حلقة 41
قمر تحكي
حليت عينيا شويا شويا مع الضو الي ضرب فياا .. مانجمتش نتحرك نحس في بدني مدقدق .. عضيت على شفايفي و عاودت غمضت عينيا .. الي صار البارح عاود تعدا قدامي مرة اخرى .. هزيت روحي شوي و دورت بعينيا عالبيت مالقيتوش .. اخر مرة نتفكر كان مقابلني عالفوتاي .. و بعدها ما نتفكر شوي .. تقويت على روحي و قمت بش نغسل وجهي بقيت نغزر في المرايا لجرح الي بقالي في خدي بعد الي صاار .. كل مرة تبقالي امارة منهم .. مازالت مابريتش من جرحي لقديم نلقى روحي نواجه في جرح اخر .. غمضت عينيا و طلعت يديا لخدي بقيت نحك في الجرح بظوافري كنت كل ما نتوجع كل مانستحلى الوجيعة .. بالك وجيعتها تنسيني في وجيعة قلبي .. هبطت راسي و هربت عينيا من على لمرايا .. قداشني عايفة روحي لدرجة معادش نحب نغزرلهاا ..
خذيت نفس و رجعت للبيت بدلت دبشي و لميت شعري و خرجت .. هزيت راسي على باب بيتو قدمت بخطوات رزينة قدام لباب طلعت يدي مترددة بش ندق.. عضيت على شفايفي دقيت الباب نحكي
" ل.. ليث ؟؟ انت هنا ؟"
كيف ما جاوبنيش عرفتو مش في البيت هبطت نجري بش نشوفو اللوطة بقيت نلوج في الدار مفماش ريحتو
.. للحظة خفت لا يكون مشى و لا صارت حاجة و انا راقدة .. مشيت نجري حليت الباب ودورت عينيا .. حسيت بالدم جمد في عروقي كيف ريت برشة رجال واقفين كل واحد منهم في جهة حسيت بالخوف سرا في بدني عرفت وجودهم هناا معناها فما حاجة صارت .. بقيت نلوج على ليث حتى ريتو واقف عاطيني بظهرو .. حسيت روحي هديت شوي بشوفتو .. خذيت نفس و قربت ناحيتو اما وقفت على صوتو يحكي
" الي صار مانيش بش نعديه .. و الميساج وراه يا محمود يا أيوب انا متأكد و الزوز بش يتحاسبو "
قربت منو اكثر نحكي " ميساج شنوة ؟؟"
دارلي و بقا يدور بعينيه عليااا يحكي "عم مصطفى شوي و نكلمك لازمني نعلق "
علق التاليفون و قربلي شدني من مرفقي عقد حواجبو يحكي
" شتعمل انت لبرااا ؟؟ مش قتلك ماتخرجش "
نطرت يدي منو و عليت في صوتي شوي نحكي " ليث شصاير هنااااا ؟؟ شكون الرجال هاذم و شنوة الميساج ؟ انت شنوة مخبي عليا ؟؟"
مجاوبنيش قربلي و طبس براسو قدام وجهي هز يديه و بعدلي شعري حل عينيه فيا يحكي " شنوة الدم هذا ؟؟ شبيه الجرح صار فيه هكا ؟؟"
رمشت عينيا برشة مرات و طلعت يديا نخبي في الجرح .. حط يديه فوق يدي و هبطها .. علاا في صوتو يحكي " شبيه وجهك هكااا انطق ؟؟"
هبطت دمعة من عيني غزرتلو في عينيه نحكي " أ.. انا حكيتها "
" علاه هكاا ؟؟ ياخي صغيرة قمر بش تعمل هكااا ؟؟"
حسيت بغصة وحلت في حلقي تقويت على روحي نحكي " ك.. كيف غزرتلو تفكرت شصار لبارح و .. وتفكرت شصار النهار هذاكاا .. حبيت نفسخ اي حاجة تفكرني باهم الكل "
حط يدو على خدي مسحلي دموعي ووطى في صوتو يحكي " و انت هكا في بالك بش تفسخو ؟؟ علاه تعمل هكا في روحك يا قمر ؟؟"
هبطت راسي مالقيتش شنوة نجاوبو هزيت عينيا نغزرلو شدني من مرفقي يحكي " يزي من لبكاا و هي ادخل معايا "
هزيتلو براسي باهي و بقيت نتبع فيه حتى وصلنا لصالة قعدني و عاود خرج مانعرفش وين مشى .. تكيت بظهري عالفوتاي و غمضت عينيا.. عاودت حليتها كيف حسيت بيه قعد بجانبي و في يديه بوات فرماسي قربلي و حطلي شعري وراء وذنيا يحكي " الجرح هذا لازمو يتعقم.. طلع راسك شوي "
طلعت راسي و بقيت نتبع فيه بعينيا ساكتة كيفاه يعقملي في الجرح بسياسة .. بعدت عليه شوي نحكي
" اي يحرق ليث "
غزرلي في عينيا تبسملي يحكي " هاك طلعت مش بكاية كهو و تتشوكع زادة للا قمر "
ضحكت على كلمتو من غير ما نجاوبو بقى يحطلي في الدواء يحكي " هاني قريب نكمل ماتخافش تحمل شوي .. و رد بالك تعاود تحكو هاني نوصي فيك "
هزيتلو براسي باهي نحكي " باهي تهنى "
قام من حذايا يحكي " صحيت .. و تو خليك هنا نغسل يدي و نجيك بش نحكيو بش تقلي شبيك خارجة تجري صبااح "
"باهي "
اول ماخرج طلعت يدي و حطيتها عالجرح الي دواهولي بقيت نمسح عليه مانعرفش علااه .. تبسمت وحدي كيف تفكرت كلامو .. للحظة فرحت بلهوتو بياا ماتصورتش بش نلقى في حياتي بعد الي صار فيا شكون يخاف على جرحي و يخمم يداويني.. فقت من سرحتي على صوتو يحكي " اي احكيلي تو .. شبيك قمت و علاه خارجة هكاكا ؟؟"
عديت بلساني على شفايفي و غزرتلو نحكي " ك..كيف قمت و مالقيتكش حذايا خفت .." بلعت ريقي و كملت نحكي " ي..ياخي خرجت و دقيت على باب بيتك في بالي انت غادي اما كيف ماخرجتليش خفت لا تكون مشيت و بقيت وحدي في الدار .. حتى خالتي مفماش "
حط يديه فوق يديا يحكي "مش قتلك متخافش انا ماعندي وين نمشي و نخليك ؟ و رفيقة خرجت مشات لجيداء عندهم ما يحكيو .. "
ميلت راسي نحكي " ميسالش نسالك ليث ؟؟"
بعد يديه من عليا و عداها على شعرو يحكي
" اسال بالطبيعه"
قاومت رعشة شفايفي و شديت دموعي بسيف نحكي "علاه الرجال هاذم الكل لبرا ؟ و .. وشنوة حكاية الميساج الي سمعتك تحكي عليه في التاليفون ؟؟ امان ماتخبي عليا شي ليث "
قرب مني ويحكي " الرجال جبتهم بش يحرسو الدار و يحرسوك .. هكاكا في غيابي نبدا مطمان عليك اكثر "
" باهي و .. و الميساج ؟؟"
عض علا شفايفو و دور بعينيه على وجهي يحكي
" نحكيلك اما اوعدني ماتخافش "
الطلب متاعو زاد خوفني اكثر حسيت كرشي وجعتني و قلبي دق بالقوي هزيتلو براسي باهي نحكي
" باهي نوعدك "
حك جبينو و غزرلي يحكي "البارح وصلني ميساج ..فيه رد بالك تبعد على قمر خلاها ديما على عينيك .. على هذاكا انا جيت البارح و عديت النهار هنا .. خفت من تهديدهم.. " تنهد و كمل يحكي " اما حتى انا هنا هوما ضروك .. "
" علاه ماحكيتليش ليث ؟؟ "
" ما حبيتش نزيد نحيرك .. انت تو ابقى هناا و الرجال البرا مستحيل يقربلك مخلوق و انا معاك لداخل متخافش "
بلعت ريقي نحكي " باهي اخر سؤال؟؟"
تكا بظهرو عالفوتاي و حط يديه وراء رقبتو يحكي
" نسمع فيك اسال "
" ش.. شكون أيوب الي سمعتك تحكي عليه في التاليفون؟؟"
رجع استوا في قعدتو يحكي " المحامي متاعهم "
" و زعمة هو وراء هذا الكل ؟؟"
" مانستغربش .. انا نعرفو مليييح واحد مسخ "
تكيت بظهري عالفوتاي و غطيت وجهي بيدايا نحكي
" كل مرة يطلع واحد جديد و تطلع معاه حكاية تزيد تعقد الأمور .. ضياع الدليل اول حاجة و .."
بعدت يديا و عاودت قربت لليث نحكي " ليث زعمة موش هوما وراء حكاية الدليل الي تهز ؟؟ كيف مادخلو الرجال للجنينة ينجمو يكونو دخلو للفيرمة في غيابنا ؟؟"
"اي ينجموو .. خممت فيها لحكاية هاذي .. و صدقني كان هوما ورا لحكاية انا بش نثبت هذاا "
" ليث بش نسالك و جاوبني رد بالك تخبي علياا "
ضيق عينيه فيا يحكي " مش من شوي قتلي اخر سوال "
ذبلت عينيا نحكي " اماان ليث .. و الله هذا اخر سوال "
خذا نفس بالقوي يحكي " انشالله .. اسال هاني نسمع فيك "
" قداه نسبة احتمال اني نربح القضية من الجلسة الأولى "
حط يديه فوق يدي و كبس علاها يحكي " شوف قمر .. بش مانكذبش علييك.. حتى كان الجلسة الأولى مكانتش في صالحك .. بش نعمل المستحيل و نثبت هذا الكل في الجلسة الثانية.. في الحالات الزوز انت مش خاسرة "
تنهدت نحكي " ي.. يعني ينجم يتسيبو ؟؟"
" مانعرفش .. اما خلينا حاضرين لكل شي .. انا متأكد الي كلهم بش يشهدو ضدك .. اما شهادة رفيقة و الشهادة الطبية الي خذيتها من السبيطار وقتها و التقارير ينجمو يبدلو رأي القاضي و يخلاهم محبوسين لجلسة الثانية .. و حتى كان تأجلت للجلسة الثانية اثق فيا قمر .. انا عارف شنوة بش نعمل مليييح "
فكرة انهم يخرجو خلات دموعي تهبط .. غزرت لليث نحكي " احساسي يقلي بش تصير حاجة نهار الجلسة .. متاكدة بش يعملو حاجة "
حط يديه فوق خدي يمسحلي في دموعي بالشوي بالشوي "اششش .. مش بش يصير شي .. تهديدهم هذا بش يخليونا نخافو و نتراجعو .. اما احنا بش نكملو في لحكاية هاذي .. و بش نعمل المستحيل بش نخلاهم ما يخرجوش نهار الجلسة غير انت كون مطمانة "
طلعت عينيا فيه بقيت نغزرلو .. رمشت عينيا فيسع نحكي " باهي انشالله يصير كيف ماتحكي "
" هياا .. قوم افطر و ارجع ارتاح شوف وجهك كيفااه تاعب "
طلعت راسي معاه كيف قام قمت قدامو نحكي
" انت بش تبقى هنا مش هكا ؟؟"
" اي بش نبقى هناا .. خليك مرتاحة "
" م.. ميسالش نرقد هنا في الصالة؟؟ كيف قمت و مالقيتكش حذاياا استوحشت من البيت "
"اي ميسالش بالطبيعة .. خليك هناا .. تو نجيبلك مخدتك و غطاك "
هزيتلو براسي باهي و عاودت ترميت عالفوتاي تكيت و غمضت عينيا .. حسيت بيه كيف رجع طلعلي راسي و حط لمخدة تحتي و غطاني ..
قد مانحاول نطمن روحي بوجود ليث اما قلبي خايف و متاكدة بش تصير حاجة .. بش تخلي لحكاية مش في صالحي .. حاسة روحي مرعوبة من الي جااي.. و قد مانقنع روحي اني حاضرة اما انا لااا نكذب على روحي ... مواجهتهم الكلل نهار الجلسة عارفتها بش تهدني مرة اخرى مع كذبهم الي بش نسمعو .. و الجو الي صاير في الدار تو خلاني متوتره اكثر .. الحاجة الوحيدة الي مخليتني نقاوم لتو و واقفة على ساقيا هي وجود ليث .. مانعرفش وقتاه و لا كيفاه اما صار هو مصدر الامان متاعي ننسى خوفي و انا معاه .. و رغم الي صااااار الكل انا واثقة فيه.. هو يستحق الثقة هاذي مني ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
