الحلقة الثامنة
#قمر تحكي
حليت عينيا بسيف و دورتهم عالبيت .. ما نعرفش قداه تعدا عليا وقت و انا عالحالة هاذي .. الوقت وقف بيا .. وقف في الليلة الي خلاني فيها يحيى و عطاني بضهرو .. تعداو ايامات عالحكاية و الوجيعة هيا هيا .. الي عملو يحيى كان كافي بش يهدني و يقتل اخر امل كان عندي .. هزيت روحي شوي و خرجت للتيراس .. ظربتني نسمة باردة حسيتها بردتلي على قلبي الي شاعلة فيه النار .. قعدت عالكرسي .. طلعت راسي نغزر لسماء .. محلاه الطقس .. الربيع جاء .. الربيع الي كنت نستنا فيه .. الربيع الي كان بش يشهد على فرحتي مع يحيى .. بش يشهد عاللحظة الي نولي فيها مرتو .. غمضت عيني و جبدت نفس .. على قد مالدنيا كبيرة على قد مانحسها تخنق فيا .. حسيت بيديها الحنينة الي تلامس في شعري كالعادة .. هزيت راسي و غزرتلها .. حاولت نحكي اما لكلام كان واحل في حلقي .. نحس في روحي ضعيفة لدرجة اني مانجمش نخرج حتى كلمة ..
قعدت بجنبي و تبسمتلي حطت يديها فوق يدي و غزرتلي بغزرة حنينة .. غزرة تطمني و تخليني نحس بشعور محلاه .. من نهارت الي لقاتني ملوحة مسلمتش فيا .. خلاتني انا و امي نروحو معاها للفيرمة متاعها ماخلتناش وحدنا .. كانت أخت لأمي و اليد الي الطبطب عليها .. كانت قارب النجاة ليا انا و مازالت .. كلامها و غزرتها تخليني ما نخافش .. فقت من سرحتي على صوتها " شنية تحس في روحك ليوم "
دورت وجهي و بقيت نغزر في الفراغ تقويت على روحي و تكلمت " لباس .. هاني عايشة "
شدتلي وجهي ودورتني ليها و حطت يديها الزوز على خدي تتكلم " نعرف بش تعيش .. اما المهم كيفاه بش تعيش .. لازن تقوي روحك و تخمم في غدوة "
تبسمت باستهزاء و دمعة هربت مني " ماعادش فما غدوة عندي يا خالتي رفيقة .. حياتي وقفت .. مفماش حاجة تخليني نخمم في غدوة و نكبش فيه "
دورت عينيها على وجهي تتكلم " ما تقولش هكا .. انت مازلت ضغيرة و لا زمك تتعلم انو الضربة الي ما تقتلكش تقويك .. لازمك تاقف على ساقيك قمر و تواجه الي صارلك .. نعرف انو صعيب عليك و انو الشي الي صار فوق طاقتك .. اما ميسالش قوي روحك حتى بالكذب .. ماتخليش الناس تسخف عليك ما تراضاش لروحك الشفقة .. "
تكلمت بصوت مخنوق " حاسة روحي ضايعة يا خالتي .. مانيش عارفة شنعمل .. خايفة من الي مازال يستنى فيا .. ماعنديش قوة بش نواجه الي صار، ما عنديش القوة الكافية بش ننسى الي عملوه فيا .. سلبو مني كل شي باهي في حياتي سرقولي حلمتي و فرحتي .. كل واحد قتلني بطريقتو .. "
قربت مني و مسحتلي دموعي الي هبطوك انهم كانو يستناو ف كلمة واحدة بش يهبطو " هوما قتلوك .. اما انت لازمك تحيا مرة أخرى لازمك ترجع حلمتك و فرحتك .. صدقني ربي ديما يعوضنا بحاجات باهية .. ربي كبير و رحمتو كبيرة .. ربي كيف يحطنا في امتحان يعرف الي احنا قدو و يقوينا .. اسئلني انا قمر .. كنت كل مرة نطيح فيها و نضعف .. نزيد نقوى عمري ماحسيت بروحي وحدي كنت ديما نحس ف طيطبت ربي على قلبي .. بعد التعب ديما ربي يعوضنا .. كيف ما انا تو ربي عوضني بيك انت قميرة "
تبسمت على كلمتها لخرة و هزيت راسي نحكي " خالتي ميسالش نسالك "
رجعتلي التبسيمة و هزتلي براسها بأي
" نتفكرك مرة في السبيطار قتلي الي انت عندك طفلة انا فكرتك فيها .. ويني ياخي "
عينيها زغللت .. جبدت نفس و تكلمت " صحيح كانت عندي بنوتة مزيانة كيفك .. اما ربي حبها .. كانت ياسر تشبهلك .. عينيها شهل كيف عينيك قميرة .. كانت بقات حية راي في عمرك تو "
قربت منها عنقتها بقوة جهدي نتكلم " صحيح ما نجمش ناخذ بلاصت بنتك .. اما انا ملي ريتك و انا حاسبتك امي الثانية .. انت زادة احسبني بنتك "
باستني من جبيني تتكلم " انت بنتي من نهارت الي ريتك .. احنا بش نكونو دواء بعضنا قميرة .. بش نبقى شادتلك يدك و واقفة ورا ظهرك بش نحميك منهم الكل ماتخافش "
قداه حسيت روحي ارتحت بعد كلامها .. محلاها كيف تحس بروحك مش وحدك و ربي عوضك بانسان حنين عليك من غير مقابل
قربت مني و حطتلي راسي فوق كتفها و بقات تمسحلى على شعري و تتلكم " قميرة ميسالش نسالك حاجة "
هزيت عينينا فيها نتكلم " بالطيعة خالتي "
تنهدت و تكلمت " ماتفكرت شي قمر .. ماتفكرتش حتى حاجة تنجم تعاونك "
حسيت سوالها خنقني و غصة وحلت في حلقي و غمضت عينينا نتفكر
" بصراحة درت ودرت و عمري لا شخة هكا .. اه ايهم شقولك في البنة"
" صحيح يا صاحبي السلعة هاذي لا ذقتها لا في تونس و لا ف أمريكيا "
" أيا يا عروسة نخليوك ترتاح "
" ههه صبحية مباركة "
شهقت و حليت عينيا فيسع نحب نفسخهم من مخي
تكلمت بصوت يرعش " ت تفكرت .. تفكرت اسم واحد منهم "
هزتلي راسي و عينيها مركزة معايا و تتكلم " شنية لأسم "
تنفست بالشوي نحاول نجمع الحروف بش نخرج اسمو .. اسمو الي جمد في حلقي و حاسة روحي بش تخرج معاه كيف نخرجو ..
" أ أأيهمم "
بعدت عليا و حلت عيناها فيا تتلكم " نعرف .. كنت متأكدة اني بش نسمع الأسم هذا"
حسيت بروحي جمدت من كلامها و الف سيناريو جاء لبالي منين تعرف ؟ كيفاه تحكي و متأكدة هكا
قمت من بلاصتي بزرية حاولت نتنفس اما لقيت روحي تخنقت .. يادوب جمعت كلامي بسيف
" م منين تعرف خالتي ؟؟ شتعرف احكيلي ؟ "
قامت و شدتني و حطت يداها على خدي و تحكي
" اهدى اهدى قمر .. هاني بش نحكيلك "
بعدت علاها و بقيت نمشي و نجي كيف المهبولة تلفتلها نصيح " شنية بش تحكيلي ؟ منين تعرفو انت "
قعدتني عالكرسي و دخلت للبيت و انا بقيت نتبع فيها بعينيا .. في لحظة رجعت حذايا و قعدت غزرتلي و شدتلي يدي و حطت فيها حاجة ..
هبطت راسي مستغربة شنوة الي في يدي حليت عينيا بالقوي كيف ريت "شركة" عليها أسم و تصويرة .. تخنقت وانا نغزر لتصورة .. صحيح تصويرة طفل صغير اما الملامح هيا هيا .. نفسو الي هبطلي مالكرهبة و شدني .. نفسو الي دمرني .. شهقت و حتى دموعي خانوني مانجمتش نبكي .. بمجرد اني ريتو و قريت اسمو .. بمجرد اني مسيت حاجة تخصو .. حسيت روحي رجعت لليلة هذيكا .. صوتو رجع في وذني و ريحتو ضربت في خشمي .. بقيت نغزر لشركة و نقرا في الإسم المنقوش في ظهر التصوير " ايهم بن سعيد "
أكثر اسم ناقمة عليه .. اسم كان نلقى نلغيه من الدنيا الكل .. الأسم هذا الي سلب مني كل شي و عينيا تغزرز الي مارحمنيش و قتلني .. مشي من غير ما يتلفت وراه لطفلة المسكينة الي خلاها مطيشة في دمها.. فقت من شرودي على صوت خالتي رفيقة تتكلم "" ليلتها لقيت الشركة هاذي مطيشة جنبك .. هزيتها و قلت بالك متاعك و لا متاع واحد من ولاد لحرام .. هاذي دليل قمر .. دليل بش تنجم تأخذ حقك منهم .. و انا نشهد معاك على ريتو ليلتها "
بقيت نغزرلها و ما لقيتش حاجة نقولها غمضت عينيا و انا نعاود في كلامها بيني و بين روحي .. يمكن عندا الحق هذا دليل .. دليل كافي بش نحاسب الي عمل فيا هكا .. دليل بش نرجع بيه حقي .
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
