#ليس_ذنبي ❤️‍🔥

حلقة 111

#قمر_تحكي

حطيت الفنجان فوق الطاولة وهزيت راسي على صوت خطواتو.. تبسمت نحكي
انا :" بونجور ياروحي "
قدملي اكثر طبس عليا باسني من راسي وجبد الكرسي قعد بجنبي يحكي
ليث :" بونجور قمرتي "
صبيتلو  القهوة وحطيتها  قدامو نحكي
انا :" ليث امان افطر فيسع .. مانحبش نتأخر عالامتحان "
خذا رشفة من الفنجان وغزرلي يحكي
ليث :"تهنى تو توصل ف الوقت..قلي وقتاه تكمل ليوم؟"
انا :" نكمل مع 14 "
ليث :" باهي "
عديت بعينيا عليه وعضيت على شفايفي نحكي
انا :" ليث ليوم موعد الطبيبة ليوم.. مازلت متفكر مش هكا؟"
تبسم وحط الفنجان يحكي
ليث :" مقعول ننسى.. اول ماتكمل تلقاني نستنى فيك نمشيو مع بعضنا "
تبسمت نحكي
انا :" باهي مالا بش نستناك "
قمت من بلاصتي بعد ماكملت فطوري.. لميت الطاولة شوي وهزيت ساكي خلطت على ليث بعد ماسبقني هو للكرهبة.. طلعت بجنبو وشدينا الثنية للفاك.. تكيت براسي عالبلار ..حطيت يدي على كرشي وتبسمت اول ماتفكرت اني ليوم بش نعرف جنس البيبي..حسيت روحي فرحانة عاللخر ونستنى ف الوقت يتعدا فيسع على قد ماكنت متحمسة للحظة هاذي.. تلفتت على صوت ليث يحكي
ليث :" فاش سارحة ؟"
عديت بعينيا عليه وكبست على كرشي.. تبسمت نحكي
انا :" نخمم ف البيبي.. فرحانة ومتوترة نحب تشوفو ونطمن عليه "
حط يديه فوق يدي الي كانت على كرشي ودوب غزرلي ورجع غزر قدامو يحكي
ليث :" حتى انا نستنى وقتاه نشوف ولدي.. كان مش الامتحان الي عندك رانا مشينا من تو "
عوجت شفايفي نحكي
انا :" اي خسارة "
ليث :" ميسالش حبي معاد مامازال.. بعد نمشيو ونعرفو.. اهم شي صحتكم تكون مليحة "
انا :" انشالله ..اول ما نعرف جنسو  بش نمشي نشريلو حاجات ميسالش مش هكا "
ليث :"بالطبيعة ..تو ناخذو كلشي ناقصو "
ضحكت نحكي
انا:"لا مش تو يا روحي هههه جيست نختارو حاجة خفيفة تو كيف نقرب نولد نشريو كلشي "
ليث:"باهي مالا ركز ف امتحانك.. ماتخليش الموضوع هذا يشتتك "
هزيتلو براسي باهي من غير حتى كلمة ورجعت تكيت براسي عالبلار... فقت من سرحتي الكرهبة ك وقفت.. تلفتت ليث يحكي
ليث:" أيا اهبط و بعد استناني لداخل ف الفاك ماتخرجش "
قربت بستو من خدو نحكي
انا :" باهي ياروحي.. رد بالك على روحك انت "
تبسم يحكي
ليث :" وانت زادة قمرتي "
كبست على ساكي وحليت الباب نزلت.. دخلت للفاك وقدمت فيسع ناحية لكلاس.. دخلت وقعدت على اول طاولة..خذيت الورقة وبقيت نحل ف الامتحان.. حاولت نحط تركيزي لكل فيه بش نجيب نقاط باهية.. رجعت الورقة بعد ماتعداو الساعتين.. خرجت من لكلاس ومشيت بش نحضر الكور الثاني.. غزرت لرامي كيف قدم ناحيتي يحكي
رامي :" أيا تمشي معانا للكافتيريا؟"
عقدت بحواجبي مستغربة نحكي
انا :" علاش مانقراوش ؟"
رامي :" لا لعشية مفماش قراياا.. فما اجتماع أساتذة "
انا :" اا اوكي "
عدا بعينيه عليا يحكي
رامي :" ماشية معانا ولا لا ؟"
هزيتلو براسي لا نحكي
انا :" لا لا.. بش نروح انا "
رامي:" على كيفك "
عطيتهم بظهري وبعدت عليهم ووقفت على جنب وحدي..مانعرفش علاش حسيت روحي فرحت خاطر ماقريتش هكا نمشي فيسع لطبيبة مانبقاش نستنى للعشية وانا متوترة.. اول ماخرجت جبدت تاليفوني وحطيت رقم ليث طلبتو.. شوي وقت ورد علياا يحكي
ليث:" وي قمر "
انا :" ليث انا كملت.. نستناك بش تجيني ولا ناخذ تاكسي ؟"
ليث :" شبيك كملت تو ؟ مش قلت تكمل 14 ؟"
انا :" اي اما فما اجتماع أستاذة على هذاكا "
ليث:" باهي انا ف المحكمة تو.. ربع ساعة ونكون حذاك..استناني ورد بالك تخرج لبرا.. ابقى ف الفاك لداخل "
انا :" باهي تهنى "
علقت عليه وقدمت عالكرسي على جنب نغزر للبنات قدامي قلبي ضرب بقوة اول ماريتو هو خرج من لكلاس الي كان مقابلني وغزرلي.. اول ماقدم ناحيتي شوي حسيت روحي دخلت بعضي خفت لا يجي ليث ويلقاه معاياا الي خلانس تنطرت من بلاصتي وخرجت فيسع من الفاك.. تربتثت أكثر كيف ريتو خرج وراياا ومقدم ناحيتي السخطة وقتهاا سرعت في خطواتي اكثر وين شفت تاكسي واقف ومتكي بظهرو عليها.. عدا بعينيه عليا وغزرلي يحكي
هو :" كان تلوج على تاكسي انا ليبر "
غزرت وراياا لقيتو كيف قربلي..نفخت بالقوي وغزرت لصاحب التاكسي نحكي
انا :" اي "
حليت الباب وطلعت بعد ماطلع هو زادة..ف اللحظة هاذي بلحق ماخممت ف شي كان اني نبعد عليه.. اصلا ماخممتش ف ليث الي ف الثنية خفت لا يجي ويلقاه معاياا تصير مشكلة اخرى..عطيت عنوان الطبيبة للتاكسي وشدينا الثنية..جبدت تاليفوني بش نكلم ليث ونخبرو اني خذيت تاكسي نتقابلو ف دار.. اول ماطلبتو علق علياا لحظتهاا عرفتو مازال ف المحكمة تو ك يكمل يكلمني..  تكيت براسي عالبلار وبقيت سارحة مع طريق نخمم بلحق ف حكاية مهدي الي بقات مقلقتني ومش عارفة شنعمل ف الكور متاع غدوة عندو مانحبش نشوف وجهو.. فقت من سرحتي على صوت الراديو ف تاكسي.. هزيت راسي وغزرت للطريق عقدت بحواجبي مستغربة وانا نشوف فيه شق طريق اخر غير الي انا متعودة بيه مع ليث..
كبست على ساكي وغزرتلو نحكي
انا :" سامحني ياخي شبيك مشيت من الطريق هذا ؟"
دوب تلفتلي ورجع غزر قدامو يحكي
هو :" الطريق لاخر مسكر.. صار حادث كبير "
هزيتلو براسي باهي وتحشيت ف الكرسي ساكتة.. حسيت روحي توترت من عينيه إلي كانت تغزرلي من لمراياا.. غير الخوف الي سيطر علياا من الطريق الفارغ والطويل هذاا..نزلت راسي فيسع على صوت تاليفوني جبدتو وين شفت رسالة من ليث..
《 أيا اخرج هاني قدام الفاك 》
عقدت بحواجبي مستغربة رسالة ليث.. كيفاه وصل بسرعة هاذي والطريق مسكر كيما قال التاكسي.. لحظتهاا حسيت قلبي ضرب بقوة من الخوف الي مكن فياا اكثر..كبست على تاليفوني وحاولت نتحكم ف يدي ااي كانت ترعش وجاوبت ليث
《 ليث انا تعبت من الوقفة وليت خذيت التاكسي.. كلمتتك بش نخبرك اما انت علقت عليا.. ليث التاكسي شق بيا من الطريق *****.. قلي انو الطريق الرئيسي مسكر.. حاسة روحي خايفة منو يغزرلي درا كيفاه.. اخلط علياا فيسع امان 》
سكرت التاليفون وبقيت نستنى ف ليث يرجع علياا وانا نرعش بكلي..رجعت حليت التاليفون على صوت رسالتو
《 ابعثلي موقعك تو فيسع.. وقلو ياقف على جنب خاطرك بش ترد.. اعمل روحك تعبت ودخت 》
رجعتلو
《 باهي فيسع امان ليث 》
خبيت تاليفوني وخذيت نفس طويل حاولت نهدي روحي ونعمل كيما قلي ليث من غير مانخليه يفيق بياا.. شديت راسي بالقوي ويدي لخرى على فمي نحكي
انا :" امان اقف اقف.. بش نرد  "
شد فران بالقوي وغزرلي يحكي
هو :" اهبط اهبط قبل ماتوسخلي التاكسي "
تنفست بالراحة اول ماحليت الباب وبعدت عليه شوي.. ورغم هكا مازلت حاسة بخوف خاطر الطريق كان خالي.. بعدت عليه فيسع وطبست عملت روحي نرد.. هزيت راسي وغزرتلو كيف كان يتبع فيا بعينيه قربتلو بالسيف نحكي
انا :" انا.. انا معادش انجم نطلع.. مازلت دايخة "
عدا بعينيه عليا وغزرلي درا كيفاه يحكي
هو :" مالا خلصني وبرا على روحك "
هزيتلو براسي باهي وجبدت فلوس من ساك.. مشى بالوقت بعد ماخلصتو..لحظتهاا حطيت يدي على صدري ورديت نفس مرتاح..بلعت ريقي وتكيت بظهري عالشجرة ورايا.. عديت بعينيا عالطريق نستنى ف ليث وقتاه يوصل.. بلحق حسيت روحي مرعوبة من لبلاصة هاذي..فارغة وكلها شجر كانت تخوف عاللخر..كبست على ساكي وقدمت بخطواتي وبقيت نمشي عكس الطريق بش نعرض ليث..
تهزيت وتحطيت على صوت الكرهبة الي كانت تمشي بسرعة وراياا..سرعت في خطواتي بش نبعد عليهاا اما وقفت بعد ماخلطت علياا وشدت فران قدامي.. بدني رعش وكرشي وجعتني اول ماريت زوز نزلو منهاا.. قلبي ضرب بقوة اول ماريت واحد منهم قربلي وغزرلي بنظرة خايبة يحكي
هو :" شبي الزين ضايع وحدو.. اياا شرايك تطلع معانا نوصلوك "
لحظتهاا طيحت ساكي من يدي من الخوف ووخرت بخطواتي لتالي.. بلعت ريقي بالسيف نحكي
انا :" م..مانحبش ابعدني "
اطرافي نملت اكثر كيف ريت صاحبو قرب اكثر ناحيتي.. تبسم على جنب يحكي
هو :" هياا اطلع برك ماتخافش "
عطيتو بظهري اول ماقري مني..بقيت نجري هاربة منهم وانا مش مصدقة الي صار..للحظة حسيت روحي رجعت لنفس الليلة الي عشت فيهاا اول كابوس ف حياتي.. حسيت كل شي عشتو فيهاا هد علياا وتعدا بين عينيا من جديد وين حسيت بنفس الخوف سيطر علياا ودموعي هبطو يجريو على خدي..بقيت نجري على قوة جهدي.. دقات قلبي قوات مع صوت حثلتهم الي كانت تجري ورايا..شهقت بالقوي اول ماخلط علياا واحد وخطفني.. دور بيديه على كرشي وكبس علياا..بقيت نفرقط بين يديه ونضرب فيه بيدياا نحكي
انا :" سيبننننني "
كبس علياا اكثر يحكي
هو :" سكرررر فممممك "
مانعرفش كيفاه صحت على قوة صوتي بالك حد يسمعني اما فيسع ماصوتي تكتم مع يديه الي تحطت على فمي وسكتني..بدني رعش ودموعي هبطو اكثر
اول ماريت صاحبو لاخر وقف قدامي وعدا بيديه على خدي يضحك يحكي
هو :" ماتخافش نعديو شوي وقت مع بعضنا وبعد تو تمشي على روحك "
لحظتهاا كركرني معاه ف اتجاه الغابة..وقتها عرفت روحي مستحيل كان انجم نهرب منهم واني ممكن ياسر بش نرجع نعيش الي عشتو قبل.. رجعت صحت بالقوي كيف رخف يديه مني لحظتهاا صحت على علو صوتي
انا:" ليييييث.. سيبنييييي.. اماااان سيبنييييي"
هزيت يدي وبقيت نفارع فيه ش يسسبني اما كان اقوي مني..عصابي فلتت مني على صوت ضحك صاحبو ااي كان بجنبنا ويتبع فياا بعينيه.. غمضت عينيا بالقوي عالكف إلى تلقيتو ف وجهي وخلاني نطيح ف القاعة.. يحكي
هو :" بلللع فمممك "
حاولت نهز روحي قبل مايقرب مني ويطبس علياا اما رجعت طحت كيف دزني على قوة جهدو.. لحظتهاا مديت يدي شوي عالقاعة وهزيت الحجرة الي كانت بجنبي.. ضربتو بيهاا على راسو وين وخر بخطواتو لتالي يتوجع قمت نجري بسرعة كيف شفت صاحبو مشى يتفقد فيه.. ساقياا رزنوا وقلبي ضرب على صوتو يحكي
هو :" اخلللللط عليهااا.. ماتخليهاش تهرب "
مانعرفش كيفاه تقويت على روحي وبقيت نجري ناحية الطريق الرئيسي بالك يعرضني ليث و لا اي كرهبة اخرى تساعدني وتخرجني من الكابوس هذا.. شهقت بالقوي على يديه الي شدتني من شعري من تالي.. دموعي هبطو اكثر اول مالفتني ليه ورجع طيحني.. ريتو كيف وعدا بعينيه على بدني وضحك لحظتهاا عرفت اني سايي مستحيل كان انجم نهرب ولا نمنع منهم...
#فريحة_تحكي