حلقة 92
#ليث_يحكي
ليلة لبارح كانت أطول ليلة.. مانجمتش حتى نغفى شوي.. كل تفكيري كان ف التاليفون الي وصلني ولخبر الي سمعتو كيما بقيت نخمم شنوة بش نعمل بالضبط خاطر مازلت مانعرفش لحكاية بالتفصيل.. كبست عالفولون اكثر ونزلت عالفيتاس حبيت نوصل فيسع ماعدتش انجم نصبر اكثر.. تلفتت على صوتها بجنبي تحكي
قمر :" خلينا نتعداو لدار خالتي قبل مانروحو"
شديتهاا من يداها غزرتلها شوي ..رجعت غزرت لطريق نحكي
انا :" هذا الي بش يصير يا روحي.. بش نخليك شوي عند رفيقة خاطر عندي خدمة "
دارتلي بكلها وغزرتلي مستغربة تحكي
قمر :" خدمة شنوة ليث؟؟ مش ناوي تحكيلي شنوة صاير ؟"
عديت بيديا على وجهي ونفخت نحكي
انا :" يا روحي قتلك مبعد نحكيلك كل شي.. باهي؟"
قمر :"و بش تتأخر ف الخدمة ؟"
انا :" صدقني مانعرفش.. اما بش نحاول مانتاخرش و نرجعلك فيسع "
قمر :" باهي "
نزلت عالفيتاس أكثر وبقيت نسوق.. ساعتين من زمان ووصلنا.. راكيت الكرهبة قدام الفيلا نحكي
انا :" خلينا ننزلو "
نزلنا مع بعضناا.. نزلت الفاليزات الكل وقربنا ناحية الفيلا.. اول ما قدمنا شوي ..ريت لباب كيف تفتح... تبسمت اول ما ريت عمي خرج يستقبلنا يحكي
مصطفى:" ياا مرحباا.. والله كيف ريت الكرهبة ماصدقتش .. أيا تفضلوا "
انا "عيشك عمي"
غزرت لقمر كيف قربت زباستو من رايو تحكي
قمر "اهلا عمي.. توحشتك برشا "
عدت بيدو على شعرها يحكي
مصطفى :"عيش بنتي واحنا توحشناك .. هيا فوتو "
دخلنا معاه.. قدمنا ناحية بيت لفطور وين كانت رفيقة قاعدة.. شفتها كيف وقفت وحلت عيناها ...قربت لقمر باستها وين هي عنقتها بلوقت... غزرتلي تحكي
رفيقة :" مرحبا بيكم "
قمر :" عيشك خالتي "
رفيقة "شحالك بنتي... لباس "
قمر :"لباس خالتي عيشك " تبسمت وانا نغزرلها كيفاش فرحانة بيها.. حطيت الفاليز على جنب وقعدنا معاهم عالطاولة.. هزيت راسي على صوت عم مصطفى يحكي
مصطفى :" ليث شبيكم روحتو من تو ؟ مش قتلي بش تزيدو اسبوع اخر ؟"
انا :" الله غالب جاتني شوي خدمة.. على هذاكا "
رفيقة :" احسن حاجة انك روحتو.. خليتو بلاصة .. خاصة قمر خلات بقعتهاا علياا توحشتهاا "
غزرتلها كيف ضحكت وشدتها من يداها تحكي
قمر :" حتى انا خالتي توحشتك برشة.. و اصلا كان لازم نرجعو نحب نكون معاك قبل ما تولد "
انا :" بنتك بش تبقى حذاك اليوم شوي مالا طيرو وحشة.. انا عندي خدمة و مانحبش قمر تبقى وحدها "
مصطفى:" خدمة شنوة ؟؟"
حكيت على جبيني وغزرتلو نحكي
انا :" فما قضية مهمة لازمني نطلع عليها "
دورت بعينيا على قمر الي غزرتلي كأنها مش مصدقتني .. قمت من بلاصتي فيسع وغزرتلهم نحكي
انا :" نخليكم تو "
مصطفى:" افطر ساعة.. و بعد امشي تو نخرجو مع بعضنا "
انا :" لا عمي فطرت قبل مانجي.. و لازمني نمشي تو بش نرجع بكري "
مصطفى:" على راحتك ولدي "
غزرت لقمر نحكي
انا :" قمر ميسالش تجي شوي "
هزتلي براسها باهي و قامت معاياا.. خرجنا مع بعضناا قدام الباب ووقفنا.. دورت بعينيا عليها حطيت يدي على خدهاا نحكي
انا :" مانبطاش عليك حبي.. نكمل الي عندي ونرجعلك فيسع باهي "
تبسمتلي تحكي
قمر:" باهي نستناك.. ورد بالك على روحك "
بستها من جبينها وبعدت علاهاا نحكي
انا :" تهنى ياروحي.. و انت ماتخرج لحتى بلاصة.. و كان فما حاجة كلمني تفاهمناا "
هزتلي براسها باهي من غير حتى كلمة.. اشرتلها بعينيا نحكي
انا :" اياا ادخل تو برد عليك "
قمر :" باهي "
اول ما دخلت وسكرت الباب وراهاا قدمت ناحية الكرهبة وطلعت شديت الثنية.. طريق كامل وانا نخمم ف شنوة انجم نسمع.. حسيت روحي تضغطت من الموضوع الي طَول و لغاية تو ما وصلت لحتى معلومة تنجم تفيدني.. شوي وقت ووصلت للعنوان الي وصلني ف ميساج.. هزيت راسي نغزر للقهوة الي وقفت قدامهاا.. راكيت الكرهبة ونزلت.. قدمت بخطواتي و دخلت.. ريتو كيف كان قاعد على طاولة مطرفة وحدو.. قربتلو جبدت الكرسي وقعدت قدامو وين هو هز راسو معايا و تبسملي يحكي
مازن :" يا مرحبا بالعريس "
تكيت بظهري لتالي وتبسمت على جنب نحكي
انا :" و بيك سي مازن "
مازن :" مبروك ماعملت.. الله غالب مانجمتش نحضر.. و نباركلك وقتها "
انا :" يبارك فيك.. ميسالش "
تبسم على جنب و هز بحاجبو يحكي
مازن :" مالا عملت الي ف راسك عرست.. مانجمتش تصبر شوي"
عديت بيديا على وجهي وتنهدت نحكي
انا :"صدقني ماكنتش بش نرجع لحياتها قبل ما يوفى لموضوع هذا و انت تعرف.. اما لي صار معاها اخر فترة خلاني نتراجع عالفكرة.. حالتها و هي ملوحة هكاك وقريبة للموت خلاني نحط كل شي على جنب.. لحظتها مانجمت نخمم ف شي كان اني نخليها قدامي و بين عينيا.. انا في الوقت لي فكرت اني نحميها من المافيا هاذي خليتها تواجه وحدها خالي وولدو.. حبيت نحميها من اعدائي ونسيت الي هي زادة عندها اعداءها وهي ماتنجمش تواجهم وحدها.. على هذاكا قررت اني مستحيل نخليها مرة اخرى وبش نحميها منهم لكل "
مازن :" عندك حق.. اما هكا بش يصير عليك ضغط ياسر هاني قتلك من تو "
انا :" نعرف و انا مستعد لكل شي "
مازن :" باهي قلي انت شحالك مليح ؟"
انا :" لحقيقة كنت مليح اما بعد اتصالك لا "
مازن :" سامحني خليتك تقص على شهر لعسل متاعك.. اما الي كيف ما قتلك ف التاليفون لحكاية ماتتاجلش "
انا :" ميسالش.. نسمع فيك "
مازن :" ف اخر تحقيق صار.. توصلت انو احتمال كبير اختك موجوده ف اسبانيا "
عقدت بحواجبي مستغرب نحكي
انا :" اسبانياا ؟؟ شنوة تعمل غادي ؟ "
مازن :" صدقني مانعرفش.. مانجمت نوصل لحتى معلومة اخرى.. كل الي نعرفو انها تنجم تكون ف مدينة فالنسياا "
انا :" الي مش قادر نفهمو كيفاه تكون سافرت ؟"
مازن :" الاجابة هاذي اكيد عند خالك.. اما مالازمناش نخليوه يعرف انو وصلنا لشي.. لازم لحكاية تبقى سرية ليث "
هزيتلو براسي باهي نحكي
انا :" باهي و شنوة بش نعمل تو ؟"
مازن :" لازمك تسافر لفالنسياا و تشوف ديار الايتام الي غادي .. نظن فما ثلاثة ابحث فيهم و بما انك من عايلتها نتصور يسمحولك تقابلها "
انا :" ووقتاه لازمني نسافر ؟"
ريتو كيف حط ملف قدامي وغزرلي يحكي
مازن :" الملف هذا فيه فيه تاريخ السفرة.. و عناوين ديار الايتام و اي معلومة تنجم تفيدك زادة "
خذيت الملف وحليتو عديت بعينيا عالورقة الأولى وهزيت راسي مع مازن غزرتلو مستغرب نحكي
انا :" السفرة بعد نهارين؟؟"
مازن :" اي .. و ماتنجمش تأجل ليث خاطر .. لحكاية مهمة ياسر كيما منها هي بش نوصلو لحكايات اخرى و انت تعرف هذا "
انا :" فهمت عليك.. باهي "
مازن :" و خوذ معاك صورة لاختك كان عندك اي حاجة تنجم تفيدك "
انا :" اي عندي.. تهنى "
مازن :" فما خبر اخر لازمك تعرفو "
انا :" شنوة هو ؟"
مازن :" من خلال حساب زكريا عرفنا انو ايهم موجود في اسبانيا زادة "
حليت عينيا على وسعهم نحكي
انا :" شنوة ؟؟ انت متأكد؟"
مازن:" والله متأكد.. على هذا نحبك تاخذ حذرك ليث.. خاطر جسب خبرتي نحب نقلك انو لحكاية مش صدفة "
انا :" اكييد مش صدفة.. على هذا مازن لازمني نعرف شنوة صاير بالضبط "
مازن :" شوي صبر و تو نعرفو كل شي.. غير نحبك تبع تعليماتي رد بالك تعمل حاجة من راسك ليث.. و كان صارت اي حاجة كلمني "
انا :" باهي.. نخليك تو لازمني نمشي "
مازن :" باهي و خلينا على اتصال "
انا :" اكيد "
هزيت الملف قمت من بلاصتي وخرجت.. طلعت ف الكرهبة ورجعت حليت الملف بقيت نقرا فيه و نقرا ف العناوين الي قدامي.. للحظة هاذي مش فاهم شنوة الي صاير بالضبط كل الي نعرفو انو خالي وراه سر كبير وممكن الحل متاعو موجود ف واحد من العناوين هاذي.. على هذاكا ملازمنيش نضيع وقت كيما لازمني نلقى اختى ف اسرع وقت خاطر وقتها وين بش نرتاح..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
