حلقة 15
#أيهم_يحكي
كل ما نحاول ننسى ونطمن روحي انه الكابوس هذا بش يوفى قبل ما يبدى .. بش نكمل حياتي ونطوي الصفحة هاذي نلقى روحي نرجع لنقطة الصفر، نرجع للبداية الي نهايتها مجهولة .. اما أكيد النهاية بش تكون في صالحي انا .. صحيح نادم ونتمنى كان معملتش هكاكا .. اما لا الندم ينفع ولا الوقت يرجع لازمني نكمل حياتي حتى كان نعرف انو على حسابها وحساب الناس الكل .. مانيش بش نرضى انو حياتي تتهد.
اليوم نهار جديد .. حاسس روحي مرتاح شوي بعد ماجاء ليث .. ليث ولد عمتي تربينا مع بعضنا من الصغرة .. حاسبو كيف خويا، صحيح ما نتفاهموش وساعات نغير منو خاطر بابا يعمل عليه في كل شي و يعوضو في غيابو.. انا وليث عكس بعضنا الشي هذا الي خلى بابا يعطي فيه الثقة اكثر مني.. اما هذا ما يمنعش اني نحبو .. كنت كل ما نطيح ليث يوقفني نتحامى بيه قبل بابا، بابا كان ومازال صعيب مايحبش حتى غلطة كان ديما يقلي شوف ليث معاك تعلم منو .. نحبك تولي كيفو.. نحبك انت تاقف على ورثك وترتحني.. اما انا كنت الطفل الطايش الي يغلط وليث ينظف وراه.
قمت اليوم حبيت نحاول نبدا من جديد .. عملت دوش لبست كوستوم في النوار ريقلت شعري .. هزيت تاليفوني ومفاتح الكرهبة وهبطت بش نفطر مع امي.
" صباح الخير امي "
" هزت راسها معايا وضيقت عينيها " صباح النور، وين على خير؟؟"
" ماشي للسوسيتي .. بش نبدى خدمة من اليوم"
قربتلي وحطت يداها على راسي تمس فيا " ايهم لباس؟ عندك السخانة ولدي كسبة ؟؟"
بعدت عليها ومشيت قعدت على طاولت لفطور هزيت كاس القهوة وتلفتلها نحكي " حسيت انو لحق الوقت سايي لازمني ناقف على رزقي مش ديما تقلي انت المالك الوحيد و برا تلها برزقك"
قربت قعدت قدامي وحطت يداها فوق يدي تبسمتلي تحكي " صحيت هاكا نحبك لازمك تخلى بوك فخور بيك خاصة بعد العملة لخرا متاعك لازمك تصلح من روحك وادعي لربي انو الحكاية تتعدى على خير وصفحة وتطوى"
" ليث شعمل في الحكاية لقى حل مش هكا "
" تهنى خلي الحكاية علينا شي ماهو بش يصير وراس ولدي "
تطمنت شوي من كلامها كملت فطوري وقمت بش نخرج هكاكا و نسمع الناقوز هزيت بيدي للبون الي كانت ماشية تحل الباب وقفتها بش نحل انا في ثنيتي كيف نخرج .. حليت الباب نلقى زوز بوليسية على شوفتهم حسيت الدم جمد في عروقي واطرافي نملت .. حسيت بترهويجة كيف سمعت واحد فيهم قال
" صباح الخير .. حاشتنا بسي ايهم بن سعيد "
بلعت ريقي الي هبط كيف الشوك في حلقي بقيت نرد في النفس الي حسيتو شوي ويحبس .. صوت امي ورايا تحكي حاسيتو بعيد ياسر .. للحظة حسيت روحي غبت عالدنيا الكل.. قربت مني وحلت الباب اكثر
" تفضل .. كيفاه انجم نعاونك؟"
" حاشتنا بسي ايهم مش هاذي الفيلا متاعو؟ هو موجود؟ "
" لواه شفما لباس؟؟"
هزيت راسي معاه تنفست شوي لميت الحروف الي ضاعت بين شفايفي ونطقت "ا انا ايهم.. تـ تفضل "
" فما شكون مقدم بيك شكوى.. لازم تتفضل معانا بش ناخذو أفادتك"
حسيت ساقيا بش يرخو بيا غمضت عينيا وحليتهم فيسع تكلمت بصوت مربوث " ش شكوى ؟؟ مـ ممن شكون "
" مانجمش نقلك .. تفضل معانا وتو تعرف "
تلفت لأمي نحكي " امي كلم ليث .. تصرف امـــان امي "
" تهنى ماتخافش هاني بش نخلط وراك"
خرجت شدوني الزوز من مرفقي وطلعوني معاهم في الكرهبة لحظتها حسيت انو القوة الي قمت بيها الصباح و الاحلام الي حبيت نبدا فيها من اليوم طاحو في الماء.. تهدمو قبل ما يتبناو .. ثنية كاملة نحس في بدني يرعش .. وراسي بش يطرشق من التخمام .. عارف و متاكد انو هي الي شكات بيا ..هي عملت الي في راسها اما بش تلقاني في وجهها مستحيل كان نستسلم من اول مواجهة .
فقت من سرحتى على الكرهبة الي وقفت لقيت روحي قدام " قصر العدالة " .. لحظتها استغربت مافهمتش انا شنعمل هنا في بالي بش نمشي للمركز اما الحكاية باين اكبر من الي نتصور .. على تلفيتي نلقى الشوفور قدامي و امي هبطت تجري تتكلم " ايهم انا هنا ماتخافش .. وليث هاو في الثنية .. سوء تفاهم اكيد وتو ترجع معايا.. خليك قوي يا بابا "
هزيتلها براسي أي و كملت نمشي معاهم حسيت انو ماعنديش قوة للكلام .. الخوف سيطر عليا لحظتها دخلت معاهم..
تلفتلي واحد منهم يتكلم " استني هنا .. بش تدخل تقابل رئيس الجمهورية بش يأخذ افادتك."
" ع علاش رئيس الجمهورية ؟ علاش انا في المحكمة ؟ مش افادتي نعطيها في المركز؟ مش هكا المفروض؟"
" ما نعرفوش وتو استنى هنا شوي وتدخل "
بقيت كيف المهبول نمشي و نجي مانيش فاهم شنية صاير بالظبط و انا علاش هنا .. بقيت دقايق نستنى، دقايق تعداو عليا دهر خايف ملي يستنى فيا وراء الباب هذاكا تنفست شوي كيف ريت ليث قدامي مشيتلو نجري " ليث امان عاوني .. لازمني نخرج"
" ماتخافش هاني معاك ..خوذ نفس انا هنا معاك "
" بش تدخل معايا مش هكا ؟؟ امان ليث ماتخلينيش وحدي لداخل "
" ما نجمش ندخل تو .. لازم تقابل رئيس الجمهورية وحدك"
" ليث علاش انا هنا؟ مش نورمالمون في المركز علاه في المحكمة مافهمتش "
" خاطر هوما قدموا شكوى لوكيل الجمهورية طول.. طبيعي بش يحقق معاك هنا في المحكمة مش في المركز .. ماتخافش تو اول حاجة بش يتأكدوا من هويتك وبعد يتم التحقيق معاك .. وتبقى هنا شوي وقت لين يعيطو للي قدمت بيك الشكوى بش ياخذو افادتها وعلى حسب الي بش يسمعو وكيل الجمهورية هو يقرر كان تتحل القضية و لا لا "
قصيت عليه نحكي " انجم نتحبس معناها ؟؟؟"
حط يدو على كتفي يحكي " ما تخافش اما حط الاحتمالات الكل .. تنجم تبقى في التوقيف لين يلمو الأدلة و يشوفو كان فما شهود .. اما انا بش نحاول نخرجك تو نتصرف "
ما جاوبتوش هزيت راسي كيف سمعت اسمى خذيت نفس بالقوي وقدمت بخطوات ثقيلة خطوات مانيش عارف لوين بش تهزني .. خطوات خايف لا ما نرجعش منها.. الثنية هاذي هي الي بش تحدد مصيري.
دخلت قعدت على الكرسي كابس على يدي وساقيا ترعش هزيت راسي على صوت وكيل الجمهورية
" ايهم بن سعيد .. بناء على الشكوى الي توجهت ضدك من قيبل "قمر بن منصور" الي ادعات فيها انها تعرضت لعملية اغتصاب من قيبلك انت و صاحبك انت موجود هنا بش تقدم افادتك"
" الأسم هذا اول مرة نسمعوا .. افتراء اما معملت شي "
قص عليا و غزر في عيني يحكي" نهار 28 أفريل 20** وين كنت؟"
" ما نتفكرش .. ا اما اكيد كنت في الدار .. انا 25افريل روحت من أمريكيا بقيت في الدار مع امي متوحشها ما نتفكرش روحي خرجت "
"و شكون من صحابك الي قابلتهم في الإيامات هذوكم "
بلعت ريقي حاولت نهدي روحي شوي نحكي " عندي برشة صحاب وقابلت اغلبهم خاطر كيف ما قتلك مازالت كيف ما روحت من السفر كنت متوحشهم"
" قمر بن منصور .. قالت انو نهار 28 افريل كنت انت مع صاحبك وقتلي عرضتوها و قمتو بعملية الإغتصاب في السانية لقريبة من ***** .. كلام هذا صحيح ولا لاااا"
" لا لا مش صحيح.. انا الإسم هذا اول مرة نسمعوا معملت شي .. افتراء والاتهام هذا زور مانعرفش شكون صاحبي الي حكات عليه الحكاية مفماش منها"
" و الشنوة السبب الي يخليها تتهمك بالتهمة لكبيرة هاذي ؟""
رمشت عينيا برشة مرات و خذيت نفس نحكي
"ما نعرفش اكيد هذا افتراء لتشويه صمعتي و صمعت عايلتي "
ماجاوبنيش تلفت لراجل الي مقابلو
"أكتب .. بناءا على ادعاء قمر بن منصور بحق ايهم بن سعيد و بعد الإستماع الي شهادة أيهم بن سعيد .. و لعدم توفير الأدلة الكافية و الشهود ولنسبة احتماله الهروب من البلاد .. اتخذت القرار بتوقيف المدعي عليه أيهم بن سعيد حتى يتم الإستماع لطرف المقابل وتوفير جميع الأدلة والشهود "
غمضت عينيا وهبطت دمعة تجري على خدي. لحظتها الدنيا الكل وقفت، قادم على مصير مجهول مش عارف شنية يستنى فيا. فكرة اني بش نتوقف و نتحبس خلاتني ننقم علاها وطرف الإحساس الي كنت حاسو ناحيتها بذنب تلاشي .. هي أعلنت الحرب صحيح أما انا بش نحط القواعد متاعها. رغم الي نعرف هيا مظلومة اما مانيش بش نضعف قدام شوي مشاعر ..انا بش نكون قوي سوا ظالم و لا مظلوم اسم ايهم بن سعيد صعيب انو يتهد و النهاية انا بش نكتبها بطريقتي و مالحظة هاذي بش نكون جهنم في حياة قمر و حياة كل حد بش ياقف معاها ضدي.
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
