حلقة 74
#قمر_تحكي
حليت عينيا عالضو الي دخل للبيت .. غزرت للوقت لقيت مازال بكري شوي .. كنت بش نرجع نرقد اما ريحة القهوة الي وصلتني و صوت الحس الي سمعتو خلاوني نقوم .. عرفت خالتي فاقت حبيت نهبط نفطر معاها .. هزيت روحي وقمت فيسع خذيت دوش و حضرت روحي .. خرجت من بيتي .. اول ماهبطت من الدروج لمحت ليث .. ماعرفتش شنوة كان يعمل اي الصالة .. قربت شوي لقيتو كان راقد .. بقيت واقفة نغزرلو .. مانجمتش نقدم ماحبيتش نشوف كان هي راقدة معاه.. فكرة انو ممكن رقد معاها في الصالة بش متخافش كيف ما كان يعمل معايا ماعجبتنيش .. اصلا ماعرفتش علاه حسيت بالقلق كيف تفكرت الي صار لبارح و انو فريحة حذانا مازالت .. قدمت بالشوي بش مانفيقهمش .. اول مادخلت لصالة دورت بعينيا ملقيتهاش .. هزيت بحاجبي مستغربة .. يعني مارقدتش هنا ؟ .. مالا ويني .. بقيت هكاكا واقفة تسال و نجاوب في روحي .. فقت من سرحتي على صوت ليث الي فاق يحكي " بونجوور "
قربتلو شوي نحكي " بونجوور .. علاش رقدت هوني ؟؟"
هز بحاجبو وغزرلي يحكي " وين تحبني نرقد ؟؟ الطفلة هوني "
ضيقت عينيا فيه نحكية " وينهااا؟؟ رقدتو هوني مع بعضكم ؟؟"
" لا رقدت في بيتي وانا رقدت هنااا "
بقيت نغزرلو من غير مانجاوبو .. حسيت قلبي خظ بالقوي كيف عرفت الي هي رقدت في بيتو .. خذيت نفس و رجعت نحكي " و .. وعلاش رقدت غادي ؟؟"
هز روحو شوي و قام يحكي " وين تحبها ترقد ؟ شبيك قمر اكيد منيش بش نخليها في الصالة .. غديكا ترتاح اكثر "
" ما نقصدش أما فما بيوت اخرى على هذاكا انا سالت راو "
عدا بيديه على شعرو وغزرلي على جنب يحكي
" شتحب قمر عالصباح ؟؟ اي فما بيوت اخرين اما مش حاضرين و رفيقة كانت راقدة .. وانت تبارك الله هاني شفتك كيفاش استقبلتها"
عوجت شفايفي على كلامو من غير مانجاوبو .. بعدت من قدامو .. هز روحو ومشى لبيت لبانو الي لوطة .. بقيت واقفة في بلاصتي ناكل في روحي وحدي ماتحركتش .. مانعرفش علاه ماعجبنيش الحال هذاا .. علاش حتى ترقد في بيتو اصلا..
عديت بيديا على شعري و خذيت نفس بش نهدي روحي و مشيت للكوجينة .. ريت خالتي تحضر في الطاولة قربتلها بوستها و بقيت نحكيلها في الي صار الكل ..ضربت على صدرها تحكي " يكب سعدو... شنوة هالعملة ؟؟"
حطيت مرفقي عالطاولة و يدي على خدي نحكي" ريت خالتي ريت .. انا تعبت والله كل يوم مشكلة "
" يزي عيش بنتي.. متحط شي في بالك... والطفلة اعذرها حتى هي برشا عليها "
هزيتلها براسي باهي نحكي " بااهي خالتي متخافش مانيش بش نقلقها "
تبسمت كيف مسحتلي على شعري و تحكي " باهي عيش بنتي الغالية "
هزيت راسي على ليث كيف دخل وقعد على الطاولة مقابلني يحكي" صباح الخير رفيقة "
" صباح النور "
" رفيقة ميسالش تصبلي قهوة "
" افطر ساعة "
" لا صبلي قهوة ساعة راسي بش يطرشق "
بقات تحضرلو في قهوتو و تحكي " يمكن مرقدتش مليح "
" ايه منجمتش نرقد "
هزيت بحاجبي نحكي " بالطبيعة ماتنجمش ترقد .. هاك رقدت في الصالة على الفوتاي.. مش باش ترتاح "
بقا يغزرلي يحكي " لا مرتاح انت اتهنى .. شد القهوة على خالتك "
حسيت روحي غزلت عليه كيفاه نبزني هكااا .. اصلا شمدخلني فيه يرقد حتى في الجنينة .. هبطت راسي نفطر ماحبيتش نكمل نغزرلو ..
هزيت عينيا مع خالتي تحكي " ليث قمر حكاتلي لي صار " شفتو كيف طلع فيها وهزلها براسو ايه .. بقيت نغزرلهم كيف يحكيو ..
" تحب نقوم نرا الطفلة .. ولا ناخذلها فطورها للبيت ؟؟"
" لا .. قالت متحبش تفطر "
" علاش ولدي ميجيش هكا بش نقوم ناديلها خلي تفطر "
" متعبش روحك رفيقة .. انا تو طلعت وقلتلها كان تحب ناخذلها فطور ولا تهبط قالت متحبش .. ميسالش خليها على راحتها "
تبسمت باستهزاء نحكي " ايه باين متحبش تقعد معايا على هاذاكا .. حقك قلتلها قمر في بيتها متخافش منيش يش نقلقها"
بقا يغزرلي باهت فياا .. تكلمت خالتي " يزي عيش بنتي .. شكنت نقلك من بكري "
ضربت بيدي على فمي نحكي " باهي باهي هاني سكت منعرفش علاش خايفين عليها هكا منيش بش ناكلها انا "
عوجت شفافي وبقيت نشرب في قهوتي ساكتة .. هزيت راسي كيف ريتها واقفة عند باب الكوجينة تحكي " ليث امان نحب نمشي لامي "
تكلمت خالتي " صباح الخير بنتي...كيفاش تحس في روحك "
بقات تغزرلها ساكتة من غير ما جاوبتها .. غزرتلي خالتي و رجعت غزرتلها تحكي " ايجا تفطر وتو ليث يوصلك ميجيش تبقى هكا "
دورت وجها تغزر لليث تحكي " ليث انا بش نستناك لبرا وسامحني كان قلقتك "
" باهي هاني جاي... نبدل دبشي ونجي استناني في الجنينة متخرجش " هزلتو براسها وخرجت
غزرلنا ليث وحك على جبينو يحكي " ميسالش رفيقة متاخذش عليها "
تبسمتلو خالتي تحكي " نعرف ولدي.. برا وصلها ماتخليهاش تستنى "
تلفت لخالتي نحكي " شفت خالتي شفت كيفاش طفاتك .. اصلا هي مش طايقتني و لا طايقة حد فينااا "
غزرلي ليث حل عينيه فياا يحكي " شعندك فيها انت.. شوصيتك انا "
نفخت بالقاوي و كبست على يدي نحكي " بااهي اما عيب لي عملتو مع خالتي مايجيش "
تلفت لخالتي تحكس " يزي قمر افطر واسكت "
" باهي هاني سكت انااا "
شفتو كيفاش غزرلي و قام من بلاصتو .. عطاني بظهرو و خرج .. حتى خالتي قامت من حذاياا .. بقيت وحدي في بلاصتي نخمم فيها و في حالتها .. حتى انا يمكن ماحقنيش نتغشش منها .. الي عاشتو في البارح برشا عليها .. حسيت بغصة كيف تذكرت الضربات لي على وجها .. انا اكثر وحدة لازم نحس بيها .. قمت من بلاصتي و طلعت لبيتي .. بقيت ندور و نخمم .. مانعرفش كان لي نفكر فيه صحيح ولا لا اما مانيش بش نعديلو لي صار هكاكا .. هزيت تلفوني وكتبت نومروه مانعرفش كان بدلو ولا لا .. اما كان لازمني نجرب ..
شوي وسمعتو ينوقز هز عليا يحكي " الو .. شكون معايا ؟؟" حسيت روحي تقززت من صوتو .. صوتو الي كنت نستنى وقتاه نسمعو .. لقيت روحي تو مانيش حاملتو حتى من بعيد .. خذيت نفس نحكي " قمر معاك .. نحب نشوفك .. عندنا ما نحكو "
" قمر هاذي انتي ؟؟؟"
بقيت ساكتة شوي و رجعت نحكي " ايه نحب نشوفك تو "
" باهي ايجا لدارنا .. نقصد دار لي كنا بش نعرسو فيها وتو نحكو على كل شي "
عقدت بحواجبي و عليت في صوتي شوي نحكي " انت شقاعد تقول .. مانحبش نقابلك غادي ايجا للجنينة متاع الصغار هاني بش نستناك " علقت عليه ومخليتوش يحكي .. مانعرفش منين جايب صحة الرقعة هاذي .. قال دار و كنا بس نعرسو فيها .. حسيت روحي توترت منو قبل مانراه .. للحظة كنت بش نبطل .. نعرف لي عملتو غالط .. اما مانيش بش نتراجع هو لازم يعرف حدودو .. اللي عملو في الطفلة مش باش يتعدى بالساهل ..
طلبت تاكسي ولبست دبشي فيسع .. طليت من البيت شفت خالتي لابسة هي زادة و قدمتلي للبيت .. رجعت رميت الصاك ورا الباب .. قربتلي تحكي " خارجة بنتي ؟؟"
هزيتلها براسي لا نحكي " ل.. لا خالتي جيست حبيت نبدل دبشي "
" باهي بنتي انا بش نخرج نقابل مصطفى ونرجع "
تبسمتلها نحكي " باهي خالتي .. سايس روحك و سلم على عم مصطفى "
تبسمتلي وخرجت استنيتها حتى مشات من حذاياا .. اول ماسمعت صوت الباب الي تسكر ..رجعت هزيت الصاك وهبطت نجري .. خرجت من الباب التلاني بش مايراني حد من الرجاال الي واقفين قدام الدار .. استنيت شوي حتى التاكسي جا .. ركبت وشديت ثنيتي ليه اليوم لازم نسكر الصفحة هاذي جملة .. ثنية كاملة و انا نخمم كيفاه بش نتحمل نرا وجهو و نحكي معاه .. بدني قشعر من الفكرة .. اول ماوصلت وهبطت من التاكسي ريتو كيفاه قاعد يستنى .. بقيت واقفة في بلاصتي نخمم نقدملو و لا نرجع منين جيت .. اما لحظتها جات تصويرت فريحة قدامي و الي عملو فيهاا .. الشي الي خلاني نقدم ناحيتو من غير مانزيد نفكر .. ريتو كيفاه وقف اما مشافني .. قربتلو ووقفت قدامو بقيت نغزرلو ماعرفتش منين نبدا و لا شنوة نقول .. حاسة روحي قدام انسان غريب .. انسان عمري لا عرفتو و لا حبيتو .. تبسملي يحكي " اول ما كلمتني و قلت انك تحب تراني و اما مش مصدق .. شنحوالك قمر "
هزيتو و حطيتو بعينيا نحكي " انا هنا مش بش نحكيلك على احوالي .. جيت بش نقلك كلمتين و نمشي "
حط يديه فوق يدي يحكي " باهي ايجا نقعدو و نحكيو "
نطرت يدي منو نحكي " رد بالك تمسني.. مانحبش نقعد .. انا هنا بش نسالك سوال .. شنوة الي عملتو البارح انت ؟؟ كيفاه تعمل هكاكا في الطفلة "
هز بحاجبو يحكي " كان لازمني نعمل هكاكا .. لازمني نحاسبهم الكل على الي عملوه فيك "
تبسمت على جنب نحكي " انت بش تحاسبهم ؟؟ و الله كان حاسبت روحك خيرر .. انت ماتنقص علاهم شي .. و لا يمكن انت اكثر منهم صدقني .. اسمع يحيى .. انا ماحاجتيش انك تحاسب حد على خاطري .. نحبك تبعدني و تبعد الناس الي دايرين بيا "
دور بعينيه على وجهي يحكي " قمر .. نعرف الي انا غلطت .. نعرف الي كملت علييك ووجعتك .. اما صدقني انا نادم .. اعطيني فرصة نصلح كل شي .. صدقني مازلت نحبك .. مانسيتكش ولا لحظة .. نرقد و نقوم بيك.. تصويرتك لتو قدام عينيا "
بقيت نسمع فيه .. حسيت روحي ماتحركتلي حتى شعرة من كلامو .. بالعكس عفتو .. كان كيف السم في وذنياا .. بلعت ريقي و غزرتلو نحكي " كلامك هذا معادش ينفع .. تعدى وقتو .. صدقتك قبل كيف قلتهولي اما تو مستحيل .. الي عملتو فياا خلاني ننسى كل شي و مانحس بشي ناحيتك "
هزلي براسو لاا يحكي " لا قمر لااا .. انت تحكي هكا من غشك .. من قهرتك مني .. اما انا متاكد انك مازلت تحبني .. شوف مش قلت انت عرست بلاخر بش يحميك .. " قربلي و حط يديه فوق يدي و شدني رجع يحكي " طلقوو و ارجعلي و انا بش نحميك منهم الكل و نعوضك.. وقتها تو تصدقني و تصدق كل كلمة قلتها تو "
فلت يدي منو نحكي " سيبني .. افهم يحيى انا و انت معاااادش .. انا صرت نكرهك و نعيفك .. مستحيل نرجعلك .. معادش في حاجة تجمعنا .. و هاني انبه عليييك ابعد عليااا و على كل حد داير بياا .. ارجع وين كنت .. احسبني مت و معادش فما قمر "
قربلي و حط عينيه فعينيا يحكي " مستحيل كان نرجع و نخليييك .. ماتطلبش مني الشي هذاا قمر .. خاطر انت مسيرك ترجعلي .. و الايام بش تثبتلك هذااا " دورت بعينيا على وجهو و تبسمت على جنب نحكي " صدقني قاعد تحلم .. لازمك تفيق من الاوهام الي راسمها في بالك .. انا الي عندي قلتو .. و انت لازمك تفهمو "
عطيتو بظهري و مشيت من قدامو من غير مانخليه يجاوبني .. حسيت روحي بش نرد من ريحتو و غزرتو .. قربو كان كيف الشوك مانجمتش نحملو.. الكلمتين الي قلتهم خرجتهم بالسيف .. قدمت شوي و هزيت راسي عالكياس بش نوقف تاكسي .. اما وقفت كيف ريتو كان واقف و يغزرلي .. حسيت روحي جمدت في بقعتي و ساقيا يبست .. قلبي رعش من غزرتو الي كانت تقدح بالناار .. بلعت ريقي بالسيف و قدمت شوي بش نمشيلو و نفسرلو كل شي .. رجعت وقفت كيف ريتو خدم الكرهبة و طاار و خلا كان التراب وراه .. بقيت نغزرلو كيفاه بعد من قدامي .. ماعرفتش شنعمل .. حسيت الخوف سيطر عليااا .. تفكيري الكل كان كيفاه بش نروح و نواجهو .. عارفة مش بش تتعدالي بالساهل و بش تصير مشكلة جديدة .. دموعي هبطت من الافكار الي سيطرو علياا و خلاوني نترعب .. هزيت روحي ووقفت تاكسي .. طلعت فيها و شديت ثنية الدار .. كل ماكنت نقرب كل ما بدني يرعش و قلبي يخظ .. في اللحظة هاذي ندمت على الي عملتو .. مش عارفة شنوة يستنى فيااا منو ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
