#ليث_يحكي
غمضت عينيا بالقوي و رجعت حليتهم على صوت صيحتها الي وصلني وهي تنادي ب اسمي.. سرعت ف خطواتي مع العون بش نبعد من هناا خاطر بلحق معادش انجم نتحمل اكثر من هكا.. خرجت معاه لبرا وطلعت ف كرهبة الشرطة الي بش تنقلني للسجن لكبير بعد ما كملنا كل الإجراءات.. ثنية وانا متكي براسي لتالي ونغزر قدامي هكاكا للفراغ.. تفكيري لكل كان ف الحكم الي سمعتو ومعاه تصويرة قمر.. مانيش نخمم ف روحي قد مانخمم فيها هي شنوة حالتهاا تو وشنوة بش تعمل بعدي.. تنهدت بالقوي من التعب الي حسيتو كل مانقول سايي حياتناا رجعت نلقى مصيبة ما اكبر حلت فوق رؤوسناا.. فقت من سرحتي على صوت الكرهبة الي وقفت.. تلفتت للعون الي قدم ناحيتي وشدني من مرفقي ونزلني.. هزيت راسي وغزرت للسجن لكبير.. للحظة هاذي مازلت مش مصدق للحال الي وصلتلو.. بقيت نمشي معاه حتى دخلناا لداخل.. وين قابلناا عون السجون فكلي يدي من المينوت ودخلني معاه للبيت صغيرة يحكي
العون :" نحي السانتور الي لابسها و الساعة من يدك و اي حاجة فوقك حطها هناا عالطاولة "
طبست راسي من غير مانجاوبو ونحيت السانتور حطيتهاا قدامو هي والساعة.. غمضت عينيا بالقوي و رجعت حليتهم وانا نغزر للخاتم الي ف صبعي.. حسيت روحي بلحق ماعنديش قوة بش انحيه ونخليه وراياا.. خذيت نفس طويل ومديت يدي بالسيف ونزعتو وحطيتو عالطاولة هو زادة.. هزيت راسي على صوت العون يحكي
العون :" تو بش تدخل يحجمولك شعرك وتغسل قبل ماتمشي لزنزانة "
تبعتو وانا ساكت ودخلت بعدو لدوش الي يخص المساجين.. غزرت للكرسي الي كان على جنب و الحلاق الي واقف.. تبسمت على جنب من غير مانشعر على اخرتي كيفاه.. قدمت بخطوات ثقيلة وقعدت عالكرسي قدامو.. كبست عالبونية متاعي اول ماسمعت صوت الة الحلاقة الي خدمت و تحطت فوق راسي.. رسيت على سنيا بالقوي اول ماحسيت بشعري بدا يتساقط فوق وجهي.. مانعرفش قداه بقيت هكاا حتى فقت على صوت العون يحكي
العون :" اياا ادخل اغسل و شد هاذم البسهم تو حتى يجيبولك دبشك "
قمت من بلاصتي وخذيتهم من يديه.. دخلت لدوش الي كان مقابلني وحطيت الدبش الي كان ف يدي على جنب.. نزعت مريولي رميتو ف القاعة وكملت نزعت الباقي.. دخلت تحت الماء بعد ماحليت السبالة.. استندت بيديا عالحيط وطبست راسي نتحسس ف الماء.. غمضت عينيا وين رجعت نخمم ف الي صار من الصباح مرة اخرى.. تفكيري لكل مع قمر وحالتهاا تو.. قلبي يوجعني كل مانتفكر دموعهاا وصوت صيحتهاا وهي تنادي ب اسمي.. كيما بقيت نخمم شنوة بش يصير بعد ليوم قد ماخممت ف اني نلقى حل بش نخرج من هناا مانجمتش حسيت روحي عاجز اني نفكر اصلا مالقيتش حتى ثغرة تعاوني بعد الاتهامات الي سمعتهم.. عديت بيديا على وجهي وعديتهم لشعري وسكرت السبالة وخرجت.. غيرت ثيابي فيسع وخرجت للعون الي بقى يستنى فياا.. خرجت معاه المرة هاذي لثنية الزنزانة.. وقفت على صوتو يحكي
العون :" اقف هنا "
وقفت وين شفتو كيف حل الزنزانة يحكي
العون :" ادخل تحرك "
كبست عالبونية متاعي بالقوي ودخلت لداخل.. حسيت بيه كيف سكر الباب بعدي.. بقيت واقف ف بلاصتي نغزر للمساجين الي وقفو قدامي وهزو رووسهم معاياا يغزرولي.. عديت بعينيا عليهم واحد واحد وقدمت تلفتت لواحد كيف وقف قدامي وربت على كتفي يحكي
عماد :" ربي يفك اسرك "
هزيتلو براسي اي نحكي بالسيف
انا :" عيشك وانت زادة "
عماد :" ادخل فما فرش فارغ هناا.. هذاكا الي من تحت "
اشرلي بيديه ناحية الفرش الي كان على جنب وغزرت للمسجون الراقد الي كان معايا فرد فرش اما من فوق.. نحكي
انا :" عيشك "
قدمت بالسيف ناحية الفرش وقعدت عالفرش.. طبست راسي وشبكت يدياا ف بعضهم وساقياا ترعش بكلهاا.. حسيت روحي تخنقت اول ماعفست الزنزانة هاذي الي كانت ظلمة شوي ومليانة بالمساجين غير ريحتهاا الي كانت ماتنطاقش.. تلفتت على جنب وحطيت لمخدة وتكيت حطيت يدي تحت راسي وبقيت نغزر قدامي شارد من فكرة لفكرة.. تلفتت على صوتو كيف قربلي يحكي
عماد :" هياا بسم الله معااناا.. ماتبقاش هكا وحدك خاطر مخك بش يسيبك.. ايجاا بيناتناا خليناا نحكيو "
استويت ف قعدتي وكبست بيديا على جبيني نحكي
انا :" ماعينيش نحب نرقد شوي "
عماد :" على كيفك صاحبي.. ارتاح شوي اما نصيحة من حد اقدم منك هناا وتعدا ب الي انت فيه.. حاول انك تتعايش مع الوضع بش تستانس فيسع.. انت باين عليك ولد ناس مش متاع تمرميد اما حاول لين ربك يحلهاا "
عديت بعينيا عليه من غير حتى كلمة.. عاود ربت على كتفي كيف بكري يحكي
عماد :" كان مارقدتش ايجا حذانا "
هزيتلو براسي باهي من غير حتى كلمة ورجعت تسطحت.. بقيت نسمع فيهم كيفاه يحكيو ويضحكو بصوت قوي.. حسيت انو صعيب علياا اني نتعايش ف وضع كيف هذاا و نتعود.. فقت من سرحتي على صوت الباب كيف تحل وصوت العون يحكي
العون :" ليث بن مراد "
عديت بيديا على وجهي وقمت من بلاصتي ناحيتو.. غزرلي يحكي
العون :" عندك زياره "
عقدت بحواجبي مستغرب خاطر كيما نعرف انو اول نهار صعيب حد يجي يزروني من عيلتي.. هزيتلو براسي باهي وخرجت معاه.. شوي وصلنا للبيت متاع المكالمات.. غزرت من وراء البلار وين شفت المحامي كيف كان قاعد.. قدمت بخطواتي ناحيتو قعدت قدامي هزيت السماعة ساكت.. غزرلي وهز السماعة هو زادة يحكي
المحامي :" شحالك مسيو ليث ؟"
انا :" عادي "
المحامي :" نعرف انو الي صار ليوم صعيب عليك.. اما صدقني انا بش نعمل كل الي يطلع بيدي ونخليك تخرج من هناا ف اقرب وقت.. بعد مانخرج من هناا بش نمشي نحضر وراق الاستئناف وانا وسي مصطفى بش نلقاو حل ماتخافش "
انا :" باهي.. اهم شي تو نحب نعرف وقتاه الزيارة ؟ نحب نشوف مرتي وعمي لازمني نحكي معاه "
المحامي :" تهنى بش نحاول نسرع ف نهار الزيارة ونخليهم يجيوك اول الاسبوع الجاي انشاالله "
هزيتلو براسي باهي من غير حتى كلمة.. عدا بعينيه عليا يحكي
المحامي :" المدام بعثتلك معاياا ساك فيها حوايجك وكل شي تنجم تستحقو.. تعدات تو لتفتيش وبعد يجيبوهالك "
تنهدت بالقوي نحكي
انا :" هي مليحة ؟انت كنت معاهم ؟"
المحامي :" كلهم ملاح ماتخافش و المدام موجودة ف فيلا سي مصطفى مع مدام رفيقة تهنى "
هزيتلو براسي باهي من غير حتى كلمة.. غزرلي يحكي
المحامي :" انا تو لازمني نمشي.. ونهارين اخرين بش نرجعلك لازمناا نحكيو اكثر بش نتفاهمو على الاستئناف "
انا :" باهي "
المحامي :" رد بالك على روحك سي ليث وماتخمم ف شي خلي كل شي علياا انا "
انا :" باهي مشكور على تعبك "
المحامي :" ماعملت شي هذا واجبي "
تبسمت من غير حتى كلمة وحطيت السماعة قمت من بلاصتي بعد ماخرج المحامي وخرجت مع العون بش نرجع لزنزانة.. شوي وقت ووصلنا ورجعت دخلت وين شفتهم رجعو غزرولي كلهم.. ماركزتش معاهم ومشيت طول للفرش.. تسطحت عليه وغمضت عينيا حاولت نرتاح شوي ومانخمم ف شي.. خاطر حسيت روحي بلحق تعبت من كل شي و مذابياا كان نغمض عينيا ونحلهم ونلقى كل شي وفى وانا ف داري تو وقمر بين يديا...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
