#قمر_تحكي
غزرت لروحي ف لمراياا وعديت بعينيا عالروبة لي لابستها..تبسمت وكملت حطيت الروج..الايامات للي فاتو حسيت روحي تحسنت..صحيح مزلت منحكيش معاه وامورنا مش باهية رغم ديما يحاول يحكي ف لموضوع ويقلي اسمعني مرة كهو.. اما انا معادش نحب خاطرو جرحني برشا بعملتو..معادش يهمني فيه المهم نرد بالي على صغيري بش يجي يوم ونعيش نهار كيف هذا..تبسمت ك تفكرت انو الليلة مستدعين عند عم مصطفى وخالتي رفيقة بش يعملو حفلة في دارهم جديدة..بمناسبة عيد ميلاد كرم..خالتي حبت تعوضو خاطر وقت عيد ميلادو ليث كان ف لحبس وقتها معملولوش حفلة شراولو كيكة صغيرة كهو..وتو هي حبت تحتفل كيف كل شي رجع لبلاصتو..خرجت من البيت وهبطت فالدروج حسيت روحي فرحانة علخر أصلا توحشتهم ياسر من وقت مشاو للمزرعة ما شفتهمش خاصة كيف كانو لاهيين يحضرو في دارهم محبيتش نقلهم لي صار ونشغلهم عليا..عديت بعينيا عالدار ملقيتوش عرفتو مش موجود..نفخت بالقوي وقعدت فالصالة..ستنيت شوي حتى سمعت صوت لباب.. خرجت وغزرتلو ك دخل..هزني وحطني بعينيه ساكت.. وقفت وربعت يديا نحكي
انا:"وينك..مش قتلك نحب نمشي بكري عند خالتي"
غزرلي على جنب يحكي
ليث:"هاني جيت "
هز يدو لي فيها الساك ورجع يحكي
ليث:"مشيت جبت لهدية..بعد ما حضرتك مرضيتش تشريها "
هزيت بكتافي نحكي
انا:"اي خاطر منحبش نمشي معاك..قتلك خليني نمشي وحدي "
عدا بيدو على وجهو يحكي
ليث:"صبري بدا يوفاا..برا جيب ساكك خليني نوصلك"
عوجت فمي وطبست هزيت ساكي وخرجت للكرهبة وين لقيتو يستنا فيا..طلعت و هزيت الهدية نحكي
انا:"شنوة جبت !؟"
عوجت شفايفي ك ريتو طفاني.. عديت بعينيا عالهدية حبيت نعرف شنوة اما ماعرفتش خاطر كانت مغلفة بكلها..نحكي
انا:" نحكي معاك "
ليث:"تعرف وقتاه تحكي معايا..اما وقت نجي نحكي معاك ونحلو لمشكلة كاني نحكي مع حجرة "
انا:" متحاسبنيش على حاجة انت سبب فيها..أصلا تستاهل..ومنغير ما تجاوبني تونحلها وحدي نشوفها "
خطفها من يدي يحكي
ليث:" سيب..كيف يحلوها تعرف شفيها "
انا:"أصلا باين مش بش تعجبهم..ماتعرفش تشري معندكش ذوق "
قحرلي ورجع يغزر قدامو..حسيت روحي توترت من كلامو هذا..يحاسب فيا على غلطة مش غلطتي.. شعندو يقول أصلا وهو كان بش يطلقني..ويحبني نسامحو بالساهل..فقت من سرحتي كيف راكا لكرهبة يحكي
ليث:" هيا اهبط وصلنا "
ضحكت وقت ريت دار عمي جديدة..كانت اقرب من للفيلا لقديمة ومحلاها..هبطت فيسع وجريت للباب دخلت وعديت بعينيا على لجنينة لي كانت مزينة.. تبسمت اكثر وقت خرجت خالتي تحكي
رفيقة:" مرحبا ببنتي "
جريت وعنقتها نحكي
انا:" خالتي توحشتك برشة"
باستني من خدي تحكي
رفيقة:وانا توحشتك بنتي "
كبست على يدها نحكي
انا:مبرووك..تهبلل للدار "
تبسمت تحكي
رفيقة:" عيش بنتي ..عجباتك ؟"
هزيتلها براسي اي وعديت بعينيا عليهاا نحكي
انا:"ايي حبيتها علخر احلى من للفيلا لقديمة "
تبسمت وقربت بست عمي لي خرج وراها نحكي
انا:"مبروك عليكم عمي..تهبل داركم "
ضحك يحكي
مصطفى:"عيش بنتي..ودارك زادة "
تبسمت وبعدت كيف سمعت صوتو ورايا يحكي
ليث:"مبروك عليكم..تسكنوها بلهنا "
تبسمت كيف قرب منو عمي وسلم عليه يحكي
مصطفى:"عيش ولدي..مرحببا بيكم..بيتكم حاضرة كيف قبل "
تبسملو يحكي
ليث:"ربي يخليك عمي..شحالك رفيقة لباس ؟"
رفيقة:" لباس وانت ؟"
ليث:حمد الله "
عدا بعينيه عليهم ورجع يحكي
ليث:" انا لازم نمشي تو بعد نرجع "
مصطفى:" ادخل اشرب حاجة وبعد امشي "
ليث:"لا ماو تعرف عماد ليوم بش يخرج نمشي نطمن عليه ونرجع "
مصطفى:" فهمت ربي معاك ولدي"
دورت بعينيا عليهم وين فهمت انو نجم يخرج صاحبو لي كان محبوس..قحرتلو ك غزرلي و مشى..محسوب خلي يمشي اصلا مش طايقتو.. قربت مع خالتي ودخلت للدار..وين بقات توري فيا ف البيوت..سلمت على خالتي فاطمة ورجعت ندور معاها.. اول ماكملناا رجعت معاها للصالة غزرت لطواول لي كانو موزعين ومزيينين..متوقعتش بش يعملو حفلة كبيرة هكا حتى الصالة كانت كبيرة ومحلاها..غزرتلها نحكي
انا:" محلاه ديكور خالتي "
رفيقة:" فرحت ك عجبك..حبيت يكونو طاولات موزعين بش كل حد ياخو راحتو "
هزيتلها براسي باهي وبقيت نغزر لزينة.. تلفتت على صوتها ك رجعت تحكي
رفيقة:" صارت حاجة بينك وبين راجلك ؟"
تربثت وغزرتلها نحكي
انا:" لا علاش ؟"
عدات بعيناها علياا وغزرتلي درا كيفاه تحكي
رفيقة :" منعرفش هو مشى من غير ما يدخل وانت مكلمتوش "
انا:لا لا..انا جيست مش طايقتو بسبب لوحم "
ضحكت تحكي
رفيقة:" كي هكا ميسالش..فترة وتعدي "
هزيتلها براسي اي بقينا نحكيو..يدلت الموضوع فيسع محبيتش نحكي حتى شي من لي صار..نحبها تبقى فرحانة بكرم..تعدا شوي وقت وين بداو لمعازيم يجو.. غزرت لخالتي نحكي
انا:" خالتي كل شي حاضر تحب نعاونكم فحاجة ؟"
رفيقة:" لا..فاطمة حضرت كل شي من بكري انت ارتاح "
هزيتلها براسي باهي واستقبلت امنة لي جات..بقيت نحكي معاها..ونغزر للضياف لي قاعدين..لكل هنا كان هو مجاش..أصلا منعرفش علاش قاعدة نخمم فيه تو..قربت وغزرت لكرم لي يلعب..تبسمت وانا نتخيل فصغيري يلعب هكا قدامي نهار آخر..تلفت على صوت خالتي تحكي
رفيقة:" قمر برا كول حاجة من بكري ما كليت شي "
هزيتلها براسي باهي وقربت للبوفي..هزيت صحن وبقيت نغرف من الحاجات لي اشتهيتهم..اول ما كملترجعت نغزر للطاولات لي كانو معبيين بناس
منعرفهمش..غزرت لامنة اما حشمت نمشي بحذاها وهي مع راجلها..نفخت بالشوي خاطر هو بطى..كان جا هو هنا راني قعدت معاه..بدني رعش على يدو لي تحطت على خصري يحكي
ليث:" شبيك واقفة هنا ؟"
بلعت ريقي نحكي
انا:" م..ملقيتش وين نقعد "
اشرلي بيديه يحكي
ليث:" فما طاولة فارغة ايجا "
هزيتلو براسي باهي وتبعتو وين لقيتها بلحق فارغة وانا منتبهتلهاش..قعدت وغزرتلو كيف كان لابس كوستيم ومبدل لبس الصباح..حسيتو ياسر زيان حتى صحتو رجعت خير من كيف خرج من الحبس..اول ما قعد قدامي عوجت شفافي نحكي
انا:" شبيك لتو..مخليني وحدي "
ليث:" الله غالب..طريق معبية "
عديت بعينيا عليه نحكي
انا :" اممم..وقتاه جيت ؟"
ليث:" تو دخلت "
قمر :" مالا برا جيب صحن وايجا تعشا..خاطر كلشي قريب يوفا "
هز بحواجبو يحكي
ليث:" مليح.. هاك مزلت تخمم فيا شوي "
غزرتلو على جنب وغطست فصحني ناكل من غير مانجاوبو..عندي قداه على ماكلة خالتي فاطمة وين حسيت روحي توحشتها..رجع حذايا وبقا ياكل من غير حتى كلمة..اول ما كملنا.. ريتو كيف قام ومشا يسلم على صحابو و بقى يحكي معاهم.. تبسمت وقت ريت عمي وخالتي مع كرم بش يقصو الطارت لي كانت كبيرة ومحلاها..كانت فالون الابي والرمادي.. ضحكت كيف شفت كرم بقا يدور في راسو بيناتهم. مش فاهم شي و مد يدو للكيكة بش يشدها..بقيت نغزرلهم وانا فرحانة انو كبر..صفقنا اول مانفخو عالشمعة وهزيت عينيا معاه وين ريتو يغزرلي هو زادة وتبسم..قحرتلو ورجعت نغزر للبياس مونتي لي قطعوها وين حسيت روحي اشتهيتها عاللخر و روحي بش تخرج مني وانا نرا في الطبقات لي من داخل معمولين بشكلاطة.. بلعت ريقي وبقيت ندور في عينيا عليهم تبسمت كيف ريت خالتي فاطمة تقطع فيها مشيت ووقفت وراها..حسيت روحي حشمت بش نطلب منها اما سايي معادش فيا قربت منها نحكي
انا:" خالتي فاطمة.. ميسابش تقصلي طرف تشهيتها "
فاطمة:" نقص لبنتي مالا لا "
ريتها كيف دارت وقصتلي قطعة اكبر شوي من لقطع لموجودة.. عطاتني تحكي
فاطمة :" شد بنتي "
تبسمت على لفازة وبستها نحكي
انا:" عيييشك خالتي "
رجعت لبلاصتي وبقيت ناكل فيها ونتبن وين حسيتها ابن حاجة ذقتها لتو.. منعرفش كان هي بلحق هكا ولا انا لي نبالغ..غزرتلو كيف بقا وقف مع صحابو يحكي ومرجعش حذايا.. عوجت شفافي كيف ريتو حسيت روحي مش طايقتو خاطر بقا مطفيني.. رجعت غطست راسي ناكل ومعدت ركزت مع حد..ماهزيتش راسي كان ماكملت صحني..منعرفش علاش قلبي وجعني وحلقي حسيتو حرقني كيف لقيتها وفات فيسع اصلا حتى القطعة مش كبيرة برشا بقيت نشوف فيهم كيفاش مازالو يوزعو في لكيك..حسيت روحي بش نبكي كيف ما بقات حتى قطعة... بقيت قاعدة في بلاصتي وندور في راسي بين ظيوف لي كلاو ومخلو شي وقتها حسيت روحي زدت اشتهيتها اكثر...بقيت نهز في رجلي كيف حسيت روحي تقلقت وعينيا زغلوو بدموع تلفت كيف قعد بجنبي وفي يدو طرف الكيك لي عطاتهالو خالتي فاطمة.. حليت عينيا على وسعهم كيف ريت الطرف اكبر حتى من لي عطاتهالي بمرتين.. اصلا ديما هكا هي خالتي فاطمة مفضلتو على لكل حتى في العشاء تحطلو دوبل لي تحطلنا.. هزيت راسي معاه كيف غزرلي يحكي
ليث:" شبيك.. لباس! تكونش تعبت وتحب نروحو؟"
هزيتلو براسي لا نحكي
انا:هأه..ياخي انت مش بش تاكل ؟"
غزر للكيكة ورجع غزرلي يحكي
ليث:" لا..تعرفني منحبوش "
بلعت ريقي نحكي
انا:" م ميسالش ناكلها انا؟"
ضيق عيناه فيا يحكي
ليث:" اشتهيتها ؟"
هزيتلو براسي اي نحكي
انا:اي...من قبيل نحب ناكل.. وسايي معادش فما "
غزر للصحن لفارغ لي قدامي ورجع غزرلي يحكي
ليث:" هاك كليت ..تحب تاكل مرتين؟!"
فركت يديا في بعضهم نحكي
انا:"اي اما وغات فيسع.. اصلا خالتي عطاتني طرف قد هكا صغيرة "
تبسم على جنب يحكي
ليث:" اممم فهمت عليك "
طبس عليا وهمس ف وذنيا يحكي
ليث:" تنجم تاخذها..اما حتى انا نحب ناكل لحلو كيف نروح "
عضيت على شفايفي وين حسيت بدني فور من كلامو
بعدت عليه فيسع نحكي
انا:" متحشمش.. اصلا احنا متعاركين"
هزلي براسو باهي يحكي
ليث:" باهي كيما تحب.. حتى هي ملاك تبكي تحب تزيد تاكل خليني نعطيها "
حسيت قلبي خض بلقاوي كيف هز صحن ووقف.. شديتو من يدو نحكي
انا:" حرام عليك ليث والله متشهيتها "
تبسم وحط عيناه فعينيا يحكي
ليث:" وانت مش حرام عليك لي عاملتو فيا..ليلة بش تتحل لمشكلة وبش تسمعني..حتى انا عندي ايامات شاهيك وصابر مالا قرر يا تسامحني يا سكت "
دورت وجهي عليه نحكي
انا:" م منحبش..برا هزها "
حليت عينيا ك ريتو تحرك شوي يحكي
ليث:"باهي انت حبيت "
بلعت ريقي ك عرفتو يحكي بلحق مش يفدلك نحكي
انا:"استنى ..ب باهي"
اول مامديت يدي بش ناخذ الصحن من يدو بعدو بالوقت يحكي
ليث:" باهي شنوة ؟"
قحرتلو نحكي
انا:" ليث يزيي..انت فاهم اعطيني الصحن "
تبسم على جنب بخبث ورجع قعد..قربو مني يحكي
ليث:" اتفضل يا روحي "
جبدت صحن وقحرتلو وغطست ناكل.. حسيت روح رجعت فيا كيف ذقتو من جديد... هزيت عينيا معاه كيف حكا
ليث:" تنجم تخلي معاك شوي لملوكة ؟"
هزيتلو براسي لا برشة مرات نحكي
انا:" لااااا منحبش "
ليث:" اهيكا تبكي يا روحي صغيرة راهي..اعطيها شوي كهو "
هزيت بكتافي نحكي
انا:"هأه منحبش.. خلي بوها يعطيها.. اصلا صغيرة ميجيش تاكل برشا حلو "
هز بحاجبو يحكي
ليث:" صاار ؟"
انا:" اممم "
عدا يدو على شعرو يحكي
ليث:" هاك كيفها بالضبط؟"
قحرتلو نحكي
انا:" شمدخلك انت.. خليني ناكل في راحتي"
ضحك وبقا يغزرلي كيفاه غاطسة فيها..حسيت روحي فرحت خاطر نجمت نزيد ناكل منها..غزرتلو كيفاه يغزرلي..تبسمتب على جنب وانا نشوف فيه..خليه فرحان هكا ف بالو اني سماحتو ..تو نمشي للدار ونعمل لي فراسي..كملت كليت وقمت قدمت وين خالتي قاعدة نغزرلهم كيفاه يفتحو في الكادوات.. وهو مشا يحكي مع عم مصطفى.. شوي وقت وقربلي يحكي
ليث:" خلينا نمشيو تاخر الوقت "
غزرتلو نحكي
قمر:" اما مزال مكملوش حلو كادوات لكل "
ليث:" شعندك تعمل بلكادوات انت بش تلعب بيهم!راني تاعب نحب نروح نرتاح"
عوجت شفافي على كلامو ومشيت بين خالتي وكرم لي فحجرها.. بستها وبست كرم نحكي
انا:" ربي يخليهولك خالتي..انا ماشية "
غزرتلي تحكي
رفيقة:" مزال بكري "
انا:" ليث قال لي هو تاعب "
رفيقة:" فهمت ميسالش بنتي روح وارجع مرة نعملو اخرى "
انا:" باهي تصبح على خير "
عطيتها بظهري وخرجت وين لقيتو واقف برا يحكي فالتاليفون..طلعت فالكرهبة وبقيت نستنا حتى طلع خدم الكرهبة يحكي
ليث:" عجبتك الحفلة؟"
هزيتلو براسي اي نحكي
انا:" اي محلاها "
ليث:" كيف تجي بنتنا بش نعملك هكا وخير زادة"
تبسمت على كلامو وغزرتلو كيف هز يدي وباسني منها يحكي
ليث:"اما لازم نتصالحو قبل ماتجي..بش نطفيو شمعة مع بعض "
ضحك وغمزني..فكيت يدي منو نحكي
انا:" والله انا مزلت ماسامحتكش "
ليث:" تو نخليك تسامحني مالا "
هربت عينيا منو وبقيت نغزر لطريق.. اول ما وصلنا هبطنا ودخلنا..نحيت صباطي وطلعت للبيت فيسع.. مديت يدي ونحيت لبلالط لي وجعوني.. وغزرتلو كيف خلط عليا.. دخل ونحا لفاست متاعو طيشها عالسرير قلبي خظ بلقاوي وقت قرب مني ودور بيديه على كرشي يحكي
ليث:" وين كنا..مالا كليت لكيك وتحب تهرب ؟"
دورتلو وغزرتلو نحكي
انا:"والله انا مقلتش لي سامحتك "
هز بحاجبو يحكي
ليث:" بالله !..مش تفاهمنا قبيل ؟"
ربعت يدي نحكي
انا:" انت قلت تحبني نسمعك شعندك تقول..وقتها انا نقرر اذانسامحك ولا لا"
ليث:"منتفكرش اني قلت هكا.. ساعة انا نحب قول وفعل..نحب ناكل لحلو فبلاصت لي كليتو انت "
قحرتلو وبعدت عليه شوي نحكي
انا:" زايد متحشمش "
شهقت بالشوي اول مادور بيديه علياا.. حاولت نبعدو نحكي
انا :" سيبني ليث "
ضحك وقرب مني كبس عليا اكثر.. عدا بعينيه على وجهي وركزها ف شفايفي لحظتهاا قرب مني اكثر وين حسيت روحي وحلت.. وقتها حطيت يدي على فمي نحكي
انا :" ا ابعد بش نرد "
حل عينيه فيا يحكي
ليث:" شنووة"
مشيت نجري للتوالات وسكرت لباب ورايا ضحكت كيفاه خليتو داخل بعضو.. دورت للمفتاح مرة اخرى وقعدت على حافة البانو..شوي وقت وسمعت صوتو يحكي
انا:" قمر انت لباس ؟"
شديت ضحكتي بالسيف نحكي
انا:" لباس علياا "
سمعتو كيف دور لبواني يحكي
ليث:" حل لباب مالا شبيك ؟"
انا:" منيش بش نحلو "
علا ف صوتو شوي يحكي
ليث :" نعمم "
قمت قدمت للباب نحكي
انا:"والله مش انا لي تمشي عليها كلامك سي ليث..برا تو ارقد "
ضرب عالباب بالشوي يحكي
ليث:" قمرر يزي من التفوريخ وحل لباب خلينا نحكيو.. ماكش صغيرة "
انا :" لاا والله لاني خارجة..كان ممكن نسمعك اما انت تحب تبوسني بالسيف عليا..كهو ابقا هكا مالا "
بقيت واقفة مادة وذنياا حتى وين حسيت الحس بات.. رجعت قعدت على حافة لبانيو وين حسيت روحي تعبت شوي..منعرفش وين مشى لوقت هذا لكل زعما مشا للبيت الاخرى..خفت نحل لباب ونلقاه مزال هنا.. قمت وقربت للرخامة ريقلت أموري ومشطت شعري.. حليت عينيا على وسعهم وقت الضو قص.. لحظتهاا حسيت قلبي خض بالقوي من الخوف لي مكني ف لحظة
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
