حلقة 83
#يحيى_يحكي
هزيت راسي مع المراية و بقيت نغزر لروحي .. طلعت يدي و حطيتها للندبة لي في وجهي .. الندبة لي خلاهالي هو يومها كيف ضربلي راسي في البلار .. الندبة هاذي بش تبقا تذكرني ديما فيه .. وكان بش يبقى نهار واحد في عمري نهايتو بش تكون على يدي انااا .. غسلت وجهي وخرجت لبيتي .. ريت امي كيف قاعدة تستنا فيا .. وقفت قدامي تحكي " يحيى احنا لازم نحكو "
عديت بيديا على شعري نحكي " مفما حتى شي نحكو فيه امي اعمل لي قتلك عليه كهو "
كنت بش نخرج اما وقفت على يداها كيف شدتني من مرفقي تحكي " انت كيفاش تخمم تاخذ الطفلة هاذي من جديد ... نسيت لي صار .. نسيت لي وصلت للموت بسبتها ؟؟"
غزرتلهاا و عليت في صوتي نحكي " اميي يزييي .. قتلك انا نعرف شنعمل .. متخافش منيش بش نخليها على اسمي "
عقدت بحواجبها تحكي " علاه بش تاخذها كان بش تطلقها ؟؟"
نفخت بالقوي نحكي " اميي .. اماان اعمل لي قتلك عليه كهو "
" والله انا خايفة تكون داخل في لعبة اكبر منك يا يحيى .. خايفة عليك ولدي "
بستها من جبينها نحكي " متخافش امي .. انا قدها .. و فما يد قوية ورايا متخافش عليا "
لحظتهاا تبسمت كيف تذكرت سي محمود واتفاقنا ..
#فلاش_باك
بعد ما قضيت اكثر من شهرين نداوي في جروحي .. جروحي لي خلاتني ننقم عليهم اكثر وزادت في كرهي ليهم .. فرد وقت كنت نحاول نلقى شي بش نقهرو بيه .. حل ناخذ بيه حقي .. مشيت ندور قدام الفيلا متاعو .. تعدا لوقت وانا واقف نغزر و نخمم .. فقت من سرحتي على صوت تاليفوني كيف ينوقز .. غزرت مستغرب للرقم لي منعرفوش .. هزيت نحكي " الو "
" الو ايوب معاك"
كبست عالبونية متاعي نحكي " شتحب انت اه .. مزال عندك وجه وتتطلب ؟"
" والله يقولو عدو عدوي صديقي مش هكا سي يحيى .. شرايك باتفاق جديد .. اما لمرة هاذي .. انا وانت بش نستفادو .. غريمنا واحد وهو ليث "
اول ما سمعت اسمو نطقت من غير ما نشعر " باهي ابعثلي العنوان هاني جايك "
لحظتها جاوبتو بلا منخمم دقيقة .. كرهي ليه يخليني نعمل اي شي بش نعفس عليه و ننهي وجودو .. ثواني ووصلني ميساج من عندو .. قريت العنوان وطلعت ف كرهبتي و شديت ثنية للبلاصة لي دلوني عليها .. ثنية كاملة و ان نخمم زعما شنوة يحب مني ..
اول ما وصلت للبيرو .. استقبلتني السكريتار ودخلتني للبيرو .. دورت بعينيا علاهم الزوز .. تلفت لسي محمود يحكي " مرحبا سي يحيى .. تفضل "
قدمت بخطواتي ناحيتهم و قعدت عالكرسي نحكي
" نسمع فيكم "
هزيت راسي مع ايوب كيف هز بحاجبو يحكي " احنا سمعنا بشنوة صار مع ليث و شنوة عمل فيك "
كبست بيديا على ركبتي الي رعشت نحكي " و بعد ؟ شنوة المطلوب؟"
" المطلوب انك تاقف في صفنااا .. و مع بعضنااا نحطو حد لليث و هكاكا تاخذ حقك "
عضيت على شفايفي نحكي " و انا مش بحاجتكم سي محمود .. حقي انجم ناخذو وحدي "
ضحك باستهزاء يحكي " وحدك ؟ في بالك انت بش تقدر على ليث .. والله كيف ما قال ايوب احنا سمع شنوة عمل فيك .. و نظن حتى اثر عملتو مازال باين في وجهك "
حسيت دمي فور من كلامو رسيت على سنيا نحكي " كيفاه بش تساعدوني "
غزرت لسي محمود يحكي " انا مستعد نوفرلك لفرصة بش تنتقم من ليث .. لما لازمك تبعني خطوة بخطوة.. و اول خطوة اني بش نخلي ليث يخسر كل شي يملكو .. بش نحرقلوو كل شي .. و كان انت قدها بش نخليك انت تعمل هذاا .. و هكا تكون رجعت حقك "
نبرة صوتو و غزرة الشر الي ف عينيه خلاتني نتبسم على جنب نحكي " حاضر .. و انا مستعد نتبعكم و مستعد لكل شي المهم نراا ليث متعذب "
كملت حديثي معاهم و مفاهمتناا وخرجت .. خرجت باحساس عكس الي دخلت بيه .. وقت اللعب بداا و المرة هاذي نهاية ليث على يدي انااا ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
