#قمر_تحكي
تململت شوي وحليت حليت عينيا على شدت يدها لشعري وين عرفتها فاقت وك العادة لقات شعري تلعب بيه.. حطيت يدي فوق يداها وتلفتلها.. تبسمت وقت ريتها راقدة عندو وقاعدة بساقيها وتلاغي وين عرفتها فاقت ف نص ليل كيف كل مرة وهو لي عمللها حليبها وحطها بيناتناا خاطر صعيب بش ترجع ترقد بعد ماتفيق ف ليل كان عند بوهاا..تقعدت وهزيت لملحفة على بدني.. تبسمت وقت ريتها غزرتلي وهزت يداها ناحيتي بش نحملهاا.. طبست هزيتها ف حملتي السياسة بش منفيقوش خاطر مازال بكري.. بستها من خدها نحكي بصوت واطي
انا :"صباح الخير ياماما فاقت صغرونتي "
ضحكتلي بالوقت وبقات تعدي فعيناها عليا وتلاغي.. رجعت بستها من شفتها نحكي
انا :" رجعت فيقت بابا ف ليل مش هكاا..ومخليتوش يرقد..نعرفهم عمايلك يا لفعة "
حطيتها فوق ساقياا وتلفتت لتابل دونوي..هزيت البوات لي فيها دبشهاا نحكي
انا :" هياا خلينا نبدلو الكوش "
طبست شوي وبقيت نبدللها ف الكوش وفرد وقت نتبع فيها بعينيا كيفاه هازة يداها وتلعب بصوابعها.. اول ماكملت هزيتها ف حملتي.. بستها من خدها ورقبتها نحكي
انا :" كهو هاني كملت..هوكا بنتي رجعت نظيفة وريحتها محلاها "
ضحكت وقت ريتها مدت يداها لصدري وين عرفتها تحب ترضع حطيتها ف حضني وبقيت نرضع فيها.. تبسمت وانا نغزرلها كيفاش تلعب بخصلات شعري وتغزرلي..احساس محلاه يتملكني ف كل مرة نحطها فحضني ونرضعها.. طول عمري كنت نحلم أني نعيش احساس الامومة والحمدلله ربي ماحرمنيش منو.. هذا احلى احساس تنجم لمرا تعيشوا ف دنياا.. حياتي زهات بوجود ميّار وخلاتهاا تدفى اكثر بوجودها.. غير فرحتي لكبيرة لي تتملكني كل ما نشوفها تكبر قدامي نهار بعد نهار..كل ما تتعلم فازة جديدة ولا تنطق كلمة جديدة نشيخ علاها.. اصلا ماننساش فرحتي انا وليث وقت نطقت كلمة بابا.. كناا بش نطيرو بالفرحة ومن فرحتو خرجها وخذالهاا كادوات وعديناا نهار لكل برا.. رغم اني ساعات نغير خاطرها نطقت بابا ولتو لا سمعت كلمة ماما منهاا.. هاذي اكثر كلمة نستنى اني نسمعها.. نحب نحسها ونتطعمهاا.. عديت بعينيا عليها وتبسمت نحكي
انا :" وقتاه ناوية تقول ماما.. ماااا ماااا.. ساهلة أسهل حتى من بابا.. هياا قول ماماا "
هزت راسها معاياا وبقات تغزرلي باهتة.. ضحكت وبعدت علاهاا اول ما عرفتها شبعت.. قربتها لياا وبقيت نبوس فيهاا نحكي
انا :" صحة لبنتي.. هياا مدامك شبعت قول ماما.. مااا ماااا... "
شهقت بالشوي وقت شدتني من شعري لي كان طايح على وجهي بالقوي..مديت يدي وفكيتوو من يداها بالسيف نحكي
انا :" علاش هكا ياماما.. هذاا لكل خاطر قتلك قول ماما.. "
ريتها ك تلفتت وضحكت وقت سمعت صوت ليث يحكي
ليث :" صحيت بابا..زيدها قمر لمغيارة "
ذبلت عينيا فيه نحكي
انا :" بالله ليث نهون عليك؟"
رجع غمض عينيه يحكي
ليث :" تهون كيف ماهنت عليك ومصبحة تتعارك مع بنتك على كلمة مااما..لا بنتك تخليني نرقد ف ليل ولا انت تخليني نرقد فالنهار "
عضيت على شفايفي نحكي
انا :" صباح الخير ياروحي..سامحني نسيت جملة انك راقد وفيقتك "
رجع حل عينيه وهز روحو شوي يحكي
ليث :" تعودت شنعمل "
ضحكت وقت ميّار قامت تفركح ك شافتو فاق وتحب تمشيلو..هزيت بحاجبي نحكي
انا :" كهو شبعت توو ومعادش حاجتك بيا..وتحب تمشيلو مش هكا ؟"
بقات تفركح وتلاغي لين حطيتها عالفرش لحظتهاا جرات تتكعبر حتى وصلتلو وحطت يداها فوق صدرو بقات تغزرلو.. ضحكت تحكي
ميّار :" ب..ابا "
مد يديه حملهاا عندو وباسها..عدا على ظهرها يحكي
ليث :" روح بوك..شبيك متحبش تخليني نرقد..انت وامك متفاهمين عليا؟؟"
ريتها ك صاحت وبقات تحكي كيف لعادة ف كلام مش مفهوم..تكيت بظهري لتالي وبقيت نتفرج فيهم تبسمت ك ريتو قحرلها يحكي
ليث :" شوف الفرخة تجاوب فيا..ايجا نوريك..."
ضحكت ك ريتو هزها وحطها تحتو..بقى يبوس ويدغدع فيهاا وهي صوت ضحكتها طالع...تبسمت وانا نغزرلهم وين حسيت روحي شخت خاطرهم متعلقين ببعضهم..هزيت الكيمونو لبستو وغزرتلو نحكي
انا :" انا بش ندخل ناخذ دوش..وبعد نحضرلك الفطور "
ليث :" باهي..و انا هاني شادلك الفرخة هاذي حتى تكمل "
ضحكت ودخلت طول لسال دوبان.. عملت دوش دافي صحصحت بيه وخرجت.. لبست الكاب دوبان ورجعت للبيت وين شفتو ك وقف وميار ف حملتو.. بدني رعش اول ماقربلي وطبس باسني من شفايفي بوسة خفيفة يحكي
ليث :" صحة "
انا :" عيشك ياروحي "
ليث :" قمرتي حضرلي قهوتي اول حاجة "
انا :" باهي هاني هابطة بش نحضرهالك.. كمل واخلط "
هزلي براسو باهي ودخل هو ميار وين عرفتو بش يدوشلها ك العادة.. رجعت شعري لتالي وقربت للدريسينغ جبدت روبة خفيفة لبستها وبقيت نحضرلو ف دبشو هو وميّار.. حطيتهم ع الفرش بش يلقاهم وقربت للكوافوز كملت حضرت روحي وهبطت طول للكوجينة.. حطيت اول حاجة قهوة ليث تحضر وبقيت نحضر ف فطور ميار.. حطيت كل شي فوق الطاولة وقعدت نستنى فيهم.. اول ماريتو هبط قمت فيسع وسكبتلو قهوتو.. تبسمت وقت دخل وهي ف حملتو.. حطها ف كرسيها وقعد بجنبهاا.. قدمت بخطواتي ناحيتو وحطيت الفنجان قدامو.. هز راسو معايا وتبسم يحكي
ليث :" يعطيك الصحة "
قعدت بجنبو نحكي
انا :" صحة ياروحي "
قربت بست ميار وخذيت نفس من ريحتها نحكي
انا :" صحة ياماما..ممم محلاها ريحة بنتي.. "
تلفتت على صوتو يحكي
ليث :" تبوس كان بنتك..حتى انا ريحتي محلاها "
عضيت على شفايفي وقت ريتو غمزني..ضحكت نحكي
انا :" على اساس انت متغيرش من بنتك ؟"
عدا بعينيه عليا يحكي
ليث :" والله ظاهرلي بش نولي نغير..ونحبك ترضيتي كيف مارضيتك انا لبارح"
تبسمت وقربت بستو من خدو نحكي
انا :" والله انا ماعنديش مشكلة نرضي راجلي... "
غزرت لميار واشرتلو بعينيا نحكي
انا :" اما كان بنتك قعدت عاقلة تعرفها ساعات يكون عندها راي آخر.. ليلة ترقد بالساهل وعشرة تبقى فايقة "
عدا بيديه على شعرو ومط شفايفو يحكي
ليث :" امم شرايك مالا نخليها تبات عند رفيقة..مدامها ناوية تحرم عليا لفرخة ؟"
ضحكت وهزيت الشوكة ناكل ونحكي
انا :" هاني صدقتك انت بالذات مستحيل تفرط في بنتك وتخلاها ترقد بعيد عليك "
ضحك وقرب يوكل فيهاا ويحكي
ليث :" الله غالب معادش يجيني النوم من غيرها.. ماتهونش عليا بنتي تبات بعيدة عليا "
حط الفنجان وغزر لتاليفونو.. رجع يحكي
ليث :" شوي ونخرج عندي اجتماع مهم "
انا :" بش تطول برشة ليث..نسيت لي عندنا طهور كرم ولازم نمشيوا بكري ؟"
ليث :" لا مانسيتش..نكمل الاجتماع فيسع ونروح "
هزيتلو براسي باهي نحكي
انا :" باهي مالا انا نحضر روحي ونستناك "
ليث :" حضرلي شنوة ب نلبس زادة بش منتعطلش "
انا :" أكيد ياروحي "
هزيت راسي معاه وقت وقف..طبس على ميار باسها وين هي تشعلقت ف رقبتو.. ضحك وهزها يحكي
ليث :" ماتعمايش منوحة العادة.. مش بش نطول يابابا تو ساعة ونرجع لبنتي "
قمت من بلاصتي وشديتها عليها نحكي
اما :" برا على روحك.. ربي معاك ياروحي "
غزرتلها وقت قلبت شفايفها..مدت يداها ناحيتو وبدات تبكي..عدا بعينيت عليها وقرب خذاها من عندي يحكي
ليث:" يزي ياروحي توو شوي ونرجع والله.. علاش لبكا هذا لكل ؟"
ريتو ك غزر لتاليفونو لي بدا ينوقز يحكي
ليث :" هام بداو يكلمو فياا.. "
تبسمت وقت ريتها كبشت فيه ودورت وجهها اول ماشافتني قربت.. هزيتها من عندو نحكي
انا :" برا ليث..تو نسكتها انا "
ليث :" باهي "
هز تاليفونو وعدا بيعينيه علينا يحكي
ليث :" شوي ونرجع "
انا :" سايس روحك.. لا إله إلا الله "
قرب باسني من راسي وخرج..لحظتهاا طبست راسي نغزرلها كيفاه تبكي..عديت بيديا على ظهرها نحكي
انا :" اشش يزي ياروحي تو شوي ويروح بابا...كهو عيش بنتي متبكيش "
بقيت نبنن بيهاا ف حاملتي ونسكت فيها وباقي مازالت تبكي..هزيتها للصالة وحطيتها وسط العابها بش تنسى شوي نحكي
انا :" ايجا خلينا نلعبوا شوي "
طبست قعدت بجنبها وبقيت نلاعب فيها ونفدلك حتى تلهات وسكتت.. مانعرفش قداه تعدا وقت عليناا وحنا غاطسين نلعبوا.. شهقت بالشوي وقت هزيت راسي وغزرت للوقت وين لقيتو تاخر وانا لتو لا حضرت روحي..هزيتها ف حملتي وهزيت العابها لي تحبهم نحكي
انا :" معادش بكري.. بوك قريب يجي واحناا لاهين نلعبواا.. ايجا خلينا نحضرو رواحنا "
طلعت فيسع للبيت وحطيتها ف الأرض فوق الزربية..عطيتها لعبها ومشيت قعدت عالكوافوز.. جبدت مكياجي حضرتو قدامي وبديت بشعري.. فردتو لتالي بعد ماعملت خصلات بالبابليز وبديت نمكيج وفرد وقت عيني على ميار تبسمت وقت ريتها غارقة وسط العابها مش مركزة معاياا..كملت حضرت روحي فيسع وقمت.. جبدت روبتي الجديدة لبستها ورجعت قدام لمرايا.. تبسمت من غير مانشعر وقت عديت بعينيا على روحي كيفاه طلعت ف الروبة الزرقاء لي كانت طويلة ويداهاا كيفكيف طوال ومخيطين بقماش شفاف.. رشيت شوي من البرفان لي يحبها ليث ولبست اكسسواراتي.. اول ماكملت تلفتت لميار وقربتلها.. طبست حملتها نحكي
انا :" تو جا دور بنتي "
حطييتها ع الفرش بدلتلها الكوش وخترتلها روبة جديدة..رجعت حذاها وبقيت نلبس فيهاا.. اول ماكملت هزيتها وعديت بعينيا عليها نغزرلها كيفاه طلعت ف روبتها لي كانت بيضاء قماشهاا ڤوال ومنقوشة بوردات الاقحوان ف الأبيض والأصفر.. بستها من خدها وحطيتها فوق حجري..مشطتلها شعراتها الصغرونين وزينتلها شعرها بشريطة ف لون الروبة علاها وردات الاقحوان زادة.. دقات قلبي قوات وانا نشوف فيها كيفاه طلعت محلاهاا كاني ملاك قدامي..طبست عليها بقيت نبوس فيها ونحكي
انا :" محلاك ياروحي..مبننك..مشالله على بنتي "
تبسمت وقت ريتها بقات تفركح وتضحك معايا.. فقت من سرحتي على صوت الكرهبة لي وقفت وين عرفتو ليث رجع.. طبست بستها نحكي
انا :"هوكا جا باباتك...نمشي نعطيه الكوستيم ونجي "
هزيتها حطيتها وسط العابها مرة اخرى وعطيتها البيبرون متاعهاا..مشيت للدريسينغ خذيت كوستيم لي حظرتهول لبارح والساعة لي يحبها ورجعت للبيت وين شفتو ك دخل..قربتلو وتبسمت نحكي
انا :"اهلا بيك ياروحي"
عدا بعينيه عليا بكلي وغزرلي.. قربلي اكثر ودور بيديه على جنبي.. جبدني ليه وطبس باسني من شفايفي يحكي
ليث:"محلاك حبي..النهارين هاذم ناوية تهبلني ولا شنوة"
عضيت على شفايفي نحكي
انا :"عيشك ياروحي..هاني جبتلك حوايجك برا البسهم فزالبيت الاخرى"
عقد بحواجبو يحكي
ليث:"علاش شفما؟"
ضحكت نحكي
انا :" تو تراك ميار تكبش فيك ومش بش تخليك تلبس ف راحتك..واحنا متأخرين..أصلا بالسيف بش سكتت قبيلا"
تبسم على جنب يحكي
ليث:" هههه مدام طلعت لحكاية هكاا هاني ماشي نلبس ف البيت لخري.. ونجي لصغرونتي"
انا :"ههه باهي خليني انا نمشيلها قبل ما تبدا تبكي..انت كمل وايجا "
عطيتو بقية دبشو وين خرج بالوقت..لحظتهاا رجعت حذاها وبقيت نغزرلها..وين لقيتها مزالت غاطسة ف العابها لدرجة انها مافاقتش ب ليث ك رجع.. خليتها و
مشيت خذيت الساك حضرتلها اغراضها لكل لي ممكن نحتاجهم خاطر بش نطولو ليلة عندهم...خذيت البيبرونة زادة و الحليب وحطيتلها تبديلة اخرى.. بقيت نتفقد ونتفكر إذا نسيت حاجة حتى كملت كل شي.. هكاكا وتلفت على صوت لباب لي تحل وين شفتو ك دخل.. عديت بعينيا عليه نغزرلو كيفاه طلع ف الكوستوم النوار وين حسيت بدقات قلبي تسارعت من وراء ريحتو لي تغلغلت فياا ورهوجتني..قد ماعشت معاه ما شبعتش منو ومن شوفتو..نفس الاحساس يبقى يتملكني كل مانراه..غير اني نحسو كل مرة يحلى اكثر.. فقت من سرحتي فيه على صوت ميار لي طيشت اللعبة من يدها وقت راتو..قدمت منو تحبو بسرعة وتحكي
ميار :"با با...بابا"
ضحك وطبس هزها باسها من خدها يحكي
ليث :"روح بابا.. توحشت بوك انت..حتى انا توحشت بنتي.. "
رجع غزرلها وباسها من عيناها يحكي
ليث:"محلا بنتي..شنوة زين هذا لكل..شعملت فيك امك "
تلفتلي وقحرلي يحكي
ليث:" شبيك ملبستلها هكا نخاف يصيبوها بالعين "
انا :" عجبتني الروبة شريتهالها بالذمة لطهور..متخافش مش بش يصير شي "
حل عينيه فيا يحكي
ليث:"لا نخاف على بنتي أنا..أصلا صارت من قبل لحكاية هاذي.. تذكر يوم خرجنا ولبستلها اكا روبة الحمراء.. بقات جمعة كاملة مريضة..وقتها خالتي فاطمة فهمتني وقتلي الطفلة مزيانة ميجيش تلبسوها هكا "
عقدت بحواجبي مستغربة نحكي
انا:" وانت من وقتاه تسمع خالتي فاطمة فالامور هاذم"
ليث:"والله مدام الموضوع يخص بنتي نسمع وحتى رفيقة قالت نفس لكلام"
تنهدت بالشوي نحكي
انا :"باهي برك ليوم آخر مرة.. وزيد اما محصنة بنتي ديما نقرا علاها ف القرآن.. ربي يحميها "
هزيت البرفان وقدمت منهم..رشيتلو منها وبستو جنب شفايفو نحكي
انا:" اما تحب لحقيقة.. انت هو لي لازم تبدل حوايجك خاطر ساعات نحسد روحي عليك"
تبسم على جنب يحكي
ليث :" كولني بالكلام..عارفك تحب تغيير لموضوع "
دور بيديه علياا وجبدني عندو يحكي
ليث:"اما اعمل حسابك بش تخلص حق عمايلك هاذم"
تبسمت وغزرتلو ك طبس جبد تاليفونو لي نوقز.. جبدو بالوقت وجاوب يحكي
ليث:"اهلا عمي..اي هانا جايين....أكيد تو مسافة الطريق ونكون غادي"
رجعت البارفان وهزيت بوشاتي وساك ميّار..وين خذاه من يدي.. تبسمت كيف ريتو محملها بين يديه وهي لفر_خة مكبشة فيه من غير ما تتحرك ونساتني انا.. اول ما خرجت من الدار وقفت على بلاصتي نرد ف النفس من وراء قلبي لي ضرب بقوة.. احساس غريب حسيتو ف اللحظة مافهمتوش..للحظة حسيت كأنو صدري ضاق بياا وخوف عندي برشه عليه سيطر علياا خلاني نتخنق ونرعش على بلاصتي..بلعت ريقي بالسيف وهزيت راسي نغزر لليث يحط ف ميّار ف كرسيها ف الكرهبة.. اول ماكمل وسكر الباب. تلفتلي يحكي
ليث:"هيا قمر تاخرنا.. شبيك واقفة؟"
مديت الخطوة بالسيف وقربتلو نحكي
انا:"باهي ياروحي ..هاني جيت "
طلعت وغزرتلو كيف طلع بجنبي.. عديت بعينيا عليه وحطيت يدي فوق قلبي لي باقي يضرب.. للحظة مافهمتش شنوة الخوف لي هدّ علياا فجأة.. نفسو الخوف لي كنت نحسو قبل وقت نحس لي بش تصير حاجة..عديت بعينيا علاهم الزوز وتكيت بظهري لتالي نرد ف النفس وراء بعضو وفرد وقت ندعي ف سري انو ربي يحفظلي عيلتي الصغيرة ومايورينيش شرّ فيهم.. خاطرني مستحيل كان نتحمل إذا صارت حاجة لواحد فيهم.. حياتي تو صارت عبارة على ليث وميّار.. من غيرهم هوماا الموت ارحملي...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
