#ليس_ذنبي ❤️‍🔥

حلقة 123

#ليث_يحكي

تنهدت بالراحة اول ماسمعت برائتي من نسب الصغير قدام الناس لكل خاصة قمر.. عديت بعينيا عليها وتبسمت على تبسيمتهاا.. رجعت غزرت للمحامين الي مازالو يتناقشو.. ركزت بعينا مع محامي فريحة الي قدم ناحية القاضي يحكي
المحامي :" حضرة القاضي.. صحيح نتيجة النسب سلبية اما هذا مش دليل لبراءة المتهم.. بل بالعكس ممكن هذا بش يكون اكبر دليل على ارتكابو لجريمة.. بعد ما تهمتو الضحية و شوهتلو صمعتو غير هكا هي خلقتلو مشاكل مع عايلتو الي خلات سيد ليث يخرج من عقلو و يمشي لدارهاا يهددها قدام لكل...غير انها تحالفت مع العدو متاعو السيد أيوب.. غير هذاا ياحضرة القاضي قدام سيادتكم تقرير كامل من الطب الشرعي على تعرض الضحية للعنف من قِبل السيد ليث.. فما اثار كدمات وقت الي حاول هو خنقهاا وهذاا بشهادة كل الجيران زادا.. يعني السيد ليث عنفهاا من اول مرة.. كيما غياب الشهود على وجود ليث ف مكان آخر وقت الجري#مة دليل كافي.. كل الادلة ضدو هو ومانتصورش كان الصدفة بش تلعب دورها لهدرجه انو بعد مشكلتها مع السيد ليث هي تت-قتل منا من طرف اخر... "
كبست على يدي و انا نسمع فيه حسيت روحي ترهوجت من كمية الاتهامات الي بقيت نسمع فيهم و المشكل اني ماعندي حتى دليل ضد هذا لكل.. خذيت نفس وغزرت للقاضي الي يحكي مع المستشارين الي بجنبو.. دقات قلبي قوات اول ماسمعت اللحظه الي بش يتنطق فيها الحكم..هزيت روحي وقفت وبقيت نغزر للناس الي كانو قدامي.. دورت بعينيا علاهم واحد واحد.. ورجعت نغزر قدامي على صوت القاضي يحكي
القاضي :"محكمة... من خلال الدلائل المقدمة و بما ان السيد ليث بن مراد هو المتهم الوحيد في القضية قررت المحكمة ادانة السيد ليث بن مراد بتهمة القتل العمد و حكمت المحكمة حضوريا على السيد ليث بن مراد ب 25 سنة سجن بتهمة القتل العمد مع سبق الاصرار والترصد.. رفعت الجلسة "
بدني جمد بعد الي سمعتو.. للحظة حسيت روحي نتخيل و الي سمعتو مش صحيح.. غمضت عينيا بالقوي و رجعت حليتهم على شهقت قمر الي كانت بصوت عالي لحظتهاا تلفتت وغزرتلهاا وين شفتهاا كيفاه تغزرلي وتبكي بالصوت..
لحظتهاا ماخممت ف شي كان فيهاا هي شنوة بش تعمل بعدي وشنوة بش يصير فياا.. حسيت بالمحامي متاعي كيف قربلي يحكي
المحامي :" ليث ماتخافش.. هذا ماهوش الحكم الاخير.. انا بش نعمل استئناف و انشالله الحكم بش يطيح و مازلت بش نشوف ادلة ونخرجك"
بقيت نسمع فيه ومش مركز ياسر مع كلامو..هزيتلو براسي باهي من غير حتى كلمة و مازلت نغزر لقمر و رفيقة و عمي.. ريتهاا كيف سيبت رفيقة و قربت ناحيتي ..فقت من سرحتي على صوت لعون كيف قربلي وشدني من يدي
العون :" اتفضل معايا "
هبطت راسي ومشيت معاه بسرعة قد ما نحب نزيد وقت بعيد على الحبس قد مالقيت روحي نزرب بش نوصلو جيست بش منشوفهاش فلحالة هاذي.. رغم اني تمنيت نسمعهاا و نطمنهاا حتى بالكذب اما فرد وقت حسيت انو معنديش طاقة بش نواجها وهي فلحالة هاذي

#قمر_تحكي

شهقت بالقوي وين دموعي هبطو مني اول ماسمعت الحكم إلي تصدر ف حق ليث.. للحظة حسيت روحي نتخيل مانجمتش نصدق انو ليث بش يبعد علياا بالطريقة هاذي و ظلم من فوق.. تلفتت بالوقت وشفتو كيفاه كان يغزرلي بنظرة قسمتلي قلبي.. سيبت يد خالتي الي شدتني وقربتلو نجري رجعت وقفت كيف ريتو دور وجهو ومشى مع العون من غير مايستناني.. قربت اكثر وشديت ف القضبان بالقوي وطرشقت بالبكاء نحكي
انا :" ل..ليييث.. لييث ماتخلينيش امان ليث ارجع "
غمضت عينيا بالقوي و رجعت حليتهم على يد خالتي الي حاوطتني تحكي
رفيقة :" قمر يزي عيش بنتي ماتعملش هكاا.. ليث تو يخرج صدقني لحكاية مش بش توفى هناا "
تلفتت وين شفتها قدامي هي وعمي.. دموعي نزلو اكثر من الاول نحكي
انا :" ع..عمي ليث مظلووم..ا..امان اعمل اي حاجة امان ياعمي تصرف ماتخليهمش يهزوه امان.. ا..انت سمعتهم ق..قداه حكمو عليه.. ك..كيفاه ليث بش يتحمل الي صاار و..وانا كيفاه بش نتحمل "
قرب ناحيتي وشدني من مرفقي يحكي
مصطفى:" قمر نوعدك ليث بش يخرج وعلى قريب مستحيل نسلم ف ولدي ونخليه محبوس ويضيغ عمرو هنااا.. غير انت كون قوية على خاطر ليث.. وخليني انا نتصرف "
ضميت على شفايفي كيف خالتي قربتلي ومسحتلي دموعي تحكي
رفيقة :" يزي من لبكا عيش بنتي.. قمر انت تو لازمك تكون قوية على خاطر راجلك.. لازم ليث يعرف انو خلى وراه مرا وتنجم تتحمل هذا لكل بش هو مايتحيرش عليك "
هزيتلها براسي باهي من غير حتى كلمة وحاولت نشد دموعي.. حسيت قلبي بقى يوجع فياا من تصويرة ليث الي بقات قدام عينياا غير صوت القاضي الي حكم عليه.. خرجت مع خالتي وعمي لبراا وين شفناا المحامي واقف هز راسو معانا وقربلناا.. تلفتتلو عمي يحكي
مصطفى:" حضرة المحامي شنوة بش يصير تو ؟ شنوة الحل بعد الحكم هذاا ؟"
المحامي:" اول شي بش نقدم حكم استئناف.. وبش نحاول من هناا لوقتهاا نلقى أدلة ممكن كانت ضايعة عليناا حتى يتصدر نهار الجلسة.. ماتخافش سي مصطفى مسيو ليث بش يخرج وعلى قريب "
مصطفى:" انشالله وانا زاده بش نحاول نتصرف ونلقى حل مانجمش نبقى مربع يدي هكاا.. المهم تو قلي كيفاه بش يكون وضع ليث؟ ووقتاه انجمو نقابلوه ؟"
المحامي:" فما اجراءات بش تكمل تو وبعدها مسيو ليث تو بش يترحل للسجن لكبير.. انا شوي آخر وبش نمشي نشوفو ونحكي معاه و بعد بش نتعدا نشوف وقتاه اول زيارة ليه "
حليت عينيا على وسعهم اول ماسمعت كلمة زيارة.. قربت اكثر نحكي
انا :" م..مانجمش نمشي نشوفو ليوم انا زادة ؟"
هزلي براسو لا يحكي
المحامي:" لا ليوم صعيب اما بش نحاول ندبرلكم زيارة ف أقرب وقت "
استندت بظهري عالحيط وين دمعتي نزلت بالوقت من غير حتى كلمة.. سمعت خالتي كيف تحكي
رفيقة :" باهي بخصوص حوايجو وماكلتو كيفاه بش نعملو.. هو ماعندو حتى شي معاه "
المحامي :" انجم انا ندخلو دبشو ليوم و بخصوص الماكلة بش يصير عندكم نهار ف الأسبوع تطبخولو كيمة كبيرة وتهزوها نهار الزيارة هي وشنوة ينقصو "
حطيت يدي على فمي نكتم ف صوت شهقتي.. حسيت روحي تخنقت وانا نسمع ف الكلام هذاا.. كيفاه بش وصلنا لهناا مش عارفة.. كيفاه بش نتحمل نولي نشوف ليث نهار واحد كهو ودقيقة من زمان.. كيفاه ليث بش يتحمل يبقى بين اربع حيوط مع لمجرمة.. مسحت دموعي بكف يدي وغزرت لخالتي تحكي
رفيقة :" باهي تو نحضرلو ساك فيها حوايجو مالا وهزها معاك ليوم.. ماتخليهوش هكاكا "
مصطفى:" هياا مالا خليني نوصلكم تحضرو الساك وبعد انا نهزها ونمشي مع المحامي "
شديت ف يد خالتي وخرجنا لبرا و المحامي ورانا يحكي هو وعمي.. حسيت روحي نمشي جهامة بلا روح معاهم تمنيت كان ليث روح معاياا ليوم ومانزيدش نعيش ف الكابوس هذا انا وهو.. طلعت ف الكرهبة مع عمي وخالتي وشدينا الثنية.. تكيت براسي عالبلار وبقيت نخمم ف الي صار ودموعي ماكفوش لحظة.. سمعت خالتي تحكي
رفيقة :" ياخي انجمو ندخلو لدار ليث خاطر سمعت انها كانت مسكرة لتفتيش "
مصطفى:" اي كلمت حمزة وقلي امشيوا عادي بما انو كل شي وفى تو.. حتى كرهبة ليث بعثوهاا "
رفيقة :" فهمتك "
غمضت عينيا وبقيت ساكتة مانجمت نقول شي.. تفكيري لكل مع ليث تو وشنوة عامل.. رجعت حليتهم على صوت الكرهبة كيف وقفت.. قلبي ضرب بقوة اول ماشفت دارناا وين تفكرت اخر ليلة عديتها مع ليث هناا قبل ماتتقلب حياتنا مرة اخرى.. خذيت نفس طويل وحليت باب الكرهبة ونزلت نكركر ف ساقياا بالسيف مع خالتي وعمي.. جبدت المفتاح بيدي الي كانت ترعش وحليت الباب.. بدني رعش اول مادخلت ولمحت الدار للحظة تخيلت ليث بس يخرج ونشوفو ونسمع صوتو.. سكرت الباب وراياا ودخلت مع خالتي وعمي وباقي عينيا عالدار نغزرلها كيفاه كانت داخلة بعضهاا من وراء التفتيش الي صار فيها.. بقيت واقفة مانجمتش نتحرك اكثر ولا نجمت نطلع لفوق وانا عارفة ليث مش هناا.. فقت من سرحتي على صوت خالتي تحكي
رفيقة :" هياا قمر خليناا نطلعو المحامي يستنى "
هزيتلها براسي باهي من غير حتى كلمة وطلعت معاها للبيت.. خذيت نفس طويل محاولة مني بش نتماسك شوي اول ماوصلت قدام البيت.. غمضت عينيا بالقوي و رجعت رجعت اول مادخلت وشميت ريحة ليث الي فقدتها.. عديت بيديا على وجهي وقدمت لدريسينغ خذيت ساك وقربت ناحية دبش ليث.. لحظتها مانجمتش نزيد نشد دموعي اكثر.. هزيت يدي وعديتهاا فوقهم جبدت اول مريول عرضني وقربتو لياا حضنتو بالقوي وبقيت نستحلى ف ريحتو.. حسيت بيد خالتي وراياا كيف طبطبت على ظهري من غير حتى كلمة.. مسحت دموعي وبقيت نحضر ف الساك وخالتي تعاون فياا.. حطيت كل شي ينجم ليث يستحقو و ف قلبي من داخل ندعي انو الكابوس هذا مايطولش.. اول ماكملت قفلت الساك وتلفتت لخالتي نحكي
انا :" ك..كملت خلينا نمشيو "
هزيتلي براسهاا باهي وخذات الساك من يدي وسبقتني.. عديت بعينيا عالبيت اخر مرة وخرجت وراهاا.. سكرت الباب ونزلت نكركر ف ساقياا.. خرجت مع خالتي وعمي وسكرت باب الدار بالمفتاح وعطيتها بظهري وانا قلبي محروق خاطر مش عارفة وقتاه بس نرجع لهناا.. اما كل اي نعرفو اني مستحيل نرجعلهاا من غير ليث.. طلعت ف الكرهبة من تالي نسمع ف عمي يحكي
مصطفى:" نوصلكم للفيلا وبعد نمشي للمحامي.. قمر بنتي روح ارتاح شوي وماتخمم ف شي.. وراس بنتي كل شي بش يتحل انا نوعدك.. فترة خايبة وبش تتعدا"
تقويت على روحي بالسيف نحكي
انا :" ا..إنشالله عمي "
تكيت براسي عالبلار وغمضت عينيا حاولت نهدي روحي شوي بعد كلام عمي و نصدقو انو هاذي فترة خايبة وبش تتعدا كيما تعدينا ببرشة حاجات قبل.. ليث بش يرجعلي وانا بش نستناه للاخر لحظة...