حلقة 19
#رفيقة_تحكي
عقلي مازال مش مستوعب قرار قمر.. كيفاه تستسلم من اول مواجهة كيفاه تكون ضعيفة لدرجة هاذي .. نعرف الي تعدا علاها مفماش قوة تتحملو اما الاستسلام مش هو الحل .. لازمها تفك حقها و تخلق من ضعفها قوة.. مستحيل كان نخلاها توطي راسها و تعرس بواحد كيفو وتدفن روحها معاه.. هي سبقتني بخطوة كيف تنازلت اما الخطوة الجايا انا بش نكون وراها مهما يصير ونمنعها وبش نحاسب كل واحد جبرها عالقرار هذا...
مانعرفش كيفاه تقويت على روحي وشديت ثنيتي للفيلا مرة اخرى .. قذ مانحب نهرب منها ومنهم نلقا روحي نواجه فيهم اما كل شي يهون ولازمهم يعرفو انو بالطريقة هاذي هو ما ربحوش ووصلو للي حبو عليه وانو خطوتهم الجايا مش بش تصير وفمر مستحيل تعرس بريان.
اول ماوصلت خذيت نفس وحضرت روحي لأي مواجهة بش تصير .. دقيت الباب حلتلي البون
" تفضل مدام "
" لازمني نقابل مدام وجيهة قلها ام قمر"
هزيت راسي على صوتها كانت تتكلم وتقربلي " لا عاد مش امها .. .. قمر عندها ام أخرى يظهرلي "
تفاديت البون ودخلتها من غير حتى استئذان وقفت قدامها و عيني في عينيها نحكي
" قمر بنتي بسيف عليك وانا هنا بش نقلك رد بالك تفرح بلي وصلتلو خاتر الي تحب عليه مستحيل كان يصير مستحيل نخليك تجبر قمر على اي حاجة"
تبسمت على جنب تحكي " اما انا مجبرتهاش.. قمر مشات بارادتها تنازلت لقات هذاكا الحل المناسب ليها"
"هه قصدك الحل المناسب ليك انت وولدك اما صدقني الحكاية موفاتش هنا.. و قمر عمرها ما ختارت الله اعلم شصار بش هيا قدمت عالخطوة هاذي وخروج ولدك مش معناها انتوما ربحتوالحكاية مازالت في اولها"
" غالطة مدام الحكاية وفات هنا وبنتك حكيت معاها انا مستعدة نعوضلها كل شي وحكاية العرس بش تكون في صالحها هي قبل صالحي انا خمم مليح "
" مفما حتى شي يعوض دموع بنتي الي هبطت من جرت ولدك وصاحبو حتى شي ما ينجم يعوضلها شرفها الي سلبوه وحياتها الي سرقوها و بش يجي نهار و يتحاسبو عالشي الي عملوه صدقني وانا بش نبقى نجي ورا النهار هذا و..."
قص على كلامي صوت نعرفو مليح صوت مهما تعدات السنين بقا راسخ في عقلي صوت نقدر نميزو بين ألف صوت
" شنوة الي سمعتو؟؟؟ "
تلفت وغزرتلو رغم تعدات عوام اما ماتبدل فيه شي نفس الشخص الي حبيتو قبل نفس الغزرة و الوقفة اما لحظتها ماحسيتش نفس الإحساس الي كنت نحسو قبل، خذيت نفس نحكي " الي سمعتو سي محمود .. ولدك وصاحبو اغتصبو طفلة وانا هنا بش ناخذلها حقها " قدم ناحيتنا و صاح بالقوي
" وجيهة شنية الي نسمع فيه .. شنية الي صار في غيابييي؟"
جات بش تحكي اما انا قصيت علاها قدمت ناحيتو و غزرت في عينيه تقويت على روحي ولغيت الضعف متاعي الي عشتو قبل معاه " انا نحكيلك شصار في غيابك .. ولدك تعدى على بنتي " على اخر كلمة حل عينيه فيا ووجهه تبدل لونو " و احنا شكينا بيه وتوقف اما مرتك هددت بنتي وبعثتلنا المحامي متاعكم بش هي تسكت و جبرتها تتنازل وتعرس .. وانا هنا بش نقلكم انو الحكاية ماوفاتش هنا سي محمود وبش نفضحكم و نفضح عمايل ولدكم المسخ وقمر بنتي مستحيل كان تعرس بواحد تعدى علاها و نخلاها تعيش معاه مهما يصير وننصحك اشبع بولدك مليح مدام جاتو فرصة المرة هاذي وخرج خاتر المرة جايا مستحيل كان بش يعاود يخرج كان على جثتي "
كملت كلامي وخرجت نجري مانجمتش نزيد ناقف قدامو اكثر خفت لا قوتي تخوني خرجت خذيت نفس وراء بعضو .. انا جيت لهنا وماكنتش حاضرة لا اني نراه و لا نواجه فقت من سرحتي كيف حسيت بيد شدتني من مرفقي ودورتني لحظتها جات عيني في عينو
" رفيقة لازم نحكيو "
نطرت يدي منو وخرت بخطوتي لتالي " الي عندي قلتو سي محمود "
" نحب نسمع الحكاية كاملة منك نحب نعرف شصار "
هزيت حاجبي و تبسمت نحكي " ظاهرلي مرتك أولى مني انها تحكيلك .. خلاها هي تفسرلك مليح عمايلهم المسخة.. "
" رفيقة خلينا نحكيو بالك نوصلو لحل مع بعضنا المواضيع الي هكا مايتحلوش بالطريقة هاذي"
" حل ؟ كيف الي وصلنالو قبل محمود ؟؟ حلولك انت انا اكثر وحدة نعرفها .. حلولك ديما تكون في صالحك انت و مايهمكش في العباد والطرق متاعك انا نعرف لوين توصل"
" انت هنا بش تخلص الي صار قبل مش هكا ؟ لقيتها فرصة بش تنتقم مني ومن عايلتي "
عينيا زغللت على كلامو حسيت بغصة في حلقي منجمتنش نحكي منها " الي صار قبل مفماش قوة تنجم تخليني نخلصو منك .. مفماش قوة تنجم ترجعلي بنتي الي ماتت "
قص عليا رس على سنيه يحكي بشوية " بنتك الي تحكي علاها هي بنتي ما تنساش.. "
" للأسف .. انا خسرت قبل قدامك و مستحيل كان نخسر مرة أخرى و حق قمر بش ناخذو ونخلص القديم و جديد منكم .. ووصي مرتك تبعد على قمر المحكمة هي البلاصة الوحيدة الي بش تجمعنا في المستقبل سي محمود"
ماخليتوش يجاوبني عطيتو بظهري ومشيت .. الي صار ماكنتش حاضرتلو لقيت روحي نواجه فيه على الماضي و الحاضر و مانعرفش شنية يستنى فينا في المستقبل اما بش نحاول المرة هاذي انا الي نربح يزيني ماخسرت حقي و حق قمر لازم يبان و العدالة بش تأخذ مجراها بسيف علاهم الكل .
VOUS LISEZ
#ليس_ذنبي ❤️🔥
Lãng mạn" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
