#قمر_تحكي
نزلت من الكرهبة بعد ماسلمت على عمي الي وصلني قدام مكتب المحامي ..خذيت نفس طويل ودخلت وين شفت السكريتار.. قربت ناحيتها نحمي
انا :" بونجور..عندي موعد مع مسيو عادل "
تبسمت تحكي
السكريتار:" اي تفضل مدام قمر هو ف انتظارك "
انا :" مرسي "
كبست على ساكي وقدمت ناحية المكتب..خبطت مرتين وفتحت الباب.. دخلت نحكي
انا :" بونجور ماتر"
قام من بلاصتو وتبسملي يحكي
عادل:" بونجور مدام قمر "
اشرلي بيديه يحكي
عادل:" تفصل ارتاح.. نطلبك حاجة تشربها؟"
قعدت مقابلتو وحطيت ساكي نحكي
انا :" لا عيشك.. انشالله مانكونش تأخرت عالموعد "
عادل :" لا ف وقتك بالضبط.. كيما تعرف مسيو ليث طلب مني نحضر وراق نقل الملكية ليك و تو كل شي حاضر مش ناقص غير الامضاء متاعك بش نمشي نسجلهم ف البلدية "
عديت بعينيا عليه مالقيت مانقول وانا مازلت مش مستوعبة الدوامة الي فيها لغاية تو..عمري لا حبيت لا فلوس ولا دار كل شي تمنيو كان ليث.. ليث وكهو.. شديت دمعتي بالسيف وغزرتلو كيف حط الاوراق قدامي يحكي
عادل :" تنجم تقراهم قبل ماتوقع "
هزيتلو براسي باهي وخذيتهم من يدو..عديت بعينيا عليهم وين شفتو كيفاه كتب الفيلا ب اسمي و حول كل فلوسو لحسابي زادة حتى من كرهبتو صارت ملكي.. حسيت قلبي وجعني وانا نقرا ف الكلام هذا رغم كل شي هو فيه خمم فيا انا اول وحدة حتى قبل مايعرف بحبالتي.. خذيت نفس طويل وشديت لقلم رغم انو ماكنتش حابة هذا لكل اما حسيت روحي انا زادة بديت نحط السيناريوهات لكل قدامي.. ممكن ليث كلامو صحيح لازمني نضمن حياة صغيري نخمم فيه هو عالاقل خاطر اكيد بش يحتاج كل مليم مانيش بش نبقى عالة على عمي وخالتي فرد وقت بقيت ندعي انو الكابوس هذا يوفى وليث يخرج خليه هو يربي صغيرو خاطر بش نحتاجوه هو أكثر من أي شي.. مسحت دمعتي فيسع ووقعت عالاوراق لكل نحكي
انا :" تفضل وقعت على كل شي "
عادل :" ممتاز.. نهارين نكمل نصبهم ونجيبلك شهادة الملكية "
هزيتلو براسي باهي وخذيت نفس طويل نحكي
انا :" ماتر.. مفما شي جديد ف القضية ؟ موعد الاستئناف قرب شنوة بش يصير ؟"
عدا بيديه على وجهو وغزرلي درا كيفاه يحكي
عادل :" مانكذبش عليك مدام قمر انا بش نعمل كل الي يطلع بيدي بش نخففلو العقوبة.. لحد لان ماوصلت لحتى دليل "
حسيت بغصة شدتني من كلامو وقلبي وجعني اكثر كانو روحي بش تطلع مني.. للاخر لحظة هاذي كان مازال عندي امل نسمع خبر باهي.. ضميت على شفايفي ومت من بلاصتي وهزيت ساكي نحكي
انا :" باهي ماتر.. نخليك تو "
عطيتو بظهري وخرجت فيسع.. دمعتي نزلت اول ماخرجت حاسة الي صار لكل فوق طاقتي ومعادش منجمة نتحمل اكثر فكرة انو ليث يبقى غادي عمال تخنق فياا اكثر..حاسة روحي ضيعت وجهتي من غيرو ومعادش عارفة شنعمل ولا كيفاه نكمل..حطيت يدي على كرشي وبقيت نمشي ونخمم زادة ف مصير صغيري كيفاه بش يتولد وبوه مش معاه..فقت من سرحتي وتخضيت على الكرهبة الي شدت فران قدامي.. حليت عينيا على وسعهم اول ما ريتو هو قدامي.. نزل من الكرهبة وقرب ناحيتي يحكي
مهدي :" قمر شحالك ؟"
عديت بعينيا عليه مصدومة نحكي
انا :" انت شتعمل هنا ؟ ياخي قاعد تتبع فيااا ؟"
هزلي براسو لا يحكي
مهدي :" لا دار صاحبي هنا وريتك بالصدفة عاد نزلت بش نطمن عليك بعد آخر مرة "
رسيت على سنيا بالقوي نحكي
انا :" نقص بلا كذب وابعد من قدامي تو "
دمي فور اول ماريتو وقف قدامي ماخلانيش نتعدا.. عدا بعينيه علياا يحكي
مهدي :" تو نبعد اما قبلها خلينا نحكيو "
انا :" باش تفهم انت ؟ ماعندي شي نحكيييه معاك ابعدنننني "
هز بحاجبو يحكي
مهدي :" قتلك تو نبعد اما قبلها نحب نعرف انت شقررت ؟"
عقدت بحواجبي مستغربة نحكي
انا :" ف شنوة ؟"
مهدي :"
ف حكاية الصغير الي ف كرشك "
حليت عينيا على وسعهم اول ماسمعت جملتو.. بقيت ثواني نغزرلو مصدومة مش مصدقة قمة الوقاحة الي هو فيهاا.. قحرتلو نحكي
انا :" انت شدخلك ف الموضوع هذا ؟"
مهدي:" قمر شوف انت مازلت صغيرة والدنيا مازالت قدامك.. علاش مصرة تضيع حياتك على خاطر واحد كيف ليث مستقبلو تدمر وضاع "
رسيت على سنيا بالقوي وهزيت صبعي ف وجهو نحكي
انا :" اخر مرة انبه عليك.. راجلي ماتجبدش سيرتووو على لساااانك "
تبسم على جنب يحكي
مهدي :" صدقني لتو لا نجمت نفهمك.. شبيك مكبشة فيه هكا.. واحد لا يزي قا/تل وزيد قبلهاا خانك وقت/ل عشيقتو الي حبلت منو "
عديت بعينيا عليه مش مصدقة انو بقى يسأل ورايا حتى عرف الموضوع.. رمشت عينيا برشة مرات حاولت نستوعب كلامو نحكي
انا :" انت.. انت منين ليك ؟"
مهدي :" انا عرفت كل شي "
ضغطت على يدي نحكي
انا :" شوف مهدي هاذي آخر مرة نحكي معاك فيهاا.. ابعدني فوووتني هاذي حياتي وانا حرة.. ماعندكش الحق تدخل فيااا.. وكيما قتلك رد بالك تجبد سيرة راجلي على لسانك ب اي كلمة.. وقول الي حكالك يحكيلك بصحيح المرة جاي.. وصدقني كان مازلت بش تتعرضلي مانشكي بيك ونحبسك انت زادة واضح "
عدا بعينيه عليا وتبسم على جنب يحكي
مهدي :" قداكش مسكينة لتو تدافع عليه وعندك امل انو بريئ وممكن يخرج.. واحد عمل فيك هذا لكل ومازلت تستنى فيه علاش ؟ كات عالصغير الي ف كرشك ماتخمم ف شي "
ضيقت عينيا فيه نحكي
انا :" شمعناها مانخمم ف شي ؟"
قرب ناحيتي وغزرلي درا كيفاه يحكي
مهدي :" يعني اعطيني فرصة وحدة..ابعد على ليث وانا مستعد نكون بو صغيرك.. نربيه كانو صغيري انا المهم انت حل مخك وبرا ارفع دعوى عليه.. طلقو وطيش عليك... "
قصيت عليه كيف هزيت يدي وضربتو بكف على قوة جهدي.. حط يديه على خدو وغزرلي مصدوم.. حليت عينيا فيه وعليت ف صوتي نحكي
انا :" نموووت ومانخليش ليث خاصة على خاطر واحد سا/قط كيفك.. صغيري عندو بوه وبش يخرج على قريب..وانت تنساني جملااا خاطرك واحد مريض برا داوي روحك و ابعدنننني "
شدني من مرفقي يحكي
مهدي :" قمر صدقني راك بش يجيك وقت وتندم "
نطرت مرفقي منو نحكي
انا :" تعرف مرخصك عبد "
خليتو واقف وبعدت عليه فيسع قبل مايجاوبني.. وقفت اول تاكسي عرضتني وطلعت وانا ننهج من لعصب..حسيت دمي فور وعصابي تعبت.. حطيت يدي على كرشي الي شدت علياا من الغش وحاولت نهدي روحي شوي..قلت لشوفور على ثنية السجن وتكيت براسي عالبلار خذيت نفس من النسمة الباردة اما حاسة روحي مازلت مغزلة كيفاه تجرأ يحكي معايا هكاكا ويعطي لروحو الحق بش يطلب مني طلب ك هذاكا.. غمضت عينيا وحاولت ننساه ونخمم ف ليث الي بش نقابلو تو.. حاسة روحي توحشتو عاللخر ونحب نشوفو.. متوحشة صوتو وريحتو وكل شي فيه.. تبسمت اول ما تاكسي وقفت.. خلصتو فيسع ونزلت.. دخلت للسجن وعطيت بطاقتي بش نقابلو.. بقيت نستنى ف العون بش يدخلني للبيت وانا نرعش بكلي نستنى ف الوقت يتعدا فيسع تالمون ملهوفة بش نراه.. قربت للعون الي خرج وتبسمت بس ندخل للبيت.. اما وقفت على صوتو يحكي
العون :" المسجون رفض يقابلك "
حليت عينيا على وسعهم وين قلبي ضرب بقوة من الخوف نحكي
انا :' ش..شنوة ؟ علاش شبيه صارتلو حاجة ؟"
العون :" لا لباس عليه اما قال مايحب يرا حد "
غمضت عينيا بالقوي و رجعت حليتهم على دمعتي الي نزلت نحكي
انا :" ا..انت قتلو الي مرتك تحب تراك ؟'
العون :" اي قتلو.. وهو رفض "
شهقت بالشوي نحكي
انا :" تنجم ترجع تحاول معاه امان.. قلو مرتك تحب تراك اكيد..ه..هو اكيد ماسمعكش ك ق..قتلو مرتك "
العون :" لا سمعني وسامحني مانجمش نرجع "
استندت بيديا على الحيط اول ما العون مشى من قدامي وين دموعي نزلو اكثر..بقيت واقفة ننهج مش مصدقة انو ليث رفض يقابلني..للحظة مفهمتش شصار و علاش عمل هكاا.. بقيت خايفة لا تكون صارتلو حاجة اما العون قال مابيه شي.. عديت بيديا على وجهي وخرجت نكركر ف ساقياا بالسيف.. اول ماخرجت طرشقت بالبكا اكثر.. حسيت روحي تخنقت والدنيا ضياقت بياا غير عقلي الي مانجمش يصدق انو ليث ماحبش يراني.. اكيد فما سبب..اكيد صارت معاه حاجة.. لحظتها وقفت تاكسي وشديت ثنية الفيلا بش نحكي لعمي ونخليه هو يعرف شصار بمعرفتو...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
