حلقة 96
#ليث_يحكي
حليت عينيا على ضو الشمس لي ضرب فيا.. تلفتت شوي وبقيت نغزرلها كيفاه كانت راقدة وحاشية راسهاا ف رقبتي فرد وقت بقيت نخمم فيها و ف حالتهاا الليلتين الي فاتو.. حسيت قلبي وجعني عليهاا رغم اني غزلت من التصرف متاعهاا الا اني كنت حاسس بيهاا الشي الي خلاني مش عارف كيفاه نتصرف معاهاا بش نخليها ترتاح اكثر.. نفسيتها ياسر تاعبة من الموضوع هذاا الي بقات تخمم فيه ليل ونهار ورغم اني حاولت نطمنها قداه من مرة اما ماننجمتش.. بعدت عليهاا شوي مانحبيتش نفيقها وقمت دخلت لسال دوبان خذيت دوش خفيف ولبست حوايجي وريقلت اموري ورجعت للبيت.. عقدت بحواجبي كيف ريتها مازالت راقدة للوقت هذاا.. عرفتها تاعبة ماحبيتش نفيقهاا.. نزلت تحت ودخلت للكوجينة بقيت نحضر ف الفطور.. تلفتت اول ما سمعت صوت حثلتهاا وراياا.. تبسمت و انا نشوف فيهاا بالبيجاما و مازالت ناعسة.. تكيت عالرخامة نحكي
انا :" صحة النوم حبي"
قربتلي ووقفت قدامي.. غزرت للفطور و رجعت غزرتلي تحكي
قمر :" صباح الخير يا روحي.. علاش ما فيقتنيش راني انا حضرتلك لفطور ؟"
قرصتهاا من خشمها و تبسمت نحكي
انا :" حبيت نخليك ترتاح.. وزيد انا حضرت كل شي.. برا اقعد شوي و الطاولة تحضر "
طلعت على طراطيش صوابعها و باستني من خدي تحكي
قمر :" عيشك يا روحي.. ربي يخليك ليا "
عطاتني بظهرها وقدمت لطاولة قعدت حتى كملت حضرت كل شي وقعدت معاهاا .. بقينا نفطرو.. هزيت راسي شوي غزرتلها نحكي
انا :" كيفاه تحس ف روحك ليوم ؟"
قمر :" لباس.. نحس ف روحي خير "
انا :" اياا باهي قمرتي.. نحبك الفترة هاذي ماتخمم شي.. ماتنساش عندك امتحانات نحبك تركز ف قرايتك "
عدات بلسانها على شفايفها و غزرتلي تحكي
قمر :" ليث.. انا مانحبش نمشي للفاك.. يعني مانخممش نمشي نعدي الامتحانات "
انا :" فاش تحكي قمر ؟؟ يعني تقرأ هكاكا بالفارغ ؟ تتعب من غير ما تمتحن ؟"
قمر :"ليث امان منحبش نرجع غديكا"
شديتها من يداها وكبست علاهاا نحكي
انا :" ايجا عندي "
هزت روحا وقامت قربت مني جبدتها قعدتها في حجري وغزرتلها نحكي
انا:"علاش..خايفة؟!"
قمر:"اي خايفة برشا ليث منحبش نمشي..م معادش نجم نبقا مطمنة ن نخاف كان يعملولي شي كيف اخر مرة "
هزيت يدي ومسحت دمعتها لي طاحت نحكي
انا :" ششش معقولة تخاف وانا معاك.. نوعدك مش بش نخلي حد يقرب منك.. انا بش نوصلك و نستناك حتى تكمل.. منيش بش نخليك وحدك طمن "
قمر :"ب بلحق...ي يعني تمشي معايا "
انا :"اي انا بش نبقا معاك في الفاك وقريب للقاعة لي تعدي فيها بش نستناك تكمل ونروح بيك.. اصلا هو اسبوع واحد تعدي فيه "
قمر :" باهي.. ك هكا ميسالش "
انا :" على هذاكا تو نحبك تركز ملييح بش تنجح.. تفاهمناا "
تبسمتلي تحكي
قمر :" باهي تفاهمنا "
انا :" اياا كمل فطورك "
قمر:" ليث نحب نمشي لدار خالتي..مدام بش نبدا نقرا للامتحانات مش بش نجم نمشي مبعد نحب نشوفها ونشوف كرم "
انا :" اي اكييد يا روحي.. اصلا انا عندي شوي خدمة نوصلك و بعد نرجع نروح بيك "
قمر :" باهي "
هزيت يدي وخذيت قطعة جبن نحكي
انا :" هيا افتح فمك "
ضحكت وكلاتها من يدي غززرتلي في عينيا وعدات بيدها على خدي تحكي
قمر :"ممم بنينة ياسر من يدك "
حليت عينيا على كلامها.. مديت يدي بعدت كول شوميز نحكي
انا:" قمررر..مش وقتك جملة"
قمر:"شعندي عملت انا "
انا:"كمل افطر برك "
كملنا فطرنا و قامت هي طلعت للبيت حضرت روحهاا و رجعت نزلت.. قربتلي تحكي
قمر :" نمشيو ؟"
انا :" اي هياا "
خرجنا مع بعضناا و طلعنا ف الكرهبة وشدينا الثنية للفيلا.. شوي وقت ووصلنا راكيت الكرهبة على جنب وغزرتلها نحكي
انا :" أيا انزل.. نكمل الي عندي و نجيك "
قمر :" بش تتأخر؟؟"
انا :" لا ياروحي نحاول نجي بكري "
قربتلي شوي وباستني من خدي تحكي
قمر :" باهي رد بالك على روحك "
انا :" باهي "
استنيتها حتى دخلت للفيلا واطمنت علاها.. خدمت لكرهبة وشديت ثنية لمازن.. اول ما رجعت من اسبانيا كلمني وخبرني لي منحاولش نتصل بيه ولا نقابلو.. خاطر اكيد بش نكون مراقب لفترة لي تعدات.. ولبارح بعد ما روحت بقمر لقيتو كلمني وطلب نتقابلو.. شديت فران قدام لبيرو متاع لمحامي لي عطاهولي.. ظاهر فيه تابع ليهم.. نزلت ودخلت.. اول ما عطيتهم اسمي دخلوني.. قابلني قاعد ورا لبيرو.. دخلت وضحكت نحكي
انا :" ياسر وتاتك المحامات "
ضحك يحكي
مازن :" اي.. هاني نتعلم منك "
ضحكت وقعدت على لكرسي مقابلو نحكي
انا :" اي.. شنوة لحكاية نجمتو توصلو لشي.. نجمتو تعرفو بلاصة اختي ؟!"
قام من بلاصتو وهز دوسي في يديو قرب وقعد في الكرسي لي مقابلني حط دوسي قدامي وغزرلي يحكي
مازن :" بعد الاعتداء لي صار عليك..تاكدنا لي طبيب هاذا هو العضو لي متورط معاهم.. خاطر كنا شاكين في برشا اطباء.. اما ردة فعلهم كيف قربت توصلو اكدتلنا شكوكنا لي هو فرد منهم "
انا :" شقاعد تقول مازن.. يعني هو معاونش اختي.. هو زادة متورط معاهم ؟؟"
هز يدو وفتح الدوسي يحكي
مازن :" في **/*/**** تم الابلاغ على اختفاء مجموعة من الطالبات.. لي ثبت فيما بعد انو تم الاعتداء عليهم وتقطيع جثثهم
في **/*/**** في مشفى ****** تم الابلاغ على عمليات غير قانونية تمت في الخفاء.. الاعمال هاذي لكل اسمها مرتبط بالطبيب هاذا "
بقيت نغزلو مستغرب نحكي
انا :" ي يعني...؟ "
مازن :" العصابةهاذي.. عصابة تجارة بالاعضاء.. متورطة بخطف اللاشخاص ولا اجبارهم للخضوع لعمليات.. وتقوم ببيع الاعضاء في السوق السوداء.. وخالك واحد منهم "
بقيت نغزلو مصدوم من لكلام لي قالو.. قد ما تخيلت خالي ميسواش اما مش للدرجة هاذي.. نحكي
انا :" ب باهي.. و.. واختي ي بعني.. هي زادة متورطة معاهم ؟؟"
غمض عينيه بالقاوي ورجع حلهم.. غزرلي درا كيفاه يحكي
مازن :" اختك ضحيتهم "
حسيت دم جمد في عروقي على لكلمة.. غمضت عينيا بلقاوي وحاولت نستوعب كلامو هزيت يديا نرعش وعديتهم على وجهي
انا :" ا.. انت شقاعد تخرف مازن.. نظن فما غلطة "
هزلي براسو لا.. قمت من بلاصتي وغزرتلو نحكي
انا :" ماازن مستحيل لي تقول فيه اختي حية رفيقة اكدتلي.. اكيد فما غلطة..... "
قص عليا يحكي
مازن :" الاحداث لي ربطناها.. اختك تعملها تحاليل هنا قبل ما تسافر.. لي يثبت انهم حاولو يتاكدو من تطابق انسجة متاعها مع الشخص لي بش ينقلولو.. بعدها سفر طبيب في نفس رحلة خالك.. وبعدها اختفاء اختك.. كلهم ياكدو شكوكنا.. كيما بعد ما رجعنا استجوبنا واحد من لعصابة لي شديناهم.. اعترف لي لعملية تمت في اسبانيا و اختك كانت وحدة من الضحايا "
بقيت نغزرلو جامد ف بلاصتي.. دمعة سخونة هبطت من عيني على لكلمة حسيت رجليا خانوني وبدني تخدر ترميت فوق لكرسي ونزلت راسي حسيت بدني رعش و دقات قلبي بقات مسموعة.. حسيت روحي وسط كابوس.. الاحتمال هاذا مجاش لبالي جملة.. لقيت روحي مش مصدق حتى حرف.. مش مصدق نهاية اختي كيفاش كانت.. هزيت راسي على يد مازن لي تحطت على كتفي يحكي
مازن :" ليث نعرف لي سمعتو مش ساهل عليك.. اما انا قتلك من الاول متتأملش برشا "
انا :" علاش ماقتليش من الاول مازن علاش خليتني نجري ورا كذبة ؟"
مازن :" خاطرني انا زادة تأملت لي خالك مايكونش حيوان لادرجة هاذي.. وميتاجرش ببنت اختو "
غمضت عينيا بلقاوي وقمت من بلاصتي.. كبست عالبونية متاعي نحكي
انا :" وانا نعرف كيفاش بش ناخذ حقها منو "
مازن :" ليث استنا.. متنجمش تمشيلو هكا بش تفسد كلشي "
حليت عينيا على وسعهم و عليت ف صوتي نحكي
انا :" ماااايهمني في شي تسمع فيااا.. انت تو جاي تقلي اختك ماتت.. ومش اي موتة... تحبني نبقا هادي ؟"
مازن :" شباش تعمل يعني؟؟"
انا :" الي كان لازم نعملو من قبل.. نهاية محمود بش تكون على يدي.. ولي خلقني انا لي بش ناخذ روحو "
مازن :" بش تمشي وتقتل محمود باهي.. وبعدها كان عشت يومين اخرين يكونو عملو فيك مزية.. وعيلتك بعدك خممت فيها.. مرتك.. كلهم بش يدفعو ثمن "
بقيت نغزرلو ساكت..حسيت الدنيا ظلامت قدامي وماعاد نرا شي.. الشي الوحيد لي نحب نعملو تو اني نمشي لمحمود ونحاسبو على كلشي.. هزيت راسي معاه كيف رجع تكلم
مازن :" اهددا ومتخليش غشك يعميك.. نعرف لي عرفتو صعيب عليك.. اما نهاية خالك بش تقضي عليه هو كهو.. لي كانو مشتركين في الجريمة بش يبقاو احرار.. كان تحب تاخذ حق اختك بلحق اصبر.. قربنا برشا وبش نطيحو بالعصابة لكل وقتها كهو تنجم تقول لي انت خذيت حقها وحق برشا ناس كانو ضحيتهم "
عديت يدي على وجهي وخرجت من لبيرو.. لكلام لي سمعتو منو حسيتو هدني وقيدني فرد وقت.. كرهت شعور لعجز هاذا الي انا فيه كل مرة منجمش نحاسبو على شي لي خلاني نعيشو.. لعذاب لي تعذبتو في صغري ..اختي لي تاجر بيها كلشي.. طلعت في الكرهبة هزيت التلفون بالسيف وبعثت ميساج لعم مصطفى.. خدمت لكرهبة وشديت ثنية الدار.. حليت الباب ودخلت للصالة نحيت الفاست و ترميت عالفوتاي.. دموعي لي كنت شادهم بالجهد لقاو طريقهم على خدي اول ما غمضت عينيا.. الصور و الاصوات لي هدت عليا حسيتها زادت في عذابي.. تشويت وانا نتذكر في صوتها وهي تناديلي.. في فرحتها وقت تلاقيني وانا راجع من لقراية.. انا كنت خايف لا نلقي اختي وحدة من لعصابة.. كنت خايف منعرفش نتعامل معاها وقتها.. اما لقيتها ضحيتهم.. في اللحظة هاذي تمنيت كان بقات عايشة كهو كنت مستعد نقبلها بكل حالاتها.. مستعد نعاود نربيها ونرجعها للطريق.. المهم انها تكون بخير.. اما هاذا لكل طلع حلمة.. حلمة كانت نهايتها كابوس....
#قمر_تحكي
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
