الحلقة 37
فريحة تحكي
الي صاار النهارين هاذم مانجمتش نتقبلو .. كيفاه ريان بعيد عليا و محبوس .. و الي مهبلني مش عارفة السبب.. نحس فروحي روحي ضايعة من غيرو .. ماحبش بقابلني و يفهمني شنوة صاير .. خايفة كان يبقى بعيد عليااا و نخسرو .. خسارتو بالنسبة ليا هي خسارة روحي ..
من نهار الي توقف فيه و انا في دارهم مع امو .. مانجمتش نخلاها وحدها هي أمانة عندي و ريان طلب مني مانخليهاش .. هوما عايلتي الثانية و مستحيل كان نسلم فيهم مهما يصير ..
قمت الصباح كالعادة حضرت فطور خالتي .. حالتها كانت ماتعجبش و قاعدة تتراجع .. رغم الي حالتي ماتبعدش ياسر على حالتها اما لازمني نتقوى على روحي على خاطرهم .. انا متاكدة ريان مظلوم و بش يخرج و السبب اكيد بش نعرفو ..
دقيت الباب و دخلت لخالتي الي كانت متكية قدمت ناحيتها نحكي " أيا خالتي قوم لازمك تفطر بش تشرب دواك "
" عيش بنتي يقوي سعدك يا فريحة "
قعدت بجنبها تبسمتلها نحكي " ماتخافش خالتي ريان بش يرجعلنا.. انا ليوم ماشية نقابل ريما صاحبتي المحامية بش نخلاها هي تعاونو و اكيد ريان بش يخرج على قريب "
حطت يداها على خدي تطبطب عليا تحكي " عيشلي بنتي .. ريان محظوظ على خاطر معاه انت "
بستها من كف يداها تبسمتلها نحكي " ربي يخليك لينااا خالتي "
هكاكا و الباب دق تلفت لخالتي نحكي " كمل فطورك و ماتنساش دواك .. نمشي نشوف شكون و ترجعلك "
خرجت من البيت ناحية الباب اول ماحليت لقيت راجل اول مرة نراه غزرتلو مستغربة نحكي " تفضل "
" انا سي أيوب المحامي .. محامي السيد ريان و السيد ايهم .. انت مدموازال فريحة مش هكا ؟"
" اي انا .. من وقتاه انت المحامي متاع ريان .. علاه انا مافيباليش ؟"
" انجمو نحكيو لداخل ؟"
هزيتلو براسي اي و بعدت عالباب اشرتلو بيديا بش يدخل قدمنا لصالة .. قعدنا مقابلين بعضنا هز راسو معايا غزرلي يحكي " مدموازال فريحة.. انا هنا بش نحكي معاك في الي صار الكل .. اما لازمك تسمعني للأخر و تفهمني "
عديت بلساني على شفايفي و خذيت نفس نحكي " نسمع فيك.."
" انا محامي السيد ريان و السيد ايهم وكلني سي محمود .. الاولاد متهمين بقضية صعيبة شوي .. رغم الي انا نعرف هوما مظلومين و هذا الكل افتراء .. اما لازمنا نكونو حاضرين لكل شي على هذاكا شهادتك بش تكون مهمة و تنجم تساعدهم و تخلي ريان يخرج "
حسيت قلبي خظ بالقوي بلعت ريقي نحكي
" ش.. شنوة القضية "
غمض عينيه و عاود حلهم غزرلي يحكي
" قضية اغتصاب "
لحظتها حسيت بالدم جمد في عروقي و نفس ضياق علياا قلبي صوت دقاتو قوات .. بقيت نغزرلو من غير حتى كلمة بقات كان كلمتو لخرة تتعاود قدامي .. هزيت راسي معاه كيف كمل يحكي " فما طفلة شكات بيهم الزوز قالت الي هوما اغتصبوها .. اما انا ناكدلك انو هذا افتراء .. مجرد كذبة لتشويه صمعتهم .. كيف ماتعرف سي ايهم و سي ريان عندهم قداه من عدو في مجال خدمتهم .."
حسيت روحي غبت في لحظة و ماسمعت حتى كلمة من كان يقول فيها .. هبطت دمعة من عيني نحكي
" شكوني الطفلة؟؟"
" مدموازال فريحة مايهمش شكون الطفلة .. اما لازمك تشهد نهار المحكمة لصالح ريان .. تقول انو ريان النهار هذاكا كان معااك "
مسحت دمعتي الي هبطت و هزيت حاجبي نحكي " و هو كان معايا بلحق النهار هذاكا ؟؟ اصلا اناهو نهار ؟؟ " عليت في صوتي نحكي "جاوبني سي أيوب؟؟ ريان وقتها معايا بلحق ؟؟ و لا بش نشهد بالكذب "
" السيد ريان قلي الي نهار هذاكا كان في المشروع الي يحضر فيه يكمل في خدمتو و لازم انت تأكد الشي هذا انك كنت معاه "
" باهي .. و الطفلة علاه اتهمتهم؟ شنوة مصلحتها ؟؟ "
" كيف ما قتلك هذا لكل لتشويه صمعتهم .. سي ايهم النهار هذاكا مكانش مع سي ريان و دارهم شاهدين على هذاا .. و الطفلة قالت الي هوما كانو مع بعضهم .. يعني باين كلامها كذب "
" نحب نقابل ريان .. نحب نسمع منو هو لكلام هذاا "
" تو مستحيل.. الجلسة الأولى بش تصير على قريب و اكيد بش يروح معاك .. غير انت لازمك تشهد و تقول انو النهار هذاكا ريان كان معاك نهار كامل تفاهمنا ؟"
عضيت على شفايفي تقويت عالغصة ااي شدتني نحكي " و كان ما يروحش .. كان مايصدقوش كلامي و لا كلامهم.. ريان بش يتحبس ؟؟؟"
" من غير ماتخمم هكا .. كون متاكدة الي ريان بش يروح معاك خلي كل شي عليا انا "
قام من بلاصتو و غزرلي يحكي " نتمنى منك انك تساعدنا.. و صدقني انو ريان مظلوم "
عطاني بظهرو ماشي قمت من بلاصتي خلطت عليه نجري وقفتو نحكي " سوال واحد .. الطفلة وقتاه قالت انو لحكاية هاذي صارت ؟؟ يعني في اما شهر و لا اما نهار ..قريبة لحكاية و لا عندها قداه "
" قالت انو لحكاية صارت اخر افريل .. و احنا تو في ديسمبر .. خمم تو تشوف انو كلامها كذب .. خمم هي علاه سكتت طول الفترة هاذي ؟ و حلت فمها كان تو وقت قريب افتتاح مشروع خطيبك .. خمم بعقلك مدموازال فريحة.. نخليك تو "
بقيت نغزرلو من غير حتى كلمة اول ماخرج حطيت يديا على صدري غلبوني دموعي الي بقيت نقاوم فيهم اما في الاخر هبطو و لقاو طريقهم على خدي.. قد ما تخيلت نوع التهمة عمري لا تخيلت بش نسمع الكلمة هاذي .. "اغتصاب".. للحظة خفت لا تطلع لحكاية صحيحة و ريان عملها .. عملتو هاذي كان بلحق مادمرتش الطفلة المسكينة كهو .. هي بش تدمرني انا زادة .. رجعت لصالة و ترميت عالفوتاي غمضت عينيا و بقيت نرجع بالتوالي .. تفكرت تصرفات ريان الي صارت غريبة اخر فترة .. على سكوتو و عينيه الضايعة.. تفكرت كيفاه بعد عليااا .. مسحت بيديا على وجهي و عديتها على شعري .. هزيت براسي لااا ..
مستحيل ريان يعملها هو يحبني مستحيل يخوني بالطريقة هاذي و يطلع وحش هكااا ..مستحيل ريان ينجم يفرط في طفلة و شرفها .. حسيت روحي في متاهة ضعت بين الافكار الي هدت عليااا .. تمنيت كان انجم نقابلو و يقلي ماتخافش هذا الكل كذب .. اي كلمة منو تهديني و تخليني نطمن .. حسيت اني مكتفة ماعرفتش شنوة نعمل .. الي خممت فيه اللحظة هاذي اني نعرف الطفلة شكون و نقابلها لازمني نراها و نعرف منها كل شي .. نحب نعرف علاه كذبت و اتهمت الراجل الي انا نحبو التهمه هاذي .. هزيت روحي للبيت بدلت دبشي فيسع و خرجت ماعرفتش اناهي الثنية الي نشدها حسيت روحي كيف المهبولة.. خذيت التاليفون و كلمت ريما الي كنت بش نخلاها هي تتلها بحماية ريان ..
" ريما .. حاشتي بيك اكيد لازمك تعاوني "
" شفما فريحة لباس ؟؟ "
"ريان خطيبي موقف في ** .. شكات بيه طفلة .. امان ريما حاول تعرفلي اسم الطفلة و عنوانها .. لازمني نعرفهم اكيييد "
" باهي خليني نكلم معارفي الي غادي و نرجعلك "
علقت علاها و بقيت نمشي و مش عارفة ساقيا وين هازتني دموعي تخلطت مع المطر الي كانت هابطة فوقي تفكيري كان مع ريان و الي عشتو معاه لنهار هذا .. هو حب حياتي نعرفو من وقت انا صغيرة .. عمرو ماضرني و لا وجعني عمرو ماكان وحش بالعكس هو احسن راجل في الدنيا .. كيفاه ينجم يعمل هكا فيااا .. كيفاه يفرط فيااا هكا .. كيفاه يقتلني بالطريقة هاذي .. فقت من سرحتي عالتليفون الي نوقز .. مسحت دموعي و خذيت نفس بالقوي نحكي " وي ريما "
" الطفلة اسمها قمر .. اتهمتهم انهم اغتصبوها "
غمضت عينيا نحكي " نعرف يا ريما .. لقيت عنوانها ؟؟"
" اي تسكن في الفيلا في ** رقم **"
" باهي عيش اختي "
علقت علاها و بقيت نخمم كان نمشي و لا لا خفت من الشي الي انجم نسمعو .. خفت كان نواجه حقيقة انا مش حاضرتلها .. تقويت على روحي و خذيت ثنية دارها .. ثنية كاملة و انا نقنع في روحي اني ماشية لطفلة كذابة وحدة اتهمت الراجل الي انحبو بالكذب و لازمها تقلي علاه و كيفاه تعمل هكااا .. اول ماوصلت طلعت بعينيا نغزر للدار مانعرفش قداه بقيت واقفة لا عرفت نقدم و لا نوخر .. هزيت روحي و دقيت لباب اول ماتحل بقيت نغزر لطفلة الي قدامي .. كانت صغيرة برشة عمرها في العشرين .. بقيت نثبت في ملامحها كانت محلاها.. بقات تغزرلي و تسال فيا بعينيها انا شكون .. عينيها كانت كلها براءة .. للحظة قلبي وجعني علاهااا و عالشي الي عاشتو كان تطلع لحكاية صحيحة .. فقت من سرحتي على صوتها تحكي
" كيفاه انجم نعاونك ؟؟"
تبسمتلها بسيف نحكي " انت قمر مش هكا ؟؟"
هزتلي براسها أي تحكي " اي انا .. شكون انت ؟."
"انجم ندخل و تو نحكيو و تعرف انا شكون "
" باهي تفضل "
اشرتلي بيداها بش ندخل بقيت نغزر لدار الي عايشة فيها كانت كبيرة و محلاها باين الي هي لباس علاها .. مشى في بالي الي هي اتهمتهم هكا بش تأخذ منهم فلوس اما باين الي هي مش مستحقة .. حسيت روحي زدت غرقت في أسئلة جديدة .. غزرتلها كيف قربتلي تحكي " تفضل من هنا "
قدمت معاها قعدنا هزيت راسي معاها كيف تحكي
" نسمع فيك .. انت شكون ؟"
بلعت ريقي و حطيت شعري وراء وذنيا نحكي " انا فريحة .. خطيبة ريان "
اول ما سمعت كلامي حلت عيناها فيا وجها لونو تبدل و شفايفها رعشت بقيت نغزر لحالتها و غزرت عيناها الي تبدلت فيسع تحكي " تفضل .. شنوة تحب مني ؟؟"
" انا هنا نحب نعرف لحقيقة ؟؟ علاه انت كذبت على خطيبي و وحلت في راسو عملة كيف هاذي ؟؟"
" برا اسأل خطيبك شنوة عمل فيا هو و صاحبو .. انا مانيش نكذب "
قمت من بلاصتي قدامها عليت في صوتي نحكي
" تكذب .. رياان مستحيل يعمل هكاكا "
قامت ووقفت قدامي دموعها كانو على خدها تحكي "لا عمل .. خطيبك اغتصبني هو و صاحبو .. شدوني بالسيف علياااا .. برا اسالو قلو شعملت في قمر في السانية الي في *** قلو يعاودلك لكلام الي قالهولي كلام يقزز كيفو.. خطيبك واحد ساااقط "
" لاااا .. كذب قول الي انت تكذب قمر .. قول الي تحكي فيه ماصارش.. ريان مستحيل يعمل هكاا في طفلة "
غزرتلي و صاحت " لااااا صااااار .. صاااار و عمللل فيااا اكثر من هكاكااا .. خطيبك و صاحبو دمروني ... سرقو مني شرفي و حيااتي .. خطيبك كان بش يعرس بياااا بش يلم عملتو .. في بالك و لا لا "
مع كلمتها لخرى حسيت ساقيا خانوني و ترميت عالفوتاي .. حطيت يديا على وذني ماحبيتش نكمل نسمعها و هي تحكي " من جرتهم حياتي تدمرت .. خطيبي خلاني .. امي ماتت .. خذيت واحد انا مانعرفوش .. خلاوني نكره حيااااتي ... بكاوني الدم في عوض الدموع .. خطيبك سرق مني كل شي .. و كان أنت بش تصدقو وقتها خسارة انو مرا كيفك تأخذ مجرم ووحش كيفو .. و بش تكون عااار قدام النساء الكل كيف ترضى روحك مع واحد مغتصب واحد مجرم "
كبست على وذنيا و غمضت عينيا نحكي " اسكت قمر .. اسسسسكت "
قعدت قدامي و صوت بكاها و شهقتها كانو وصليني .. هزيت راسي نغزرلها مانجمتش نقول حتى كلمة بعد الي سمعتو قمت من بلاصتي و هربت نجري من قدامها .. للحظة حطيت روحي في بلاصتها و الشي الي عاشتو منهم.. بقيت بين نارين اني نصدقهااا و لا نصدق رياان .. مش عارفة اناهي الثنية الصحيحة و اناهي لحقيقة الي انتبعهااا .. خايفة لا مشهد ضدها و تكون هي مظلومة و نزيد انا في وجيعتها .. بقيت نمشي و دموعي عمالها تقوى مع الشتاء .. ماعرفتش وين نمشي و لا شنعمل اللحظة هاذي تمنيت كان نشوف ريان و يعنقني كيف العادة و يطمني بكلمة وحدة يخلي النار الي شاعلة في تخمد حتى شوي ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
