#ليس_ذنبي ❤️‍🔥

حلقة 40

حلقة 40

ليث يحكي

حليت عينيا على صوت لمطر القوية .. غزرت للوقت نص نهار تعداا .. مانعرفش كيفااه رقدت للوقت هذا
.. ليلة كاملة عديتها و انا نخدم عالقضية .. كل ما الوقت يقرب كل ما نحس بالخوف اكثر .. اما مالازمنيش نبين قدام قمر .. بعد ما ريتها البارح كيفاه خايفة لا يكذبوها و تخسر ما لازمنيش نزيد في خوفها بالعكس لازمني نطمنها اكثر .. هزيت روحي و قمت لبيت البانو عملت دوش و خرجت .. حضرت روحي بدلت دبشي .. هزيت التاليفون و المفاتح و خرجت طلعت في الكرهبة شديت ثنية البيرو .. هبطت راسي على صوت الميساج الي وصلني .. جبدت التاليفون شفت النومرو اول مرة نراه حليت الميساج و قريتو .. لحظتها قلبي ضرب بالقوي .. شديت فراان و بقيت نقرأ فيه مرة و ثنين
" خلي عينينك على قمر .. ننصحك ما تبعدش علاها لحظة .. خليك معاها في كل خطوة هي تخطيها..  "
عديت بيديا على رقبتي و كبست علاها تكيت براسي لتالي حسيت الدم متاعي فور .. كنت عارف انهم مش ساكتين اما مش يوصلو بتهديد واضح كيف هذااا ..خدمت الكرهبة فيسع و بدلت ثنيتي للدار لازمني نطمان علاها قبل و بعد تو نتصرف و نعرف شنوة وراء الميساج هذاا .. بقيت نسوق و بالي الكل فيها هي خايف لاتكون صارتلها حاجة في غيابي و مانخلطش علاهاا .. للحظة ندمت على خروجي من الدار مكانش لازمني نخلاها وراياا مهما يصير.. اول ما وصلت هبطت نجري من الكرهبة .. دورت المفتاح و حليت الباب .. دورت بعينيا عالدار و نعيط " قمرررر.."
بقيت ندور من بيت لبيت و هي مفمااش .. خذيت نفس و الروح رجعت فياا شوي كيف ريتها واقفة في الكوجينة تطيب .. لحظتها خوفي الكل تلاشى و نسيت انا علاه جيت .. ربعت يديا و تكيت عالباب بقيت نتبع فيها بعينيا كيفاه تقضي و تتحرك .. كانت لابسة روبة قطن في الازرق .. شعرها كان محلول و مبلول واصل لنص ظهرها يتحرك معاها كل ماتتحرك .. ريحتها الي كيف ريحت الياسمين الي حفظتهاا و انجم نفرقها على روايح الدنيا الكل كانت ديما سابقتها وواصلتني .. ضيقت عينيا و تبسمت كيف ريتها تحاول تتطلع على طراطش صوابع ساقيها بش تجبد الكيسان .. قربت منها نحكي
" كيف انت قصيرة هكاا شملازك بش تتطلع "
دارتلي و طيحت الي كان في يداها غمضت عيناها و حلتهم بقات تلهث و تحكي "ليث فجعتني .. وقتاه جيت انت؟"
بقيت نغزر لعيناها لكباار الي حالتهم فيا كل مرة نبقى عاشق في لونهم الي يسحر  .. فقت من سرحتي فيها و بعدت علاها مديت يدي جبدتلها الكاس الي كانت تحب عليه نحكي " تو جيت ماعنديش برشة.. شتعمل انت ؟"
هزت بكتافها تحكي " شي .. اما جعت و خالتي خرجت.. حبيت نطيب حاجة "
نحيت الفازت متاعي و قعدت عالكرسي مقابلها نغزرلها ونحكي " وين مشات رفيقة ؟؟ كيفاه تخليك وحدك ؟؟؟"
دورت راسها غزرتلي و رجعت تكمل تقص في الخضرة تحكي " قالت عندها قضياات .. و زيد الدار مسكرة ماتخافش علياا و قتلك معادش نحل لحد و ندخل حد اتهنى.."
دارت تغرزلي حطت شعرها وراء وذناها تحكي
" انت علاه جيت ؟؟ فما حاجة جديدة ؟؟"
" لاا .. لا مفما شي اما حبيت نجي نطمان عليكم "
" امم .. ماتخافش احنا لباس .. برا كان عندك خدمة ما تتعطلش "
تبسمتلها نحكي " انت تطرد فيا تو ؟؟"
عقدت بحواجبها تحكي " لاا .. اما مانحبش تتعطل على خاطري .. احنا لباس كيف ما قتلك "
" لا بش نبقى هناا ليوم ماعنديش خدمة .. بش نستنى رفيقة حاجتي بيها "
ماجاوبتنيش عطاتني بظهرها و دارت تكمل في الماكلة .. جبدت التاليفون و رجعت قريت الميساج .. كنت ناوي نطمان علاها و نمشي نشوف شكون وراه مع اني عارف و متاكد شكون الي بعثو و بش نخليه يخلص حق تهديدو هذا و ينسى وحدة اسمها قمر .. اما كيف لقيتها وحدها ما نجمش نخلاها حتى تجي رفيقة و نطمن علاهاا معاها .. هزيت راسي معاها كيف قربتلي تحكي " تحب تاكل معايا ؟؟ نحطلك صحن ؟؟"
تبسمتلها نحكي " و الله بعد الريحة لبنينة هاذي مانجمش نقول لا "
تبسمتلي و بقات تحضر في الطاولة و انا نتبع فيها بعينيا.. حسيتها كانت مرتاحة و هذا الي فرحني .. كيف نبدا معاها ننسى الي صاير و ننسى غشي منها من كلامها اخر مرة .. كل مرة نبقى بيني و بين روحي نلوجلها عالاعذار المهم نلقى حاجة تلغي غشي منهاا .. حطتلي الصحن قدامي تحكي " تفضل "
" عيشك "
قعدت قدامي و بدات تاكل .. كل ما تبدأ قريبة مني كل ما نزيد نثبت في تفاصيلها .. رغم سكوتها اما عيناها كانت تحكي .. شفايفها الي اول مرة نثبت فيهم كانو روز و صغار بوسة الخال الي قريبتلهم زادت زينتهم.. يداها الصغيرة الي كانت شادة بيها شعرها بش تاكل على راحتها .. كل حاجة فيها تخليني غارق اكثر .. عديت بيديا على وجهي و هبطت راسي ناكل معاها من غير حتى كلمة .. هزيت عينيا فيها كيف سألتني
" عجبك ؟؟"
" اي .. يعطيك الصحة "
عضت على شفايفها و دورت بعينيها على وجهي تحكي "حكيت مع جيداء؟؟ مفما شي جديد؟"
نحيت لمغرفة من يدي و خذيت الكاسة الماء شربت منها هبطتها من يدي و غزرتلها نحكي " حكيت معاها.. البارح بعد ما وصلتك قابلتها .. كل شي حاضر ماتخافش و في الليل انا بقيت نخدم زادة و تاكدت من كل شي .. ماتخمم في شي قمر .. كل شي بش يتعدا لباس "
تبسمتلي تحكي " انشالله كل شي يتعدا و هذا الكل يوفاا "
حكيت على جبيني و غزرتلها نحكي " ما خممتش بعد ما يوفى هذا الكل شنوة بش تعمل "
تنهدت تحكي " لااا .. ماعنديش حاجة اهم من القضية نخمم فيها تو "
" لاا عندك مستقبلك .. القضية بقدرة ربي رابحتها.. و بعد هذا لازم تخمم في روحك .. ما قتليش انت لوين قارية ؟"
" خذيت الباك اما ماكملتش .. وقتها بعثوني للعاصمة اما مانجمتش نخلي امي الله يرحمها "
"اي قمر مفاتك شي .. بعد ماتوفى الحكاية هاذي .. كمل اقرا و ابني مستقبلك من جديد .. وصدقني كان تحتاجني وقتها زادة بش تلقاني معاك .. غير انت متايسش "
" ماخممتش فيها لحكاية الحق .. حسيت انو ماعنديش الحق بش نخمم في المستقبل و نحلم "
" لاا ماتقولش هكاا ..الدنيا مازالت قدامك و بش تاقف على ساقيك من جديد ..خلي عندك عزيمة و ماتسلمش "
هزتلي براسها باهي تحكي " انشالله.. غير تتعدا لحكاية هاذي على خير و بعد تو نخمم في كلامك والله "
قمت من بلاصتي نحكي " انا بش نطلع لفوق .. يعطيك الصحة عالفطور "
" صحة و بشفاا .. انا بش نخرج شوي لجنينة "
" باهي الدنيا باردة البس مليح و ماتخرجش لبراا "
" تهنى "
خليتها و طلعت للبيت بقيت ندور كيف المهبول مانجمتش ننسى الميساج الي وصلني .. لازمني نلقى حل بش نحمي قمر اكثر من هكااا مانجمش نخلاها وحدها حتى مع رفيقة مانجمش نطمن .. هزيت التاليفون و طلبت نومرو نحكي " الو .. صباح الخير عم مصطفى "
"صباح الخير ولدي "
خذيت نفس نحكي " بش نطلب منك حاجة .. ماذابيا تعاوني "
" بالطبيعة نعاونك قلي شنوة تحب "
" نحبك تبعثلي شكون من رجالك لدار .. قمر حياتها في خطر و لازمني نحط  شكون يحرسها في غيابي "
" غالي و طلب الرخيص.. تو نبعثلك تو زوز رجال يبقاو قدام الداار "
" و حاجة اخرى .. فما نومرو نحبك تعرفلي شكون صاحبو .. انا شاكك في زوز .. و نحب ما نخطي الخطوة كان ما نكون متاكد شكون منهم .. خاطر كل واحد فيهم بش نحاسبو بطريقة "
" اطمن زادة .. ابعثلي النومرو في ميساج .. ساعتين و يكون الا سم عندك "
" عيشك عم مصطفى.. ريي يخليك "
" من غير مزية ولدي "
علقت التاليفون بعثتلو الميساج  و ترميت عالفرش غمضت عينيا بش نرتاح شوي .. مخي بقى مرة يسرح في الميساج و شنوة وراه و فاش يخططو لقمر و مرة يسرح فيها هي و الدقايق الي نعيشهم معاها رغم الي كل شي بسيط اما نحسهم اهم دقايق يتعداو في نهاري .. حليت عينيا و تنطرت من الفرش على صوتها تصيييح باسمي حسيت قلبي خظ شوي و ياقف .. حليت الباب و هبطت نجري في الدروج ساقيا اعلى من راسي نلوج علاها .. خرجت لجنينة مالقيتهاش بقيت نجري حتى وصلت لأخر الجنينة من تالي هزيت راسي مع الخيال الي تحرك و جرى بعيد عليا و ماعرفتوش شكون  .. هبطت راسي ريتها كيفاه كانت طايحة و روبتها مقطعة حسيت الدم نشف في عروقي عالمنظر الي نرا فيه .. روبتها مريشة من الفوق حتى حوايجها الداخلية بانت .. كتفها مخبش بالدم .. قربت منها نجري طبست على ركايبي مديت يدي بعدت شعرها الي كان هايج و مغطيلها وجها .. وجها كان احمر .. حليت عينيا عالجرح الي في خدها .. عيناها كانت مدمعة و ضايعة.. فمها كان احمر و طراس صوابع باينين عليه و على خدها شفايفها كانو يرعشو و بدنها يرعش اكثر ..
اول ما قربتلها ترمات عليا و حشات راسها في صدري و يداها الزوز كانت تحاول تغطي بيهم في بدنها العريان هزيت يديا و حضنتها كبست  علاها بالقوي بقيت نمسح عليها و نحكي " قمر شكون عمل فيك هكااا ؟؟ شصاار "
كانت تبكي بالشهقة صوتها يرعش و تحكي  "ل..ليث .. ليث خفت .. كانو زوز حتى هوما .. زوز شدوني .. "
علي كلمت شدوني حسيت بالدم جمد في عروقي شديتها من اكتافها بعدت علاها و نحيت الشوميز متاعي و حاولت نلبسهالها .. كانت تبكي و تهتري في كلام مفهمتوش .. كانت مسلمة بقات تبع فيا و تلبس في الشوميز بدنها كان مرخوف كيف الشوليقة .. قومتها من بلاصتها و قعدتها عالكرسي نحكي
" ارتااح و خوذ نفس و احكيلي شنوة صار "
قوات في بكاها و صوت شهقتها تحكي " بق.. بقيت ندور في الجنينة حتى وصلت هنااا .. تلهيت انظف في الزريعة الي غادي على تلفيتي نلقى زوز قدامي .. م... ماعرفتش منين دخلو جيت بش نصيح اما واحد سكرلي فمي و لأخر بقا يقطعلي في حوايجي من الفوق "
كبست عالبونية متاعي نحكي "و.. و شعملك اخر؟؟؟"
" شي شي "حطت يداها علي شعرها كبست عليه تبكي و تحكي "خ .. خفت لا يعملو فيااا كيف لخرين .. حسيت روحي في نفس الكابوس الي صارلي قبل .. خفت لا انت ماتلحقنيش ليث و يصير فيااا كيف اول مرة ...ت .. ت.. ترعبت ليث .. وجوهم كانت تخوف .. ماتخلينيش ليث اماان ماتخلينيش .. خليك معايا .. "
هبطت على ركايبي مقابلها هبطتلها يداها من فوق شعرها .. مسحتلها الدم الي كان عالجرح الي في خدها و مستحلها دموعها معاه نحكي "اششش .. ماتبكيش مانيش بش نخليك انا معاااك .. يزي قمر .. اهدى و احكيلي قالولك حاجة ؟"
هزتلي براسها و دموعها هبطو اكثر تحكي " اي اي .. قالولي سلم على راجلك "
عضيت على شفايفي و قمت من حذاها ندور كيف المهبول.. هذا الكل مش صدفة اول حاجة الميساج و الي صار تو متاكد وراه حاجة .. و شنوة يقصدو بسلم على راجلك .. حسيت روحي في دوامة و لغز مش عارف الحل متاعو .. قربت منها وقومتها بشوي اول ماقامت ساقيها رخت بيها .. طبست و حطيت يد على ظهرها و يد تحت ساقيها و طلعتها في حملتي كبست علاها كيف تكات براسها على كتفي  .. رعشة بدنها سرحت في بدني .. صوتها و هي تهتري و دموعها الي هابطين فوقي وجعولي قلبي و خلاوني نلعن روحي الف مرة كيفاه صار فيها هكا في وجودي  .. اول ما دخلتها طلعتها لبيتها و حطيتها عالفرش .. قربت للخزانة جبدت منها روبة اخرى و عطيتهالها نحكي
" قمر .. قوم بدل حوايجك .. انا هاني البرا"
هزت براسها لا تحكي " امان ماتخلينش امان.. خليك حذايااا  "
قربتلها نمسح على شعرها نحكي " هاني قدام الباب كمل البس و تو ندخلك باهي .. مانيش بش نبعد عليك و الله "
" ب..باهي "
خليتها تبدل و دخلت لبيتي لبست شوميز اخرى بعدها هبطت للكوجينة عبيتلها كاس ماء و عاودت طلعت نجري دقيت الباب نحكي
" قمر  انجم ندخل "
" اي"
دخلت نلقاها متكية عالفرش و دموعها مازالو هابطين اول ماشفتني هزت روحها شوي.. قعدت بجنبها و شديت كاس الماء قربتلهولها نشرب فيها و نحكي
" شنوة تحس في روحك تو .. خير شوي ؟؟"
بعدت الكاسة من على فمها و تهز لراسها لااا تحكي " لا لا مانيش لباااس ..خ.. خايفة والله.. ليث شكونهم علاه عملو فيا هكاكا؟ ع.. علاه انا مكتوبلي بش نعيش الخوف هذا حياتي الكل ؟؟ حطت يداها على وجها تبكي و تحكي " س.. سكرولي فمي .. حتى بش نعيطلك مانجمتش .. خفت لا مانلقاكش ليث و يتعداو عليا حتى هوماا .. واحد فيهم عمل كيف لأخر بالضبط.. ق..  قطعلي حوايجي و عينيا تغزر .. "
بقيت نغزر لحالتها باهت لوين وصلت مرة اخرى.. هزيت يديا و دورتهم علاها قربتها ليا حضنتها و كبست علاها نحكي " سامحني خاطر خليتك تعيش هذا الكل و انا حذااك .. اششش وفات وفات  "
هزت راسها تغزرلي بعينيها الذابلين تحكي " لا ماوفاتش ليث .. شي ما وفا و شي ماهو بش يوفااا .. تعبت من الي صاير فياااا .. نحب نموت و نرتاح من هذا الكل نرتاح من الخوف و لعذاب هذاا "
بعدتها علياا و طلعت يدي حاوطتلها وجهها بيديا عديت صبعي تحت عيناها نمسحلها في دموعها نحكي
" اششش معادش تحكي هكااا .. انا بش نطلعهم شكون و نخلاهم يتحاسبو على كل دمعة هبطت من عينيك .. بش نخلاهم يندمو على عملتهم و يخلصو حق خوفك هذاا "
دورت بعيناها على وجهي تحكي " علاه عملو فيا هكااا ؟؟ انا شنوة ذنبي ليث؟؟ شعملتلهم "
" انت ما عملت شي .. و انا بش نعرف علاش عملو هكاكا ماتخافش .."
بعدت علاها و قمت نحكي " اتكى شوي و حاول انك ترتاح "
هزت راسها معايا و هبطو دموعها اكثر تحكي " بش تمشي ؟؟ بش تخليني ؟؟"
" ماعندي وين ماشي بش نهبط اللوطة نخليك ترتاح .. غمض عينيك و ارقد انا هنا ما يمسك حد "
خليتها تتكا غطيتها غزرتلها كيفاه تحاول تغمض في عيناها و مش منجمة من الخوف .. مانجمتش نخلاها مشيت قعدة عالفوتاي مقابلها.. اول ما شفتني قدامها ارتاحت غمضت عيناها و رقدت .. بقيت نغزرلها و نخمم في الحالة الي كانت فيها .. كيفاه انا ماخلطتش علاها و كان صارتلها حاجة كنت مستحيل نسامح روحي .. قررت اني بش نتراجع في قراري و بش نرجع لدارر.. لازمها نكون قدام عيني .. حتى بوجود الرجال الي بش يبعثهم عم مصطفى مستحيل نطمن .. مدام وصلو و دخلو لداري يعني لحكاية اكبر من هكاا و الي عملوه اكيد وراه حكاية ما أكبر.. لازمني نكشف عملتهم و غايتهم منها قبل نهار الجلسة اما حاسس روحي مربوط .. لا نجم نخرج نحاسبهم و نخلاها و لا انجم نبقى مربع يديا هكااا .. غمضت عينيا و تكيت راسي عالفوتاي بش نرتاح شوي حسيت روحي تهديت كيفاها بعد الي صاار.