش تكيت و غمضت عينيا تعدات قدامي كل كلمة قالها ليث لحظتها رضيت اني نوهم روحي على تصديق كلامو على اني نعيش في حقيقة ريان .. نحب نصدق كل كلمة تخليني نرتاح حتى بالكذب.. تعبت لدرجة اني مستعدة نتشبث بوهم و كذبة انو غدوة كل شي بش يتصلح و نلقى راحتي.
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
