#ليس_ذنبي ❤️‍🔥

حلقة 150

#ليث_يحكي
سكرت الدوسي بعد ماكملت الخدمة لي عندي لكل وقمت..نظمت البيرو وهزيت مفاتحي وتاليفوني وخرجت طول للكرهبة..تبسمت من غير مانشعر من وراء لهفتي كيفاه وليت مانصدق نكمل خدمة بش نروح..من نهار ماولدت قمر وشرفت ميَّار ف حياتنا صرت نحسب فالدقايق بش نروح ليها..معادش نجم نبقى بعيد على بنتي وكل مانبعد نتوحشها فيسع.. اصلا للحظة هاذي مانيش مصدق كيفاه تعداو 8 شهور.. محسيتش بيهم وماعرفتش كيفاه كبرت فيسع..اما كل لي نعرفو انو حياتي تبدلت وعرفت فرحة جديدة معشتهاش من قبل..نزلت عالفيتاس وشديت ثنية الدار طول نستنر وقتاه نوصل نشوفهاا ونلعب معاها شوي قبل ما ترقد.. مسافة الطريق ووصلت.. راكيت الكرهبة وهبطت فيسع.اول مادخلت لدار عديت بعينيا نلوج علاهم.. قلبي ضرب بقوة مع صوت بكاها لي كان جاي من الصالة.. قدمت بخطواتي فيسع بش نشوف شبيهاا..
اول مادخلت ضحكت وانا نشوف فيهاا كيفاه تحبو وتبكي.. للحظة حسيت روحي شخت وانا نشوف فيهاا كيفاه تتكعبر بكلهاا.. قربتلها اكثر بش نشوف شبيها تبكي.. اول ماوصلتلهاا هزت راسها وضحكت وسط دموعها.. طلعت يداها ناحيتي بش نحطها ف حملتي..تحكي
ميار: " با.. با "
دقات قلبي قوات عالكلمة مازلت ك نطقتهاا ولي تخليني نشيخ.. قد مانسمعهاا مانشبعش وكل مرة نزيد نتسلّطن علاها اكثر..طبست هزيتها ف حملتي وبستها من خدها نحكي
انا :" روح بابا..شبيها بنتي لمزيانة.. علاش تبكي "
ذبلت عيناها فياا وقلبت شفايفهاا ف اللحظة هاذي كان لقيت نمشمشهاا..تحكي
ميَّار :" دودو "
هزيت بحاجبي نحكي
انا :"شبيه زادة سي دودو ؟"
هزت يدها تاشرلي وتحاول انهاا تحكي وين فهمت انها ضيعتو كيف كل مرة.. ضيقت عينيا فيها نحكي
انا:" ماتقليش رجعت ضيعتو مرة اخرى؟"
حطت راسها على كتفي وطرشقت بالبكا ف لحظة.. عديت يدي على ظهرها  نحكي
انا :" باهي اهدا يا روحي يزي من لبكاا..تو نلقاه سي دودو" 
قربت وحطيتها على الفوتاي نحكي
انا: " خليك هنا رد بالك تطيح "
ريتها ك دوب طبست راسها زبقات تدور بعيناها وفرد وقت تنادي باسمم لعبتها..تنهدت بالشوي وبقيت نلوج عليه ورا الفوتاي وبين لمخادد وشي مالقيتوش.. هزيت راسي على صوت بكاهاا كيف علا من جديد كي تبكي .. 
قربتلها نحكي
انا:" ياروحي ماتبكيش تو نلقاه.. شبيك متصبرش ياخي.. انت و امك الصبر ماتعرفوهش وماسمعمتوش بيه "
نحيت الفاست متاعي رميتها على جنب وطبست على ركايبي بقيت نشوف تحت الفوتاي.. نفخت بالشوي وقت ريتو لقيتو مرمي..هزيتو في يدي وقمت نحكي
انا :" اهوا يا روحي.. شدّ"
ريتها كيف ضحكت وهزت يديها تحبني نعطيهولها..اول ماحطيتو في يدها عنقتو بالقوي وباستو.. تبسمت عالفازة و بقيت نغزرلهاا وانا شايخ.. ريتها كيف حطت دودو بجنبها وهزت راسها ومدتلي يديها تحبني نحملها
تحكي
ميَّار :" با .. با "
ضيقت عينيا فيها نحكي
انا :" تو تذكرتي بوك انت ؟"
هزيتها وحطيتها في حضني.. بستها من خدها وخذيت نفس طويل من ريحتهاا نحكي
انا:" محلاها ريحة بنتي ومابنّها " 
ترميت على الفوتاي وحطيتها فوق حجري.. وين بقات تغزرلي كيف كل مرة وتلعب بيدها على وجهي..بستها من يدها لي حطتها على شفافي نحكي
انا:"شبيك مزيانة ليوم هكا..محلاها روبة بنتي..ياخي ماشيين لبلاصة ؟"
عقدت بحواجبي مستغرب كيفاه قمر مخليتها وحدها هنا ومفماش حسها.. اصلا هاذي اول مرة تخلي ميَّار وحدها وماتستقبلنيش ف الباب.. هزيتها وعديت بعينيا عليها نحكي 
انا :"يا فر_خة امك ويني شبيها مخليتك وحدك هنا ؟"
ضحكت كيف عقدت بحواجبها وبقات تعدي فعيناها عليا مش فاهمة..هزيتها ف حملتي وقمت نحكي 
انا :" ايجا تراه نشوفو وين الفرخة الاخرى"
بستها من خدهاا وطلعت ف الدروج حتى وصلت لبيت النوم.. اول ما حليت لباب تبسمت وانا نشوف ف الطاولة لي كانت مزينة بالورد.. حليت عينيا على وسعهم وقت تلفت على صوت حثلتهاا وين شفتها طلعت من وراء الباب وين لقيت سرحت فيهاا الفر_خة كيفاه ماشية وتزيان..عديت بعينيا عليهاا بكلهاا نغزر لروبة لي كانت لابستها ولي ظهرت بدنها اكثر..فقت من سرحتي فيها وقت قدمت باستني من جنب شفايفي تحكي 
قمر :" الله عينك ياروحي..توحشتك "
عديت بعينيا عليها وركزتهم ف شفايفها نحكي
انا :" شنوة زين هذا لكل؟"
عضت على شفايفها تحكي
قمر :" عيشك ياروحي..حبيت نعمل سهرة ليلة "
تنهدت بالشوي نحكي 
انا :" والله احسن حاجة عملتها..عندي قداه عالجو هذا "
قربتلي اكثر وين حسيت بريحتهاا تغلغلت فيا.. عدات بصوابعها على خدي تحكي
قمر :" والله متلومنيش انا.. لوم بنتك لي صارت متخليلناش وقت "
ضحكت وغزرت لميَّار لي كانت شادة فلس الشوميز تلعب بيهم ورجعت نحكي 
انا :" ايا اخطالي بنتي ماعندهاش ذنب..ساعة شبيك خليتها وحدها تبكي ؟"
ذبلت عيناها تحكي
قمر:"هأه انا مخليتهاش كنت معاها نلوجلها على لعبتها سي دودو.. واول ماسمعت صوت كرهبتك طليت من الشباك وشفتك طلعت نجري للبيت بش متفسدش المفاجأة وزيد حبيتك انت تلوج على دودو مدامها هي بنتك "
هزيت بحاجبي نحكي
انا :" زايد فرخة كيفك كيف بنتك "
حطت يداها على خدي تحكي 
قمر :" قلي شنعمل خفت لا كل شي عملتو يطيح فالماء وسهرتناا تفسد حبيبي "
دورت بيديا على جنبها ولزيتها ليا نحكي 
انا :" شكون قالك لي مانيش بش نتفاجا وقت نراك هكا ساعة عندي برشا عالدلال هذا "
هزيت بحاجبي وقت ريتها عدات بيداها على صدري تحكي 
قمر :" ميسالش مالا تو ليلة نعوضك..استنا شوي كهو"
مديت يدي وحليت فلس الشوميز نحكي 
انا :" هاني نتبع فيك وريني "
عديت بعينيا على ميار لي عملت صوت كاني متغششة وقت فسدت عليها لعبتها..ضحكت نحكي 
انا :" عمايل امك ياروحي..منقصدش نقلقك"
ريت قمر وقت مدت يداها ليها تحكي 
قمر :" ايجا عندي ياروحي خلي بابا يرتاح "
تبسمت وقت ريتها حشات راسها ف صدري ومرضاتش تمشيلها قدمت للفوتاي نحكي 
انا :" خليها انا مرتاح هكاا "
وقفت قدامي وحطت يداها ف خصرهاا تحكي
قمر :" على اساس متوحشتي وتحبني ندلك.. خليك مع بنتك مالا... "
مديت يدي فيسع وشديتها من يداهاا.. خطفتهاا وقربتهاا لياا..بستها من خدها نحكي
انا :" والله انا بنتي منفرطش فيها.. ميسالش دللني انا وبنتي "
ضحكت وعدات بيداها على خد ميار تحكي
قمر :" هههه ندللكم مالا لا انتوما اغلى حاجة ف حياتي "
قربت لطاولة وعديت بعينيا عالماكلة لي كانت منصوبة نحكي
انا :" انت طيبت هذا لكل ؟"
قمر :" اي والله طيبتو وحدي "
تبسمت نحكي
انا :" الله الله هاك صرت شاطرة ومرا حرة "
هزت بحاجبها تحكي
قمر :" عندك شك ماكش تشم ف الريحة لبنينة "
انا :" والله انا تو مانشم كان ف ريحة وحدة ونستنى وقتاه نغطس فيهاا "
كملت كلامي وغمزتهاا.. تبسمت على وجهها لي حمار تحكي
قمر :" احم..هيا ذوق وقلي شرايك "
جبدت الكرسي وقعدت.. حطيت ميار فوق حجري وهزيت لمغرفة..كليت شوي نحكي 
انا :" يعطيك الصحة ياروحي..بنين برشا "
تلفت على يد ميار وقت شدت فيا تحكي 
ميار :" با..با... هم "
ضحكت وقت شفتها حالة فمهاا وتفارع بيداها تحب تفك لمغرفة نحكي 
انا :" تو انا نوكل بنتي بش ماتوسخش روبتك "
هزيت لمغرفة وقربتها ليهاا وين كلات بالوقت.. رجعت غرفت وغزرت لقمر لي كانت تغزرلناا نحكي 
انا :" هيا هل فمك انت زادة..نوكل صغرونتي زادة "
ضحكت وكلات من عندي تحكي 
قمر :" بالله..انت بش تاكل ولا تبقى توكل فينا ؟"
انا :" ميسالش انا هكا مرتاح قمرتي "
تبسمت وبقيت ناكل ونسمع ف قمر تحكيلي كيفاه عدات نهارهاا وفرد وقت نوكل ف ميّار وين حسيت روحي ارتحت بعد نهار خدمة ونسيت التعب لكل باللمة هاذي لدرجة اني ماحسيتش بالوقت..اول ما كملت حطيت لمغرفة نحكي 
انا :" الحمدالله..شبعت يعطيك الصحة على كل شي "
قمر :" صحة ياروحي استناني شوي ونجي "
هزيتلها براسي باهي وغزرت لميار لي شادة كعبة تفاح حاطتها ف فمها وتلعب.. نحكي 
انا :" شبعت بنتي ولا مزالت ؟"
ضحكت بالوقت وبقات تدور بعيناها عليا ريتها كيف غزرت التاليفون وبقات تفركح.. قمت من بلاصتي وحطيتها فوق الفوتاي.. حطيت لمخدة بجنبها بش ماتطيحش ورجعت قعدت نغزرلها ك قربت هزت التاليفون وبقات تلعب بيه..تبسمت وهزيت راسي على صوت خطوات قمر وين شفتها دخلت وف يداها ڤاتو.. قدمت ناحيتي وطبست باستني من خدي تحكي
قمر :" كل عام واكل عام وانت بخير ياروحي "
عديت بعينيا عليها وغزرت للڤاطو لي حطتو قدامي وين تفكرت ف اللحظة هاذي انو ليوم عيد ميلادي.. تبسمت نحكي
انا :" تعرف نسيت جملة لي ليوم عيد ميلادي"
وقفت وراياا ودورت بيداها على صدري.. طبست علياا وباستني من خدي تحكي
قمر :" اما انا مانسيتش ليث..كل مرة كان يجي فيها عيد ميلادك نكونو متفارقين اما كنت ديما نتفكرو ونتمنا كان جيت بحذايا راني حضرتلك احلى مفاجأة أما ماصارش ..و لمرة هاذي الحمدالله احنا مع بعضنا.. مالا حبيت نحتفلو بيه مع بعض..ربي يخليك لينا وميحرمناش منك "
تبسمت وشديتها من يداها.. دورتها قدامي وحطيتها فوق حجري.. عديت بعينيا عليها وقربت بستها من جنب شفايفها نحكي
انا :" ويخليك ليا قمرتي " 
تبسمت ودارت حطت الشموع.. شعلتهم ورجعت غزرتلي تحكي
قمر :" هيا..طفي الشموع ليث  "
دورت بيديا على جنبها وكبست علاها ف حجري نحكي
انا :" هههه باهي لالة "
ريتها ك وقفت وهزت ميار..حطتها ف حملتي تحكي 
قمر :" هيا ايجا طفي الشموع مع بابا..شوف ليث بنتنا كبرت بش تحتفل بعيد ميلاد بوها "
خذيتها من يداها وبستها نحكي
انا :" وهذا احلى عيد ميلاد ف حياتي مرتي وبنتي معايا شنحب اكثر "
غزرت لميار لي هزت راسها وبقات تدور بعيناها الشموع لي عالطارت.. حليت عينيا وقت ريتها مدت يدها بالوقت وحبت تمسهم.. شديتها فيسع بش ماتتحرقش نحكي
انا :" لا يافر_خة تو تحرق روحك "
غزرت لقمر كيف ضحكت عالفازة وقعدت بجنبي..مديت يدي ولزتها ليا هي زادة نحكي 
انا :" ايجا انت زادة..نحبك تنفخ معايا خاطر حياتي ما تكمل كان بيك "
تبسمت وطبست معاياا نفخت عالشموع وين تمنيت ف سري انو ربي ميحرمنيش منهم زوز..تلفت لقمر لي باستني تحكي 
قمر :" لعاقبة لمية سنة ليث"
هزيت بحاجبي نحكي
انا :" بالله..مش برشة هكا؟..نخاف تفد مني"
حطت يداها فوق خدي تحكي
قمر :" هأه انا عمري ما نفد منك "
عديت بكف صوابعي على خدها نحكي
انا :" تعرف هذا اول عيد ميلاد نحتفل بيه بعد موت عايلتي.. انت وبنتي خليتوني نعيش احساس ماعشتوش قبل "
عدات بعيناها علياا تحكي
قمر :" عارفة اني مش بش نجم نعوضك عالسنين لي تعدات لي انت تعذبت برشا معاهم..اما نوعدك ليث انو حياتنا الجاية بش تكون دايما هكا كلها فرحة "
تبسمت نحكي
انا :" ان شاء الله ياروحي..هيا خلينا نقصو الڤاطو قبل ما ميَّار تغفصها بيداها "
ضحكت اول ماشفتها كيفاه مطبسة تحب تاكل منهاا..
شديتلها بعدها نحكي 
انا :" استنا يا بابا تو توسخ روحك "
قلبت شفايفها بالوقت وبدات تبكي.. جبدتها عندي نحكي
انا :" اششش كهو هاني بش نقصلك "
خذيت السكينة من عند قمر وقصيت طرف صغيرة نحكي
انا :" قمر اعطيني صحن نحطلها..معادش تنجم  تصبر طالعة لامها "
شهقت بالشوي تحكي
قمر :" بالله سي ليث ؟"
تبسمت على جنب نحكي
انا :" شنوة قاعد نكذب ولا نتبلى عليك؟"
قحرتلي وطبست حطت طرف ف صحن.. خذيتها من يداها وقصيت شوي.. هزيت الشوكة نحكي
انا :"  هاني قصيتلك ياروحي هيا حل فمك... "
حليت عينيا على وسعهم وقت ريتها دورت وجهها علياا بالوقت ومرضاتش تحل فمها.. نحكي
انا :" شوف الفر_خة ك طفاتني.. يابنتي كول "
غزرت لقمر ك ضحكت تحكي 
قمر :" تحب تاكل بيدها "
انا :" صار.. هياا ميسالش مالا المهم بنتي متبكيش "
قربتلها الصحن وحطيتها فوق حجري قدامو وين شفتها ك غطست يدها ومسحتها ف فمهاا.. ضحكت وغزرت لقمر ك شدتها من يداها تحكي
انا :" ميّار بنتي تو توسخ الروبة وانا شريتها جديدة "
انا :" خلاها تعمل لي تحب ميسالش.. تو  نشري لبنتي الف روبة لمهم تبدا فرحانة وتاكل "
عدات بعيناها علياا وعضت على شفايفها تحكي
قمر :" مالا خليني أنا بش نقص ونوكلك.. خاطرك لاهي مع ميار ومش بش تخليك تاكل "
انا :" والله منقولش لا.. هياا وكلني "
تبسمت وهزت الشوكة قدامي.. كليت من يداهاا وغزرت لميّار ك هزت يذاها تحب تبعدها علياا وين حسيت روحي شخت اكثر..تبسمت وبقيت عندي ف عينيا علاهم زوز.. للحظة هاذي مازلت مش مصدق انو كل شي وفى وربي عوضني بيهم وصارت عندي العيلة لي بقيت عمري لكل نحلم.. كنت حاسب انو هذا حلم بعيد علياا وصعيب يتحقق أما مع قمر الحلم صار حقيقة..
اول ماكملت كليت شديت ميار من يداها وبقيت نمسحلها بعد ما بلبزتهم بالشكلاطة.. غزرت لقمر تحكي
قمر :" نحب نزيدك ؟"
قدمت منها وبستها من جنب شفايفها نحكي 
انا :" لا عيش حبي "
رجعت باستني تحكي 
قمر :" باهي صحة ياروحي "
ضحكت وقت ريت ميار صاحت ودزتها بعدتهاا عليا.. شفتها ك هزت بحاجبها تحكي 
قمر :" بالله يافرخة..هذا راجلي..ابعد انت "
اول ماقربت باستني من مرة اخرى ريتها ك صاحت اكثر وبقات تفارع بيداها بش قمر تبعد علياا.. ضحكت نحكي
انا:" زايد بنت بوهاا "
هزيت يدي وبعدت قمر بالسياسة نحكي
انا :"باهي يا بابا باهي.. هوكا بعدناها قمر "
ريتها ك ضحكت الضحكة لي نعشقها وحشات راسها وتغزر لقمر كاني تغزل فيهاا.. غزرت لقمر وين شفتها تعدي ف عيناها علينا وغزرتلي.. ذبلت عيناها فياا تحكي
قمر :" امان ليث.. ترضى بنتك تبقى تبعد فياا عليك هكا كل مانقربلك.. "
انا :" عادي قمرتي صغار كلهم هكا وبنتي غايرة علياا هذاا حقهاا ياروحي وانا مانجمش نغشش بنتي "
قلبت شفايفها تحكي
قمر :" غششني انا مالا "
انا :" انت تو بعد نرضيك "
كملت كلامي وغمزتهاا.. عضت على شفايفها وقامت
باست ميار من خدها تحكي
قمر :" تو نتحاسبو بعد..اما تو نحب ناكلك وانت مبلبزة هكا بالشكلاطة"
طبست وبقات تبوس فيهاا وتدغدغ وميّار شايخة بالضحك وتفارع بساقيهاا ويداهاا.. تحكي
قمر :" امم محلا ريحة بنتي.. راي تتقرمش هاتها عندي شوي... "
كبست علاها اكثر نحكي
انا :" لاا خلاها عندي.. نهار كامل نبدأ نستنى وقتاه نروح بش تبقى عندي "
بعدت علاهاا وقامت من بلاصتها تحكي
قمر :" باهي سي ليث اهوكا بنتك هاني ماشية انا "
دورت بيديا على جناب ميار وهزيتهاا لفوق وبقيت نلاعب فيها نحكي
انا :" ريت امك كيفاه تغير منك "
بقيت نلعب معاهاا وفرد وقت نتبع ف قمر لي كانت تلم ف الطاولة.. اول ماريتها خرجت..كبست عليها ف حملتي ورجعت بستها من خدها نحكي 
انا :" محلا زين بنتي...حتى وانت موسخة روحك بالشكلاطة..عندها حق امك لواحد ميشبعش منك.. هياا خليني اناا نظفلك بش بعد نتلهى بأمك لي هزت علياا خشمها.. "
دخلت للسالدوبان وقربت لرخامة.. حطيتها وبقيت كابس علاهاا بيد ويدي لخرى بليهاا وبقيت نمسحلهاا وهي تفركح.. نحكي
انا :" يا بنتي اركحي... "
سكرت السبالة نشفتلها ورجعت للبيت بعد ماكملت غسلت حالتي معاها.. قربت للخزانة جبدتلهاا روبة خفيفة وقربت للفرش.. حطيتها نحكي
انا :" اياا تو نحبك تركحي خليني نلبسلك البيجامة ومن غير بكا عيش بنتي "
اول مانحيتلهاا الروبة طبست حطيتها على جنب ورجعت غزرتلها وين شفتها ك دارت على كرشها تحب تهبط.. شديتها ورجعت رقدتهاا على ظهرها نحكي
انا :" ماكش ناوية تركح خليني نبدلك توا تجي امك تتغشش عليا اناا "
هزت ساقيها لفوق وانا بقيت نشد فيهاا مالبستهاا وبدلتلها الكوش كان بالسيف.. نفخت بالشوي وهزيتها ف حملتي نحكي 
انا :" من غدوة بش نخليك عند امك هي تولي تبدلك خلاها تكش عليك مدامك ماتسمعش لكلام"
ضحكت وقت حطت راسها على كتفي كأنها فهمتني.. عديت بيدي على ظهرها وحطيتها فحضني بقيت ندوح بيها..اول ما حسيت بيها غفات قمت وحطيتها بالسياسة ف فرشها.. غطيتها وبقيت واقف نغزرلها كاني نحب نصدق انو بلحق بنتي قدامي تو ولي هذا لكل مش حلم وبش نفيق منو.. طبست بستها بوسة خفيفة وخذيت نفس من ريحتهاا لي نعشقهاا.. الفر_خة خلات حياتي تتبدل بكلهاا.. كل دقيقة تتعدا نلقى روحي عمال نتعلق بيهاا اكثر وحبهاا يزيد ف قلبي.. كان نلقى نحطهاا بين ضلوعي بش ماتبعدش علياا حتى ثانية.. تنهدت بالشوي ورجعت لميت كل شي متاع ميار ودخلت للسالدوبان.. غسلت حالتي وريقلت أموري ورجعت للبيت وين شفت قمر ك دخلت.. عدات بعيناها عليناا وغزرتلي تحكي
قمر :" رقدت؟"
هزيتلها براسي باهي نحكي
انا :" اي رقدت احكي بالشوي "
طبست باستها ورجعت غزرتلي تحكي
قمر :" معايا انا ترقد بالسيف عكسك انت... "
تبسمت وقربتلها.. دورت بيديا على جنبها وجبدتها قدامي نحكي
انا :" والله انا وبنتي نتفاهمو "
حطت يداها فوق صدري وضحكت تحكي
قمر :" بنتنا كبرت ليث.. وانا فرحانة خاطر كل ماتكبر كل ماتتعلق بيك أكثر.. "
تبسمت وغزرت لميار بالوقت.. عديت بعينيا عليها ورجعت غزرت لقمر نحكي
انا :" تعرف اكثر حاجة مفرحتني اني بيناتكم تو وقاعد نشوف ف بنتي كل يوم تكبر قدامي وماتحرمتش من اللحظات والتفاصيل هاذم.. وقت كنت ف الحبس مشي ف  لي بش نتحرم من النعمة هاذي..كل مانمشي للخدمة ما تجي كان تصورتها بين عينيا نلقى روحي متوشحها ونزرب نحب نروح بش نشوفها ونلعب معاها..هي صارت كلشي ف دنيتي..
دورت بيداها على رقبتي تحكي
قمر :" امم صار تتوحش كان بنتك ؟"
رجعتلها خصلة من شعرها لتالي وطبست بستها من كتفها نحكي
انا :" بنتي وام بنتي..معنديش اغلى منهم.. وكان عندك شك ف كلامي.... "
شهقت بالقوي اول ما طبست ودورت بيديا على خصرها..هزيتها نحكي
انا :" ايجا تو نوريك قداش متوحشك "
دورت بيداها على رقبتي تحكي
قمر :" وانا توحشتك برشة ليث... "
حطيتها ع الفرش وطبست علاها شوي..عديت بعينيا عليها نحكي
انا :" مالا غايرة من بنتك يا فر_خة "
ضحكت تحكي
قمر :" اممم خاطرها فكتك مني... "
عديت بعينيا عليها ودورت بيديا على جنبها.. طبست علاها اكثر وين حسيت بيداها ك تحطو فوق فلس الشوميز تحل فيهاا.. نحكي
انا :" وانا مايرضينش غشك.. الليلة نرضي مرتي وبطريقتي انا "
عضت على شفايفها تحكي
قمر :" وريني مالا "
رميت الشوميز ف القاعة نحكي
انا :" تدلل... "
طبست علاها اكثر وغطست ف رقبتها.. بقيت نبوس فيهاا وين حسيت روحي شعلت وترهوجت قدام ريحتهاا.. حطيت يدي فوق كتفهاا ونزلتلهاا روبتهاا لحظتهاا طبست وبقيت نبوس فيهاا اكثر من صدرها وين حسيت بصوابعها ك طلعوا ف تغلغوا ف شعري غير صوت انفاسها لي كان قوي وحرارتهم زادت ف ناري.. تحكي
قمر :" نحبك..ليث.. "
قصيت علاهاا ك طلعت وغرقت ف شفايفهاا وبنّتهم... كبست على يداها لي شبكت ف يدي وضعت معاها ف ليلة طويلة خلصت فيهاا حق الليالي لي فاتو..حتى وهي بين يديا نحس روحي متوحشهاا كان نلقى الوقت ياقف ف اللحظة هاذي ونبقى ضايع فيهاا وف تفاصيلها لي تهزني لدنيا اخرى.. تكيت بظهري ع الفرش وجبدتها عندي وين حطت رأسها فوق صدري.. بستها من جبينها وبعدتلها خصلات شعرهاا.. حطيت يدي فوق دقنونتهاا وهزيتلها راسها قدامي وبستها من خشمها نحكي
انا :" رضات مرتي ولا مازالت "
عضت على شفايفها وحشات راسهاا ف صدري تحكي
قمر :" يزي ليث عاد... "
ضحكت وعديت بصوابعي على ظهرها نحكي
انا :" تعبت حبي ؟"
هزت راسها معاياا تحكي
قمر :" شوي.. اما مانحبش نرقد نحب نبقى ساهرة معاك..وليت نتوحشك برشة ليث.... "
قلبت شفايفها ورجعت تحكي
قمر :" ياسر كثرو سفراتك الفترة هاذي.. ياريتك بقيت تخدم محامي كهو الخدمة هاذي سرقتك مني"
عديت بكف صوابعي على خدها نحكي
انا :" نعرف ياروحي وانا متوحشك ومتوحش بنتي والله ومذابياا نعدي معاكم اكثر وقت ممكن..  اما شعندي نعمل الخدمة الايامات هاذي ماشية وتزيد وانا لازمني نسافر بش نتفقد السلعة..وتعرف عمي كبر ومعادش ينجم  يسافر..ومعندوش ثقة ف حد غيري.. وانا مستحيل نخليها بيه "
حطت يداها فوق خدي تحكي
قمر :"نعرف.. مقصدتش انك تخلي خدمتك..اما لبارح رجعت ف نص الليل وليوم صبحت تخدم كان خلاك ارتحت شوي ع الاقل "
انا :" بالله وكيف نرتاح انا شكون ينظم أمور الخدمة.. شوف خلي يتعدا طهور كرم ونكمل اجراءات الشحنة الجاية ونوصلوها لصحابها.. ونوعدك ناخذ نهارين عطلة نعديهم مع مرتي باهي هكا"
تبسمت تحكي
قمر :"باهي ياروحي "
طبست بستها من شفايفها بوسة خفيفة نحكي
انا :" ايا ارقد.. بش تفيق الصباح تحضرلي فطوري مانيش ناوي نخرج بلا فطور كيما البارح "
قمر :" والله انت لي خرجت تجري اما انا ديما نقوم ونحضر لراجلي احلى فطور "
تبسمت نحكي
انا :" تو الصباح نشوف مالا "
قربت باستني من خدي تحكي
قمر :" تصبح على خير حبيبي "
انا :" وانت بخير "
تكيت براسي على راسهاا وبقيت نلعب بشعراتهاا حتى ريتها غفات.. بستها من جبينها وبقيت نغزرلها نتأمل ف زينهاا..الفر_خة قد مانعدي معاها وقت قد مانحس روحي شاهيها اكثر ولهفتي ليهاا تزيد.. مهما نقربلهاا ومهما نغزرلها مانشبعش منهاا.. عارف روحي صرت مقصر معاهم وهذا بلحق مقلقني اما لازمني نكون قد كلمتي لعمي خاصة وانو صار معمل علياا ف كل شي وحاسبني يديه ليمين.. اما هذا مايمنعش انو لازمني نتلهى بعيلتي الصغيرة.. على هذاكا بش نحاول نكمل كل شي عندي ونخمم كيفاه نعوضها.. مانعرفش قداه بقيت نغزرلها حتى غفيت من غير مانحس.. رجعت
حليت عينيا على صوت بكاها.. غزرت لقمر لي كانت غاطسة فالنوم ومافاقتش.. بعدتها بالسياسة علياا وغطيتهاا وقمت..لبست شورط متاعي ومشيت طول لفرشها..تبسمت اول ماطليت عليها ولقيتها تنغنغ وتحرك وحاطة صبعها ف فمهاا وين عرفتها جاعت.. طبست علاهاا مديت يديا وهزيتها ف حملتي نحكي 
انا :" اشش ياروحي سايي هاني جيت لبنتي "
تبسمت وقت ريتها كبشت فيا وبقات تغزرلي بعيناها لي كانو مدمعين.. بستها من خدها وكبست عليها..خرجت من بيت النوم وهبطت بالسياسة ف الدروج حتى وصلت الكوجينة..اول ماشعلت الضو ضحكت ك غزرتلها ولقيتها دايخة بالنوم وتفرك ف عيناها..حطيت الماء يغلي وحضرتلها البيبرونة كيما علمتني قمر لحظتها شفتها ك مدت يداها وبدات تفركح بش تهزها وترضع.. شديتهاا نحكي
انا :" اصبر شوي حتى تبرد..جعت برشة انت ؟"
هزيت البيبرون وجربت على يدي ويت لقيتو دافا شوي..
بستها نحكي
انا :" اهوا حضر "
مشيت للصالة وترميت عالفوتاي وحطيتها ف حضني.. عطيتها البيبرون وين بقات تشرب وتلعب بيداها على وجهي..هزيت بحاجبي وشديتها من يدها بستها منها نحكي 
انا :" ماكش بش تبطلها لعادة هاذي انت..لازم تفيّق بوك ف نص الليل ؟"
ضحكتلي ورجعت تشرب ف حليبها وتلعب بساقيهاا.. نحكي
انا :" اما اسمعني تشرب حليبك وترقد طول عندي اجتماع الصباح باهي... " 
ريتها ك سيبت البيبرون وقعدت تدور بعيناها عليا رجعت هزيتها نحكي
انا ؛:كهو شبعت بنتي...تو وقت النوم "
تبسمت ك ريتها بقات تلاغي وتحاول تحكي..مشيت حطيت البيبرون ف الكوجيمة ورجعنا للبيت.. قدمت بخطواتي ناحية الفرش وغزرت لقمر لي باقي غاطسة فالنوم ومش حاسة بشي.. حطيت ميّار ورقدت بجنبها ك العادة..خاطرها تعودت كل ما تفيق ماترجع ترقد كان عندي.. جبدتها عندي وعديت بيدي الى شعرها نحكي 
انا :" هيا ياروحي غمض عينيك "
حليت عينيا نغزرلها ك تقعدت وبقات تغزرلي.. تنهدت بالشوي وقعدت معاها..عديت بيدي على شعري نحكي 
انا :" معناها ناوية تبيتني فايق ليلة زادة؟"
ترمات علياا وشدتني من شعري تحكي
ميار :" ب.. با.با.. "
دورت بيديا على ظهرها نحكي
انا :" شنوة يابابا "
بعدت علياا شوي وحطت يداها فوق خدي.. بقيت نغزرلها كيفاه تحكي ف كلام مش مفهوم..هزيت بحاجبي نحكي 
انا :" بالله يافرخة وقتو لكلام توو..هيا ارقد بابا غدوة يخدم بكري "
بعدت علياا فيسع وعطاتني بظهرها تحب تمشي لقمر.. جبدتها من ساقيها نحكي 
انا :" ايجا هنا تحب تفيق امك زادة ؟"
ضحكت اول مادورتها قدامي وبقات تلعب بساقيها.. عرفتها لي شبعت نوم وتحب تلعب هزيت لعبتها من فوق التابل دونوي وعطيتهالها وين شدتها بالوقت وبقات تلعب وتعمل ف الاصوات متاع لعادة.. تكيت بظهري لتالي وبقيت نتفرج فيها حتى بديت نغفى..اول ما غمضت عينيا حسيت بيها كيف قربتلي وبقات تضرب بيداها على وجهي..تحكي
ميار :" ب..با..با "
حليت عين وحدة وغزرتلها نحكي
انا :" امممم "
ميار :" بابا ..بابا "
انا :" ياروح بابا ماكش ناوية ترقد انت.. انا نحب نرقد عيش بنتي... "
اول مارجعت غمضت عينيا سمعتها ك فحمت بالبكاء..
رجعت غزرتلها وحليت يديا نحكي
انا :" أيا ايجا عندي..ايجا "
قدمت مني فيسع وغطست راسها ف صدري رجعت غزرتلي وعيناها مليانين دموع.. بستها منهم نحكي 
انا :" متبكيش ياروحي...كهو هاني فايق هيا ومعادش بش نرقد.. غير انت غمض عينك "
بقيت نطبطب على ظهرها ونتحسس ف يداها الصغرونين على خدي حتى لين حسيتها غفات.. لحظتهاا تسطحت عالفرش وحشيتها ف حضني  كالعادة بش نشبع بريحتهاا.. بستها من خدها وغمضت عينيا معاها.. يمكن احلى نومة صارت بالنسبة لياا هي النومة هاذي وبنتي ف حضني.. احساس محلاه يستحوذ علياا وهي قريبة مني.. كل شي نعيشو معاها ليه طعم اخر.. وجود ميّار ف حياتنا احلى عوض من الدنياا بعد كل شي مريناا بيه انا وقمر...