#ليس_ذنبي ❤️‍🔥

حلقة 132

#قمر_تحكي
ايامات عديتهم من بعد آخر مرة زرتو فيهاا ورفض يقابلني.. حتى عمي كيف مشى بش يشوف شفما رفض يقابلو..كان مش المحامي طمنا على صحتو راني ماعرفت شي عليه.. ايامات عديتهم وانا نخمم علاش يتصرف هكاا.. حاسة روحي توحشتو عاللخر ونحب نراه..كيفاه هنت عليه هكا مش عارفة ماسالش حتى علياا غير اني بقيت نفكر فيه زعمة المحامي قال الحق ولا يمكن ليث تاعب وبيه حاجة.. حطيت يدي على كرشي وبقيت سارحة كل مرة ف حاجة حسيت روحي بلحق تعبت ومعادش عندي قوة.. بقيت نغزر لخالتي وعمي كيفاه يحكيو وانا مش مركزة معاهم.. هكاكا وسمعت صوت الباب كيف نوقز.. ريت عمي كيف غزر لمنڤالتو ووقف يحكي
مصطفى:" شكون الي جاي الوقت "
وقفت خالتي معاه تحكي
رفيقة :" انشالله خير "
مصطفى:" خليني نشوف شكون ونرجع "
ريتهم كيف خرجو مع بعضهم وانا مازلت ف بلاصتي سارحة.. عقدت بحواجبي مستغربة صوت خالتي تحكي
رفيقة :" انت.. انت شتعمل هناا وشمجيبك؟"
مصطفى:' امشي من هناا خير مانطلبلك الحاكم "
لحظتها وقفت من بلاصتي حبيت نشوف شكون وشنوة صاير.. جمدت ف بلاصتي اول وصلت ناحية الباب وريتو مقابلني.. كبست بيديا على روبتي وبقيت نغزرو وبدني يرعش بكلو..للحظة حسيت روحي نحلم ولا نتخيل فيه.. عينيه الي كانت تغزرلي خلاتني ف لحظة وحدة نسترجع كل شي صار ونحس بنفس الخوف متاع قبل.. وخرت بخطواتي لتالي وشديت ف الكرسي بش مانطيحش اول مانطق ب اسمي يحكي
ريان :" قمر... "
قصيت عليه نحكي
انا :" ا..انت.. انت شتعمل هناا.. شنوة مازلت تحب مني "
ريان :" قمر لازمني نحكي معاك...  "
قص عليه عمي كيف دزو يحكي
مصطفى:" ماعندك ماتحكي معاهااا امشيييي خيير مانطلب الحااااكم "
ريان :" لا مانيش ماشي قبل ماتسمعوني "
سكرت وذنياا اول ماصاح باسمي يحكي
ريان :" قمرررر امااان اسمعننني ونوعدك معااادش بش تراني طول عمممرررك "
هبطت يدي وصحت نحكي
اانا :" مانحبش نسمممعك امشيييي ابعدننني انتت شمرجععععك ابعدنننيي"
ريان :" قمر انا عندي براءة ليث "
قلبي ضرب بقوة اول ماسمعت كلامو..حليت عينيا فيه وقدمت خطوات معدودة نحكي
انا :" ش..شنوة؟ ب..براءة ليث ؟"
ريان :" اي اي صدقني اسمعني للاخر وماكش بش تندم "
ريت عمي كيف منعو يتعدا يحكي
مصطفى :" اقلللب وجههك من هنااا ويزي بلا كذب "
ريان :" ورحمة امي لاني نكذب.. انا عندي ايامات وانا نتبع فيك بش عرفت عنوانك.. و هاني جيت بش نحكي كل شي "
رجع غزرلي يحكي
ريان :" قمر نعرفك خايفة مني اما انا ماجيتش بش نضرك بالعكس... "
قصيت عليه نحكي
انا :" عمي خليه يدخل "
ريت خالتي كيف غزرتلي تحكي
رفيقة :" قمر فاش تحكي ياخي مصدقتو؟"
حطيت يدي على كرشي الي شدت شوي وهزيتلها براسي لا نحكي
انا :" لاا اما نحب نسمعو "
ريت عمي كيف حل الباب وشدو من مرفقو يحكي
مصطفى:" ادخل ومن جنبي ماتتحركش رد بالك تخمم تقربلها "
وخرت بخطواتي لتالي اول مادخلو.. دقات قلبي عمال تقول مع كل خطوة ليه.. غير عينيه الي بقات مركزة معاياا للحظة حسيت روحي ندمت اما حبيت نعرف ممكن بلحق يكون كلامو صحيح وليت نلوج ف اي امل من عند أي عبد.. ريتهم كيف دخلو للمكتب وانا دخلت وراهم.. قعدت بجنب عمي الي غزرلو يحكي
مصطفى:" احكي الي عندك ماكش جاي تتضيف.. اولا انت كيفاه خرجت مش محكوم عليك 8 سنين "
شهقت بالقوي كيف سمعتو قال
ريان :" هربت "
مصطفى:' هارب وجاي لعندي ماكش خايف نخبر عليك ؟"
هزلو بكتافو وعدا بعينيه علينا يحكي
ريان :" معادش يهم خليني ساعة نبرر ذمتي وبعد اعمل الي تحب مانيش خايف "
مصطفى:" انطق انت منين سمعت بحكاية ليث ؟ وشنوة الدليل الي عندك ؟"
ريتو كيف جبد تاليفونو وحطو عالطاولة قدامو وهز راسو معاياا غزرلي درا كيفاه يحكي
ريان :" ليث بريئ مقتلش فريحة وايوب "
كبست على ركبتي وتقويت على روحي نحكي
انا :" ف بالنا.. شنوة الجديد ف هذا؟"
ريان :" الجديد انكم بش تعرفو القا/تل الحقيقي.. الي هو انا "
شهقت بالقوي اول ماسمعت جملتو..حطيت يدي على فمي وبقيت نغزرلو من غير حتى كلمة.. شفت عمي كيف وقفت يحكي
مصطفى:" شنوة ؟ انت..انت الي قت/لتهم ؟"
هز راسو وغزرلوو بكل برود يحكي
ريان:' اي.. انا هربت على اساس بش نقتل أيوب الي رماني ف الحبس وخلا امي تموت.. "
تبسم درا كيفاه ورجع يحكي
ريان :" ياخي خرجت لقيت خطيبتي حبلة منو.. وتحب ليث من فوق "
دمعتي نزلت مني وانا نسمع فيه مصدومة مش مصدقة هذا لكل.. مانعرفش كيفاه تنطرت من بلاصتي نحكي
انا :" واحنااااا شدخلننناااا فيييك.. من جرتتتتك راجلي بين 4 حيييوط محكوووم علييييه 25 سنة حبس... علاااش هكااا دمرتتتتني اناا قببببل و جاااي توووو تدمر ف رااجلي.. شعملننناااالك احنااا علاااش "
وقف من بلاصتو وغزرلي يحكي
ريان:" ياريت الوقت يرجع بياا راني ماعملت شي من هذاا.. قمر اناا نادم.. ياريتني متت قبل مانعرضك.. الليلة هاكي بقات كيف لحبل الي ملفوف على رقبتي..من بعدها هي انا خسرت كل شي.. روحي وامي وخطيبتي.. غير تانيب الضمير الي بقى ساكن فيااا.. عمري لا بش نسامح روحي خاطرني ضريتتتك.... "
قصيت عليه نحكي
انا ؛" اسكت اسكت.. اسكت مانحبش نسمعك.. مانحبش نسمع صوووتك "
ريان :" بش نسكت.. اما قبلها جبتلك هذاا "
ريتو كيف هز التاليفون وعطاه لعمي يحكي
ريان :" هناا تلقى اعتراف مني بكل شي انا عملتو.. فيديو حكيت فيه كل شي الي عملتو فيك قمر.. و هروبي من الحبس.. وقت/لي للايوب وفريحة..و جرائم اخرى انا عملتها.. هناا برائتكم لكل "
ريت عمي كيف خذاه من يديه وحل الفيديو وين سمعت شوي من كلامو..رجعت غزرتلو كيف قرب مني شوي وقف قدامي عدا بعينيه عليا وغزرلي درا كيفاه.. شهقت بالقوي اول ماريتو جبد السلاح من وراء ظهرو وحطو فوق قلبو يحكي
هو :" سامحني..رغم انو الكلمة هاذي قليلة عالشي الي خليتكم تعيشوه..اما كل الي طالبو منك انك تسامحني قمر على كل شي.. ياريت الوقت يرجع بيناا.. صدقني كنت بش نصلح كل شي صار.. وتو جاء لوقت الي بش نخلص فيه.. ونخليكم تتخلصو من اخر كابوس بقى ف حياتكم.. موتي هو الحل الوحيد الي بش يمحى هذا لكل.. موتي بش يخليك ترتاح وتتجمع مع راجلك مرة اخرى..قول لليث يسامحني وانت زادة ياريت سامحني "
تهزيت وتحطيت على صوت السلاح الي ضرب.. دمعتي هبطت وانا نشوف فيه كيفاه طاح قدامي ودمو سايل تحتو.. غمضت عينيا بالقوي و رجعت حليتهم على يد عمي الي سندتني من تالي وخلاتني مانفقدش توازني ف اللحظة هاذي..