#ليس_ذنبي ❤️‍🔥

حلقة 91

حلقة 91
#قمر_تحكي

حليت عينيا شوية شوية على ضو الشمس الي ضرب فياا.. تبسمت اول ماتفكرت شنوة يستنى فياا ليوم وين دقات قلبي قوات اكثر من التوتر الي حسيتو.. للحظة هاذي مش مصدقة انو ليوم نهار عرسي و من الليلة هاذي بش نصير مع ليث و نكمل معاه بقية حياتي.. الفكرة وحدهاا كانت كفيلة بش تخليني ننسى كل شي صار ومانخمم كان ف حياتي الجاية معاه الي صارلي شهور و انا نحلم بيهاا.. هزيت روحي فيسع على صوت الباب الي تحل.. تبسمت اول ما ريت خالتي الي دخلت وقدمت ناحيتي.. هزت بحاجبهاا تحكي
رفيقة :" لتو راقدة انت ؟ قوم فيسع حضر روحك و افطر معادش وقت "
انا :" لا لا سيبون هاني قمت.. نحضر روحي فيسع و نخلط عليك "
قمت من بلاصتي فيسع قدمت لخالتي بستهاا ودخلت نجري لتوالات.. غسلت حالتي و لميت شعري.. وخرجت غيرت ثيابي وقدمت ناحية بوات الروبة هزيتهاا هي وساكي الي حضرت فيها كل شي ونزلت لتحت.. ريت خالتي معاهاا خالتي فاطمة قاعدين يفطرو قدمت ناحيتهم.. حطيت الي ف يدي على جنب وقعدت بجنبهم نحكي
انا :" صباح الخير "
فاطمة :" صباح النور يا عروسة.. اشه محلاها بنتي "
انا :" عيشك خالتي ربي يخليك "
رفيقة :" افطر فيسع .. ايمن يستنى فيناا "
هزيتلها براسي باهي وخذيت فنجان القهوة شربت منو شوي ورجعت غزرت لخالتي تحكي
رفيقة :" هزيت كل شي ؟ مانسيت شي مش هكا ؟"
انا :" اي اي خالتي كل شي ف الساك هاذي "
رفيقة :" و صباطك ؟"
انا :" اي حطيتو "
رفيقة :" رد بالك نوصلو غادي و تقلي نسيت حاجة.. نعرف مخك خاطر "
ضحكت نحكي
انا :" ههه خالتي والله حاستك انت متوترة اكثر مني "
رفيقة :" لا مش متوترة اما انا عشت هذا قبلك و نعرف أكثر منك ف الحاجات هاذم "
انا :" ههه بالله ؟"
رفيقة :" والله على هذاكا قاعدة نفكر ف كل شي "
انا :" تهنى خالتي كل شي حاضر .. لبارح حضرت كل و بقيت نشوف كل مرة "
هزتلي براسهاا باهي و بقينا نفطرو و كل مرة نحكيو ف حاجة.. وجود خالتي و فرحتها لياا الي كانت واضحة خلااني نتخطى احساس الفقد الي كنت حاستو.. تمنيت كان امي كانت موجودة بيناتنا تو هي زادة وتفرحلي ف نهار كيف ليوم اما هذا مش مقدر.. فقت من سرحتي على صوت خالتي تحكي
رفيقة :" اياا اقف معادش وقت "
هزيت كاسة الماء شربتها الكل من غير نفس و قمت فيسع هزيت حاجاتي ف يدي وخرجت مع خالتي.. ريت ايمن كيف كان واقف يستنى فيناا قدمنا ناحيتو بسرعة وطلعنا ف الكرهبة.. اول ما خدمهاا و شدينا ثنية الاوتال حسيت بدني رعش وكرشي دغدتني من الفرحة.. تمنيت كان نلغي المسافه هاذي و نوصل فيسع كيما تمنيت كان الوقت هذا يتعدا بسرعة ونلقى روحي مع ليث.. تكيت براسي على بلار و استرجعت شريط ذكرياتي مع ليث بكامل تفاصيلو.. انسان غريب ظهر ف حياتي فجاة.. من عالم غير عالمي مدلي يدو و رضى يساعدني وقتلي الكل تخلى عليااا.. خلاني ناقف من جديد كيما خلاني نتجاوز الي صار.. لقيت روحي مع الوقت نتعلق بيه و نحبو حتى صار هو كل حياتي.. عضيت على شفايفي كيف تفكرت اول مرة قلي فيها نحبك وباسني فيهاا وقتها ماتخيلتش اني بش نوصل معاه لنهار كيف ليوم كنت نرا ف هذا حلم بعيد علياا حلم مش من حقي نعيشو اما ليث خلى أحلامي الكل تتحقق.. على هذاكا انا من اللحظة هاذي بش نعيش حياتي كان لليث ومستحيل كان نسمح لمخلوق يبعدني عليه من جديد مهما يصيير وقتها انا بش ناقف قدام المل.. دقات قلبي قوات اول ما الكرهبة شدت فران قدام الاوتال.. اول مانزلت ودخلنا بقيت واقفة نغزر للبلاصة الي اختارهاا تخيلت بش يكون مكان صغير وبسيط اما الي قدامي كان العكس.. قدمنا للاستقبال خذينا مفاتح الغرفة وطلعنا.. اول ما دخلت دورت بعينيا عليها و انا مش مصدقة كل شي كان احلى من الي تخيلت تلفتت لخالتي تحكي
رفيقة :" أيا فيسع ادخل دوش.. حتى يوصل الطاقم الي بش يحضرك "
هزيتلها براسي باهي.. قدمت ناحية الفرش حطيت ساكي ودخلت لبيت البانو نحيت حوايجي ودخلت تحت دوش.. الماء الدافي الي كان نازل فوقي حسيتو هداني شوي و خلى دقات قلبي تتنظم.. ورغم هكا مازلت حاسة روحي متوترة ساعات قليلة تفصلني على عرسي.. كملت فيسع وخرجت لبست الكاب دو بان ورجعت للبيت.. شفت خالتي كيف كانت متسطحة على سرير ترتاح شوي حتى انا تعبتها معاياا.. قربت ناحيتها نحكي
انا :" خالتي لباس ؟"
هزت روحها شوي وتقعدت عالسرير تحكي
رفيقة :" مليحة ماتخافش بنتي "
تلفتت على صوت باب الي دق.. قمت فيسع وفتحتو حليت عينيا على وسعهم اول ما ريت اية صاحبتي قدامي.. تبسمت و انا نغزرلها ومش مصدقة وجودها تو.. من ايامات المشفى وقت الحادثة وخروجي من الحومة لقديمة مارجعتش ريتهاا..
دورت بعينيا عليها نحكي
انا :" اية ؟ "
تبسمتلي تحكي
اية :" اي آية.. ظاهرلي نسيتني لالة "
ضحكت وقدمت منها فيسع عنقتها بالقاوي نحكي
انا :" توحشتك برشا آية برشا..منيش نصدقة لي انت هنا "
دورت بيديها عليا وكبست عليا تحكي
اية :"ياروحي انت وانا توحشتك... منيش مصدقة لي رجعت شفتك"
بعدت عليا شوي وقرصتني من خدي تحكي
اية :" لا وعروسة زادة "
ضحكت وبعدت علاهاا حليت الباب اكثر نحكي
انا :" تفضل ادخل "
اية :" والله معايا ضيوف "
عقدت بحواجبي نحكي
انا :" اي خليهم يتفضلو اما شكون معاك ؟"
اول ما ريت امها قدمت منها نجري نخكي
انا :" خالتي انت جيت زادة ؟"
هي :" اي جيت يا روحي.. معقول منجيش "
ضحكت وقربت بستها من خدها نحكي
انا :" ربي يخليك خالتي "
هي :" اغزر شكون معايا "
اول مادورت راسي وقفت مصدومة نغزرلها اخر حد توقعتو يجي هو خالتي حليمة دموعي نزلو يجريو على خدي وقدمت ترميت في حضنها
انا :" خ...خالتي....انت انت هنا مش هكا "
ضمتني لصدرها ومسحت على شعري تحكي
هي :" يا روح خالتك اي انا هنا.. ياروحي معقول نخليك وحدك في النهار هاذا.. انت من ريحة الغالية.. وفي مقام بنتي زادة "
هزيت راسي وغزرتلها نحكي
انا :" انا مش مصدقة لي ريتك انت اكثر وحدة قريبة من امي جيتك فرحتني برشا "
جبدت روحي منهم وغزرتلهم نحكي
انا :" عيشكم خاطر جيتو ومخليتونيش وحدي في النهار هاذا ياسر ت توحشتكم "
قدمت مني آية تحكي
اية :" اووه يزي تي نهار عرسك هاذا.. وانت قاعددة تبكي ايا ادخل جهز روحك بالطبيعة بش نجو.. معقولة منجوش "
قربت خالتي سلمت عليهم وغزرتلي تحكي
رفيقة :" بنتي خليهم يفوتو على الاقل "
هزيت يدي ومسحت دموعي نحكي
انا :" اي اي تفضلو "
اول ما دخلو غزرت لخالتي نحكي بالوشوي
انا :" خالتي.. ش.. شكون عزمهم ن نقصد .."
تبسمتلي وقصت عليا تحكي
رفيقة :" والله سي راجلك سالني كان نعرف حد من معارفك ذكرت اية وقت ريتها في السبيطار قتلو عليها لباقي هو دبر راسو "
تبسمت وهزيتلها براسب باهي دخلت معاهم وسكرت الباب.. حسيت فرحتي كملت وانا نغزرلهم كيفاه ملمومين ودايرين بياا.. ليث زاد كبر في عيني برشا مش عارفة كيفاه بش انجم نوفيه حق الفرحة لي حسيتها وانا نغزرلهم تو..
دورت لخالتي نحكي
انا :" خالتي ليث جا نحب نمشي نشكرو ونجي "
شدتني من يدي وقحرتلي تحكي
رفيقة :" برا اقعد حذا لجماعة ليث مبعد تشوفو "
بوزت شفافي نحكي
انا :" باهي خالتي مقلت شي "
قدمت منهم ورجعت ضحكت كيف ريت اية تغزر للروبة
قدمت منها نحكي
انا :" شرايك فيها ؟"
اية :" قمر تهبللل والله محلاها "
قدمت مني وحطت يدها على خدي تحكي
اية :" بش تطلع احلى عروسة "
رجعت عنقتها نحكي
انا :" فرحانة برشا بجيتك اية.. فرحانة خاطر بش تاقف معايا نهار عرسي "
اية :" بالطبيعة بش نجي وناقف معاك.. انت كيف اختي يا روحي"
تبسمت وغزرت لخالتي كيف استقبلت روم سارفيس لي جابولهم عصير.. قعدت بيناتهم وبقينا نحكيو كل مرة ف حاجة ونضحكو.. شوي وقت والباب رجع دق قامت اية فيسع وفتحتو.. شفت الطاقم الي وصلو ودخلو.. قمت من بلاصتي ووقفت نغرزلهم قربت مني وحدة تحكي
هي :" أيا تفضل مدموازال قمر "
خذيت نفس طويل قدمت ناحيتهم وقعدت عالكرسي قدام لكوافوز و بقيت نغزرلهم من المراياا.. سمعتهاا تحكي
هي :" عندك حاجة معينة تحب علاهاا ؟"
انا :" لاا اما يكفي كل شي يكون بسيط "
هي :" باهي "
شفتهم كيف دارو بيا ف لحظة وحدة كانت لاهية بشعري و الثانية بمكياجي.. حتى ظوافري كانت فما وحدة لاهية بيهم.. مانعرفش قداه تعدا وقت و انا هكا بين يديهم اول ما كملو و بعدو هزيت عينيا ف المراياا وغزرت لروحي.. تبسمت و انا نشوف ف كل شي كيفاه كان كيف ماتخيلتو بالضبط..
هزيت راسي على صوت خالتي تحكي
رفيقة :" محلاك قمر .. مشاءالله على بنتي "
شفتها من لمراياا كيف قدمت ناحيتي و عيناها تلمع بالدموع قمت فيسع و قربتلها نحكي
انا :" عيشك خالتي "
رفيقة :" انشالله نراك ديما فرحانة و حياتك تكون مليانة سعادة وحب قمرتي "
رمشت عينيا برشة مرات نمنع في دموعي عالنزول نحكي
انا :" ربي يخليك لياا خالتي.. اصلا انا فرحانة خاطرك انت معاياا ف نهار كيف ليوم.. كان مش انت كنت بش نبقى وحدي ماعندي حد غيرك ".
ريتها كيف مسحت دمعتهاا فيسع تحكي
رفيقة :" اياا برا خلاهم يساعدوك ف لبس الفستان.. احنا ماشيين للغرفة الثانية بس نحضرو رواحنا "
هزيتلها براسي باهي وريتهم كيف خرجو الكل.. بقيت وحدي ف الغرفة مع الطاقم.. قدمت ناحيتهم و ساعدوني في لبس الفستان وكملنا اخر لمسات.. هزيت راسي وغزرت لروحي ف المراياا حسيت قلبي خظ بالقوي وانا ندور بيديا عالروبة البيضاء.. رمشت عينيا برشة مرات و هزيت يدي مروحت على وجهي نمنع في دموعي عالنزول.. تبسمت على صوت وحدة من الطاقم تحكي
هي :" صحة .. ياسر محلااك "
انا :" عيشك .. مرسي ليكم الكل "
هي :" ماعملنا شي "
ريتهم كيف لمو ماتريالهم و خرجو اول ماتحل الباب ريت عم مصطفى قدامي.. دخل للبيت وسكر الباب وراه.. قدم ناحيتي وقفت قدامي وطبس باسني من جبيني وين حسيت دمعتي سايي بش تنزل قدام الموقف هذاا.. للحظة حسيت روحي مع بابا.. بعد علياا وتبسملي يحكي
مصطفي :" صحة لبنتي.. فرحتك ليوم هي فرحتي انا زادة.. انت بنتي الي عوضتني بيها الدنياا.. نحبك تعرف انو داري ديما مفتوحة ليك و الي انا ديما وراك قميرة "
انا :" نعرف عمي.. ربي يخليك ليااا و يطولي ف عمرك.. انت ف مقام بابا و عمري لا ننسى انت شنوة عملت على خاطري "
ريتو كيف جبد بوات من الفاست متاعو و فتحها.. جبد منها سلسلة محلاهااا و لبسهالي.. تبسمت و عديت بيديا علاهاا نحكي
انا :" عمي علاش تعبت روحك.. يكفي الي انت معاياا و انا مانحب شي اخر "
مصطفى:" مفماش حتى تعب.. هاذي هديتك مني "
ترميت عليه وعنقتنو بالقوي غمضت عينيا على يديه الي دارت وراياا ومسحت على ظهري.. رجعت حليتهم نحكي
انا :" نحبك عمي نحبك برشة "
بعد علياا وحاوطلي وجهي بيديه الزوز يحكي
مصطفى :" انا زادة نحبك بنتي.. على هذاكا انت بش تبقى امانتي حتى بعد عرسك "
تبسمتلو وهزيتلو براسي باهي من غير حتى كلمة اصلا مالقيت حتى كلمة انجم نعبر في شنوة انا قاعدة نحس تو.. حسيت روحي نشوف ف تصويرة بابا من خلال عم مصطفى الشي الي خلاني نطمن انو مهما صار و ممكن يصير عندي عيلة انجم نتسند علاهاا و الي انا مش وحدي.. غزرتلو كيف رجع يحكي
مصطفى:" نخليك تو كمل حضر روحك ف عقلك "
انا :" باهي عمي "
اول ماريتو خرج رجعت قدام لمراياا وبقيت نشوف ف روحي كاني حبيت نتاكد اني بلحق عروسة و هذا نهاري اناا و الي صااار لكل لغاية تو حقيقة مش حلمة.. هزيت راسي شوي وغزرت للوقت دقات قلبي قوات و انا نشوف الي مازالت أقل مش ساعة ونشوف ليث.. بقيت نرد ف النفس بالشوي بالشوي محاولة مني بش نهدي روحي و نخفف التوتر الي كان مكني.. تلفتت على صوت الباب تفتح تبسمت و انا نرا فيها دخلت مع خالتي فاطنة وتتكعبر بروبة بيضاء هي زادة .. قربت مني فيسع وشدتني من يدي تحكي
ملاك :" محلاك قمر .. انت عروسة ليوم ؟"
كبست على يداها و ضحكت نحكي
انا :" ههه اي .. و انت الي محلاك ملوكتي "
ملاك :" شوف حتى انا عروسة كيفك .. روبتي كيف روبتك "
انا :" انت احلى عروسة يا روحي "
ملاك :" هيا خلينا نخرجو عمو ليث واقف لبرا ريتو "
عضيت على شفايفي نحكي
انا :" انت ريتو ؟"
ملاك:" اي ريتو حتى هو محلاه زادة كيف بابا "
ضحكت اكثر على كلامها وهزيت راسي مع خالتي فاطمة كيف قربتلي تحكي
فاطمة :" محلا زين بنتي .. مشالله عليك طلعت "
انا :" عيشك خالتي ربي يخليك.. و فرحت برشة انك جيتني تو ربي يفضلك لياا "
فاطمة:" ماعملت شي.. انت بنتي كيف امنة "
انا :" امنة حضرت مش هكاا ؟؟"
فاطمة :" اي هي تحت "
هزيتلهاا براسي باهي و رجعت طبست راسي نغزر لملاك.. سمعت خالتي كيف رجعت تحكي
فاطمة :" نخليوك تو.. هياا ملاك "
ملاك :" نتقابلو بعد قمر "
تبسمتلها نحكي
انا :" باهي ملوكة "
اول ماخرجو رجعت غزرت للوقت الي حسيتو عمل بلعاني علياا وماحبش يتعدا.. فركت يديا في بعضهم و انا نستنى فيه يحل الباب هذا ويدخل بش نشوفو.. هكاكا و سمعت صوت لبواني كيف دارت و الباب تفتح..
قلبي رعش وكرشي دغدتني وانا نشوف فيه قدامي لابس كوستوم نوار.. دخل وسكر لباب.. اول ما تلفتلي..وقف بعد ما قدم خطوة ويقا يغزرلي.. حسيت روحي تربثت قدام عينيه لي بقات تدور علياا.. تبسملي في لحظة وقدملي.. كان كل ما يقدم ناحيتي .. دقات قلبي تقوا اكثر.. ونحسهم بش يطلعو من بين ظلوعي.. اول ما وصل قدامي غمضت عينيا على ريحتو الي تغلغلت في خشمي وين حسيت بروح رجعت فياا من جديد.. رجعت حليتهم على يديه الي تحطت على خدي وشفايفو الي طبعو بوسة على جبيني.. دورت بعينيا عليه وركزتهم في عينيه وين لقيت روحي سرحت معاهم كاني اول مرة نشوفهم.. مسح على خدي بقفى يديه يحكي
ليث :" محلاك قمرتي.. مانيش مصدق الي نهار هذا جاء وانت قدامي بروبة العرس.. طلعت احلى من الي تخيلتو.. انت اجمل وحدة ريتهاا ف حياتي "
بلعت ريقي وتبسمت نحكي
انا :" حتى انا ليث مش مصدقة الي انا عايشة هذا الكل معاك .. حاسة روحي بس نطير من الفرحة "
ليث :" انا زادة فرحان يا روحي تعرف علاه خاطرني محظوظ الي لقيتك و بش نكمل بقيت حياتي معاك.. حياتي صارت مزيانة و منورة بوجودك فيهاا "
انا :" انا زادة محظوظة بيك يا روحي.. انت احلى هدية و احلى صدفة صارت ف حياتي.. فرحانة اني بش نصير مرتك و بش نكمل بقيت عمري معاك "
ليث :" ربي يقدرني و نخليك ديما فرحانة "
انا :" يكفي الي عملتو ليوم على خاطري.. انت ليوم وهبتلي الدنيا لكل كيف تفكرتني و تفكرت أهلى و ماخليتنيش وحدي "
ليث :" مانحبش نشوف حتى دمعة ليوم قمرتي.. ليوم بذات نحب عينيك تلمع من الفرحة كهو "
رمشت عينيا برشة مرات نمنع في دموعي عالنزول وهزيتلو براسي باهي.. تبسمت كيف ريتو مدلي يديه يحكي
ليث :" حاضرة قمرتي "
جبدت نفس طويل و شديتو من يديه نحكي
انا :" اكثر من كل مرة "
ليث :" هياا ملا يستناو فينا "
هزيتلو براسي باهي وشديت فيه أكثر بش مانطيحش من وراء بدني و اطرافي الي كانو يرعشو.. خرجنا من البيت ونزلنا وين الضيوف.. الضحكة ملات وجهي وانا نغزر لديكور الصالة لي كان في الابيض.. بقيت ندور في عينيا علاها.. كانت كيف القصور.. حسيت روحي في حلم.. عمري ما تخيلت لي بش يكون عرسي هكا.. للحظة حسيت روحي توتورت اكثر كيف قدمنا ريت الضيوف.. عيناهم الي كانت تغزرلنا وصوت تصفيقهم خلاني نكبس على يدو اكثر .. قدمت معاه ناحية الطاولة.. جبدلي الكرسي وقعدت وقعد بجنبي.. يديه الي تحطت على يدي وشدتني حسيتهاا هدات ف دقات قلبي و نظمتهم من جديد..
ليث :" اهدا "
انا :" توترت برشا ليث ياسر ناس وكلهم يغزرلونا" ضحك يحكي
ليث :" بالطبيعة احنا العرسان... اهدا هاني معاك "
هزيتلو براسي باهي.. دورت راسي شوي على صوت العدل يحكي
اليوم بش نعقدو قران ليث بن مراد وقمر بن منصور " الآنسة قمر بن منصور .. هل تقبلين بالسيد ليث بن مراد زوجا لك "
دورت راسي غزرتلو وين لقيتو هو زادة يغزرلي مركز معاياا.. حطيت عينيا ف عينيه و تبسمت نحكي
انا :" نقبل "
تبسمت اكثر على صوت العدل كيف رجع يسال فيه وهو جاوبو
ليث :" اكيد نقبل "
ريتو كيف مضى عالورقة وقدمها ناحيتي خذيت لقلم من يديه ومضيت انا زادة ووقتها كهو حسيت روحي تنفست براحة.. حسيت خوفي من انو يصير شي تلاشى .. اللحظة هاذي خلات كل مخاوفي تتبخر قدام فرحتي اني صرت مرتو من جديد.. ريتو كيف وقف ومدلي يدو.. عضيت على شفايفي و حطيت يدي فوق يديو وكبست علاهاا ووقفت قدامو.. غمضت اول ماطبس علياا وباسني من راسي.. بعد علياا شوي و ضحكلي يحكي
ليث :" نحبك برشة "
مانعرفش كيفاه طلعت يدي و حطيتها على خدو.. ركزت بعينيا على تفاصيل وجهو نحكي
انا :" و انا نعشقك ليث "
فقت من سرحتي فيه على صوت التصفيق الي رجع.. ريت خالتي وعمي كيف قربو ناحيتنا ووقفو معانا.. قربتلي خالتي وعنقتني بالقوي تحكي
رفيقة :" مبروك .. ربي يهنيكم "
انا :" عيشك خالتي "
بعدت علاها و غزرت لعمي كيف قرب من ليث عندو يحكي
مصطفى:" مبروك.. ربي يهنيكم ولدي "
ليث :" عيشك عمي "
بعد عليه و غزرلي ورجع غزر لليث يحكي
مصطفى :" سي ليث مانوصيكش على بنتي.. كان تغششها حسابي معاك.. هاو ف علمك "
تبسمت وغزرت لليث يحكي
ليث :" تهنى علاهاا عمي قمر ف عينيا "
طبست راسي على صوت ملاك الي قربتلنا تجري.. ريت ليث كيف طبس وهزها ف حملتو باسها من خدها يحكي
ليث :" محلاك ملوكة.. هاك طلعت اشب من العروسة "
ملاك :" اي نعرف انا احلى "
هزيت بحاجبي نضحك و شديتها من يداها بستها منها نحكي
انا :" ههه اكيد ملوكتي انت احلى "
تبسمت اول ما قربلي وهمس في وذنيا يحكي
ليث :" والله انا مش منجم نشوف حتى وحدة احلى منك "
انا :" يزي ليث بش يسمعوك .. و الطفلة ف يديك عيب "
ليث :" شقلت انا ؟ من بعد اللحظة هاذي مانحبش نسمع كلمة عيب.. يزي صبرت ياسر "
كمل كلامو وغمزني يضحك.. عضيت على شفايفي و هربت عينيا من عليه.. ريتو كيف نزل ملاك و قربلي اكثر.. حسيت بدني فور و رعش قدام لمستو و يديه الي دارت على ظهري.. جبدني ليه و ضيق عينيه فيا يحكي
ليث :" شقولك كان نمشيو من هنا ؟"
انا :" وين نمشيو ؟؟"
ليث :" شنوة وين؟؟ لبيتنا "
حسيت روحي تربثت قدام غزرتو و صوابعة الي كانو يتعداو وراء ظهري..ضربتتو بشوي على صدرو نحكي
انا :" يزي ليث الناس تغزر.. احشم امان "
ليث :" خلى يغزرو انت صرت مرتي سايي مفماش حشمة بعد ليوم "
انا :" يا ليث يهديك خالتي و عمي حذاناا "
تبسم على جنب يحكي
ليث :" باهي باهي اسكت.. هياا ايجاا معايا "
انا :" وين ؟"
ليث :" بش نشطحو.. البيت تو نزيد نستنى علاهاا "
ضحكت و شديتو من يديه وهزيت روبتي بيدي لخري وقدمت معاه لوسط القاعة.. شفت الاضواء كيف تطفات و الضو الرئيسي تمحور علينااا و العينين كيفكيف.. شفتو كيف قربلي و يديه دارت علياا ف لحظة.. انفاسنا تخلطوو و دقات قلبي توحدت مع دقات قلبو..الشي الي خلاني ننسى كل الموجودين وندور بيديا عليه انا زادة.. حرارة بدنو الي سرات ف بدني خلاتني نزيد نقربلو اكثر ونحط راسي على صدرو.. سرحت معاه على صوت الموسيقى وين لقيت روحي تفكرت نهار ليوم من أولو لغاية تو و الي هو حقيقة مش حلمة.. كل شي داير بياا ياكدلي هذاا.. اني من اللحظة هاذي صرت مع ليث و حياتي صارت مربوطة بحياتو هو.. فقت من سرحتي اول ما صوت الموسيقى وقف.. بعدت عليه شوي و انا مازلت مرهوجة من قوة الاحاسيس الي تملكوني اللحظة هاذي.. شدني من يدي يحكي
ليث :" خلينا نسلمو عالضيوف ونمشيو "
انا :" باهي "
بقيت كابسة على يديه و ندور معاه ف القاعة.. سلمنا عالكل و بقينا نحكيو مع خالتي و عمي شوي.. هزيت راسي على صوتو يحكي
ليث :" نمشيو قميرة ؟"
عضيت على شفايفي و هزيتلو براسي اي من غير حتى كلمة.. قربت من خالتي بستهاا و رجعت شديت ليث و خرجنا من القاعة... اول ماطلعنا ف الدروج ووصلنا قدام حسيت دقات قلبي قوات فجأة على قد ما كنت فرحانة على قد ما خفت من اللحظة هاذي.. شفتو كيف فتح الباب و قربلي فيسع دور بيديه علياا وهزني ف حملتوو فجاة.. دورت بيديا وراء رقبتو وضحكت نحكي
انا :" ياا ليث نزلني "
قرب باسني من خشمي يحكي
ليث :" لاا و اركح "
تبسمت وكبست عليه اكثر و بقيت ساكتة.. دخلنا للبيت سكر لباب برجلو وقدمنا اكثر لوسط البيت.. رجع غزرلي ودور بعينيه عليا وركزهم على شفايفي يحكي
ليث :" وأخيراً "
لحظتهاا حسيت لكلام ضاع بين شفايفي و مالقيت حتى كلمة انجم نعبر و نترجم بيها انا شنوة قاعدة نحس من مشاعر مختلفة ف اللحظة هاذي.. كبست على رقبتو اكثر و حشيت راسي عندو من غير حتى كلمة.. يكفي دقات قلبي الي عمال تقوا بين يديه و بدني الي رعش و تدخر من وراء لمساتو......