حلقة 43
أيوب يحكي
غمضت عينيا و كبست عالستيلو في يدي بالقوي .. رغم دمي الي بردتو معاه و قد ما حاولت نستفزو اما حاسس روحي مغلل علييه .. بقيت مغزل من كلامو .. مفهمتش سبب جيانو بالضبط .. هو فاهم انا على شنوة ناوي و لا هو خايف .. عمري لا فهمتو هالانسان .. اما لازمني نوفي بوعدي ليه .. النهار الجلسة بش يكون نهار جهنم متاعو ..
هزيت الكاسة شربت ماء حسيت ريقي شاح تنفست شوي و جبدت التاليفون نحكي
" الو .. حبيت نفكرك الي النهار الجلسة قريب .. حضر روحك "
علقت عالتاليفون تبسمت و انا نتخيل في وجه ليث نهار الجلسة و المفاجأة الي تستنى فييه هو للا قمر .. بش نخلييه يندم على جيانو الصباح .. و بش يندم على كل كلمة قالها قبل و لا تو .. قمت من بلاصتي و خرجت من البيرو لازمني نكمل كل شي و نكون حاضر من النواحي الكل و مانخليش فجوة في الحكاية و لا نخلي حاجة تفوتني .. طلعت في الكرهبة و شديت الثنية لدار ام ريان و خطيبتو .. عارفها شاكة و خايف منها لا تكسح راسها معايا .. مانيش بش نخلاها تهد كل حاجة انا قاعد نبني فيها تو .. اول ما وصلت هبطت دقيت لباب هزيت راسي معاها كيف حلتلي تحكي
"تفضل "
" مرحبا مدموازال فريحة .. انجمو نحكيو ؟"
بعدت من قدام لباب و اشرتلي بيداها بش ندخل من غير حتى كلمة.. دخلت و قدمت معاها لبيت الصالة
غزرتلها تحكي
" تفضل اقعد "
"عيشك "
قعدت مقابلها نحكي " انا رجعت هنا بش نحكي معاك في شوي تفاصيل "
" نسمع فيك "
"اول حاجة نحب نعرف قرارك .. انت بش تشهد معانا نهار الجلسة ؟ بش تاقف في صفك خطيبك "
بقات تغزرلي شوي و بعد تنهدت تحكي "مانعرفش .. مازلت نخمم "
تبسمتلها بسيف نحكي " مدموازال فريحة لحكاية هاذي مفيهاش تخمام .. انت بش تاقف مع خطيبك .. بش تاقف مع الحق "
" و كيف يطلع خطيبي عملها بلحق ؟؟ كيف نشهد بالكذب مش حرام ؟؟ انا قابلت الطفلة و حكيت معاهاا"
عقدت بحواجبي مستغرب من كلامها نحكي
" وقتاه قابلتها ؟ و كيفاه تحكي معاها ؟؟"
عدات بيداها على رقيتها تحكي " كان لازمني نراها.. كيف ريان ماحبش يقابلني كان لازم نراها هي .. ريتها و حكاتلي كل شي .. قالت الي ريان كان بش يعرس بيها "
" مدموازال فريحة كان جاء كلامها صحيح علاه ماعرستش بيه مالا و سترت روحها ؟؟ علاه عرست بليث الي هو خاطيتو لحكاية ؟ "
هزتلي براسها لا تحكي "مانعرفش .. و هذاكا الي محيرني و مخليني داخلة بعضي .. كلامها حاجة و الي عملتو حاجة .. مانيش فاهمة الصحيح من الغالط .. و خطيبي الي مخليني هكا و مانجمتش نقابلو زاد في حيرتي .. مانيش عارفة شنعمل "
غزرتلها في عيناها نحكي " اثق فياا كيف نقلك الي هي طفلة كذابة .. لعبت اللعبة بش تورط خطيبك و صاحبو "
غطات وجها تبكي من غير حتى كلمة.. حكيت على جبيني نحكي " ما عندك علاه تبكي .. بكلمة منك انت خطيبك يرجعلك و هي تخسر هذا الكل و تطلع كذابة قدامكم الكل .. شهادتك مهمة ياسر و بش تبدل كل شي "
هزت راسها و مسحت دموعها تحكي " وقتاه نهار الجلسة؟"
" 20 ديسمبر.. مازالو جمعتين اخرين .. ابقى خمم فيهم مليح .. و تأكد الي خطيبك برئ اثق فيه و فياا .. برأت خطيبك بش تظهر ماتخليهوش يشك في حبك ليه كيف ماتصدقوش و يلقا خطيبتو ما وقفتش معاه "
"باهي ..نهار الجلسة تو نكون موجودة "
قمت من بلاصتي نحكي " باهي ياسر.. فرحتني بقرارك .. نخليك تو "
قامن من بلاصتها مديت يدي سلمت علاها و خرجت نتبسم .. هذا انتصاري الثاني لليوم .. كل شي بش يصير كيف مانحب و اكثر كل شي ما شي كيف انا مخططلو بالضبط .. شوي وقت و لحكاية توفاا .. و لحكاية نهايتها صارت باينة من تو ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
