حلقة 18
#ريان_يحكي
من اخر مرة قابلت فيها ايهم و انا هازز حمل ثقيل مفماش قوة في الدنيا تنجمم تخفف عليا الشي الي سمعتو منو .. عايش بين الف شعور و الف فكرة نتخبط فيهم وحدي .. ثنيتي مسكرة من كل الجهات.
عديت اياماتي بين الخدمة والدار حتى فريحة قصرت معاها معادش نحب نراها تعبت مالكذب علاها كل مرة تسالني فيها شبيك .. بقيت غاطس بين الأوراق نحاول نتناسى و نتعدى الي صار بالك الوقت يداوي جروحنا .. هزيت راسي عالتليفون ينوقز استغربت كيف لقيت خالتي وجيهة تكلم فيا للحظة خفت اني نهز عليها ونسمعها
" اهلا خالتي لباس "
" ريان لازمك تجي للفيلا تو .. عندنا ما نحكيو "
" شفما لباس ؟ ايهم لباس "
" ايهم توقف يا ريان .. و انت لازمك تجي تو لازم نحكيو"
طيحت التاليفون من يديا على كلمتها حسيت الدنيا لحظتها وقفت و بيبانها تسكرت في وجهي بقات كان كلمتها تتعاود في وذنايا " ايهم توقف " ركزت عالبيرو حاولت نقوم هزيت روحي بسيف خرجت نجري من السوسيتي معادش نشوف في حتى حد قدامي.. طلعت في الكرهبة وخذيت الثنية للفيلا ثنية متع نص ساعة انا سقتها في ربع ساعة .. اول ما وصلت خذيت نفس وهبطت كنت نمشي بخطوة لقدام و عشرة لتالي خايف من الشي الي بش نسمعو خايف من الي يستنى فيا ورا الباب هذا .. اول وصلت حلتلي البون الباب ودخلتني الخالتي وجيهة الي كانت قاعدة في التراس
" خالتي شصار .. وقتاه توقف ايهم"
هزت عينيها فيا تحكي " البارح .. قمر قدمت شكوى و خاطرها تعرف كان ايهم جاو هزو ولدي"
حسيت بساقيا خانوني كيف سمعت اسمها قعدت على اول كرسي لقيتو عديت يديا على شعري كبست على رقبتي من تالي نحكي
" شنوة بش يصير تو ؟ ايهم شقال ؟؟"
" ايهم نكر بالطبيعة وتهنى اسمك ماتجبدش "
" شنوة بش نعملو تو شنوة الحل بش ايهم يخرج ؟ ليث شقال ؟؟"
" الحل انو قمر تسحب الشكوى متاعها قبل ما تتعدى للمحكمة وتتحل القضية وقتها الحكاية تتعقد اكثر واسمك ينجم يتجبد"
حسيت الدم جمد في عروقي، قلبي خظ بالقوي وبدني رعش فكرة انو اسمي يتجبد ونتحبس خلاتني نترعب خلاتني نخمم في امي وفريحة كان يسمعو رمشت عينيا ورا بعضهم نحبس في الدموع الي شوي و يعلنو استسلامهم و استسلامي خذيت نفس نحكي
" و وهي بش تقبل انها تتنازل ؟؟ بش توافق زعمة ؟؟؟؟"
" بش توافق بسيف علاها .. ليث حكى معاها و انا زادة وهي وافقة اما بشرط "
" شنوة الشرط ؟"
" انو الحكاية تتلم و تعرس يواحد فيكم "
تنطرت من بلاصتي وعينيا بقات تدور في وجهه خالتي وجيهة حاولت نستوعب الي سمعتو " ش شنوة ؟"
" هذاكا شرطها و انا عيطتلك اليوم بش نحكي معاك "
" شنوة بش تحكي معايا ؟"
" ريان انت بش تعرس بقمر "
" ش شنوة ؟؟ فاش تحكي انت ؟ علاه انا ؟؟؟"
" خاطر هذاكا اللازم "
" ههه لازم ؟ تتطلعشي قمر تحب عليا وطلبتني بالأسم ؟؟"
" مش وقت تفدليكك تو .. لازم تتحمل مسؤولية عملتك حتى انت "
" قصدك عملتنا .. انا وولدك عملناها راو .. ظاهرلي فيك نسيت "
" لا مانسيتش اما ولدي الي تحكي عليه تحبس وماجبدش اسمك تحمل المسؤولية وانت كيفو بش تتحملها "
" حسستني انو ما جبدش اسمي من خوفو عليا .. هو ما جبدش اسمي خاطر وقتها بش تثبت عليه الحكاية .. ما تعملش فيها انكم خايفين عليا وخممتو فيا .. وولدك تحمل المسؤولية هكا عندك انت تحملها ؟؟؟ ولدك شد الحبس نهار وبش يخرج وانا بش نهزها عمري الكل .. كيفاه بش نعرس بيها ؟"
" ما عندكش حل اخر ريان .. ما تنساش حكاية القرض الي عليك انا مستعدة نعاونك و نسامحك في الفلوس الكل .. سمعت من ايهم انو مشروعك لخر امورو ما تعجبش "
" هههه يا خي تهدد فيا و لا تشري فيا انت مفهمتكش ؟ انت ناسية اني خاطب و عرسي على قريب؟ شنية بش نقول لأمي وخطيبتي ؟"
" خطيبتك و امك في الحالات الكل بش يسمعو .. سوا بش تعرس بقمر و لا بش تتحبس بش يعرفو عملتك .. المواجهة هاذيكا مفماش منها هروب ريان"
" مانيش موافق مستحيل كان نقبل اني نكون كبش فداء ليك ولولدك "
" باهي كان عندك حل قلي وانا مستعدة نسمعك "
بقيت ساكت مانيش لاقي حل اخر بش نخرج من المصيبة الي انا فيها .. مانيش عارف كيفاه بش نفيق من الكابوس هذا .. وصلت لخانة اليك وماعنديش مهرب.. وفي الحالات الكل انا بش نخسر اما ما نقبلش هوما الي يحددولي خسارتي
"ما نعرش اما الي نعرفو انا مانيش موافق∙∙∙ كيف ما قلت انت في الحالات الكل فريحة وامي بش يعرفو وتهديدك ما يخوفنيش معاد عندي شي نخسرو بعدهم وفي اللحظة هاذيكا انا نمشي نسلم روحي والحكاية توفا هنا مدام وجيهة اما اني نرضجلك مستحيل ∙∙ عرضك مرفوض"
ما خليتهاش تجاوبني هزيت روحي وخرجت طلعت في الكرهبة وكلامها بقى يتعاود .. قرارها صدمني و مانجمتش نقبلو اما بقات قمر بين عيني زعمة بلحق هذا شرطها زعمة الحل هذا يخليها تغفرلنا ولو شوية .. القرار الوحيد الي خرجت اني نقابل قمر و نحكي معاها وكان الحل هذا يرضيها انا مستعد نضحي ونخسر حتى نكفر ذنبي ولو شوية.
اول ما خرجت شديت ثنيتي لليث هو الوحيد الي ينجم يعاوني ونعرف منو الي صاير بالضبط و نفهم اصل الحكاية ثنية كاملة وانا نخمم ماوصلت لحتى حل كل فكرة توصلني لثنية مسكرة صحيح انا متوقفتش كيف ايهم اما يمكن انا متعذب اكثر منو عايش الخوف من الجهات الكل .. اول ما وصلت هبطت نجري نستنى في اي اجابة تخليني نرسي على بر ونفهم روحي دخلت نلقى ليث غاطس بين الاوراق هز راسو معايا اول ما حليت الباب ودخلت غزرتو كانت متبدلة مش ليث الي نعرفو وكنت صحاب معاه قدمتلو ووقفت قدان بيروه نحكي
" ليث لازم نحكيو "
غزرلي غزرة كانت كلها حقرة حسيتو ذلني بيها وهبط راسو للأوراق الي مانت عالبيرو ويحكي " تفضل نسمع فيك "
" ليث اغزرلي نعرف روحي غلطت وعندك حق تتصرف معايا هكا اما انا هنا بش نلقا حل معاك انا هنا بش تعاوني "
هز راسو معايا و قحرلي يحكي" نعاونك ؟؟ كيفاه تحبني نعاونك كيفاه تحبوني نعاونكم ؟؟؟"
"كنت في الفيلا .. خالتي وجيهة قالت الي تفاهمت مع قمر بش نعرس بيها وتتنازل عا..."
تنطر من البيرو وجا قدامي قص عليا " قمر قبلت ؟؟؟"
" ما نعرفش ليث مانعرفش اما خالتي قالت هكاكا قالت انو قمر بش تتنازل انا بشرط انها تعرس والحكاية توفي هنا حبيت نعرف منك اصل الحكاية"
" *** تحب تعرف اصل الحكاية ؟ الحكاية انا مشيت و حكيت مع الطفلة خوفتها وجبرتها وهي قبلت بيك، قبلت بواحد مسخ كيفك .. ريت انتوما وين وصلتوني بحكايتكم بش نتحمل ذنب طفلة بش انتوما سيرتكم تبقى نظيفة "
حسيت ساقيا فشلو استندت بيديا عالبيرو وقعدت حطيت يديا على راسي و هبطت دمعة مني صحيح انا واحد مسخ واحنا كلنا جبرناها مش كان ليث احنا خفنا من الحبس اما حكمنا علاها هي تعيش في حبسنا طول عمرها خذيت نفس نحكي
" ما تتصورش قداه كاره روحي ياليث من اليلة هاذيكا وانا عايش في كابوس.. نعرف انا واحد ساقط و مش راجل انا مستعد نمشي تو نسلم روحي اما انا خايف، خايف على امي وفريحة .. نعرف دار خالك مش ساهلين و بش يحملو عايلتي مسؤولية قراري "
قمت ووقفت قدام ليث " انا موافق نعرس بقمر ,, بش نتحمل المسؤولية هاذي بش نحمها هي ونحمي دارنا "
"هه بش تحمي قمر ؟؟ قمر مسكينة انها طاحت بين يديكم .. انت و ايهم خممتو في مصلحتكم قبل مصلحتها هي "
" لازمني نحكي معاه وصلني لقمر لازم نحكي معاها "
قرب قدامي ورس على سنيه يحكي " رد بالك تقرب منها وقرارها انا متاكد انها بش تتراجع عليه يزي الي صار في الطفلة من جرايرنا "
" احكي معاها انت مالا قلها الي انا حاضر لأي حكم منها قلها القرار الي تراه هي انا مستعد نقدم عليه مهما كان "
هزيت روحي وخرجت مانجمتش نزيد كلمة اخرى ..حاسس بنار شاعلة في صدري كل حل نوصلو نلقاه كيف الحبل على رقبتي يخنقني اما ساي لحق الوقت بش نواجه روحي بخسارتي و نواجه الناس بغلطتي امي وفريحة لازم يعرفو نعرف مستحيل كان يسامحوني اما المهم قمر تغفرلي بالك وقتها يجي نهار ونقدر نغفر لروحي.
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
