#ليس_ذنبي ❤️‍🔥

حلقة 16

حلقة 16
#ليث_يحكي
اول ما عرفت الي صار مشيت نجري للمحكمة .. خذيت الملف وقريت الشكوى الي قدمتها قمر
اول ما قريت اسمها سرحت فيه مانعرفش شنوة الي شدني فيه بالضبط اما حسيتو محلاه للحظة تخيلتها هي كيفاه بش تكون .. فقت من سرحتي على خروج ايهم الي كان وجه اصفر وذابل وقتها عرفت انو بش يتوقف حتى ياخذو شهادتها هيا زادة وبناء على شهادتهم الزوز تنجم القضية تأخذ منحنى اخر و تتعدى لقاضي التحقيق وقتها ما نجموش نرجعو من الثنية هاذي .. لازم نلقى حل قبل ما يخسر حد فينا.. لحظتها حتى قمر خممت فيها رغم مانعرفهاش اما مانحبهاش تتضر في جرتهم اكثر من هكا .. اللعبة هاذي مش بش تكون في صالحها وبش تتقلب ضدها .. انا اكثر واحد نعرف الناس الي طاحت بين يديهم نعرف انو ناس يداهم طايلة واي حاجة تسوى فلوس وتتشرى و الي ما يتشراش وقتها يستعملو معاه حلول أخرى انا اكثر واحد نعرف شنية هيا ..
فقت من سرحتي علي صوت مرت خالي الي كانت تبكي " ليث مش قتلك القى حل قبل ما نوصلو لهنا ؟؟ شنية بش تعمل تو؟ كيفاه ولدي بش يتحمل الحبس يا ليث "
شديتها من مرفقها قعدتها عالكرسي بش تتنفس و ترتاح " اهدى مرت خالي تو نلقى حل .. "
طلعت راسها فيا تغزرلي " شنية الحل شنية ؟؟"
" بش نحكي مع قمر .. بش تتنازل اطيح الشكوى متاعها قبل ما ياخذو افادتها .. وتترفع القضية "
"أي أي برا احكي معاها " مسحت دموعها و قامت تحكي " سكتها باي طريقة .. قلها قداه تحب فلوس انا مستعدة لكل شي .. خوفها ليث قلها على حكاية العرس وانها لازم تتستر .. شوف نقاط ضعفها واستغلهم"
رسيت على سنيا من كلامها .. قداش الناس عندهم رخاص يراو الدنيا فلوس و كل شي تحت سيطرتهم.. هزيت براسي باهي و خرجت طلعت في الكرهبة.. خذيت عنوانها من المحكمة وشديت ثنيتي ليها .. ثنية كاملة وانا نخمم فيها و في المواجهة الي بش تصير معاها بقيت نعاود ونرتب في الكلام الي بش نقولو. في اللحظة هاذي تمنيت كان نرجع بالتوالي و ما نوصلش نساوم طفلة بشرفها ونهددها كان لزم.. وانا لا عندي القوة و لا الجرأة لشي هذا.
وقفت الكرهبة لقيت روحي قدام فيرمة صغيرة كانت محلاها كلها خضار .. هبطت من الكرهبة قدمت بخطوات رزان خذيت نفس ودقيت الباب .. طلعت راسي على المرا الي حلتلي كانت مرا ياسر محلاها مش كبيرة تبسمتلي تحكي
" تفضل .. "
" عسلامة مدام .. انجم ناخذ من وقتك دقيقة كان تسمح"
" بالطيبعة اما شكون سيادتك "
" انا ليث بن مراد .. محامي "
على كلمتي وجهها تقلب و التبسيمة الي كانت فيه تمحات غزرتلي في عينيا تحكي
" محامي؟؟ تفضل في شنوة بش نحكيو "
" مدام الموضوع هذا ما يتحكاش قدام الباب .. وزيد لازمني نقابل مدموازال قمر كان هي موجودة"
هزت صبعها في وجهي تحكي "ابعد على قمر وقول للي بعثك ما عندنا ما نحكيو معاكم بيناتنا المحاكم"
جيت بش نتكلم اما قص عليا صوت حسيت قلبي دق اول ما سمعتو " خالتي شكون؟"
هزيت راسي نغزرلها جاية و تقرب منا كانت كل ما تقرب كل ما ريحة الياسمين تقرب معاها .. كل ماتقرب كل ما تفاصيل وجهها تبان اكثر .. كانت محلاها، عينيها كبار وشهل رغم انهم ذابلين اما فيهم سحر يخليوك تحب تبقى تغزرلهم حياتك الكل .. شعرها اكحل ارطب وطويل شوي حطتو على جنب .. شفايفها روز محليتهم بوسة الخال الي قريبة منهم ..  كانت لابسة روبة في الأزرق الي لونو طفى قدام ضوها هيا .. رغم التعب الي باين عليها اما زينها عمري طغى على كل شي.. فقت من سرحتي كيف تلفتتلها المرا تحكي " قمر ادخل .. واحد غالط وهاو ماشي "
قويت في صوتي شوي نحكي " قمرر احنا لازم نحكيو "
ضيقت عينيها فيا وقربت اكثر " شكونك انت ؟؟"
" انا ليث بن مراد.. محامي عيلة بن سعيد "
لحظتها وجهها تبدل لونو الخوف ظهر في عينيها وخرت بخطواتها لتالي " ما عندي ما نحكي معاك"
قالت جملتها فيسع وعطاتني بظهرها بش تهرب مني.. وقفت على صوتي نحكي بالقوي " قمررر صدقني انا هنا على مصلحتك انت.. انا هنا بش نلقاو حل.. اسمعني وبعد قرر"
تلفتتلي لمرا الي كانت حاصرتني بش مانقدمش لقمر تحكي "ماناش مستحقين للحل متاعك وقرار قمر نتصور وصللكم ليوم "
" خليه يدخل خالتي " هزيت راسي على صوتها الي كان يرعش غزرتلها كانت مهبطة راسها وتحك في يديها في بعضهم
" قمر .. ماعندو علاه داخل "
" امان خالتي نحب نسمعو"
سبقتنا ودخلت تجري لصالة اول مادخلت وريتها كانت قاعدة مهبطة راسها وترعش في ساقيها كابسة على روبتها بيديها الزوز قعدت مقابلها نغزرلها مانجمتش نهبط عيني من عليها حسيت بحاجة تجبد فيا ليها .. غزرتها كانت كلها براءة عينيها يلمعو من الدموع المحصورة فيهم شفايفها يرعشو .. قلبي وجعني عليها، لحظتها ماعرفتش كيفاه ومنين نبدا.. حسيت روحي عاجز قدام غزرتها وضعفها.
هزيت راسي على أمها الي دخلت وقعدت بجنبها كانت هي زادة تاعبة حالتها ماتبعدش ياسر على حال قمر شدتها من يديها تطمن فيها.. بلعت ريقي لميت القوة الي عندي وخذيت نفس نحكي
"قمر .. انت تعرف الي اليوم ايهم عيطولو لتحقيق وتوقف مش هكا وبش يناديولك انت زادة بش تعطي إفادتك "
هزتلي براسها أي وعينيها مازلت في القاعة .. تلفت على صوت المرا الي كانت واقفة وتقحرلي مكانتش حاملة وجودي وعندها الحق في هذا ربعت يداها و هزت حواجبها تحكي"
" هذا الي تحب تقولو؟ أي نعرفو الي هو توقف وعلى قريب بش يتوقف الي معاه زادة ماتخافش وبش يخززو في الحبس"
" مدام بش نحكي معاكم بصراحة .. ومش بصفتي محامي ايهم .. احسبني واحد يحب يقدم نصيحة ويعاونكم"
تبسمت باستهزاء " هه تعاونا ؟؟ كيفاه تراه"
" نعرف الي قمر مظلومة وتعذبت منهم .. اما احنا مستعدين نقدمو تعويض مادي ومعنوي للقمر بش تتنازل عالشكوي والحكاية هاذي تتلم بيناتنا قبل ما تتحل القضية وتوصل للمحكمة ووقتها نخرجو بأقل اضرار"
تلفت لقمر الي شهقت وهزت راسها معايا دمعة هبطت من عينيها كنت انا السبب فيها.. تكلمت بالغصة " ت تعويض؟ تنجمو تعوضولي شرفي.. تنجمو ترجعولي حياتي القديمة سي ليث؟ الأضرار صارت ولتو انا نعاني منهم "
غمضت عينيا وحليتهم فيسع كبست عالبونية متاعي " بالطبيعة مانجموش .. اما خمم بعقلك قمر .. عيلة بن سعيد مش بش يستسلمو ويرضاو ولدهم في الحبس .. كان بش تكمل في الثنية هاذي صدقني انت الي بش تخرج خاسرة في الحكاية"
" ما عندي مانخسر اكثر من الي خسرتو .. و مانيش ناوية نتراجع على قراري مهما يصير"
" قمر انا جيتك ليوم بش نلقاو حل بش يخليك ماتخسرش اكثر خمم في روحك وف امك.. القرار هذا بش يضركم اكثر صدقني"
تكلمت لمرا بصوت قوي خلى قمر تتهز وتتحط " ياااخي تهدد فينا انت ""
" لا مش نهدد فيكم اما كيف ما قتلك احسبني واحد يحب يعاونكم ويلقا حل معاكم "
" شنوة الحل ؟ اه شنوة الحل الي ينجم يرجع حياة الطفلة هاذي .. تحب تشري سكوتها ؟ تحب تساومها بشرفها ؟ كان هكا انا نقلك مستحيل كان نخلاها تقبل بعرضك هذا سي ليث مهما يصير"
عديت يدي على رقبتي فيسع وبلعت ريقي ماعرفتش كيفاه بش ننطق ونخرج الجملة من فمي
"الحل انو قمر تعرس والحكاية تتلم بياتنا وتوفى هنا " خرجت الجملة وحسيت روحي خرجت معاها هزيت راسي مع قمر الي دموعها قوات كانت تبكي بالشهقة لحظتها تمنيت كان نمسحلها دموعها ونطبطب عليها.. تمنيت انو هي ترفض انو نقلها قمر رد بالك تقبل بريان .. تمنيت كان نشدها من يدايها ونقلها انا بش نعاونك وناقف معاك اما الخطوة هاذي ياسر بعيدة عليا.. خذيت نفس بش نكمل نتكلم ونقول كلام انا مش مقتنع به كلام قلبي ومخي رافضينو
" قمر خمم في امك وفي كلام الناس.. الحكاية كان بش تكمل انت بش تتفضح صدقني.. الي طحت معاهم ناس قويين.. خاف على روحك و خمم في غدوة و في مستقبلك.. ر ريان صاحب ايهم الي كان معاه مستعد انو يعرس بيك وتتستر لحكاية .. خمم مليح في كلامي وهاذي لكارط متاعي كلمني كيف تأخذ قرارك"
هزت راسها بـ لا برشة مرات حطت يدايها على وذنيها وقامت من بلاصتها تصيح " مستحيل مستحيل كان نعرس بواحد كان السبب ف الي انا فيه .. مستحيل كان نوطي راسي ونسلم في حقي.. مستحيل كان ناخد القرار هذا .. تحبو تقتلوني اكثر.. تحبو تضحيو بيا و تسلمو فيا لجلاد متاعي لواحد مجرم حرام عليكم .. شعملت انا شعملتلكم.. ابعدوني حرام عليك حرااااام .. تعبت ياربي تعبت.. شنية ذنبي انا بش يصير فيا هكاااا"
بقيت نغزرلها مصدوم من الحالة الي كانت فيها كانت تصيح ودموعها هابطة بدنها يرعش ووجها اصفر شادة شعرها بيديها الزوز طاحت على ركايبها أمها كانت تهدي فيها اما شي دخلت في هستيريا خلاتني عاجز بش نقول كلمة أخرى و لا نعمل ردت فعل.. فقت من الصدمة متاعي عالمرا الي قامت تحاول تهز فيها غزرتلي تحكي "شوف لوين وصلتو الطفلة و الله ما نحاسبكم على كل دمعة كنتو السبب فيها وتو اخرج سي ليث اخررررج من داري.. عرضكم مرفوض من اليوم بيناتنا المحاكم ورد بالك ترجع هنا ولا تخمم انك تقرب لقمر"
هزيتلها براسي أي وعينيا مازالت على قمر قمت من غير مانزيد كلمة أخرى.. خرجت من الدار حاسس روحي مخنوق قلبي وجعني عالحالة الي خليتها فيها .. خرجت و عقلي كان معاها تمنيت كان نرجعلها ونطمنها .. كان نجمت نخفف عليها حتى شوي.
طلعت في الكرهبة ودمعة هبطت مني.. من دمعة ولاو دموع نبكي ومش عارف السبب بالضبط.. كل شي هد عليا مع بعضو.. مواجهتها كانت كافية بش تفشلني دموعها حسيتهم هدوني.. كيفاه طاوعني قلبي وضميري بش نحكي مع طفلة هكاكا بش نستغل ضعفها وقلة حيلتها .. كيفاه رضيت اني نقلها عرس بيه ونسلم فيها لواحد كان السبب في تحطيمها.. تكيت راسي عالفولون و غمضت عينيا تعدات قدامي غزرتها الحزينة الي ضعت فيها وخلاتني مكتف لاحول ليا و لاقوة غزرتها الي حسستني بضعفي..
ما ننكرش اني حسيت بفرحة  على قرارها، اما الخوف الي حسيو كان أكثر..  نعرف انهم مش بش يسيبوها كان ما تتنازل، بش يخوفوها و يحاولو يسكرولها فمها نعرف الي هي ماهيش بش تتحمل و الشي الي بش تتعدى بيه بش يكون فوق طاقتها.. نتمنى كان ناقف معاها ونحميها منهم، قلبي يقلي ماتسيبهاش رغم الي اول مرة نراها، نتمنى كان نرجعلها نقلها انسى الي قلتو الكل سامحني على دموعك الي انا كنت السبب فيهم.. سامحني خاطرني زدت هديتك فوق ما هدوك هوما..
حاسس روحي بين نارين ..وكل نار فيهم بش تتفنن في عذابي ..كل نار فيهم بش تحرقلي قلبي اكثر.. لازمني نرسي علي بر ونختار ثنيتي.. الثنية الي بش تخليني مرتاح و لأول مرة في حياتي .. نعرف انو رجوعي منها بش يكون صعيب.. ينجم يكون السبب في خسارتي.. اما راضي اني نخسر كل شي المهم صوت الحق يربح .. الثنية هاذي بش تحدد مصير كل حد فينا وتصفي بين الرابح و الخاسر.