#قمر_تحكي
ريتو كيف عطاني بظهرو وخرج من غير لا يجاوبني..حسيت روحي جمدت ف بلاصتي من وراء تصرفوو غير دموعي الي ملاو عيني..مانعرفش قداه بش نبقى نجري وراه انا بش يسامحني انا تعبت و هو ماحبش يفهم.. كبست على كرم وخرجت لجنينة وين ريت خالتي قاعدة..اشرتلي بعيناها تحكي
رفيقة :" قمر اقعد "
هزيتلهاا براسي باهي من غير حتى كلمة.. حطيت كرم ف البوسات متاعو و قعدت بجنبهاا..غزرتلها نحكي
انا :" حكيت معاه خالتي ؟؟ قتلو شنوة قتلك ؟؟"
رفيقة :" حكيت اما ماحبش يسمعني..الراجل مغشش عليك برشة "
نفخت بالقوي نحكي
انا :" علاش الغش هذا الكل خالتي..راني نعرف اني غلطت اما شوف اكثر من اسبوعين و هو مارضاش..راني فديت.. وزيد كمل تو ماجاوبنيش ظاهرلي عرف انا شكيتلك و بعثتك ليه..جيت نكلم فيه طفاني جملا "
هزت بحاجبها تحكي
رفيقة :" بصراحة قمر انت تستاهل..ليث عندو لحق "
حليت عينيا على وسعهم نحكي
انا :" بالله خالتي ؟"
رفيقة :" والله.. ياخي انت صحيح خبيت عليه حكاية ايهم ك ريتو ؟؟"
عضيت على شفايفي مترددة نحكي
انا :" اي.. خاطر انا وقتها.... "
قصت عليا تحكي
رفيقة :" ماتبررليش..خاطرني مانيش بش نسمعك..ياخي فهمني انت وقتاه بش تعمل عقل ك ناس وتفهم..شوف عمايلك وين وصلوك..هاك بش تخسر راجلك..خليتو يفد منك..كل مرة و انت مخبية عليه حكاية..شنوة وصاك قبل من بعد حكاية يحيى ؟؟ اما انت للا تسمع منا تخرج منا "
انا :" خالتي راني وقتهاا حسبت اني نتخيل والله "
رفيقة :" شوف كيفاه مازالت تقلي نتخيل؟ ابقى هكاا حتى يبعثلك ورقتك لهناا و بعد ابقى تخيل مليح مالا "
حسيت قلبي ضرب بقوة على كلمتهاا..لحظتهاا حسيت اطرافي بردت من الخوف و النفس ضاع علياا..بلعت ريقي نحكي
انا :" خالتي فاش تحكي انت ورقة شنوة؟ صلي عالنبي ليث مايعملش هكاا "
رفيقة :" والله كان بش تبقى بالمخ هذاا..مانلوموش كان يعملها ولد الناس "
فركت يديا في بعضهم وعضيت على شفايفي نحكي
انا :" باهي شنوة نعمل ؟ هاني طلبت السماح "
رفيقة :" اخطانا من السماح الشايح..نهار كامل و انت يا تنوح يا قالبة وجهك..غير حالتك شوف وجهك كيفاه اصفر "
انا :" تو شمدخل هذا ف هذاا "
رفيقة :" وراس بنتي كل شي داخل ف بعضو..قلي تراه من وقت عرسكم وقتاه خرجت مع راجلك ؟؟ وقتاه قعدتو مع بعضكم كالناس ؟"
استندت بيديا عالطاولة وحطيت يدي على خدي نحكي
انا :" بالله خالتي هاك تشوف..من بعد شهر لعسل جات حكاية اختو و السفر.. روح قلت بش نتهنى طلعت حكاية ايهم..و بعدهاا حكاية كذبتي..قلي وقتاه بش نخرج معاه و لا نبقاو ك الناس..اصلا مليح مازلنا فرد دار..مش عارفة وقتاه بش نتهنى كالبنات "
رفيقة :" الناس لكل عندهم ظروف و مشاكل..اما يلقاو وقت لرواحهمم..قمر شوف حتى لبسك..سروال و مريول صوف..حاول انك تلبس حاجات ف عمرك..روب مثال.. ماكيج شوي علاش وجهك هكاا ديما اصفر "
عوجت شفايفي نحكي
انا :" بالله خالتي ايجا طل علينا الصباح..راني نبدأ نجري كالمهبولة بش نحضر روحي نخاف لا يخليني و لا يكش علياا و يزيد يتغشش..راني بلحق عايشة ف ضغط..غير ساكتة و متحملة "
رفيقة :" نعرف..و حاسة بيك..اما لازمك تبدل نمط حياتك "
انا :" قلي كيفاه خالتي و انا تو نعمل "
رفيقة :" باهي مالا اسمعني و حل وذنيك..الراجل يحب لمرا الي تريحو و تحسسو لي هي انثى.. اعمل ليلة رومانسية تو هو وحدو يلين "
عضيت على شفايفي نحكي
انا :" يعني هذا هو الحل حسب رايك ؟"
رفيقة :" والله هذاا بالنسبة ليك حل..بالنسبة لغيرك حاجة عادية و تصير كل ليلة بين زوز معرسين..اما انت مطلعة ف كل شي "
تبسمت نحكي
انا :" باهي خالتي شبيك على عصابك ياخي "
رفيقة :" والله تو وين حسيت بيه ليث..يعاني الراجل "
انا :" زيد أنت كبرلو راسو..هو مضروب ف روحو خلقة "
رفيقة :" باهي اياا قوم..معادش وقت..خليناا نكلمو ايمن يوصلنا بش نقضيو كل حاجة ناقصتك "
انا :" تو ؟؟"
قحرتلي تحكي
رفيقة :" مالا غدوة..فاش نحكي عندي ساعة..تي قوم تحرك "
انا :" و كرم ؟؟"
رفيقة :" تو نخليه حذا فاطمة "
انا :" باهي مالا "
قمت من بلاصتي و دخلت لصالة هزيت ساكي و جيلي متاعي و خرجت وين ريت خالتي دخلت كرم عطاتو لخالتي فاطمة وقدمتلي تحكي
رفيقة :" حاضرة ؟"
انا :" اي هيااا "
هزتلي براسها باهي من غير حتى كلمة..هزت ساكهاا وخرجنا مع بعضناا..طلعنا ف الكرهبة مع ايمن وشدينا ثنية السوق..طريق كامل و انا نخمم شنوة بش نحضرلوو كيما بقيت نتخيل ف ردة الفعل متاعو وين حسيت روحي خفت و تربثت اما فرد وقت فرحت خاطر ممكن من اليلة هاذي حياتناا بش تتصلح و ترجع خير من قبل..فقت من سرحتي على الكرهبة كيف وقفت وصوت خالتي تحكي
رفيقة :" عيش ولدي ايمن..انت برا تو واحنا تو ناخذو تاكسي بعد "
ايمن :" باهي "
رفيقة :" اياا انزل انت "
عوجت شفايفي ونزلت مانيش عارفة علاش حاسة خالتي من حاملتني هي زادة.. نزلت وغزرتلهاا نحكي
انا :" تو شنوة بش نعملو ؟؟"
رفيقة :" اول حاجة بش تقضي شنوة ناقصك للعشاء..ساعة خممت شنوة بش تطيب ؟ هو شنوة يحب ؟"
انا :" حسب مانعرف يحب اللازانياا..مرة انا عملتهاا و هو كلاهاا و عجبتو "
رفيقة :" صار حسب ماتعرف ؟ يعني مش متأكدة ؟ "
حطيت قصتي وراء وذنياا نحكي
انا :" لا متأكدة.. يعني انا من وقت الي عرست من انواع المقرونة ماخرجتش..هذا الي نعرفو"
ريتها كيف غزرتلي مصدومة تحكي
رفيقة :" باهي قمر..اعمل لازانيا ميسالش..اصلا الفايدة ف الي بعد الماكلة "
انا :" الي هو؟"
رفيقة :" الروبة..بش نشريوو روبة "
انا :" لا خالتي..لحق انا عندي روبة شاهية نلبسها..شراهالي ليث وبقات معلقة هكاكا..نحبو يراني بيهاا "
ضحكت تحكي
رفيقة:" و اخيرااا قلت حاجة تصلح "
شدتني من مرفقي تحكي
رفيقة :" مالا نشريو قضية لعشاء..و الشموع عندكم ؟"
انا :" فكرتني..لازمناا شموع بلحق..الضو ف الفيلا يقص برشة..لازمني ناخذ بزايد "
رفيقة :" قمر هذاا شمع سبيسيال..متاع الضو خوذو نهار آخر "
انا :" صاااار "
رفيقة :" اي صااار.. و ناخذو ورد زادة زين بيه الطاولة "
انا :" باهي ناخذو "
بقيناا ندورو ف المحلات.. قضيناا كل شي كان ناقصني..حسيت روحي تفرهدت اصلا من المشوار هذاا مع خالتي الي حسيتهاا شوي و بش تخنقني من الغزول اما انا حسيت روحي شخت علاهاا يعني تتصرف معاياا كاني امي بالضبط و خايفة علياا..كملناا كل شي وخرجناا..وين لقينا عمي لبرا يستنى فيناا..كلم خالتي و ماحبناش ناخذو تاكسي..طلعنا معاه و غزرلناا يحكي
مصطفى:" كملتو قضايتكم ؟"
رفيقة :" اي.. مصطفى بش نوصلو قمر للفيلا قبل "
مصطفى:" اي اكييد "
انا :" عيشك عمي..ربي يخليك ليا "
مصطفى:" ماعملت شي بنتي "
خدم الكرهبة وشدينا الثنية للفيلا..حسيت قلبي شوي و يخرج من بلاصتو و كرشي دغدغتني من الفرحة..للحظة نسيت الخوف و بقيت نخمم كان ف وجه ليث ك يراني انا شنوة محضرة..مسافة الطريق ووصلنا..غزرت لعمي و خالتي نحكي
انا :" عيشك عمي و سامحني ف تعبك..خالتي تو نكلمك"
رفيقة :" باهي بنتي.. اياا براا "
انا :" باهي باي '
هزيت الاكياس ونزلت..دخلت للفيلا فيسع رميت ساكي ودخلت فيسع للكوجينة حطيت القضية ورجعت لتوالات غسلت يدي ووجهي ورجعت للكوجينة..بقيت نحضر ف العشاء فيسع بش مايغلبنيش الوقت..حطيت اللازانياا ف الفرن وتلفتت لطاولة..ودخلت لصالة شعلت الشوميني بش تضوي عليناا وبعدت الطاولة الي كانت ف الوسط..فرشت عالارض مقاللهاا و دورت الوردات لحمر و الشمع.. كيما حبيت نتعشاو ف الصالة زادة..قربت لطاولة الي كانت قريب الشباك..فرشت ناب ابيض و نظمت الاصحنة و الكاسات..حطيت شمعتين ف الوسط.. تبسمت وانا نشوف فيهاا كيفاه طلعت مزيانة اكثر من الي تخيلتهااا..قربت ناحية الطاولة حطيت البيسي و حضرت الموسيقي بش طول نخدمهاا بعد مانبقاش نلوج..و رجعت للكوجينة بش نشوف لازانيا الي ريحتهاا فاحت..طفيت علاهاا و خليتهاا ف الفرن بش تبقى سخونة و رجعت لرخامة قصيت سلاطة و حضرت نوع الشربة الي يحبهاا ليث زادة..مانعرفش قداه تعدا عليا وقت و انا ف الكوجينة..اول ماكملت كل شي..طلعت نجري للبيت..نحيت حوايجي الكل ودخلت لسال دوبان..عملت دوش..اول ما كملت خرجت لبست الكاب دوبان ورجعت للبيت قربت ناحية الدريسينغ و جبدت الروبة..حطيتهاا عالفرش و عديت بيدياا علاهاا وين تخيلت روحي و انا لابستهاا و عينين ليث تدور علياا بنفس الغزرة الي تدخلني بعضي..قربت ناحية لكوافوز وبقيت انشف ف شعراتي اول ما كملت خليتو مفرود ماحبيتش نلمو لفوق.. وحليت الدرج جبدت المكياج وبقيت نمكيج..عملت مكياج خفيف ف عينياا و روج احمر ف شفايفي..حليت عينيا على وسعهم اول ماشفت روحي كيفاه طلعت..هاذي اول مرة نشوف روحي هكاا من بعد ليلة عرسي..للحظة حسيت كلام خالتي صحيح كيفاه انا مسلمة ف روحي لدرجة هاذي..تنهدت بالقوي وقمت نحيت الكاب دوبان وهزيت الروبة لبستهاا..اول ماكملت رجعت قدام لمراايياا..عديت بعينيا على كل قطعة من بدني وين تبسمت وحدي وانا نشوف ف روحي كيفاه طلعت ف الروبة الي كانت ف الأحمر.. قصيرة فوق الركبة و مسنترة على بدني..غير فتحة الي كانت وين صدري وخلاتو يظهر شوي.. مديت يدي وحاولت نسكر السلسلة الي كانت من تالي.. اول ماكملت هزيت يدي وحطيتهاا فوق كرشي..خذيت نفس طويييل حاولت نهدي بيه روحي شوي و نضبط دقات قلبي الي عمال تقوااا..قربت ناحية لكوافوز و خذيت الاسوارة الي هدهالي ف عيد ميلادي وقتها و لبستها..كل شي منو بقيت مستحفظة علييه لغاية تو..كملت لبست الطالون الي كان ف النوار ورجعت رشيت نوع العطر الي يحبو هو زادة وخرجت من البيت..نزلت تحت ورجعت للكوجينة..سخنت لعشاء و هزيتو لصالة حضرت الطاولة..هزيت راسي مع الساعة وين دقات قلبي قوات اكثر كيف ريت هذاا وقت رجوعوو..لحظتهاا طفيت الاضواء و خليت كان ضوء الشوميني..و خدمت الموسيقى الي كانت هادئة و رومانسية..رجعت قعدت عالفوتاي وبقيت نستنى فيه و انا يدي على قلبي..بقيت نغزر للباب و انا نتمناه يتحل تو و نشوفو قدامي..حاسة روحي معادش انجم نصبر بش نعرف رايو ف هذاا لكل..اصلا ليلة لازم كل شي يتصلح لازمني نخليه يسامحني خاطر بلحق معادش انجم نعيش بعيدة عليهه و هو قريب مني هكاا..هزيت راسي مرة اخرى مع الساعة وين ريت تعدا نصف الليل وهو مارجعش..قمت من بلاصتي وهزيت التاليفون حطيت رقمو وطلبتو..رسيت على سنيا كيف سمعتو علق علياا..حاولت نهدي روحي و مانركزش ميسالش عارفتو متغشش..رجعت طلبتو مرة و اثنين حتي هز علياا.. تبسمت نحكي
انا :" ليث "
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
