#ليس_ذنبي ❤️‍🔥

حلقة 128

#مهدي_يحكي

سكرت البيسي الي كان قدامي وعديت بعينيا عالطلبة الي كانو يعديو ف اخر امتحان عندي وركزتهم على قمر.. تكيت بظهري لتالي وبقيت نغزرلها كيفاه سارحة ف الورقة ومش مركزة ف شي.. اسبوعين تعداو من وقت الي عرفت حقيقة حالتهاا هاذي قد ماحاولت نحكي معاها ونقدملها المساعدة الا انها كانت ترفض..
خذيت نفس طويل وقمت من بلاصتي..حطيت يديا وراء ظهري وبقيت نمشي ونشوف ف كل طالب كيفاه عدا حتى وصلت قدامهاا هي.. وقفت بجنبها وغزرت لورقتها نحكي
انا :" زيد ثبت ف سؤال رقم سبعة "
تحركت من بلاصتي قبل ماتجاوبني ورجعت قعدت على طرف البيرو.. غزرتلها كيف رجعت شعرها لتالي وكبست على رقبتهاا.. بقيت نثبت ف وجهها الي كان تاعب وين حسيت روحي تنرفزت من حالتهاا هاذي.. قمت من بلاصتي نحكي
انا :" الوقت وفى..تنجمو تسلمو الورقة وتتفضلو و ماتنساوش اساميكم "
ريتها كيف هزت ورقتها وقامت من بلاصتهاا.. قربت ناحيتي وهزت راسهاا معايا غزرتلي وحطت الورقة عالبيرو ورجعت لطاولتهاا.. كملت جمعت الاوراق حطيتهم على جنب ورجعت نغرزلها كيفاه تلم ف ساكهاا بالسيف.. عديت بعينيا عالاونفي الي ريتو فرغ وقدمت بخطواتي ناحيتها.. هزيت بحاجبي نحكي
انا :" انشالله نجمت تركز ونلقاك صلحت السؤال السابع"
حطت ساكها على كتفها وغزرتلي تحكي
قمر :" اي صلحتو.. تفكرت الاجابة الصحيحة "
تبسمت على جنب نحكي
انا :" انشالله يطلع كلامك صحيح خاطر السؤال هذاكاا عليه اكثر نقطة.. وهو الي يحدد نجاحك ولا سقوط ف المادة هاذي "
عدات بعيناها علياا وغزرتلي درا كيفاه تحكي
قمر :" نعرف "
انا :' مزية انك تعرف.. وياريت كان تعرف زادة انو الي تعمل فيه غالط.. كان انا صلحتلك ليوم غير مستحيل يصلحلك.. ياريت ماتضيعش مستقبلك و حلمتك على خاطر واحد مجرم "
طيحت الساك من يداهاا وحلت عيناهاا فياا تحكي
قمر :" ش..شنوة؟ ش..شتقصد انت؟"
هزيت بحاجبي نحكي
انا :" الي سمعتو.. انا عرفت سبب حالتك هاذي..مالا سي راجلك طلع محبوس ف قضية قت/ل ؟ ساعة مايظهرش عليه انو قتال ارواح "
عدات بعيناها علياا وكبست على وجهها تحكي
قمر :" ياخي انت قاعد تتجوسس على حياتي ؟"
قعدت على طرف الطاولة قدامهاا نحكي
انا :" صدقني عرفت ب الصدفة.. اما مانخبيش عليك صدمتي كانت كبيرة.. يعني راجلك جاء لهنا وهددني انو بش يسجني ياخي ف الاخير تسجن هو.. شوف الدنياا "
عديت بعينيا على وجهها الي حمار وعيناهاا كيفاه زغللو بالدموع.. صدرها كان يتهز ويتحط لدرجة اني حسيت ب انفاسها ضربتني.. عديت بيديا على شعري وتنهدت بالشوي نحكي
انا :" قمر الي نحب نفهمو علاش عاملة ف روحك هكا ؟ نرا فيك قاعدة تذبل وبش تضيع روحك على خاطر... "
قصت عليا وعلات ف صوتهاا شوي تحكي بصوت مخنوق
قمر :" هاذي حاجة ماتخصكش.. ياريت كان تبعد علياا وتتلهى ف روحك.. رد بالك تتجاوز حدودك معاياا اكثر من هكا.. حياتي انا وراجلي خط احمر "
قمت من بلاصتي وقربتلهاا اكثر نحكي
انا :" يعني بعد كل شي ناوية تبقى على ذمتو ؟"
حلت عيناها فيا تحكي
انا :" بالضبط.. ورد بالك تحكي كلمة وحدة على راجلي خاطر وقتهاا بش ترا وجه اخر مني فهمت.. ابعد على ثنيتي خيرلك يا مهدي ورد بالك تخمم نهار اني بش نسلم ف راجلي.. الافكار الي ف مخك ننصحك تفسخهم و نظرة الشماتة الي ف عينيك صدقني مانحسهاش خاطرك انسان مريض "
ميلت راسي نحكي
انا :" بش يجيك نهار وتندم على كلامك هذاا وقت تلقى عمرك وشبابك ضاعو.. هو مايستاهلكش.. واحد محكوم عليه 25سنة شنوة مازلت تستنى منووو "
علات ف صوتهاا بالقوي تحكي
قمر :" اننننت شدخللللك.... "
عقدت بحواجبي مستغرب كيف ريتهاا سكتت وطبست راسهاا.. استندت بيداها عالطاولة وحطت يداها لخرى على جبينهاا.. لحظتهاا شديتهاا من مرفقهاا نحكي
انا :" قمر شبيك ؟ "
دوب هزت راسهاا معايا شوي وطاحت بين يدياا دايخة.. للحظة حسيت روحي خفت ودخلت بعضي.. هزيتهاا ف حملتي بالوقت وخرجت نجرى بيهاا للكرهبة.. كبست عليهاا وبقيت نغزر لوجهها الي كان احمر والعرق الي نازل من جبينهاا وين حسيت روحس ندمت كيفاه حكست معاهاا هكاكا وقتلي انا عارفها تاعبة.. وصلت لكرهبتي فيسع وحليت الباب حطيتهاا عالكرسي تلاني وجريت ناحية كرسيا.. طلعت وخدمت الكرهبة نجري للكلينيك.. كبست عالفيتاس أكثر وفرد وقت نغزرلها من لمراياا كيفاه مغمضة عيناها ومش حاسة بشي..لحظتها حسيت روحي خفت اكثر.. مسافة الطريق ووصلت راكيت الكرهبة ونزلت فيسع.. دورت ناحية بابها حليتو وهزيتهاا ف حملتي ودخلت بيهاا.. عرضتني الممرضة بالوقت و اشرتلي وين نهزهاا.. اول ماوصلت للبيت حطيتهاا عالفرش وبقيت نغزرلهاا تلفتت للممرضة الي قربتلي تحكي
الممرضة:" دقيقة والطبيبة تكون موجوده "
هزيتلها براسي باهي من غير حتى كلمة.. سمعتهاا كيف سالتني
الممرضة :" انت راجلهاا ؟"
دورت راسي بالوقت وغزرتلهاا.. مانعرفش ف اللحظة هاذي شنوة حسيت من وراء سؤالهاا.. من غير لحظة تفكير وحجة جاوبتهاا نحكي
انا :" اي "
الممرضة :" باهي تنجم تستناها لبرا "
رجعت غزرت لقمر وخرجت.. ترميت عالكرسي وركبتي ترعش من لعصب و التوتر الي تخلطو علياا.. غير الاجابة الي قلتهاا و الي بقيت نتخيل فيهاا اذا ممكن نهار تصير حقيقة.. مانعرفش قداه بقيت هكاا حتى سمعت صوت باب بيتهاا كيف تحل.. قمت من بلاصتي وقربت لطبيبة الي خرجت نحكي
انا :" قمر لباس ؟ هي فاقت ؟"
الطبيبة :" اي فاقت ماتخافش... "
خليت الطبيبة واقفة ودخلت نجري لبيتها.. ريتها كيف كانت متكية راسهاا لتالي و السيروم معلق ف يداهاا.. تنهدت بالشوي اول ماشفت ودموعهاا الي  كانو على خدهاا.. عديت بيديا على وجهي وقربت ناحيتهاا نحكي
انا :" قمر شحالك ؟ خوفتني عليك كيفاه تحس ف روحك ؟"
غمضت عيناها من غير ماتجاوبني.. قعدت عالكرسي بجنبها نحكيي
انا :" قمر جاوبني كان مازلت تاعبة تو نخلي طبيب اخر يشوفك "
هزيت راسي على صوت الممرضة الي كانت واقفة بجنبها تحكي
الممرضة  :" مفماش داعي..الي صار مع المدام طبيعي.. الي صار معاهاا بسبب لحبالة على هاذاكا لازمهاا راحة تامة وتبعد عالضغط "
رمشت عينيا برشة مرات حاولت نستوعب الي سمعتو.. فقت من سرحتي على شهقت قمر.. غزرتلها كيفاه كانت تغزر للممرضة مصدومة وتبكي.. لحظتهاا حسيت روحي مالقيت مانقول كانو لكلام تبخر ف لحظة.. تلفتت على صوت الباب الي تحل وين شفت امنة دخلت تجري ناحيتهاا قعدت بجنبهاا وعنقتهاا تحكي
امنة :" قمر انت مليحة ياروحي.. شبيك شصارلك ؟"
وقفت من بلاصتي وخرجت من حذاهم من غير حتى كلمة.. وقفت بجنب الباب نسمع فيها كيفاه تبكي بصوت عالي.. سمعت امنة تحكي
امنة :" قمر ماتخوفنيش شبيك ؟ شصارلك رباب قتلي شافت مسيو مهدي هازك وانت دايخة حسيت روحي متت رعبة عليك.. بقيت نلوج ف اقرب كلينكات للفاك حتى لقيتك هناا.. قلي شصارلك "
كبست عالبونية متاعي اول ماسمعت صوتهاا الي كان يرعش ومخنوق تحكي
قمر :" ا..امنة انا..انا حبلة "
امنة :" بلحق قمر ؟؟ مبرررووك ياروحي مبروك هذا احلى خبر "
قمر :" ك..كيفاه احلى خبر كيفاه ؟ ا..امنة انا..انا شنوة بش نعمل تو.. معادش عندي قوة بش نتحمل هذا لكل والله تعبت.. ك..كيفاه بش نربي صغير وحدي و..وليث محبوس.. مانجمش والله... "
تبسمت على جنب اول ماسمعت كلامهاا.. بعدت من قدام الباب وبقيت نخمم ف الي سمعتو.. عرفتها بش يجي وقت وتتعب وتفد منو.. اكيد مش بش تبقى متحملة واحد محبوس وتضيع روحها وصغيرهاا من فوق تو.. هاذي هي فرصتي اني ندخل لحياتهاا ونخليهاا تنساه.. صغيرها بش يكونلي اهم دافع لشي هذا...