#قمر_تحكي
اسبوع تعدا على اخر كابوس عشناه.. من وقت خروجنا من المصحة و احنا ف دار عمي.. مانجمناش نرجعو لدارناا من وراء حالة ليث.. للغاية ليوم وهو يتوجع ماتحسنش جملا رغم انو مواظب على حصص التدليك.. بقيت حريصة على انو يحضرهم و بقيت لاهية بيه طول الفترة هاذي ورغم هكا مازال يتوجع..حتى انو لبارح مرقدش ليلة كاملة من وراء لوجيعة..
حليت عينيا شوي على ضو الشمس لي ضرب فيا.. دوب هزيت راسي شوي ورجعت سطحتو عالمخدة..حسيت روحي تاعبة ومش منجمة نتحرك من بلاصتي.. عندي كم يوم وانا عالحال هذاا مش عارفة شصايرلي..دورت راسي شوي وغزرت لليث شفتو كيفاه كان راقد ووجهو اصفر.. حتى هو للفجر مسكين بش غفى وخمدت لوجيعة شوي.. بعدت الملحفة من فوقي وقمت ناحية السال دوبان.. قربت لرخامة وحليت السبالة غسلت وجهي ورقبتي برشة مرات بش نفيق و نتماسك شوي.. اول ماكملت سكرت السبالة.. خذيت نفس طويل ورجعت للبيت وين شفت ليث حل عينيه.. قربتلو شوي نحكي
انا :" صباح الخير ياروحي "
دور راسو شوي وغزرلي.. تبسملي يحكي
ليث :" صباح النور "
قربتلو فيسع وشديتو من يديه نحكي
انا :" بالشوي خليني نعاونك "
ساعدتو بش هز روحو شوي وتقعد..حطيت لمخدة وراه وتكيتلو ظهرو لتالي.. عدا بعينيه عليا يحكي
ليث :" عيشك قمرتي.. سامحني تعبتك "
قعدت بجنبو وتبسمت نحكي
انا :" تعبك راحه معادش تقول هكاا ليث.. ساعة قلي كيفاه تحس ف روحك ليوم؟ نقصت لوجيعة ؟"
هزلي براسو اي يحكي
ليث :" اي الحمدلله خير شوي "
انا :" الحمدالله ياربي.. ك هكاا خليني نهبط نحضرلك فطورك بش تشرب دواك "
ليث :" باهي "
اول ما حركت ساقياا وقمت حسيت راسي رزن و الدنياا دارت بياا غير معدتي الي تقلبت فجاة.. استندت بيديا عالفرش ورجعت قعدت.. حط يديه على مرفقي يحكي مفجوع
ليث :" قمر شبيك ؟!"
عديت بلساني على شفايفي ورديت النفس شوي نحكي
انا :" شي حسيت بدوخة ومعدتي وجعتني شوي "
عدا بصوابعو على خصلات شعري يحكي
ليث :" هذا الكل من التعب.. عندك ايامات ماترقدش مليح من وراياا "
هزيتلو براسي لا وغزرتلو نحكي
انا :" لا ياروحي مش منك.. يمكن خاطرني مافطرتش لتو و السكر طاحلي.. تو نهبط ناكل حاجة حلوة ونرجع لباس "
هز روحو شوي يحكي
ليث :" قوم خلينا نمشيو للكلينك.. ماتبقاش هكاا شوف حتى وجهك ذابل"
عديت بيديا على شعري نحكي
انا :" ليث والله انا مليحة ماتخافش.. ماتكبرش لحكاية.. غير هكاا ماتنساش بعد ساعة عندك حصة التدليك بش نمشيو مع بعضناا "
هزلي براسو باهي يحكي
ليث :" نمشيو اما بش تعدي انت زادة "
حليت عينيا فيه نحكي
انا :" انا مليحة تو ناكل حاجة ونرجع لباس..امان منحبش نعدي "
نفخ بالشوي يحكي
ليث :" باهي ك هكا انت خليك ليوم ارقد شوي..انا تو يمشي معاياا ايمن "
انا :" لا منحبش نخليك تمشي وحدك "
قص علياا يحكي
ليث :" قمر هوما كلمتين.. يا ترتاح يا تقوم للكلينك "
تنهدت بالشوي نحكي
انا :" باهي باهي تو نرتاح المهم انت برا "
قمت من بلاصتي نحكي
انا :" نجيبلك فطورك ونرجع "
عدا بعينيه عليا وهزلي براسو باهي من غير حتى كلمة.. عطيتو بظهري وخرجت.. بقيت نكركر ف ساقياا بالسيف بلحق حسيت روحي مرهوجة و تاعبة غير كل مرة.. اول ما نزلت تحت بقيت نحضر ف الفطور باليسف.. حطيتو ف الطبق هو والدواء ورجعت للبيت حذا ليث.. قربتلو وقعدت بجنبو.. شدني من يدي و باسني من كفها يحكي
ليث :" يعطيك الصحة قمرتي.. قلي خير تو ؟"
تبسمت نحكي
انا :" اي خير"
حط يديه على خدي يحكي
ليث :" خوفتني عليك "
عديت بعينيا عليه نحكي
انا :" ماتخافش والله صرت احسن تو "
ليث :" باهي أيا افطر معاياا "
هزيتلو براسي باهي وهزيت فنجان القهوة متاعو وحطيتو ف يديه.. وبقيت نفطر معاه اول ماكملناا هزيت الطبق حطيتو عالطاولة ورجعت لليث.. بعدت الملحفة من فوقو وساعدتو بش وقف نحكي
انا :" رد بالك بالشوي "
ليث :" ماتخافش "
بقيت نمشي معاه بالشوي حتى وصلنا لسال دوبان.. حليت السبالة وبليت يدياا وبقيت نمسحلو ف وجهو ورقبتوو.. ساعدتو زادة بش مشط شعرو و فرش سنيه ورجعنا للبيت.. غزرتلو نحكي
انا :" اقعد عالفرش.. نجيبلك حوايجك ونرجعلك "
ليث :" باهي "
ساعدتو بش قعد وقربت فيسع للدريسنغ.. حليتو وجبدتلو حوايجو ورجعت ناحيتو.. حطيت الدبش بجنبو وطبست عليه شوي و شديت طرف المريول من تحت نحكي
انا :" هز يدك و سايس روحك "
ريتو كيف عض على شفايفو وكبس على وجهو من لوجيعة..كل مانشوفو يتوجع هكا نحس قلبي يتقطع عليه.. بقيت نسايس فيه بالشوي على يدو لي كانت معلقة.. اول ماكملت ساعدتو بش وقف.. طبس علياا وباسني من جبيني يحكي
ليث :" ربي يخليك لياا قمرتي "
ضحكت وقربت انا زادة بستو من خدو نحكي
انا :" ويخليك ليا انت زادة "
بعدت عليه كيف هز دبوزة البرفان من فوق التابل دونوي ورش منها شوي لحظتها حسيت روحي تغميت من ريحتها الي كانت قوية.. هزيت يدي فيسع وغطيت فمي اول ماخواطري دارت منهاا..خليت ليث واقف وجريت فيسع للتوالات..طبست راسي وبقيت نرد على بعضو.. حسيت روحي شوي وبش تطلع مني غير وجيعة راسي الي قوات اكثر وساقياا الي معادش هازيني.. حسيت بيه كيف دخل حذاياا قربلي فيسع ولملي شعري يحكي
ليث :" قمر شبيك ؟؟"
ما جاوبتوش وطبست راسي رجعت رديت مرة اخرى..اول ما كملت مديت يدي بالسيف غسلت فمي وسكرت السبالة.. قمت وتكيت براسي على صدرو ننهج ونحكي
انا :" مانعرفش..حسيت خواطري دارت ورجعت تقلقت "
حط يديه على خدي يحكي
ليث :" برا بدل حوايجك خلينا نمشيو للكلينك.. مستحيل نخليك هكاا.. شوف حالتك عمال تتعب اكثر "
بعدت عليه شوي وغزرتلو.. هزيتلو براسي لا نحكي
انا :" لا امان مانحبش.. تو نقول لخالتي تعملي حاجة سخونة "
حل عينيه فيا يحكي
ليث :" مش على كيفك ماتحبش.. براا حضر روحك فيسع مانفهم شي قمر "
تكيت عالرخامة وغزرتلو نحكي
انا :" ليث امان ماتضغطش علياا.. والله تو نتحسن برا انت و انا تو نرقد شوي و نقوم لباس بعد "
عدا بيديه على وجهو وغزرلي يحكي
ليث :" باهي اما شوف كان رجعت وتقلقت بش تمشي بالسيف عليك "
هزيتلو براسي باهي من غير حتى كلمة.. قرب مني وشدني من يدي يحكي
ليث :" هياا ايجاا معاياا.. برا تسطح شوي و تو انا نقول لرفيقة تحضرلك حاجة تشربها "
رجعناا للبيت ووقف نحكي
انا :" لا ليث خالتي مازلت راقدة.. غير هكا خليني نهبط معاك ونساعدك "
ليث :" انجم نهبط وحدي ... "
قصيت عليه نحكي
انا :" لاا ماتنجمش.. هياا خلينا نهبطو ايمن واقف تحت من بكري يستنى فيك "
عدا بعينيه عليا وتنهد بالشوي..هز تاليفونو وشد فياا وخرجناا.. بقيت نسايس فيه ف الدروج حتى نزلنا.. خرجناا لبرا وين شفت ايمن ف الكرهبة يستنى فيناا.. نزل ودار حل باب الكرهبة.. اول ماقربناا غزرلي يحكي
ليث :" مانوصيكش اطلع ارتاح تو .. و كان حسيت باي حاجة اطلبني.. مفهوم ؟؟"
تبسمت نحكي
انا :" باهي مفهوم "
غزرت للايمن يحكي
أيمن:" صباح الخير "
ليث :" صباح الخير "
انا :" صباح الخير ايمن.. ايمن عيش خوياا مانوصيكش عليه راهو راسو صحيح "
غزرلي على جنب وتبسم يحكي
ليث :" بالله ؟"
انا :" والله "
تلفتت للايمن كيف ضحك يحكي
ايمن :" تهنى عليه من غير ماتوصي"
ليث :" اطلع اطلع.. رجعتوني طفل صغير "
ضحكت وساعدتو بش طلع ف الكرهبة..سكرت الباب.. وخرت بخطواتي لتالي ورجعت للفيلا بعد ما مشاو.. سكرت الباب وراياا وبقيت نرد ف النفس حسيت وجيعة معدتي عمال تزيد وين حسيت خواطري دارت مرة اخرى.. دخلت لتوالات الي كانت تحت وغسلت وجهي برشة مرات.. بلحق مش عارفة شنوة صايرلي ليوم قاعدة نتعب اكثر.. سكرت السبالة وخرجت ناحية الكوجينة.. ترميت عالكرسي وغمضت عينيا بش نرتاح شوي..رجعت حليتهم على صوت خالتي تحكي
رفيقة :" قمر شبي بنتي ؟"
هزيت روحي شوي وبلعت ريقي الي نشف نحكي
انا :" خالتي حاسة روحي تاعبة عاللخر..ومتقلقة"
قربتلي فيسع وحطت يداها على خدي تحكي
رفيقة :" سمالله على بنتي.. شبيك ؟"
حطيت يدي فوق معدتي نحكي
انا :" معدتي توجع برشة وخواطري دايرة.. وحاسة بدوخة غريبة..وحتى راسي يوجع برشة "
رفيقة :" فطرت ولا مازلت ؟"
انا :" اي فطرت مع ليث.. خالتي امان ميسالش تعملي تيزانة ممكن خذيت برد على معدتي "
قعدت بجنبي وغزرتلي تحكي
رفيقة:" باهي تو نعمل لبنتي.. قلي شنوة كليت لبارح ؟"
عديت بلساني على شفايفي نحكي
انا :"حتى شي والله.. مانجمتش نتعشى لبارح جملا حسيت نفسي مسدودة.. و عايفة لماكلة "
شدتني من يدي وغزرتلي درا كيفاه تحكي
رفيقة :" قمر بنتي تكونش حبلة ؟"
قلبي خض بالقاوي اول ماسمعت كلمتها.. حسيت بدني رجف واطرافي.. بقيت نغزرلهاا ساكتة ماعرفتش شنوة نقول و لا عرفت حتى نتحرك..وتربثت ماعرفتش شنعمل..وعديت بعينيا عليهاا وقمت من بلاصتي نحكي نحكي
انا :" شنوة..لالا مستحيل..تو تو نشرب شي سخون نتحسن "
رفيقة :" علاش مستحيل..و الله العوارض الي عندك لكل متاع وحم...ورد بالك تشرب شي حتى نتاكدو "
انا :" ب باهي كيفاه بش نتاكد..خالتي انا انا منعرفش نقصد.. "
تبسمت تحكي
رفيقة :" اهدا بنتي شبيك توترت هكا استنى.. تو نعطيك تاست قبل برا جرب.. نظن بقالي واحد من لي شريتهم وقت عرفت بكرم "
هزيتلها براسي باهي من غير حتى كلمة حسيت روحي مش منجمة نحكي حتى شي الفكرة وحدها دخلتني بعضي..بقيت نستنا فيها رجعتلي فيسع حطتو في يدي تحكي
رفيقة :" برا جرب تراه "
هزيتلها براسي باهي.. كبست عليه ف يدياا وطلعت لغرفتي دخلت للتوالات.. قعدت على حرف البانو وجبدت التاست بقيت نقرا كيفاه نعمل وبعد قمت تصرفت كيف مامكتوب بالضبط..اول ماكملت رجعت قعدت عالحرف وبقيت نستنى ف المدة المطلوبة.. كبست عليه ف يديا وبقيت نغزرلو..بقيت نهز في رجلي من التوتر لي شدني غير كرشي الي وجعتني اكثر عمري ف حياتي لا توترت بالطريقة هاذي..اصلا مانيش عارفة انا شنوة حاسة تو بالضبط..متحمسة بش نعرف النتيجة وفرد وقت خايفة..بقيت من فكرة لفكرة حتى جاء الوقت الي بش نشوف فيه.. خذيت نفس طويل وهزيت يدي الي كانت ترعش..عديت بعينيا عالتاست وين حسيت بدقات قلبي قوات فجاة..دمعتي نزلت مني بالوقت وانا نشوف ف النتيجة الي كانت إيجابية.. مانعرفش كيفاه قمت من بلاصتي..قربتو ليا اكثر نثبت فيه..خذيت نفس طويل وين دموعي زادو قواو..فكرت انو بش يجيني صغير ماخممتش فيها جملة..بعد الي تعديت بيه لكل.. نحيتها من بالي وفكرت لي خسرت فرصة اني نصير ام..حسبت انو حياتي وقفت ومعادش عندي فرصة بش نرجع نحب..و نعرس..و بش نبقى وحدي طول حياتي..غمضت عينيا بالقوي و رجعت حليتهم على دموعي الي نزلو اكثر.. حسيت قلبي بش يخرج من بلاصتو غير بدني الي عمال يرجف اكثر.. ف لحظة وحدة نسيت لوجايع الكل ونسيت التعب الي كنت حاستو دقايق لتالي بقيت كان نغزر للتاست.. خاطرني بلحق مش مصدقة اني عايشة اللحظة هاذي.. صحيح عرست ونجمت نتجاوز خوفي ف العلاقة اما بلحق ماتخيلتش اني بش نعيش الموقف هذاا..هزيت يدي وبقيت نحاول نكتم صوتي كيف لقيت روحي نبكي بالصوت..وقت تفكرت انا شنوة عشت و شنوة صار فياا قبل.. تعذبت برشا وتحرمت من برشا حاجات.. اما الحمدلله ف الاخير ربي عوضني وماحرمنيش من الفرحة هاذي..فرحت اني حبلة من الراجل الي حبني وعاوني..الراجل الي حبيتو وخلاني نعيش حياة جديدة معاه..هو خلاني نحياا قبل وفرحني و اليوم وهبلي فرحة جديدة كيف حملت ب قطعة منو..تبسمت بين دموعي اول ماحطيت يدي على كرشي..حسيت برعشة سرات ف بدني و كرشي دغدتني..هزيت يدي ومسحت دموعي الي ماحبوش يكفو..بقيت نرد ف النفس كيف سمعت خالتي تدق عليا عليا وتحكي
رفيقة :"قمر شبيك بنتي ؟"
قدمت للباب حليتو و انا يدي على قلبي مش عارفة كيفاه بش نخبر خالتي..اصلا للحظة هاذي وانا مازلت مش مستوعبه اني بش نولي ام..هزيت راسي معاها وحاولت نلم لحروف حليت فمي بالسيف نحكي
انا :" ا..انا ح.. حبلة خالتي... "
مانجمتش نكمل كلامي وترميت في حضنها..دورت بيديها عليا تحكي
رفيقة :" مبروك ياروحي..مبروك "
عدات بيداها على ظهري ورجعت تحكي
رفيقة :" اششش عيش بنتي لمفروض تفرح علاش تبكي "
انا :"خ..خالتي ما منيش مصدقة..انا تعبت برشا يا خالتي..هوما خذاو مني كلشي..خسرت كلشي في ليلة..انا لتو نتوجع وقت نتفكرهم..ديما نحس روحي ناقصة..بسببهم ف فكرت مش بش نرا ليوم هاذا جملة..ف.. فكرت مش من حقي..ح..حاسة روحي نحلم والله "
غمضت عينيا كيف حسيت بيداها تمسح على شعري وتحكي
رفيقة:"ماكش تحلم وراس بنتي..انا ريت كلشي انت تعديت بيه..انت تستاهل الفرحة هاذي..ربي عوضك بعد لي خسرتو..وبش تنسى كل شي عشتو وقت تهز صغيرك بين يديك "
شهقت وقت سمعت كلمتها..بعدتني عليها ومدت يدها مسحتلي دموعي.. هزيت يدي ومسحتلها دموعها انا زادة..تبسمتلي تحكي
رفيقة :"بنتي كبرت وبش تصير ام "
ضحكت بين دموعي نحكي
انا:"ح.. حاسة روحي متوترة و خايفة برشا..نحس في روحي منيش مستعدة "
رفيقة :"مفما حتى شي يخوف..عيش فرحتك بلخبر.. وباقي الامور تجي بطبيعتها..وقت تصير ام..بش تعمل كلشي على خاطر صغيرك بلا حتى ما تخمم "
هزيتلها براسي باهي وضحكت اشرتلي براسها تحكي
رفيقة:"برا اغسل وجهك وارتاح..تو نعملك عصير..ورد بالك تشرب شي بلا علمي ط..يمشيش يصير شي للصغير "
انا:"باهي خالتي"
ريتها كيف عطاتني بظهرها وخرجت..دخلت للتوالات غسلت وجهي..هزيت راسي وغزرت لروحي وانا مش مصدقة الاحساس لي عايشتو تو..نزلت بعينيا وغزرت لكرشي تبسمت من غير ما نشعر الفرحة لي عشتها اليوم عمري ما عشت كيفها...
رجعت للبيت وقربت ناحية الفرش..تسطحت وفرد وقت خذيت تاليفوني نشوف ف الوقت.. حسيت روحي توترت اكثر كيف لقيت ليث قريب يروح..لقيت روحي نخمم كيفاه بش نخبرو..منعرفش كيفاش بش تكون ردة فعلو..فقت من سرحتي على صوت الباب كيف تحل وين ريت خالتي دخلت..هزيت روحي شوي وتقعدت.. قربتلي وقعدت بجنبي..حطت كاسة العصير ف يدي تحكي
رفيقة :" كيفاه تحس ف روحك تو ؟ خير شوي ؟"
خذيت رشفة من الكاسة وحطيتها عالتابل دونوي نحكي
انا :" الحمدالله خير تو "
تبسمت تحكي
رفيقة :"مانوصيكش قمر.. تو لازمك ترد بالك على روحك وعلى صحتك نحبك تاكل مليح.. راك ماكش وحدك "
هزيتلها براسي اي نحكي
انا :"نحاول خالتي..اما والله حاسة روحي عايفة لماكلة "
رفيقة :" اي غصب على روحك.. غير هكاا لازمك تمشي لطبيبة..بش نعطيك عنوان طبيبة لي عديت عندها وقت حبلت بكرم و خلي ليث يمشي معاك "
عضيت على شفايفي نحكي
انا :" ساعة خالتي انا متوترة تو..خايفة من ردة فعلو"
رفيقة:"علاش"
انا:"منعرفش خالتي ليث عمرو ما جاب سيرة الصغار ولا قالي انو يحب صغير ..بلكشي ميحبش تو "
رفيقة:"لا متخافش اكيد يحب.. اهوكا رغم لي مريض ديما يلاعب كرم"
انا:"هكا قولتك خالتي والله حاسة روحي متوترة علخر ..تو نقلو كيف يجي ان شاء الله يفرح"
عقدت بحواجبها مستغربة تحكي
رفيقة :" ناوية تقلو تو انت ؟؟"
انا :" اي..علاش ؟ "
رفيقة :" ياخي لخبر هذا يتقال هكاكا هو ؟ لازمك تحضرلو قبل "
عديت بعينيا عليهاا نحكي
انا :" كيفاه نحضرلو ؟"
هزت بحاجبهاا تحكي
رفيقة :" بنتي انت علاش ديما هكا لازم كل شي نعلمهولك انا.. لبنات فعمرك راهم حافظين الحاجات هاذم.. شوف انا كيف عرفت ب كرم وقتهاا..عملت سهرة و عشاء وجو خاص ليا وانا مصطفى.. انت زادة اعمل هكاا.. انتوما اول مرة تعيشو اللحظة هاذي..خليهاا خاصة بينك انت و ليث.. مش طول تقلو ليث راني حبلة..خليك ذكية شوي قمر "
انا :"ب.. باهي خالتي متغشش مني امان.. راني متوترة ومش عارفة نخمم"
شدتني من يدي وضحكت تحكي
رفيقة :" نعرفو الاحساس هذا.. اما ماتوترش روحك خاطر مش باهيلك تو "
انا :" باهي خالتي "
رفيقة :" أيا اشرب عصيرك و ارتاح شوي "
هزيتلها براسي باهي من غير حتى كلمة وهزيت كاسة العصير بقيت نشرب.. شفت خالتي كيف وقفت وخرجت من حذايااا.. رجعت الكاسة عالتابل وتكيت بظهري لتالي نخمم ف كلام خالتي.. شنوة بش نعمل بلحق هاذي لحظة خاصة و اول مرة بش نعيشوهاا.. نحب نحضر حاجة تفرح ليث اكثر وماتخليهوش ينساهاا..
غمضت عينيا وحاولت نغفى شوي حتى يروح ليث..مانعرفش قداه تعدا وقت حتى سمعت صوت الباب كيف تحل..حليت عينيا وتبسمت كيف ريتو هو دخل.. وفرد وقت لقيت روحي رجعت نخمم كيفاه بش نبقى ساكتة مانقولش حسيت روحي تربثت وخفت زادة لا مانعرفش نتصرف وندخل بعضي قدامو.. خذيت نفس وبعدت الملحفة قمت نحكي
انا :"حمد الله على سلامة يا روحي "
ليث :" عيشك قمرتي "
قربتلو شوي نحكي
انا :" انت مليح ؟"
ليث :" لباس "
قربلي وعدا يدو على خدي
ليث :" قلي كيفاه تحس ف روحك تو؟ ساعة رقدت كيما وصيتك ؟"
فركت يديا ف بعضهم حسيت روحي دخلت بعضي قدام سؤالو مانعرفش كيفاه شديت روحي وماخبرتوش هزيتلو براسي اي نحكي
انا :" انا لباس.. كنت متسطحة تو وخالتي عملتلي حاجة سخونة "
عدا بصوابعو على خصلات شعري يحكي
ليث :" حمد الله"
عديت بعينيا عليه نحكي
انا :" اي قلي انت شنوة قالك الطبيب؟ "
ليث :" قال لباس.. قاعد نتحسن "
انا :" قتلو على وجيعة لبارح مش هكاا؟ كيفاه مانجمتش ترقد ؟"
هزلي براسو اي يحكي
ليث :" اي قتلوو..عطاني بوماضة بش ندهن بيهاا كيف نحس روحي موجوع "
قربتلو شوي وغزرتلو ف عينيه نحكي
انا :" اللطف عليك من لوجيعة ياروحي "
ليث :" عيشك قمرتي.. ايا شرايك كان نرجعو لدارناا "
عقدت بحواجبي نحكي
انا :" علاش ليث ؟؟ انت مازلت تاعب "
ليث :" انا قاعد نتحسن.. و تو عنا ايامات هناا سلمت ف خدمتي واموري الكل.. لازمني نرجع "
انا :" اما كيفاه بش تخدم وانت بالحالة هاذي ؟"
ليث :" هاني لباس..غير هكاا غدوة عندي محكمة و الأوراق ف الدار..لازمنا نرجعو ليلة "
حليت عينيا فيه نحكي
انا :" يا ليث محكمة شنوة؟؟.. شوف روحك تمشي بالسيف.. أجلهاا "
هز بحاجبو يحكي
ليث :" على كيفي هو بش نأجلهاا.. وزيد مانجمش نجبد ب الموكل متاعي.. هو معمل علياا غدوة "
تنهدت بالشوي نحكي
انا :" و..وكيفاه بش تسوق ؟"
ليث :" ايمن بش يبقى معاياا..حكيت معاه بكري تهنى "
انا :" اي ك هكا ميسالش مالاا.. اصلا نطمن عليك اكثر معاه "
قرصني من خشمي وتبسم يحكي
ليث :" يعني رضيت عليناا.. بش نروحو ؟"
ضحكت نحكي
انا :" ايي..خليني نبدل دبشي ونخبر خالتي ونروحوو "
ليث :" باهي "
قمت من بلاصتي نحكي
انا :" انت خليك مرتاح "
هزلي براسو باهي وترمى على سرير..اول ماكملت حضرت روحي غزرتلو نحكي
انا :" كملت.. خليناا نمشيو "
حل عينيه وغزرلي يحكي
ليث :" اي هياا "
قربت ساعدتو بش وقف وخرجناا.. اول مانزلنا ريت خالتي كيف غزرتلناا.. عدات بعيناها عليناا مستغربة وقربت تحكي
رفيقة :" ياخي مروحين ؟؟"
ليث :" اي رفيقة.. كهو وقيت بش نرجعو للدار "
رفيقة :" اما انت مازلت تاعب ولدي.. خليكم الليلة عالاقل "
انا :" ليث عندو خدمة.. ماينجمش يأجلهاا "
رفيقة :" فهمت عليك "
هزيت راسي مع ليث يحكي
ليث :" انا بش نشوف ايمن.. اخلط انت "
انا :" باهي "
ريتو كيف عطانا بظهرو وخرج.. غزرت لخالتي تحكي
رفيقة:" شبيكم مروحين تو؟"
هزيتلها براسي لا نحكي
انا :" قال عندو محكمة مانجمتش نرفض "
قربتلي شوي تحكي
رفيقة :" ميسالش..يمكن هكا احسن بش تنجم تخبرو.. اما كان تحس روحك تعبت ارجع لهناا حذاياا مانوصيكش قمر وكلمني كان احتجت لأي شي "
تبسمت وقريت بستهاا من خدها نحكي
انا :" عيشك خالتي.. ربي يخليك ليا "
حطت يداها على خدي تحكي
رفيقة :" و يخليك لياا انت زادة.. استنا نسكبلك شوي فطور هكا تروح ترتاح متعمل شي باهي"
هزيتلها براسي باهي وبقيت نتبسم على خوفها عليا ريتها كيف عبتلي من كل شي عملتو وحطتو في يدي
رفيقة:"أيا برا ماتخليش راجلك يستنى و رد بالك على روحك "
انا :"عيشك خالتي..وانت سلم على عمي وبوسلي كرم "
رفيقة :" يوصل "
تبسمتلهاا من غير حتى كلمة وعطيتهاا بظهري وخرجت وين شفت ليث طلع ف الكرهبة مع ايمن يستنى فياا.. زربت ف خطواتي وطلعت معاهم وشدينا الثنية للفيلا..
ثنية كاملة عديتها نخمم ف خبر حبالتي لغاية تو مازلت مش مصدقة اني بلحق حبلة وعندي صغير ف كرشي.. نستنى ف اللحظة الي بش نخبر فيهاا ليث..اصلا ماعرفتش كيفاه شديت روحي وسكتت اما يمكن كيما قالت خالتي موضوع رجوعنا لدار ف صالحي تو..هكاا انجم نفكر ف طريقة باهية نخبر بيهاا ليث.. فقت من سرحتي على الكرهبة كيف وقفت.. نزلت انا قبل ليث هزيت الساك وحليت الباب من شيرتو..ساعدتو بش نزل وسلمناا على ايمن الي مشى.. اول مادخلناا للدار تلفتت على صوت ليث يحكي
ليث:" واخيرا الواحد رجع لدارو "
سكرت الباب وتبسمت نحكي
انا :" مافيباليش بيك قالق لهدرجة من القعدة غادي "
هز بحاجبو وغزرلي على جنب يحكي
ليث :" والله الواحد يرتاح كان ف دارو.. هكاا انجم نتفاضى بيك وحدناا ومايقلقني حد قميرة "
حطيت الساك على جنب وقربتلو نحكي
انا :" انا والله تعودت ب خالتي و الجماعة ماحبيتش نرجعو فيسع "
ليث :" بربي ؟"
هزيت بكتافي نحكي
انا :" اي "
ليث :" ادخل ادخل.. كان نتبعك انت تو نعيشو غادي "
ضحكت نحكي
انا :" خليني نمشي نحضرلك فطورك بش تشرب دواك"
ليث :"باهي قميرة.. انا بش ندخل للمكتب لازمني نبدا نخدم "
هزيتلو براسي باهي نحكي
انا :" باهي مالا اخدم حتى اناديلك "
ليث :" باهي "
عطاني بظهرو ودخل للمكتب..مشيت حطيت للماكلة في للكوجينة وطلعت لبيتي.. بلحق حسيت روحي توحشت الدار حتى انا حبيت نروح لداري خاطر كل مرة واحنا مسلمين فيهاا من وراء لحكايات الي يصيرو و الخوف.. اما انشالله المرة هاذي كل شي يكون وفى وحياتنا ترجع عادية.. وترجع احسن ممكن بوجود صغيرناا.. حطيت يدي على كرشي وخذيت نفس قدمت للبيت غيرت ثيابي وبقيت أنظم فيهاا شوي شوي خاطر عندها برشة مسكرة..غيرت الفرش و نظمت لحوايج ونزلت للكوجينة.. اول ما حليت العلب وفرغت لماكلة حسيت خواطري دارت.. مانيش حاملة نغزر ولا نشم حتى ريحة.. بلعت ريقي بالسيف وجبدت وسكبتها في الاصحن.. سخنتها في لميكوند.. حضرت كل شي وحطيت الطاولة ومشيت للبيرو وين ليث.. دقيت الباب ودخلت وين ريتو مطبس راسو وغاطس ف الاوارق.. قدملتو شوي نحكي
انا :" ليث يزيك من الخدمة و هياا بش تفطر "
هزلي براسو باهي ووقف يحكي
ليث :" باهي هاني جاي "
هزيتلو براسي باهي من غير حتى كلمة وسبقتو للكوجينة.. قعدت عالطاولة وين هو جاء وقعد مقابلني..عدا بعينيه عالماكلة وغزرلي يحكي
ليث :" يعطيك الصحة قمرتي "
انا :" صحة وعافية..اما انا ما حضرت شي خالتي لي طبخت "
ليث:"ميسالش هاك تاعبة ارتاح"
تبسمتلو و غرفتلو ف صحنو وطبس راسو بقى ياكل.. حطيت يدي على فمي وبقيت نغزرلو حسيت روحي معادش انجم ونحب نقوم.. اما شديت روحي بالسيف وبقيت معاه بش مايشكش ولا يتحير عليااا.. هز راسو معاياا وغزرلي مستغرب يحكي
ليث :" شبيك ماكش تاكل ؟"
انا :" لا حاسة روحي شبعانة.. كول انت "
هز بحاجبو يحكي
ليث :" مازلت مقلقة ؟"
انا :" اي شوي.. اما انا شبعانة تو.. تو ناكل بعد "
ليث :" باهي "
بقيت نغزرلو كيفاه ياكل حتى كمل..وقف وغزرلي يحكي
ليث :" انا بش نرجع للمكتب.. لازمني نكمل الي عندي "
هزيتلو براسي باهي نحكي
انا :" اي براا ربي عينيك "
اول ماعطاني بظهرو ودخل للمكتب قمت فيسع لميت الطاولة بش نتخلص من الريحة الي حسيتها قلبتلي معدتي.. كملت نظمت الكوجينة بسرعة وطلعت للبيت بش نرتاح.. دخلت لسال دوبان نحيت حوايجي ودخلت تحت الدوش وين حسيت بدني ترخى شوي وعصابي هدات من الماء الدافي.. اول ماكملت خرجت لبست الكاب دوبان ونشفت شعري ورجعت للبيت.. غيرت ثيابي وتسطحت فيسع عالفرش..حسيت ساقياا معادش هازيني من التعب.. غمضت عينيا من غير مانرقد.. رجعت حليت عينيا على صوت الباب كيف تحل.. هزيت روحي وتقعدت نحكي
انا :" شبيك لتو ليث..الوقت تاخر "
قربلي وتنهد بالشوي يحكي
ليث :" هذاكاا حدي قميرة.. شبيك مارقدتش انت ؟"
قمت من بلاصتي وقربتلو نحكي
انا :" مانجمتش نرقد..بقيت نستنى فيك "
تبسم وطبس علياا شوي باسني من جنب شفايفي يحكي
ليث :" باهي نغسل حالتي ونجي لحبي "
هزيتلو براسي باهي من غير حتى كلمة..ريتو كيف دخل لسال دوبان وقتهاا انا قربت ناحية الدريسينغ وجبدت مريول متاعو وخذيت البوماضة من فوق لكوفوز ورجعت للفرش.. شوي وقت وريتو كيف رجع للبيت وقرب ناحية الفرش.. هزيت روحي وقربتلو نحكي
انا :" كيفاه تحس ف روحك تو ؟ "
كبس على وجهو وغزرلي يحكي
ليث :" موجوع شوي "
هزيت روحي شوي وخذيت البوماضة نحكي
انا :" مالا خليني انا ندهنلك.. انت قلي منين تحس ف الوجيعة كهو "
ليث :" باهي "
وقفت قدامو وحطيت يدي على جنابو.. بقيت نسايس فيه بالشوي ونهزلو ف المريول حتى تنحى..حسيت روحي ترهوجت وانا نشوف فيه كيفاه عريان قدامي غير ريحتو الي حسيتهاا متغيرة مش عارفة علاش.. خذيت البوماضة ودورت وراه..تربعت عالفرش وراء ظهرو وغزرتلو لحظتهاا حسيت قلبي وجعني وانا نشوف ف لتراس متاع الضرب الي مازالو ظاهرين من رقبتو لكتفو حتى لنص ظهرو الي كان كلو جروح وازرق..حليت البوماضة وحطيت منهاا شوي على صبعي وعديتهاا على كتفو نحكي
انا :" وين موجوع بالضبط ..هناا ؟"
ليث :" اي اما اطلع شوي "
طلعت بصبعي وبقيت نعدي فيه بالشوي بالشوي بش مايتوجعش..عضيت على شفايفي كيف سمعتو تنهد يحكي
ليث :" "اه.. "
انا :" وجعتك ؟"
ليث :" لا بالعكس..هاو ليدين الي يريحو مش كيف طبيب هاذاك نمشيلو يعجني عجن.. لواحد من يديه يزيد يمرض"
ضحكت على كلامو نحكي
انا :" "هو يعرف شيعمل ليث"
ليث:"لا والله لا يعرف..كان من لول خلاوك تداويني راني لباس"
انا :" هههه انت مجنون وللله "
بقيت هكاكا حتى كمتلو.. حطيت البوماضة على جنب وعديت بعينيا على ظهرو وكتفو..هزيت روحي شوي وقربتلو اكثر..طبست عليه وبستو بوسات متفرقة على الضربات..دور راسو شوي وغزرلي من غير حتى كلمة.. عديت بصبعي على كتفو نحكي
انا :"اللطف عليك ياروحي..يا ريتهم فيا انا ولا فيك " دور راسو وغزرلي يحكي
ليث:"والله كان عرفت لي بش تدللني هكا كيف نشريها راني شريتها عندي قداه "
انا :"هههه.. يزي ليث "
بعدت عليه وقت هز روحو ودار بكلو جبدني عندو شوي حتى لصقت فيه أكثر وين حسيت ب النفس متاعو ضربني وخلاني نترهوج اكثر..اصلا حسيت روحي شوي ونذوب وانا قريبتلو هكاا وهو عريان..ضيق عينيه فيا وتبسم يحكي
ليث"لشنوة تغزر "
انا:"اه شي"
ليث:"يظهرلي توحشتني حبي"
كمل كلامو وضحك..حسيت وجهي فور من نظراتو ليا.. هربت عينيا منو وبعدت عليه تسطحت في بلاصتي نحكي
انا "لا..انا تاعبة علخر ونحب نرقد"
ليث:"متاكدة!؟"
انا"اي وانت ارقد..مش عندك خدمة الصباح "
ريتو كيف قرب مني وتكا بجنبي يحكي
ليث:"انا قلت نروح لداري نتفرهد"
انل:"يزيي ليث على اساس تنجم هاك مريض ويدك معلقة "
تلفتلي وهز بحاجبو يحكي
ليث:"شوف الفرخة..والله نجمك في حالاتي الكل..تحب تجرب"
انا :"والله لا تحشم..يزي ليث نحب نرقد دايخة انا "
ضحك وجبدني عندو يحكي
ليث :"ارقد ارقد من نهار عرفتك وانت دايخة "
حليت عينيا فيه نحكي
انا:"بربي سي ليث ..شقصدك.. يعني انا.... "
قص عليا كيف قحرلي يحكي
ليث :"مش كنت دايخة ايا اسكت وارقد"
جبدني عندو وحشاني فحضنو تبسمت على هبالو وكبست عليه.. غمضت عينيا وانا نخمم في نهار غدوة وكيفاش بش نخبرو...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
