#ليث_يحكي
ايامات تعداو من اخر مرة جات فيها وانا رفضت نقابلها.. من وقتها وانا حاسس بخنقة ماكنتني وانا نتخيل فيها شنوة حست وشنوة حاسة تو.. اما هذا أصح حل.. صحيح مجبور عليه اما على خاطر مصلحتها بش ننسى ونتحمل على هذاكا مستحيل نتراجع ف قراري.. هي مصيرها تتعود وتتعب تو شوي خير ماتعدي بقيت حياتهاا تاعبة من جرتي وهي جاية لهناا وتستنى فياا.. مانحبهاش تبقى متأملة ف قضية خسرانة عارف انها مش بش تسامحني وانا مش بش نسامح روحي اما كلو يهون المهم هي تشوف حياتها..
فقت من سرحتي على صوت العون يحكي
العون :" ليث بن مراد.. زيارة "
بقيت متكي نغزر للسقف نحكي
انا :" مانحب نقابل حد "
العون :" المحامي متاعك.. وقال لازمك تقابلوو "
تنهدت بالشوي وقمت من بلاصتي.. خرجت معاه دخلت للبيت وين شفتو قاعد.. قدمت بخطواتي ناحيتو وقعدت قدامو ساكت.. عدا بعينيه علياا يحكي
عادل :" شحالك ليث ؟ "
تكيت بظهري لتالي نحكي
انا :" لباس.. شفما مش كانو وقت الزيارة مازال كيما قلت معاد نحب نقابل حد.. جيتك زايدة ماتر "
تبسم يحكي
عادل :" جيتي المرة هاذي اهم جية.. خاطرني جيتك بخبر باهي "
عقدت بحواجبي واستويت ف قعدتي نحكي
انا :" الي هو ؟"
عادل :" الي هو خروجك من هناا ورجوعك لدارك "
عديت بعينيا عليه مش مصدق كلامو للحظة حسيت روحي نتخيل.. هزيت بحاجبي نحكي
انا :" مفهمتكش ؟ كيفاه خروجي ؟"
عادل :" لقينا دليل براءتك.. وصار عند الشرطة والبحث تفتح من جديد.. وبما انو جلسة الاستئناف قربت الأدلة بش تتقدم وانت بش تخرج يومها "
عديت بيديا على وجهي وغزرتلو نحكي
انا :" ياخي فاش تحكي؟ أدلة شنوة الي ظهرت ؟ منين لقيتهم الأدلة؟"
عادل :" مش انا الي لقيتهم.. المجرم الحقيقي هو الي ظهر واعترف بكل شي "
عقدت بحواجبي نحكي
انا :" شكون المجرم الحقيقي ؟"
تنهد بالشوي يحكي
عادل :" ريان الغربي..اكيد تعرفو.. طلع هو هرب من الحبس ومشى للايوب بش يقت/لو ياخي لقى فريحة غادي وعرف انها حبلة من ايوب مالا قت/لهم الزوز.. والبارح جاء و استعرف بكل شي.. حكى عالجريمة بالتفصيييل حتى من السكينة طلعت وعليها بصماتو.. يعني برائتك ظهرت "
عديت بعينيا عليه حاولت نستوعب الي سمعتو.. ماتوقعتش انو ريان السبب رغم كثرة الاحتمالات.. خذيت نفس طويل نحكي
انا :" يعني هو تشد تو ؟ "
هزلي براسو لا يحكي
عادل :" لاا هو سجل كل شي ف فيديو.. وهزو لمرتك وسي مصطفى "
حليت عينيا على وسعهم نحكي
انا :" ش..شنوة هزو لمرتي ؟ وين هزو عادل احكيلي كل شي صار "
عادل :" اهدا اهدا.. لبارح ريان مشى لدار عمك وطلب يقابل مرتك.. طلب منها السماح والتعرف بكل وقدم الفيديو زادة وبعد... "
هزيتلو براسي اي نحكي
انا :" وبعد؟"
عدا بعينيه عليا وغزرلي درا كيفاه يحكي
عادل:" وبعد قت/ل روحو.. ريان انت/حر قدامهم "
حليت عينيا مصدوم من الي سمعتو.. كبست عالبونية متاعي بالقوي نحكي
انا :" ومرتي ويني تو لبااس..ماصارلها شي ؟"
عادل :" هي لباس ماتخافش.. خليتها مع مدام رفيقة"
انا :" ورفيقة و عمي ؟ كلهم ملاح مش هكاا ؟"
عادل :" صدقني كلهم لباس ولبارح مشاو للفيلا متاعك خاطر الشرطة طلبت منهم يفرغو الفيلا لتحقيق و البصمات.. وتو هاني ماشي بش نقابلهم ف المركز خاطر بش يستجوبهم لكل.. انا جيت تو حبيت نفرحك ب الخبر هذا بش تفيق وتحضر روحك لنهار الجلسة "
هزيتلو براسي باهي نحكي
انا :" امشي تو للاستجواب وكون معاهم عادل.. وبعد ارجع قلي شصار مرة اخرى.. طمني على مرتي وعلى الجماعة لكل "
تبسم يحكي
عادل:" باهي تهنى انا ف كل الأحوال بش نرجعلك.. المهم تو خلينا ف الموضوع الثاني "
هزيت بحاجبي نحكي
انا :" إلي هو ؟"
عدا بعينيه عليا يحكي
عادل :" قضيةالطلاق..تحبني نكمل فالاجراءات ولا لا.. خاطرني بش نبعث الاوراق للمحكمة "
هزيتلو براسي لا نحكي
انا :" لا ألغي كل شي..معادش فما قضية طلاق ورد بالك قمر تعرف.. مدام ظهر دليل وخروجي اكيد معادش عندها داعي القضية هاذي "
عادل :" فهمتك على هذاكا حبيت نسالك قبل ما نكمل فيها وتوصلها لورقة.. فرحت انك تراجعت ف قرارك و مبروك البراءة من تو ماتر "
تبسمت بالسيف نحكي
انا :" عيشك "
عدا بعينيه عليا وغزرلي درا كيفاه يحكي
عادل :" تي افرح.. حد اخر ف بلاصتك راو قام ينڤز.. أقل من اسبوع وتخرج من الحفرة هاذي.. ولا تكونش تعودت هناا وعملت صحاب "
تبسمت نحكي
انا :" هاني فرحان.. غير مازلت مش مصدق الي عملو ريان حاسس روحي مش مستوعب لحكاية "
عادل :'عندك حق..الي صار مش ساهل "
هزيتلو براسي اي من غير حتى كلمة.. ريتو كيف وقف يحكي
عادل :" انا بش نمشي توو.. نرجعلك يا بعد يا غدوة انا ووقتاه نكمل مع الجماعة "
وقفت بعدو نحكي
انا :" باهي "
عطاني بظهرو وخرج.. ريت العون كيف قرب ناحيتي ورجعت معاه لزنزانة..رجعت تسطحت وبقيت نخمم فلي صار.. للحظة هاذي مش مصدق الي سمعتو من عادل كيفاه ريان عمل هكاكا للحظة تخيلت هي شنوة حست ك شافتو و الخوف الي عاشتو ك ق/تل روحو قدامهاا وهي حبلة هكاكا اكيد راي تاعبة تو غير تمرميدهم من جرتي ف المراكز و الحاكم.. رغم خبر خروجي حسيت روحي مانجمتش نفرح بعد الي عاشوه لكل خاصة هي..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
