#قمر_تحكي
حليت عينيا على ضو الشمس لي ضرب..هزيت روحي شوي وتقعدت وين شفت ليث يلبس..تبسمت على صوتو يحكي
ليث :" صحة نوم.. "
رجعت شعري لتالي نحكي
انا :" بونجور ياروحي "
قربلي شوي وطبس علياا باسني من شفايفي يحكي
ليث :" هذا لكل نوم قميرة "
انا :" والله حاسة روحي نعسانة.. شبيك مافيقتنيش انت "
ريتو كيف قرب لدريسينغ يحكي
ليث :" مازال بكري..حبيتك ترتاح شوي "
بعدت الملحفة من فوقي وقمت نحكي
انا :" ياخي خارج؟"
جبد لفاست متاعو يحكي
ليث :" مش تفاهمنا نمشيو للمقبرة"
عقدت بحواجبي مستغربة نحكي
انا :" نسيت جملة والله "
ليث :" اعمل حسابك بعد نتعداو للبيرو نعطي اوراق للراجل فيسع ونخرجو نفطرو لبراا "
حسيت قلبي وجعني كيف تفكرت امي وفرد وقت حسيت روحي تقلقت من مشيتي للبيرو.. ماحبيتش نشوفها خاطرني بلحق مش ناقصتهاا هي خصوصا بعد كلامها الي قالتو ف المصحة وقتهاا.. خذيت نفس طويل حاولت نهدي روحي شوي ومانتغشش كيف ماوصاتني الطبيبة البارح تو صحة صغيري اهم مانيش بش نركز معاهاا جملا.. عضيت على شفايفي نحكي
انا :" ب..باهي..خليني نحضر روحي مالا "
ليث :" باهي "
خليتو هو ف البيت ودخلت لسال دوبان نحيت حوايجي وعملت دوش خفيف.. أول ماكملت خرجت ولبست الكاب دوبان ونشفت شعري ورجعت للبيت وين مالقيتوش قدامي عرفتو حضر روحو و نزل.. قربت فيسع لدريسينغ جبدت حوايجي بقيت نغير فيهم ومشطت شعري وحضرت ساكي ونزلت..تبسمت كيف ريتو قاعد عالطاولة ومحضر فطور الصباح.. هز راسو معاياا وغزرلي يحكي
ليث :" هياا ايجاا تفطر "
جبدت الكرسي وقعدت قدامو..عديت بعينيا عالماكلة حسيت خواطري دارت وانا نشوف فيهاا..نحكي
انا :" ماعينش ليث.. حاسة روحي شبعانة "
حط كاسة لحليب قدامي يحكي
ليث :" غصب على روحك بش تشرب دواك.. الطبيبة قتلك لازمك تتغذى "
عوجت شفايفي نحكي
انا :" باهي اعطيني عصير مانحبش حليب امان "
قحرلي يحكي
ليث :" لااا بش تشرب حليبك قبل..قمر ماكش صغيرة اسمع لكلام "
هزيت الكاسة ف يدي ودوب عملت رشفتين ..حسيت روحي بش تخرج مني من الريحة.. مانعرفش كيفاه حطيتها وقمت فيسع لتوالات..طبست راسي و رديت كلشي في معدتي.. حسيت بيه كيف دخل حذاياا قربلي لملي شعري وغسلي وجهي يحكي
ليث :"قمر انت مليحة ؟"
هزيت روحي شوي ننهج ونحكي بالسيف
انا :" قتلك ماعينش ليث.. حاسة روحي عايفة لحليب امان "
عدا بصوابعو على خدي يحكي
ليث :" ميسالش خلينا من لحليب مالا.. اما لازمك تفطر"
هزيتلو براسي باهي من غير حتى كلمة..شدني من يدي يحكي
ليث :" هيا خليناا نرجعو "
رجعت معاه لبيت لفطور وقعدت.. بقيت ناكل بالسيف حسيت روحي بلحق مش طايقة لفطور.. اول ماكملت شربت الفيتامينات متاعي وقمناا.. هزيت ساكي وخرجت مع ليث..طلعنا ف الكرهبة وشدينا الثنية للمقبرة..طريق كامل عديتو ساكتة تفكيري لكل كان مع امي و ذكرياتي معاهاا.. حسيت روحي متوحشة كل لحظة عديتهاا ف دارناا لقديمة مع امي.. كل مانتفكر كيفاه خسرتها على غفلة و بالطريقة هاذيكا نحس قلبي يتقطع اكثر..شديت دمعتي بالسيف وغزرت لليث كيف وقف الكرهبة يحكي
ليث :" أيا اهبط "
هزيتلو براسي باهي من غير حتى كلمة ونزلت.. حسيت بغصة وحلت في حلقي وخنقتني وانا نشوف ف المقبرة.. للغاية تو مانيش مصدقة اني خسرت بابا وامي وبقيت وحدي..كيفاه حرمتني منهم الدنيا على بكري.. حسيت ب ليث كيف شدني من يدي يحكي
ليث :" هياا "
بقيت نمشي معاه حتى وصلناا وين قبرهاا لحظتهاا دمعتي هربت من عيني بالوقت.. ضميت على شفايفي ومديت يدي بقيت نقرا ف الفاتحة وبجنبي ليث زادة كان يقرأ.. اول ماكملت سمعت ليث يحكي
ليث :" هاني بش نستناك "
غزرتلوو وهزيتلو براسي باهي..اول ماريتو بعد.. قربتلها شوي وطبست مسحت على قبرها من فوق.. شهقت بالقوي على دموعي الي تسيبو فجاة نحكي
انا :" ا.. امي انا جيت.. ت..توحشتك برشة امي.. توحشت ريحتك.. س..سامحني خاطر عندي برشة مازرتكش.. اما.. اما صدقني مانسيتكش حتى لحظة..ديما نخمم فيك ونحلم بيك والله.. ديما نقول اني بش نجي اما تصير حاجة وتمنعني"
غمضت عينيا بالقوي و رجعت حليتهم على دموعي الي بقاو الي نازلين.. مسحت عالحجرة وين اسمها نحكي
انا :" مانعرفش كان.. كان انت تشوف فيا و لا لا.. اما.. اما خليني نطمنك انا مليحة امي والله.. ايهم وبوه ماتو تحاسبو بعد كل شي عملوه فياا.. ربي ريحني منهم وظهرلي حقي ف الاخير.. رغم اني تعبت امي..تعبت برشة بش وصلت لهناا اما ف الاخير ارتحت لحمدالله.. لقيت خالتي و عمي معاياا هوما ماخلاونيش لحظة وحدة.. بقاو ديما بجنبي.. و ليث زادة ماسلمش فياا.. هو وفى بوعدو ليك حماني وخذالي حقي.. حبني بلحق وعرسناا مرة اخرى.. رغم كل شي تعدينا بيه احناا عملنا عيلة "
ضميت على شفايفي وطرشقت بالبكاء اكثر نحكي
انا :" ا..امي انا..انا حبلة.. ياريتك كان جيت قدامي تو وقتلك لخبر هذاا.. حبيت نشوف فرحتك.. حبيتك تعنقني وتقلي مبروك بنتي.. رغم وجود لكل معاياا اما انا حاسة روحي وحدي خاطرني فاقدتك.. حد ماينجم يعوضك امي.. انت مشيت بكري ياسر امي.. برشة لحظات تمنيت نعيشهم معاك.. ف عرسي حبيتك تشوفني بالروبة البيضاء.. ف نجاحي بقرايتي.. ف حبالتي تو.. تمنيت انك تشوف صغيري كيف يجي و تربيه انت معاياا.. كيفاه بش انجم نتحمل فراقك مش عارفة..."
خذيت نفس ورجعت نحكي
انا:" ياريتك كان تكون تسمع فيا تو.. نحبك تسامحني امي.. سامحني امان خاطر انا لتو مانجمتش نسامح روحي عالشي الي خليتك تعيشو وقتهاا.... "
كبست عالحجرة وطبست راسي نبكي بالصوت حسيت روحي معادش عندي قوة بش نزيد نحكي.. حسيت ب ليث كيف طبس حذاياا وعنقني يحكي
ليث :" يزي من لبكا قمر... "
قصيت عليه كيف حطيت راسي على صدرو ونبكي ونحكي
انا :" توحشتهاا ليث..توحشتهاا برشة ياريتهاا كان جات معاناا تو.. حاسة روحي وحدي "
ليث:" انت ماكش وحدك انا معاك وبش نبقى ديما معاك"
بعدت عليه شوي وغزرتلو نحكي
انا :" نعرف اما.. اما حبيت امي تكون معاياا تو.. هي خلات عليا بلاصة "
حط يديه على خدي ومسحلي دموعي يحكي
ليث :" نعرف والله..اما هاذا حكم ربي..ربي يرحمها يكفي انك تكون لباس بش متبقاش متحيرة عليك "
هزيتلو براسي باهي..شدني من مرفقي يحكي
ليث :" هياا قوم معاياا "
وقفت معاه وباقي عينيا معاها نحكي
انا :" انا بش نرجع نزورك ديماا.. مانيش بش ننساك حياتي لكل امي "
عديت بعينيا عليهاا اخر مرة وشديت يد ليث نحكي
انا :" خلينا نمشيو "
ليث :" باهي "
قدمت معاه للكرهبة وطلعت بعد ما فتحلي هو الباب..ريتو كيف طلع بجنبي خذا دبوزة لماء وحلهاا حطها ف يدي يحكي
ليث :" خوذ اشرب "
خذيت دبوزة الماء من يديه وشربت شوي ورجعتهالو.. حط يديه على خدي وغزرلي يحكي
ليث :" كيفاه تحس ف روحك تو؟"
عديت بعينيا عليه نحكي
انا :" انا مليحة..جيست كيف نزور امي هكاا نتعب شوي "
ليث:" باهي اتكا شوي.. خلينا نمشيو فيسع للبيرو و بعد نهز مرتي تحوس "
عديت بيديا الزوز على وجهي وتكيت بظهري لتالي غزرتلو كيف خدم الكرهبة وشد الثنية..تلفتتلو نحكي
انا :" ليث المهم ماتبطاش ف البيرو مانحبش نبقى برشة "
ليث :" جيست نعطي اوراق لراجل ونخرجو ماتخافش "
انا :"باهي"
رجعت نغزر قدامي... تلفتت على صوت ليث يحكي
ليث :" كيفاه تحس ف روحك تو ؟"
انا :" انا مليحة ليث ماتخافش "
ليث :" مالا شبيك ساكتة؟"
انا :" لا شي والله.. سارحة مع الطريق "
ليث :" باهي ك هكاا خمم مالا وين تحبنا نفطرو بعد.. خمم ف حاجة انت شاهيتهاا..تو نهزك تتعشا وتتفرهد "
ضحكت نحكي
انا :" ههه باهي نخمم ونقلك "
تكيت براسي لتالي وحليت شباك الكرهبة.. مسافة الطريق ووصلنا.. نزلنا مع بعضناا ودخلناا للمكتب وين ريتهاا قاعدة على بيروهاا قدامناا.. ريتها كيف هزت راسهاا معاناا وعدات بعيناها عليناا.. قامت من بلاصتهاا تحكي
فريحة :" ليث عسلامة "
ليث :" اهلا فريحة "
ريتها كيف دارت ووقفت قدامناا وعيناها باقي على ليث كاني انا مش موجودة حذاهم.. هزيت بحاجبي كيف سمعتها تحكي
فريحة :" شحالك ؟ انت مليح مش هكاا ؟"
ليث :" اي الحمدلله عيشك "
قربتلو اكثر وعدات بعيناها عليه تحكي
فريحة :" اما وجهك تاعب ليث..علاش جيت راك طلبتني وانا جبتلك الأوراق "
ليث :" لا ميسالش..عندي موكل بش يجيني تو كان لازمني نجي "
فريحة :" فهمتك.. تعرف لبارح مشيت لدار عم مصطفى حبيت نطل عليك قالولي انك روحت.. عاد كنت بش نجيك لعشية انا وامي نطلو عليك "
كبست عالبونية متاعي حاولت نهدي روحي بش مانفرغش غشي فيهااا..
ليث :" يعطيها الصحة سلم عليهاا.. و مرحبا بيكم ف كل وقت"
رسيت على سنيا بالقوي من لعصب الي حسيتو.. كاني مش موجودة حذاهم غير خواطري الي دارت من ريحة فريحة الي عمال تقربلناا حسيتها غمت على قلبي.. تلفتت لليث نحكي
انا :"ليث.. وين عندهم يجيو ؟ مش وعدتني ليلة بش نتعشاو لبرا "
ريتها كيف غزرتلي على جنب ورجعت غزرتلو تحكي
فريحة:" ميسالش انشالله مرة اخرى مالا.. هاني اطمنت عليك تو "
ريتو كيف هزلها براسو باهي وغزر وراه وين الموكل دخل.. استقبلو ليث وخلاه يدخل للمكتب..رجع غزرلي يحكي
ليث :" ارتاح انت شوي حتى نكمل انا مع الراجل "
انا :" حاول ماتبطاش ليث امان "
هزلي براسو باهي يحكي
ليث :" باهي قمرتي "
تبسمتلو من غير حتى كلمة وعطاني بظهرو ودخل للمكتبو.. ريتها كيف مازلت واقفة لا تحركت و لا بعدت عليناا.. غزرتلي تحكي
فريحة :" اقعد ارتاح شبيك واقفة..بش نعملهم قهوة تحب تشرب معاهم "
هزيتها وحطيتها بعينيا وقربت للشباك حليتو ورجعت غزرتلهاا نحكي
انا :"لا منحبش نتقلق منها "
تبسمت على جنب تحكي
فريحة:"قول لي عندك مشكلة مع قهوتي ريتك تشربها عادي في دار عم مصطفى "
هزيت بكتافي نحكي
انا :"مانعرفش.. ممكن.. وممكن من لوحم ماك تعرف لوحم يعمل اكثر من هكاا "
حلت عيناها فيا ووجهها تقلب.. هزت بحاجبهاا تحكي
فريحة:" ا..انت حبلة ؟"
تبسمت على جنب نحكي
انا :" اي "
عدات بيداها على شعرهاا وتبسمتلي بالسيف تحكي
فريحة:" م..مبروك "
خذيت نفس طويل وقربتلهااا.. عديت بعينيا عليهاا نحكي
انا :" يبارك فيك فريحة.. و بعد لخبر هذاا ياريتك كان تعمل همة وقيمة لروحك و يزيك ماتتلوصق ف راجلي"
ضيقت عيناها فيا تحكي
فريحة :" مافهمتكش ؟"
انا :" ميسالش تو نفهمك.. نحبك تبعد على ليث و على عيلتي..خاطر مهما عملت ليث مستحيل يغزرلك.. زايد الي تعمل فيه صدقني "
تبسمت على جنب تحكي
فريحة:" كان فما وحدة قاعدة تتلوصق هناا راهي انت قمر "
حليت عينيا على وسعهم مصدومة من كلامهاا وقلة تربيتها كيفاه تحكي معاياا هكاا.. حاولت نهدي روحي شوي نحكي
انا :" ليث راجلي فما فرق عزيزتي..انت هناا مجرد سكريتار هو عمل معاك معروف.. على هذاكاا رد بالك تخلي خيالك يسرح بيك لبعيد "
فريحة :" صحيح هو عمل معاياا معروف.. اما على الاقل انا معروفو حد الخدمة.. مش كيفك من وقت الي دخلت لحياتو ضربت لصقت..خليتو يعرس بيك بش يلملك خمجك مع الرجال و جبرتو يعيشك ف دارو...عالاقل انا عايشة ف دار بابا مع امي مش كيفك..رامية روحي عالناس..و نتلاوح من دار لدار ومحملة ناس اغراب مسؤوليتي بش يغطيو على فضيحتي .. "
بقيت جامدة ف بلاصتي نغزرلهاا ومش مصدقة لكلام الي نسمع فيه منهاا.. على قد ما غزلت منهاا على قد ماغاضتني روحي.. للحظة حسيت الدنيا ظلامت قدامي و نفس ضاع مني.. مانعرفش كيفاه هزيت يدي وضربتها بكف على قوة جهدي.. خاطر ف اللحظة هاذي بالذات مالقيتش كلام و لا تصرف اخر غير هذا ينجم يفرغ الغش والقهرة الي حسيتها...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
