الحلقة الرابعة
يحيــي يحكي
ما نعرفش قداه تعدا وقت و انا ندور في الشارع .. ما نجمتش نرجع لدار و نواجه خالتي حسنة و نقولها راني مالقيتش قمر راني ماكنتش قد المسؤولية و نحميها كيف ما وعدتك .. سرحت و انا نتفكر في كل لحظة عشتها مع قمر غمضت عينيا و انا نتفكر في لمست يداها الصغرونة و صوتها الحنين .. هبطت دمعة من عيني كيف تفكرت اخر مرة ريتها فيها
فلاش باك
قمر " خليك علاه ماشي "
" حبيبي لازمني نمشي الستاج هذا مهم عاللخر .. نكمل ستاج و نرجع نعرسو و نهزك معايا "
بوزت شفايفها كيف الطفلة الصغيرة و قالت " نعرف اما 3 شهور ياسر كيفاه بش نتحمل غيابك "
" انا ديما معاك قميرة .. حتى كان بعيد اعرف الي انا هنا " حطيت يدي على قلبها و كملت نحكي " انا ساكن هنا و انت زادة ساكنة في قلبي "
" ضحكت و مسحت دموعها بكف يديها " انت مش ساكن في قلبي كهو .. انت في قلبي و روحي و عقلي .. انت حياتي يحيى بلاش بيك انا نموت .. ميسالش تو نتحمل 3 شهور و بعد معادش نتفارقو جملا حتى ساعة لا "
ضحكت و عنقتها بالقوي نحكي " من غير ما توصي يا فرخة اول ما تولي حلالي مانيش بش نسيبك جملا ساقي ساقك في كل شي " بستها من جبينها و كملت نحكي " نحبك قمر نحبك"
طلعت على طراطش صوابعها و باستني من خدي " انا نعشقك يحيى "
رجعت للواقع على صوت التاليفون استغربت نومرو مانعرفوش زعة خبر على قمر هزيت نسمع في صوت مرا كبيرة
" الو شكون معايا "
" يحيى معايا ؟"
" أي تفضل .. شكون معايا "
" ما تتفجعش .. خذيت النومرو متاعك من تليفون طفلة ....
قصيت علاها " قمر ؟ من تاليفون قمر ؟؟ ويني هيا لباس ؟؟ شكونك انت ؟"
" مانعرفش اسمها .. انا تهني هيا لباس انا هاني معاها. في سبيطار ***** "
حسيت بروح رجعت فيا شوي اما زاد خوفي كيف عرفت الي هيا في سبيطار " شباها في السبيطار شصارلها ؟؟"
" مانجمش نحكيلك في التاليفون ايجا لسبيطار تو وحاول تبرد عصابك عيش ولدي و تهنى هاني انا مع قمر "
استغربت من كلامها اما ماركزتش ياسر الي يهمني تو أنى نمشي ونراها
هزيت التاليفون وطلبت امي بش تطمن خالتي حسنة ويخلطوا عليا وطول خذيت الثنية ومشيت و انا مخي في قمر و شنية صارلها زعمة رحيت الثنية و ماصدقت لربي وصلت على تلفيتي نلقى امي و خالتي حسنة و معاهم عم محسن
عم محسن " شفما ويني قمر شصار"
" ما نعرف يا عم محسن طلبتني مرا قتلي ايجا لقينا نومرو متاعك في تليفون طفلة "
تكلمت خالتي حسنة بصوت مبحوح " بنتي حية مش هكا بنتي لباس تكلم عيش ولدي "
" أي أي حية قتلي لباس هاني داخل تو بش نعرف شصار "
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
