#ليث_يحكي
حليت عينيا على وسعهم اول ماسمعت كلامو.. حسيت روحي تصدمت مالقيت مانقول ف اللحظة هاذي.. غمضت عينيا بالقوي و رجعت حليتهم اول ماحسيت بقمر كبست على يدي اما مانجمتش نغزرلها.. بقيت واقف مش مصدق الي سمعتو..عديت بعينيا عليهم ورجعت غزرت لحمزة.. خذيت نفس نحكي
انا :" حمزة بلحق الي سمعتو ؟ فريحة ماتت ؟"
هزلي براسو اي يحكي
حمزة :" ماتت مقت-ولة "
رجعت غزرت لشرطي الي قربلي يحكي
الشرطي :" مسيو ليث ياريت كان تتفضل معانا من غير شوشرة "
انا :"باهي.. حمزة هاني بش نلحقكم بكرهبتي "
ريتو كيف غزر لشرطي و اشرلو بعينيه.. اول ما مشاو غزرت لقمر الي كانت واقفة ساكتة.. قلبي وجعني اول ماريت دموعها ماليين عيناهاا.. تنهدت بالشوي وشديتها من يداها نحكي
انا :" قمر اغزرلي "
هزت راسها معايا وكبست على يدي اكثر تحكي
قمر :" ل..ليث شفما ؟ ه..هاذم ف..فاش يحكيو ؟و..وين بش تمشي معاهم ؟ "
حطيت يدي على خدهاا نحكي
انا :" اشش اهدا قمر واسمعني.. مانحبكش تخاف.. نمشي معاهم شوي ونرجعلك تهنى "
هزتلي براسها لا برشة مرات تحكي
قمر :" لا لا ب..بش نمشي معاك.. ا..امان خليني نمشي ليث "
تنهدت بالقوي نحكي
انا :" قمر امان اسمع لكلام ادخل تو... "
قصت عليا تحكي
قمر :" لا ليث مستحيل نخليك تمشي وحدك.. انا جاية معاك.. امان مانجمش نبقى هناا "
عديت بعينيا عليها مالقيت مانقول قدام حالتها خفت كان ترجع تتعب مرة اخرى.. هزيتلها براسي باهي نحكي
انا :" باهي هياا "
طلعت ف كرهبتي وقمر بجنبي.. خدمت الكرهبة وفرد وقت جبدت تاليفوني.. حطيت رقم عمي.. شوي وقت ورد عليا يحكي
مصطفى:" اهلا ولدي "
غزرت لقمر ورجعت غزرت قدامي نغزر لكرهبة الشرطة الي كانت تسوق وراياا من لمراياا نحكي
انا :" عمي انا ف الثنية لمركز الشرطة وين يخدم حمزة.. نحبك تجي "
مصطفى:" علاش شصار ليث ؟؟ انت مليح ؟"
انا :" اي مليح.. كيف نراك تو نحكيو "
مصطفى:" باهي مسافة الطريق ونكونو حذاك "
علقت عليه التاليفون ورميتو على جنب.. تلفتت على صوت قمر تحكي
قمر :" لي..ليث شنوة لحكاية امان.. ر..راني خايفة"
شديتها من يداها نحكي
انا :" ماتخافش ياروحي.. هاني ماشي وبش نشوف لحكاية شنوة و تو نحل كل شي مانحبكش تخاف "
شهقت بالقوي تحكي
قمر :"ه..هوما علاش جاو ليك انت.. انت شدخلك "
كبست بيديا عالفولون ورسيت على سنياا.. حاولت نهدي روحي شوي نحكي
انا :" مانعرفش قمر مانعرفش.. هاني معاك كيفي كيفك تو نمشيو ونشوفو لحكاية "
هزتلي براسها باهي ورجعت تغزر للبلار.. حسيت روحي بلحق دخلت بعضي من لحكاية هاذي لكل.. مش عارف شنوة لمصيبة الي تستنى فياا من جرت **** لخرى.. راكيت الكرهبة اول ماوصلت قدام المركز.. نزلت فيسع ومعاياا قمر.. دخلنا مع حمزة و الشرطي طول.. اول مادخلناا شفت عمي ورفيقة الي سبقونا.. ريتهم كيف قدمو ناحيتنا يجريو.. وقف قدامي عمي يحكي
مصطفى:" ليث ولدي شفما ؟ علاش جايين لهناا "
رفيقة :" قمر شصاير "
عديت بعينيا عليهم نحكي
انا :" هاني داخل بش نشوف شنوة لحكاية "
شديت عمي من مرفقو وقدمت بيه وحدنا شوي على جنب نحكي
انا :" عمي قمر امانة عندك حتى نشوف شنوة لحكاية هاذي.. و اول مانكمل تو نحكيو خاطر تو مش عارف حتى تفصيل "
مصطفى:" ولدي فهمني عالاقل علاش جابوك هنا "
كبست عالبونية متاعي بالقوي نحكي
انا :" فريحة ماتت مق-تولة وشاكيين فيا انا قت-لتهاا "
حل عينيه فيا يحكي
مصطفى:" شنوة ؟؟ ليث فاش تحكي انت ؟ شهالمصيبة هاذي "
انا :" ماتخافش عمي تو نحل لحكاية.. المهم هنيني على قمر.. كان ماسيبونيش الليلة رد بالك عليهاا..خليها تروح معاك "
مصطفى :" تهنى عليهاا.. وانت زادة ماتخافش انا معاك بش نعمل اللازم "
تبسمت بالسيف وضربت على كتفو نحكي
انا :" عيشك عمي "
تلفتت على صوت قمر وراياا تحكي
قمر :" ليث "
قدمت بخطواتي ناحيتها وشديتها من يداها نحكي
انا :" قمر يزي من لبكاا.. حكاية تافهة ماتخافش "
عديت بعينيا عليها وطبست راسي بستها من جبينهاا من غير حتى كلمة.. تلفتت على صوت حمزة يحكي
حمزة :" ليث لازم تتفضل معانا لداخل "
هزيتلو براسي باهي وبعدت على قمر.. حسيت روحي مش متحمل دموعها اكثر.. اول ماقدمت مع حمزة لقيت ام فريحة الي كانت قاعدة على جنب ومعاهاا مراا.. صوت بكاهاا ونديبهاا واصل للاخر المركز.. غمضت عينيا بالقوي اول ماقامت وتنطرت ناحيتي.. ضربتني على صدري بالقوي تحكي
كريمة :" علااااش.. علاااش قتل-تلي بنتييي.. علااااش.. الله لا يساااامحك.. الله لاا يسااامحك "
حليت عينيا وبعدت عليهاا من غير حتى كلمة ودخلت مع حمزة للمكتب وين كان المحقق.. قدمت ناحيتو وين هو اشرلي بيديه يحكي
المحقق:" تفضل سي ليث "
نحيت الفاست متاعي وقعدت قدامو.. هزيت راسي معاه يحكي
المحقق :" سي ليث انت هناا بتهمة قت-ل الانسة فريحة **** "
هزيت بحاجبي نحكي
انا :" ما عندي حتى علاقة بمق-تلها.."
قص علياا يحكي
المحقق :" هذا بش نعرفوه مع البحث.. على هذاكا لازمك تجاوب على الاسئلة وحاول تكون صريح "
كبست بيديا على ركبتي نحكي
انا :" تفضل "
المحقق :" وين كنت الصباح ؟"
انا :" كنت ف البيرو متاعي نخدم..تعديت قضيت و تاخرت شوي خاطر الكرهبة تعطلت صلحتها وتوجهت لداري "
المحقق :" ام الضحية قالت انك كنت على خلاف معاها و صار شجار بيناتكم اخر نهار وانك هددتها زادة.. صحيح كلامها "
انا :" صحيح "
المحقق :" و الجيران زادة اكدو كلامهاا وانك هددتها بالق-تل صحيح هذا؟"
عديت بعينيا عليه ساكت مانعرفش علاش ف اللحظة هاذي حسيت بشوي خوف.. اما سيطرت على روحي وغزرتلو نحكي
انا :" صحيح.. اما هذاكا كان كلام غش اكيد مانيش بش نق-تلهاا مهما كان السبب "
المحقق :" اما السبب الي عندك قوي بش يخليك تق-تلهاا.. الضحية كانت حامل منك.. وهكاكا حبيت تتخلص كنها بش ترتاح "
رسيت على سنيا بالقوي نحكي
انا :" مش صحيح.. فما الف طريقة كنت انجم نبرئ بيها روحي من التهمة الي لصقتها هي فياا غير الق-تل "
هز بحاجبو يحكي
المحقق :" تهمة؟"
انا :" اي.. سبب الخلاف الي كان بيناتناا انهاا لصقت فيا الصغير الي ف كرشها وانا كنت بش نطالب بتحليل dna.. اخر حاجة ممكن نعملها اني نق-تلهاا "
ضيق عينيه فيا يحكي
المحقق :" باهي وايوب ***** "
عقدت بحواجبي مستغرب نحكي
انا :" شبيه؟"
المحقق :" لقينا جثتو هو زادة بجنب الضحية فريحة.. ف شقة الي ف ***** "
حليت عينيا على وسعهم من الصدمة الي هبطت علياا من كلامو.. للحظة ماصدقتش الي سمعتو.. هز بحاجبو يحكي
المحقق :" على حسب مانعرف انو فما عداوة بينك انت و سي أيوب زادة.. هو كان محامي خالك محمود بن سعيد ؟"
هزيتلو براسي اي من غير حتى كلمة.. رجع يحكي
المحقق :" سي ليث بش نكون صريح معاك.. انت ف وضع سئ عاللخر.. انت المتهم رقم واحد تو.. كل الأدلة و الشهود ضدك.. ياريت كان تحاول تكون متعاون معانا وتقول شنوة لحكاية.. انت محامي وتعرف القواعد اكثر مني "
هزيت راسي معاه وغزرتلو ف عينيه نحكي
انا :" انا ما قت-لت حتى حد منهم.. مهما كان الخلاف الي بيني وبينهم مستحيل نوسخ يدي بدمهم.. وانا حاضر للأي تحقيق ونعرف القواعد مليح "
المحقق :" باهي انت حالياا بش تبقى 4ايام على ذمة التحقيق.. حتى يكمل الطب الشرعي و تتم الابحاث لكل.. وبش نفتشو دارك ولكرهبة ولبيرو اي شي يخصك"
غمضت عينيا بالقوي و رجعت حليتهم على كلامو.. ف اللحظة هاذي ماخممت ف شي كان ف قمر كيفاه بش نخبرها بشي هذا لكل وقتلي انا اصلا ماعنديش قوة ولا مازلت مستوعب لحكاية اصلا.. قمت معاه وخرجت وين شفت قمر مع عمي ورفيقة.. هزت راسها معاياا وقربتلي تجرلي.. غزرت لشرطي الي كان ماسكني وغزرتلي تحكي
قمر :" ل..ليث شصار؟؟ ه..هو علاش شادك هكا "
غزرتلو نحكي ميسالش لحظة
هزلي براسو اي وسيب يدي جبدتها على جنب نحكي
انا :" قمر برا مع عمي تو "
طرشقت بالبكا وهزتلي براسها لا تحكي
قمر :" لااا لاا.. و.. وانت وين ماشي؟"
انا :" انا بش نعدي الليلة هناا.. ماتخافش ياروحي إجراءات عادية وبعد بش يخليو سبيلي "
ريتها كيف غزرت لعمي تحكي
قمر :" عمي امان تصرف.. خلي ليث يروح معاناا "
ريت عمي كيف قربلهاا ورفيقة شدتها.. يحكي
مصطفى :" قمر عيش بنتي خليك مع رفيقة وانا بش نتصرف ماتخافش.. خلي يكملو الإجراءات قبل "
ريت رفيقة كيفاه جبدتها على جنب وبعدتهاا علياا.. غزرت لعمي نحكي
انا :" عمي انا بش نبقى 4 ايام على ذمة التحقيق.. فريحة و أيوب الزوز ماتو و انا المتهم ف الحكاية.. مش عارف شنوة بش يصير ولا شنوة يستنى فياا.. نوصيك على قمر "
حل عينيه فيا وبقى يغزرلي مصدوم.. عدا بيديه على وجهو يحكي
مصطفى :" باهي ولدي تهنى وانا تو نتكفل بالحكاية ماتخافش انا وراك تهنى "
هزيتلو براسي باهي وغزرت لقمر الي كانت تبكي وتغزرلي.. نزلت راسي فيسع ومشيت مع الشرطي للسجن الي كان ف المركز.. دخلني وسكر علياا القضبان.. عديت بعينيا عالبيت الصغيرة الظلمة الي كنت فيهاا.. تنهدت بالقوي و كركرت ساقياا بالسيف تركيت عالكرسي.. حطيت راسي بين يدياا وغمضت عينيا محاولة مني بش نستوعب الي سمعتو ونفهم حجم لمصيبة الي انا فيهاا تو.. مانعرفش علاش حاسس بخوف كبير ينهش فياا.. أفكار بقات تلعب ف راسي حسيتهاا خنقتني.. بقيت نخمم ف شنوة يستنى فياا من اللحظة هاذي وشنوة بش يصير ف قمر بعدي..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
