حلقة 68
قمر تحكي
حليت عينيا على نهار جديد .. اما باحساس قديم .. بخوف و رعشة عشتتهم شهرين لتالي .. اليوم بش نرجع نواجهم .. بش نرجع نسمع صوت صياحي الي بقيت هاربة منو من جديد .. بش نرجع نشوف خيالهم و هوما ينهشولي في لحمي .. نهار بش يخليني نشوفهم و نسمعهم .. شهرين عديتهم و انا نحاول ننسى و نبرأ .. نحاول اني نعيش كيف لبنات حتى شوي .. اما نهار اليوم بش يخليني نتفكر انا شكون .. و شصار فيااا .. بش يخليني نفيق على روحي و نعرف انو حتى الحلم معادش عندي الحق فيه .. بش نبقى عايشة بالخوف منهم و من مصيري .. حاسة مخي بش يتحرق.. زعمة شنوة يستنى فيااا .. شنوة مازلت بش نسمع و نشوف منهم .. زعمة الحق بش يظهر .. و لا بش يتدفن كيف ما دفنوني بالحياة .. كيف مادفنو أحلامي و مستقبلي .. زعمة بش يجي نهار و نبرااا .. جروحي تتضمد و تتلم .. مانتصورش .. حتى كان القاضي بش يحكم بالحق و العدل .. فما حاجات ماتت فياا .. حكم الدنيا الكل مستحيل يرجعهم .. هوما قتلوني و ذلوني .. فكو مني حياتي لقديمة .. شي ما ينجم يعوضلي هذا الكل .. خلاوني نحس بالنقص و الكره لروحي .. على قد ماني عايفتهم على قد ما عايفة روحي .. سلبو مني صغري .. فرحتي و الحب .. هوما خذاو روحي و انا مابقى مني شي .. كان بدن مسخ .. مطبوع ببصمتهم .. الحق الي بش يظهر بش يخلاهم هوما يتحاسبو و يتعاقبو .. اما انا شي ماهو بش يتبدل فيااا .. بش نبقى قمر الي اغتصبوها زوز و سرقولها شرفها .. مفماش عوض في الدنيا لشرف .. على هذا انا تحكم عليااا قبلهم .. تحكم عليااا نعيش بالعار هذااا .. تحكم عليااا نكمل حياتي وحدي .. تحكم عليااا ندفن قلبي .. الجريمة هاذي رغم اني مظلومة فيها و كنت انا الضحية الا اني انا الي تحاسبت قبل و حساب أقوى من حسابهم .. حسابهم هوما بش يخلي ناري تطفى و الأصوات الي فيا تهدى و تتخمد اما قمر بش تبقى هي هي .. و حياتي مش بش تتصلح .. الي مشى عمرو لا يرجع ..
هزيت روحي شوي و تكيت براسي لتالي عالفرش .. مانعرفش قداه بقيت هكاكا .. مخي يهز و يجيب .. ماعنديش قوة بش ناقف .. يا ريت الوقت يحبس هنااا .. ياريت كل شي يوفى من بعيد لبعيد .. خذيت نفس طووويل و قمت لبيت لبانو .. خذيت دوش و حضرت روحي فيسع و خرجت .. مانجمتش نغزر حتى لوجهي في المرايااا .. صرت هاربة حتى من روحي ..هبطت اللوطة لقيت خالتي و ليث يستناو فياا .. قدمت بخطواتي ناحيتهم من غير حتى كلمة .. اصلا ماعندي مانحكي .. يكفي الأصوات الي تصيح و تعيط في راسي .. هزيت عينيا مع ليث يحكي " حاضرة قمر "
هزيتلو براسي اي و خرجت معاه للكرهبة .. ثنية كاملة و انا ندعي لربي بش يعاوني و ما يخلينش نضعف .. ندعي بش يعطيني القوة و نتحملهم لاخر الجلسة .. ندعي بش ما يخلينيش عاجزة قدامهم و ذليلة مرة اخرى .. اول ما وقفت الكرهبة حسيت قلبي خظ بالقوي .. كرشي وجعتني و نفس وحل في حلقي .. طلعت راسي نغزر للبلاصة هاذي .. بلاصة خرجت منها اخر مرة موطية راسي .. مفضوحة قدام قداه من عبد .. لعبو بشرفي و طعنو فيه كيف ماحبو .. بقيت نغزرلها و نسأل في روحي زعمة المرة هاذي كيفاه بش نخرج .. نتمنى الموت على اني نخرج كيف المرة الي فاتت .. اصلا موتي رحمة ليااا على اني نعيش نفس الموقف مرة اخرى .. عديت بيديا على وجهي و كبست على شعري .. نحب نهرب اي فكرة تهد عليااا و تزيد تلهبني .. حتى دموعي المرة هاذي عملو بلعاني زادو خنقوني و ما رضاوش يهبطو .. هزيت راسي مع ليث يحكي
" ماتخافش .. كل شي بش يكون مليح .. ماتنساش انا معاك قمر "
لميت الحروف الي هربت مني و حاولت نقاوم شفايفي الي كانو يرعشو نحكي " ن .. نعرف .. نعرف ليث "
تبسملي و اشرلي بعينيو بش نهبط .. حليت الباب و هبطت بقيت واقفة في بلاصتي جامدة حتى قربلي ليث وشدني من مرفقي يحكي " هيا امشي .. هاني معااك "
بقيت نمشي و ندور بعينيا علاهم الكل .. لأمو و بوه الي وصلو لحظة وصولنا .. و غزرتهم لينا الي زادة فيها الحقد و الغل .. الشر كان باين من وجوهم .. ايوب الي مش فاهمة شنوة مشكلتو و سر البغض و النقمة الي باينين على وجهو .. يحيى الي مُصر يكون موجود كل مرة بش يعذبني اكثر .. مجرد اني نغزرلهم من بعيد نخاااف .. خلي قربهم ووجودي معاهم في نفس القاعة شنوة بش يخليني نحس ..
اول ما دخلنا بقيت واقفة بجنب ليث بعاد علاهم .. ماعينيش نسمع اهانات خالو كيف اخر مرة .. هكاكا و شفت ايوب قربلنا و يتبسم .. كبست على مرفق ليث بالقوي و تخبيت وراه من الخوف الي حسيتو من الملامح المرسومة على وجهو .. غمضت عينيا على صوتو الي قربلنا يحكي " بونجور سي ليث .. نتمنى انك تكون حاضر للمفاجات الي تستنى فيك "
بقيت مغمضة عينيا و دموعي الي كانو محصورين هبطوا على خدي .. حسيت كان بليث كيف بعد عليا قربلو تبسم على جنب يحكي " حتى انت خلييك حاضر من اليوم سي ايوب .. تو وين بدا اللعب صدقني "
حليت عينيا نغزرلو ضيق عينيه في ليث يحكي " من اليوم انا حاضر لكل شي .. خاصة للربح و الجلسة الي بش تصير تو هي بش تصفي و تاكدلك كلامي "
قصيت على ليث الي كان بش يجاوبو .. شديتو من يديه تلفتلي نحكي " س.. سيبو ليث امان .. شيهمك فيه .. هيا نحب نقعد تعبت "
هزلي براسو باهي و بعدنا عليه من الجهة الأخرى ..
ترميت عالكرسي و قعدت .. حاسة ساقيا بش يخونوني و نطيح في القاعة .. قربتلنا جيداء تحكي " ليث وسع بالك .. هو يعمل هكاكا يستفز فيك .. ما تعطيهوش الفرصة "
قعدت بجنبي ورجعت تحكي " قمر مهما يصير لداخل خليك قوية .. رد بالك توريهم انك خايفة و لا ضعيفة "
غزرتلها ودورت بعينيا على وجها نحكي " باهي جيداء تهنى "
قامت من حذايا .. غمضت عينيا و تكيت براسي لتالي.. بقيت نتنفس بالسياسة محاولة مني بش نهدى روحي شوي .. رجعت حليتهم على صوت العون الي طلبنا بالاسم .. حسيت بدني رعش و اطرافي نملت و بردت من الخوف .. شديت في خالتي و دخلت للقاعة .. اول ما دخلت .. تعدى سيناريو اخر مرة قدام عينيا .. قعدت عالكرسي و شبكت يديا الي كانت ترعش في بعضها .. غزرتلهم كيفاه كانو الكل قاعدين و شادين بلايصهم .. خالتي الي تغزرلي و تطمن فيا بعيناها .. ليث الي وجودو معايا كان كافي بش يهديني شوي و يخليني نتفاءل .. جيداء الي مخلتنيش لحظة وحدة
.. حتى عم مصطفى كان حاضر .. وجودهم ورايا خلاني نتقوى و نحس اني مش وحدي .. مهما يصير اليوم .. ورغم خساراتي الكللل .. انا ربحتهم هومااا و هذا يكفيني ..
و لخرين زادة كانو كلهم موجودين .. كان لكلاب الزوز مازالو .. هكاكا و الباب تحل .. حسيت بيهم ورايا من غير مانغزرلهم .. حسيت بيهم من دقات قلبي الي قوات من الخوف .. ريتهم كيفاه قدمو و قعدو قدامي .. حسيت بغصة شدتني في حلقي .. ريحتهم الي تغلغلت في خشمي خنقتني و خلتني نحب نرد .. رغم هذا مانجمتش نبعد نظري علاهم .. بقيت ندور بعينيا على وجوهم و نتسال .. كيفاه حد مانجم يرا وجهم الاصلي .. كيفاه قدرو يخبيو حقيقتهم .. مثلو انهم أبرياء .. كذبو عليااا و عيني ف عينهم .. يا ريت كان انجم نوري للناس الكل انا شنوة ريت ليلتها .. غزرتهم و لمستهم .. صوتهم .. كل حاجة انا ريتها و عشتها منهم و معاهم .. يا ريت عندي القدرة نوري الي صارر مرة اخرى اما قدام الناس الكل .. خلي يعرفو هوما شنية و شكون .. هوما زوز كلاب .. سفلة و مايخافوش ربي .. وحوش عايشين بيناتنا .. مايستحقوش الرحمة ..
فقت من سرحتي على صوت القاضي " محكمة "
هزيت راسي نغزرلو كيف يحكي " سوف يتم فتح ملف القضية من جديد .. قضية قمر بن منصور و هي قضية اغتصاب و عقدت ثاني جلسة لاستماع و النطق بالحكم بتاريخ 14 ***** بدات الجلسة .. يتقدم محامي الدفاع "
ريت جيداء و ايوب كيف قدمو ووقفوا قدامو .. تقدمت جيداء تحكي " سيادة القاضي .. انا مازلت مصرة على توجيه الاتهام للمهتمين الزوز رغم انكارهم .. و انو الشهائد الي سمعناها في الجلسة الأولى ماهي إلا مجرد كذبات منهم "
قص علاهاا ايوب يحكي " اعتراض سيدي القاضي.. ممكن كلمة "
" تفضل "
" زميلتي تقول انو كل الشهادات زور .. ممكن حتى شهادتهم تكون هكاكا زادة .. احنا لليوم ما ريناش حتى دليل على صحة كلامها .. فأنا نرفض اي اتهام موجه لموكلين متاعي "
تكلمت جيداء " صحيح مفماش حتى دليل على صحة كلام كل الشهود الي في صالح موكلتي .. اما انا اليوم عندي دليل انو شهود الي شهدو ضد موكلتي كانت بالزور .. وهذا الي بش نثبتو تو .. سيادة القاضي كان تسمح فما زوز شهود نحبهم يدخلو "
" خليهم تتفضل "
تلفت عالباب الي تحل .. خفت كان نغزر المرة هاذي و تكونلي صدمة كيف اخر مرة .. اخر مرة تحل فيها الباب هذا ريت يحيى .. و المرة هاذي شكون ؟ و شنوة الي يستنى فيااا .. خذيت نفس تقويت على روحي و دورت عينيا .. عقدت حواجبي عالمرا الي دخلت .. عمري لا ريتها و لا نعرفها هي شكون .. ريتها كيفاه قدمت للقاضي ووقفت .. بقيت نستنى فيها تحكي بش نعرفها .. و نعرف شنوة الي يربطها بالقضية هاذي ..
سمعت القاضي كيف سالها " اسمك .. و شنوة تقرب للمهتمين "
" انا خديجة .. كنت نخدم في الفيلا عند عيلة سي محمود "
" و شنوة الي تعرفو و بش تشهد بيه "
"انا بش نشهد بالي ريتو سيدي القاضي .. بعد مرواح سي ايهم من السفر .. فما ليلة روح فيها هو و سي ريان مخر .. بقاو في بيت العساس مادخلوش للفيلا للصباح .. طلبو مني بش نهبطلهم مراول .. كيف دخلت نلقى سي ايهم مريولو مقطع و كان مخبش من وجهو و رقبتو .. و الزوز كانو خايفين و ماحبوش يدخلو للفيلا بش للا وجيهة متشوفهمش .. و طلبو مني بش مانقولش الي صار ليلتها للا وجيهة "
تكلمت جيداء " سيادة القاضي .. كلام مدام خديجة يبين انو ايهم و ريان تقابلو وقتلي هوما انكرو هذاا .. و الحالة الي كانت فيهم انو هو مخبش و خايف .. هذا يدل انهم عملو حاجة .. و شاهدة الثانية بش تخلينا نتاكدو من كلام مدام خديجة اكثر .. كان تمسح تدخل هي زادة "
غزرت للباب الي رجع تحل .. و ريتها هي دخلت .. للحظة ما صدقتش كيفاه تراجعت و بش تشهد معايااا .. ريتها كيفاه قدمت ووقفت قدام القاضي ..
.......................................
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
