حلقة 25
#قمر_تحكي
اليوم نهار كتبان صدقي على ليث .. النهار هذا قد ما حلمت بيه و تخيلتو عمري ما تصورت اني نعيشو بالطريقة هاذي في الظروف هاذم .. طول عمري نتخيل في روحي بش نخرج من دار بابا بالروبة البيضاء وامي بجنبي.. بش نرا فرحة يحيى بيا و نسمع كلمة نحبك من عندو.. بش نعمل العرس الي حلمت بيه ونروح معاه لدارنا الي حضرناها مع بعضنا .. اما شنوة الي صار ؟ علاه حياتي تقلبت هكا؟؟ علاه الي حلمت بيه تحطم قدام عينيا وماعنديش القدرة بش نرجع منو حتى شوي؟؟ شنوة ذنبي بش صاار فيا هذا الكل ؟.. انا اليوم وحدة مغتصبة خارجة من دار مرا لقاتني في الشارع مطيشة ..انا اليوم بش نعرس بواحد مانعرف عليه شي كان اسمو .. بش نعيش مع واحد خاطرني مجبورة و ماعنديش حل غيرو.
قمت الصباح حضرت روحي بقيت نغزر لحالتي في المرايا و الحالة الي وصلتلها لدرجة اني ماعقلتش روحي.. لبست روبة في الاكحل تحت الركبة و سبادري لميت شعري الفوق و خليت وجهي هكاكا .. خرجت بخطوات رزينة من البيت ماشية لثنية مانعرفش شنية مخبيتلي جديد .. النهارين هاذم حاولت نوهم روحي اني مصدقة ليث حاولت نقنع روحي اني لقيت شكون جنبي وبش يمدلي يدو .. على قد ما نحب نصدق انو حياتي بش ترجع و غدوة بش يكون خير اما مانجمش احساسي يقلي فما حاجة بش تصير خليك حاضرة لخسارة اخرى و ما تتعشمش في حد .. كيف ما خلاك الي قبلو بش يخليوك الي معاك تو .. يمكن الوحدة و الوجيعة صارت مكتوبة عليا و حتى حقي في الحلم تسلب مني ..
هبطت في الدروج نلقي امي و خالتي معاهم ليث واقف يستناو فيا قربت من خالتي الي حلتلي يداها تحكي
" حاضرة قمر ؟"
هزيتلها براسي باي و غزرت لأمي نحكي " امي هيا معايا ماتخلينيش وحدي"
قربتلي و حطت يداها الزوز على وجهي تبسمتلي بسيف تحكي "ماكش وحدك معاك خالتك انا مطمانة عليك معاها .. و ليث زادة معااك هو وعدني بش يرد بالو عليك .. غير انت سامحني قمر علي قلتو اخر مرة .. صدقني خممت في مصلحتك ياروحي وجيعتك انا حاستها الدوبل في قلبي .. امشي و دعواتي الكل معاك .. امشي معاهم و كيف ترجع تو تلقاني نستنا فيك يا روحي"
تبسمتلها و قربت منها عنقتنها على قوة جهدي نحكي " مسامحتك يا امي .. انت زادة سامحني على كل حاجة خليتك تعيشها .. ربي يخليك ليا "
باستني من خدي وبعدت عليا غزرت لليث تحكي
" بنتي امانة عندك .. احميها منهم كيف ما وعدتني .. رد بالك تخليها تبكي و لا توجعها .. قمر من اليوم امانتك "
هزيت عينيا معاه كيف قرب منها تبسملها يحكي
" تهنى عليها قمر أمانة عندي و نخليهم يمسوني انا و هي لاا "
تلفتلي وكمل يحكي " كان حاضرة خلينا نمشيو قمر "
هزيتلو براسي باهي قربت من امي بستها وبعد شديت في خالتي و خرجنا .. اول ماخرجت حطيت يدي على قلبي كيف خظ بالقوي حسيت بحاجة بش تصير شدتني غصة في حلقي خنقتني ماخلتنيش لا نجم نحكي و لا نبكي .. خذيت نفس بالقوي وقدمت معاهم طلعت في الكرهبة.. ثنية كاملة وانا نغزر لدنيا من الشباك .. توحشت كل بلاصة في البلاد توحشت دارنا و صحباتي .. توحشت عيشتي لقديمة .. تكيت براسي وغمضت عينيا حاولت نهدي روحي و مانخمم في شي اخر .. حليتهم مع الكرهبة كيف وقفت قدام البلدية .. دمعة هبطت من عينيا حسيت بوجيعة في قلبي .. لحظتها تمنيت كان الوقت يرجع بالتوالي و نخلي كل شي يتبدل ونعيش حلمتي بالطريقة الي تمنيتها مع الانسان الي حبيتو و اختارو قلبي.. تقويت على روحي وهبطت من الكرهبة نمشي بالسيف اول ما وصلت ودخلنا الصالة كانت فارغة كان عدل الإشهاد واقف يستنى فينا مع الشهود .. قدمت لطاولة قعدت و جنبي ليث مانجمتش حتى نهز عيني معاهم الموقف الي انا فيه خلاني نحس بروحي قداه انا رخيصة و ذليلة.. هزيت راسي مع صوت عدل لإشهاد
" لقد تقدمتم لدائرتنا بعرض الزواج وبعد الفحص و التدقيق تبين انه لا يوجد مانع لهذا الزواج ....."
لحظتها غاب عليا صوتو و حضر صوت يحيى في وذنيا و اخر لحظة حكينا فيها في التاليفون عالنهار هذا
" قمرتي.. توحشتك عاللخر حبيبي نستنى وقتاه نكمل الستاج و نروح .. عرسنا بش يكون في الربيع .. نستنى في اللحظة الي نحملك فيها و ندخلك بين يديا لدارنا .. نحبك قميرة"
هبطو دموعي مع كل كلمة تفكرتها غمضت عينيا كيف رجعت للواقع و سمعت العدل يحكي
" الأنسة قمر بن منصور هل تقبلين دون تعرضك لأي ضغوط و بكامل ارادتك بالسيد ليث بن مراد زوجا لك "
خذيت نفس و مسحت دمعتي بكف يدي جمعت الحروف الي حسيتهم هربو اللحظة هاذيكا نحكي
" ن.. نقبل "
" السيد ليث بن مراد هل تقبل دون اي ضغوط و باردتك الحرة بالأنسة قمر بن منصور زوجة لك "
" نقبل "
" بحسب الصلاحية التي منحني اياها رئيس البلدية اعلنكما زوجا و زوجة "
كيف كمل وقفت من بلاصتي ما تلفت لحد و خرجت نجري .. اول ما وصلت لبرا سندت بيديا عالحيط و يدي لخري على صدري حبيت نتنفس اما مانجمتش بقيت نبكي بالصوت يمكن هاذي اول مرة نبكي بالطريقة هاذي .. كل دمعة كانت تهبط مني كانت كيف الجمرة تحرق على خدي .. حسيت بخالتي الي قربت مني و حطت يداها على ظهري تمسح عليا تحكي
" يزي عيش بنتي .. ما تعملش في روحك هكا قمر "
تلفتلها ترميت في حضنها عنقتها بالقوي من غير مانحكي حتى كلمة لحظتها حبيت نهربلها من الي صاير الكل حبيت نحس بحنيتها و عطفها يمكن نهدا و النار الي شاعلة فيا تخمد حتى شوي ..
بعدت عليها كيف قرب منا ليث يحكي " ما تبكيش قمر امسح دموعك .. رد بالك تخاف مني و لا تندم عالخطوة هاذي .. انا من اللحظة هاذي بش نحط يدي في يدك و مانخليش دموعك تهبط مرة اخرى نوعدك.. و تو خلينا نمشيو من هنا روح ارتاح شوي "
قدمت معاه للكرهبة ثنية كاملة و انا نغزرلو حاجة اقوي مني خلاتني نصدقو من غير ما نزيد كلمة .. اول ما قلي هكاكا دموعي وقفت و حسيت روحي هديت .. بقيت نغزرلو و الف سؤال يدور في بالي .. زعمة شكون ليث بن مراد ؟ علاه يعمل في هذا الكل و ماطلبش مني حتى مقابل؟؟...
قص عليا تخمامي كيف وقفنا قدام الدار هبطنا من الكرهبة قدمت للباب بش ندخل اما وقفت كيف سمعت صوتو الي نادالي قرب مني يحكي " قمر .. متاكدة تحب تبقى هنا؟؟ خلينا نمشيو لداري انت و امك و رفيقة .. هكاكا تبقاو تحت عينيا خير "
بلعت ريقي و غزرتلو في عينيه نحكي " لا .. ميسالش خلينا هنا على الاقل تو .. وكيف نحس روحي حاضرة تو انقلو حذاك .. "
" اما انا هكا بش نبقى متحير عليك و بالي عندك "
تربثت من كلامو هبطت راسي و شبكت يديا في بعضهم نحكي "ا.. امان سي ليث خليني على راحتي .. وانت هاك ديما تطل و خالتي تو تكلمك كان فما حاجة "
قص عليا يحكي "اولا اسمي ليث .. انساها سي ليث هاذي .. ثانيا انت زادة كلمني كان فما حاجة ما تستناش خالتك حتى تكلمني.. و رد بالك تخرج وحدك .. و كان تستحق حاجة كلمني مانوصيكش قمر .. ما تخلينيش نندم اني سمعت كلامك و خليتكم هنا "
عضيت على شفايفي و هزيتلو براسي باهي و عينيا مازالت في القاعة
" ادخل تو وبعد تو نتعدا نطل عليكم .. رد بالك على روحك "
" ب.. باهي تهني "
حليت الباب و دخلت انا و خالتي لدار خذيت نفس و عديت بيديا على وجهي ما نحبش امي كيف تراني تتحير اكثر .. اول ما قدمت لداخل حسيت روحي جمدت في بلاصتي الدنيا دارت بيا و راسي رزن .. ريقي نشح في حلقي كيف ريت امي مطيشة في القاعة و الدم في كل بلاصة .. حسيت روحي طحت في هاوية غارقة عجزت عالحركة بش نقدملها حتى صوتي خاني بش نصيح و نعيط .. بقيت في بلاصتي واقفة .. صوت خالتي كيف صاحت حسيتو بعيد ياااااسر... الخوف الي عشتو قبل ما يجي شي قدام الي حاستو انا تو ..
زعمة هاذي خسارة جديدة في حياتي ؟؟ وجيعة اخرى بش تسكن و تتمكن فيا ؟؟ عذاب جديد بش نذوقو ؟؟ .. اسئلة بقات تدور في بالي مالقيتلهمش اجابة .. اما الي نعرفو انو المرة هاذي مفماش قوة تنجم تخليني نبرى من الجرح هذا و خسارة امي ماهي إلا نار جديدة بش تشعل فياا .
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
