الحلقة الثانية عشر
#ليــث يحكي
وصلت لتونس بعد غياب سنين .. ماحبيتش نروح و نرجع للبلاد الي سرقت منى كل حاجة باهية .. خطفت اكثر ناس حبينهم في حياتي و خلاتني وحدي .. خرجت مالمطار نلقى الشوفور يستنى فيا. جبدت نفس بالقوي و مشيتلو طلعت فالكرهبة.. هزيت راسي على صوتو غزلي من المراية يحكي
" الحمد الله على سلامتك سي ليث "
تبسمتلو " عيشك طاهر""
" ماشين للفيلا مش هكا ؟؟"
سكت مالقيتش شنية نجاوبو حسيت صوتي هرب مانجمتش نحكي يا دوب هزيتلو براسي أي
تكيت عالشباك غمضت عينيا .. تفكرت البلاد الي مشيلها و الفيلا الي راجعلها .. الفيلا الي دخلتلها و انا طفل صغير .. طفل تيتم على صغر سنو .. جبرتو الدنيا انو يعيش تحت رحمة عباد اخرين .. بقيت نخمم و مانعرفش كيفاه رقدت ماحسيتش بالثنية الي تعدات فيسع كاني عاملة عليا بلعاني تحبني نوصل لجهنم متاعي
حليت عينيا مع الكرهبة الي عملت فران ووقفت، طلعت راسي على صوت عم طاهر يتكلم
سي ليث هانا وصلنا""
خذيت نفس بالقوي .. تغلبت على ضعفي و هبطت.. بقيت واقف نغزر للفيلا .. الفيلا الي شهدت على طفولتي الحزينة على دموعي و قهرتي .. رجعتي هاذي بش تفتحلي جروح بقيت سنين نحاول نداوي فيها، بش تفكرني في سنين حاولت ننساهم .. رجعتلها بعد هروب دام 10 سنين. رجعتلها ولعنة الماضي بش ترجع معاها.
عديت يدي على شعري و قدمت بخطوات رزينة للباب الي تحل .. قدمتلي تضحك و يداها محلولين بش تعنقني
" مرحبا .. مرحبا بليث الغالي.. نورت الفيلا "
تبسمتلها و عنقتها نحكي
" عيشك مرت خالي .. منورة بيك "
بعدت عليا و غزرتلي تتبسم وتحكي
" هيا ادخل .. راك تاعب مالسفر "
قدمت بخطواتي معاها بسيف .. كل ما نقدم كل ما قلبي يدق اكثر .. مادخلت سرحت في سنين الي عديتها هنا .. دورت راسي على صوت مرت خالي تحكي
" هيا ادخل .. هاني وصيتهم بش يحضرولك البيت برا ارتاح "
قصيت علاها نحكي
" لا مرت خالي مانيش بش نبقى في الفيلا .. هاني وصيتهم بش يحضرولي دار قريبة منكم "
وقفت قدامي و شدتني من يدي تحكي
مانيش بش نخليك تمشي .. انت بلاصتك هنا حذانا" وين ماشي؟ "
تبسمت على جنب " عيشك مرت خالي اما خليني على راحتي و زيد هاني قريب حذاكم "
جات بش تتكلم قصيت عليها نحكي " امان مرت خالي ماتظغطش عليا .. هيا تو ندخلو واحكيلي شفما .. شنية الحكاية المهمة الي ما نجمتش تحكيهالي في التاليفون و خليتني نجي نجري"
عطاتني بظهرها من غير لا تجاوبني سبقتني لصالة قعدت .. خلطت علاها قعدت جنبها نغزرلها حالتها ما تعجبش .. كانت داخلة بعضها و مش منجمة تحكي
شديتها من يديها و دورت عينينا على وجها نتكلم "نسمع فيك احكيلي "
هزت راسها غزرتلي تحكي " ايهم يا ليث ايهم""
عقدت حواجبي و ذيقت عينيا نتلكم " شبيه ايهم .. شصارلو؟"
"ايهم عمل مصيبة .. بش نتفضحو قدام لعباد من جرتو"
" ما تهبلنيش مرت خالي .. ايهم شعمل تكلم "
عدات يديها على رقبتها و جبدت نفس تحكي
" ايهم و ريان.. اغـ اغتصبو طفلة "
حليت عينيا فيها حاولت نستوعب الي سمعتو، حببيت نتكلم مالقيتش كلام يتقال، تنطرت من بلاصتي و تلفتلها نحكي
" فاش تحكي مرت خالي ؟ واعية بالشي الي تحكي فيه ؟"
" أي واعية هو بيدو استعرفلي.. والطفلة وأمها جاو هنا قالو بش يشكيو ومش ساكتين"
عضيت شفايفي مالعصب وتكلمت " وينو هو تو؟؟ "
" في بيتو الفوق.. من نهارت الي جات فيه الطفلة هنا وهو شاد البيت مخرجش "
صحت في وجها نتكلم "لا يعطيه الصحة يعمل عملتو و يخبي وجهو و كالعادة ليث ينظف وراه.... وشكوني الطفلة تعرفها ؟؟
قامت وقفت قدامي وهزت راسها معيا تحكي " ليث ماتصيحش .. انا عيطتلك بش نلقاو حل نلمو بيه لحكاية هاذي مش بش تكمل عليا وزيد الطفلة مانعرفهاش اول مرة نراها"
عديت يديا على شعري حاولت نشد عصابي على قد مانقدر نتكلم" و الطفلة كيفاه جات هنا منين عرفتو .. احكيلي مالول خليني نفهم "
" ايهم طيح شركتو فالبلاصة الي صارت فيها لحكاية و هي لقاتها .. وباين عرفوه مالاسم و التصوير الي عالشركة.. "
هزت راسها معايا و غزرتلي تتلكم " ليث لازمك تلقى حل قبل مايسمع خالك .. امشي و احكي معاهم خلي يسكتو .. كان لزم ساومهم شوف سكوتهم قداه يتكلف.. انت محامي واكيد تعرف شتعمل "
حليت عينيا فيها و قدمتلها بخطوات ثابتين نتكلم " ياخي كل شي يسوى فلوس عندك ؟؟؟ كل شي يتشرى عندك مرت خالي؟؟ ولدك تعدى على شرف الطفلة راو .. كيفاه بش نحكي معاها ونساومها بشرفها وشكون قال الي هي بش تقبل؟"
" لازمها تقبل بسيف علاها مانيش بش نخلي ولدي يتحطم و اسم عايلتي يتفضح في المحاكم من جرتها .. و ماتخافش خممت في حل اخر .. في صورة ما ما قبلتش لفلوس "
" نورني تراه .. شنية الحل لاخر؟"
هزت راسها و خذات نفس بالقوي تتكلم " انو ريان يعرس بيها و تتلم لحكاية .. وانت فالحالات الزوز بش تحكي معاها و تخلاها تقبل ب حل من هاذم. "
هزيت حواجبي و تبسمت على جنب " يعني في الحالات الكل .. اييهم بش يخرج من الحكاية كالشعرة من العجين .. بش يهزها ريان وحدو وقتلي هوما الزوز السبب و لازم يتحملو مسؤولية عملتهم .. وسامحني ريان بش يوافق؟"
قصت عليا و هزت صبعها في وجهي تحكي " اخر مرة نسمعك تحكي هكا .. مانيش بش نضحي بولدي و نرا مستقبلو يضيع و انا نغزر .. و ريان بش يوافق بسيف عليه .. مزايانا سابقة عليه و على دارهم و هو اليوم بش يرد دينو علينا .. كيفك انت ليث بش تعاون ايهم كيف ما احنا عاوناك قبل .. و وصلناك للي انت فيه تو .. انت ليوم المحامي لكبير ليث بن مراد بفضلنا احنا. ماتنساش"
رسيت على سنيا من كلامها و كبست عالبنية متاعي .. حسيت بالنفس تقطع عليا من كلامها.. تكلمت بالسيف
"باهي احسب الحكاية وفات"
ما خليتهاش تجاوبني و عطيتها بظهري خرجت نجري حبيت نرد النفس و نبرد وجهي الي بش يطرشق مالعصب طلعت في الكرهبة و بقيت نسوق و انا مش عارف وين نمشي .. في لحظة تعدا قدام عينيا حياتي معاهم و قداه من مرة وسخت يديا من جرتهم.. كاره روحي خاطرني ضعيف قدامهم لدرجة حتى كلمة "لا" ما نجمش نقولها .. ياما ناس تظلمت منهم و انا شاركت معاهم في الظلم هذا .. انا مانفرقش عليهم برشة انا مذنب كيفهم و يمكن اكثر خاطر ريت الظلم وسكتت و رضيت بلي صاير .. اما المرة هاذي مانيش ساكت مش بشوف حق طفلة صغيرة يضيع.. بش ناقف قدامهم ونقول كلمة " لا " لأول مرة ونخلص حقي و حق الناس الكل معايا.
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
