#قمر_تحكي
حليت عينيا اول ما سمعت صوت بكاها لي خلاني نسترجع لي صار لكل وين لقيت روحي نتبسم وحدي.. للحظة خفت لا يكون هذا لكل حلمة مزيانة اما تو تاكدت اكثر اني فقت على واقع احلى وانو بنتي بلحق صارت بجنبي..هزيت روحي شوي وغزرت لليث كيف قرب ناحيتها و عدا بيدو عليها يحكي
ليث :"شبيك ياروحي..شبيك تبكي"
ضحكت ك ريتو داخل بعضو ومش عارف يتصرف.. عضيت على شفايفي وحاولت نهز روحي شوي نحكي
انا :" ليث ميسالش تعطيهالي تكون جاعت..."
غزرلي بالوقت وعدا بعينيه عليا يحكي
ليث :" فيقتك "
هزيتلو براسي لا نحكي
انا :" لا فقت على صوت بكيتها"
ليث "" باهي تو نعطيهالك "
عديت بعينيا عليه نغزرلو ك طبس حملهاا وكيفاه يسايس فيها.. باسها من جبينها وقربلي..هزيت يدي فيسع وخذيتها من عندو.. قلبي ضرب بقوة اول حطيتها ف حضني.. طبست شوي خذيت نفس من ريحتها لبنينة.. نحكي
انا :" محلى ريحة بنتي "
بستها من راسها وعديت بعينيا عليها نغزرلها ك حلت عيناها نحكي
انا :" صغرونتي جاعت "
نزلت شوي ف الروبة وقربتها مني بقيت نرضع فيها وانا مش منجمة نبعد عينيا من عليها حتى ليث محسيتش عليه كيفاش خرج..اول ما شبعت جبدتها من حضني نحكي
انا :" صحة ياروحي "
عديت بكف صوابعي على خدها نغزرلها كيفاه تحرك ف شفايفها.. للحظة حسيت كانو الوقت وقف بيا هناا ماعدت نخمم ف شي كان فيها.. فقت من سرحتي على صوت الباب لي تحل وين شفت ليث دخل و معاه خالتي وعمي.. ضحكت من غير ما نشعر اول ماريتهم دخلو يجريو..غزرت لخالتي ك قربت مني تجري.. طبست باستني من راسي وقعدت بجنبي تحكي
رفيقة :"مبروك قميرة مبروك..الحمد الله على سلامتك ياروحي"
ضميت على شفايفي شديت دمعتي لي هدت علياا من فرحتي لي كملت بجيتهاا غير فرحتهاا لي شفتها ولهفتها علياا كاني امي..نحكي
انا :" يبارك فيك خالتي عيشك خاطر جيتني تو وفرحت معايا "
قريت حضنتني تحكي
رفيقة "' معقولة مانجيش ياروحي..اول ماكلمنا ليث خرجت نجري..خفت عليك والله انت لباس مش هكا ؟"
تبسمت نحكي
انا :" لباس خالتي والله "
تبسمت وعدات بعيناها على ميار.. مدت يداها وحملتها تحكي
رفيقة :" تو نتعرفو عالصغرونة.. ماشاء الله محلاه كلها قمر "
ضحكت ك ريت ليث هز بحاجبو يحكي
ليث :" شنوة ؟ لا حسيتها تشبه ليا اناا "
عديت بعينيا عليه نحكي
انا :" حتى انا حسيتها هكاا.. فيها منك شوي "
تبسم وغزر لعمتي ك ضحكت تحكي
رفيقة :" الفايدة ف الخلقة التامة.. انشالله تتربى فعزكم "
غزرت لعمي ك قربلي ومسح على شعري يحكي
مصطفى :" مبروك بنتي..الحمد الله على سلامتك "
انا :" عيشك عمي ربي يخليك ليا "
تبسمت اول ما وقفت خالتي وقربت منو تحكي
رفيقة :" مصطفى شوف محلاها "
طبس باسها وغزرلها يحكي
مصطفى :" ماشاء الله محلاهاا.. ربي يحفظها ويعطيها الوقت الطيب "
ليث :"أمين عمي"
تكيت بظهري لتالي وعديت بعينيا علاهم نغزرلهم كيفاه يلعبو ويحكيو معاها ولي هذا يحب يشدها وخالتي ماتحبش تمدها..للحظة حسيت روحي طايرة م الفرحة.. احساس العيلة حسيتو كمل بجية خالتي وعمي لي عوضولي بابا وامي.. خلاوني نحس انو عندي عيلة تفرحلي بلحق.. ضحكت وقت ريت عمي قرب لخالتي يحكي
ليث :" رفيقة اعطيني نحب نحملها ف حضني انا زادة.. راي بنت الغاليين..حفيدتي لي بش تاخو بلاصتكم الكل عند جدها هاني قتلكم من تو "
غزرت لليث ك ضحك يحكي
ليث :" والله بلاصتنا تفكت عندها برشة لازمك تو تفاهم مع سي كرم "
رفيقة :"ههه والله كرم بالذات ما فماش مفاهمة معاه ياخوفي يدور عليها "
مانعرفش قداه تعدا وقت وهوما هكاكا شايخين بميار.. حتى دخلت الفرميلة لي خذاتها من يداهم بش تتفقدها وتتفقدني وين غزرت ليث وعمي ك خرجو بالوقت.. بقيت نتبع فيها وهي تفحص ف ميار حتى كملت وطمنتني علاهاا وين حسست روحي ارتحت اكثر.. كملت معايا انا وخرجت وين بقيت مع خالتي وحدناا.. قربت مني وقعدت بجنبي تحكي
رفيقة :" الحمد الله لي ريت هالنهار قمر..متتصورش قداش فرحتلك "
شديتها من يدها نحكي
انا :"وانا خالتي صدقني فرحتي منعطيها لحد..نتذكر وقت عرفت اني حبلة اول مرة انت قتلي اول ما تحط صغيرك ف حضنك بش تنسى كل شي..وبلحق هذا لي صار..انا نسيت كل شي تعدا عليا وحسيت انو ربي عوضني اضعاف عاللي خسرتو "
غمضت عينيا بالقوي و رجعت حليتهم وين حسيت بغصة شدتني فحلقي نحكي
انا :" تتذكر خالتي انا اول مرة ريتك فيها كنت مطيشة فالكلينيك وحالتي حالة وقتها حسيت روحي متت وليلة هانا فالكلينيك زادة اما بشعور عمري ماعشتو.. انا ليلة حسيت روحي تولدت من جديد..عيشك خالتي..عيشك خاطر مخليتنيش وبقيت ديما معايا..انت صرت ام بالنسبة ليا "
عدات بعيناها علياا وقربتلي.. حطت يداها على خدي تحكي
رفيقة :" وانت ماتتصورش فرحت امك لي راتك قداش تعذبت..وقت شافتك تو قداشك فرحانة ومتهنية ف حياتك..وربي رزقك ببنية كملتك فراحتك مع راجلك..
مسحتلي دمعتي لي نزلت ورجعت تحكي
رفيقة :" ومن اليوم الدموع ممنوع..نحب نشوفك كان فرحانة..ونحبك ترد بالك على روحك و على بنتك باهي "
ضحكت وهزيتلها براسي نحكي
انا :" اكيد خالتي تهنى..اما حاسة روحي خايفة شوي..منعرفش كان بش نجم نربيها ومانقص حتى شئ عليها "
مسحت على شعري وتبسمت تحكي
رفيقة :" بش تعرف تهني..وانا وين هاني موجودة ولي
تحتاجو نفهم بنتي وين لمشكلة "
انا :" ربي يخليك ليا خالتي "
رفيقة :" ويخلك ليا ياروحي هيا تو اتسطح وارتاح.. يزيك ما سهرت..تو شوي وترجع تفيق الصغرونة بش ترضعها..انا بش نروح تو مع عمك وصباح نجي ونجيبلك فطورك ودبشك زادة "
تبسمت وهزيت راسي معاها نحكي
انا :" باهي خالتي عيشك"
رفيقة :" قلي شاهية حاجة ؟"
هزيتلها براسي لا وتبسمت نحكي
انا :" لا اي حاجة من يدياتك تعجبني "
رفيقة :" باهي غدوة نحضرهولك بيديا لفطور..منوصيكش عالصغرونة ولفها مليح رد بالك علاها "
انا :" باهي خالتي تهنى "
طبست باستني من راسي وقربت لميار باستها بالسياسة وخرجت لحظتهاا تسطحت وعينيا على ميار لي كانت راقدة بجنبي.. هكاكا وسمعت صوت الباب ك تحل وين شفت ليث رجع حذاياا.. قرب قعد بجنبي يحكي
ليث:" عمي ورفيقة روحو..رفيقة ساعة و هي شادتني توصي فيا"
تبسمت نحكي
انا:"وانا نقول شبيه طول هكا !"
طبس على ميار باسها من راسها بالسياسة يحكي
ليث :" وهو يجي منو نطول على بنتي خرجت شوي توحشتها "
هزيت بحاجبي نحكي
انا :" بالله سي ليث وانا ؟"
غمضت عينيا بالقوي وقت طبس باسني من راسي يحكي
ليث :" انا من بكري مانجمش نعيش من غيرك قمرتي..مش من تو..وليوم بنتي تزادت فليستا معاك "
تبسمت نحكي
انا :" ربي يخليك ليناا ياروحي "
عدا بكف صوابعو على خدي يحكي
ليث :" ويخليك لياا قمرتي "
تبسمت وقت ريتو رجع طبس على ميّار.. للحظة حسيت روحي شخت وانا نغزرلو كيفاه يلعب معاها ويحكي.. هزيت يدي وحطيتها فوق يديه لي كانت شادة ف مياار..وبقيت نغزر لعائلتي الصغيرة لي وهبهالي ربي..عيلتي لي لخصت شعور الفرحة الامان والدفا لي كنت نحلم نعيشهم...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
