الحلقة 22
#رفيقة_تحكي
قرارات قمر اخر فترة خلاتني نحس باني فشلت في كل الوعود الي عطيتهالها وعطيتها لروحي .. مانجمتش نحماها منهم و ناخذلها حقها نفس الي صار سنين لتالي قاعد يتعاود تو بتفصيل قوتهم هي الي تسيطر ديما و تخلينا نرضخو و نسكرو فمنا قدامهم .
قبولها لطلب ليث خلاني حايرة فيها كيفاه تخمم تمنيت نقلها ارفض و ماتخافش اما مانجمتش نضغط علاها اكثر حالتها كانت ماتسمحش اني نزيد معاها كلمة .. كيف شفت الفاصمة في يديها عرفتها على شنية قدمت وهذاكا الي خلاني نقبل قرارها ونخلاها على راحتها شوي .. اما هذا ما يمنعش اني بش نعرف اصل الحكاية وشنية ورا طلب سي ليث .. تعداو نهارين من اخر مرة ريتو فيها مانجمتش نصبر اكثر لازمني نقابلو ونحكي معاه خذيت لدراس متاعو من الكارط الي خلاها كيف جانا اول مرة.
طمنت على قمر وخرجت خذيت ثنيتي للبيرو متاعو ثنية كاملة وانا نخمم في الي مازال يستنى فينا وشنية مازال مخبي اكثر .. اول ماوصلت خذيت نفس ودخلت قابلت السكريتار قدمت ناحيتها نحكي
" نحب نقابل مسيو ليث "
" شكون نقلو ؟؟"
" قلو مدام رفيقة هو يعرف انا شكون "
هزتلي براسها باهي ودخلتلو ماتعداتش ثانية وعاودت خرجت تبسمتلي تحكي
" تفضل مسيو ليث يستنى فيك "
قدمت بخطواتي للبيرو ودخلت نلقاه واقف بش يستقبلني تبسملي يحكي " عسلامة مدام .. تفضل "
قدمت للكرسي من غير لا نجاوبو هزيت راسي معاه كيف رجع للبيروه يحكي " تشرب حاجة "
" مانيش جاية نتضيف .. انا هنا بش نحكي كلمتين ونمشي "
ربع يديه و ضيق عينيه فيا يحكي " نسمع فيك "
" قمر موافقة عالعرض متاعك سي ليث "
استوى في قعدتو و قربلي اكثر يحكي " متاكدة ؟؟"
هزيت حاجبي وقحرتلو " للأسف .. و انا هنا نحب نعرف اصل حكاية العرض متاعك .. خاطر صدقني مستحيل كان نخلاها تقدم عالخطوة هاذي كان مانلقاش مبرر يقنعني بطلب متاعك"
عدا بيديه على وجه وخذا نفس بالقوي قام من كرسيه و قدم ناحيتي قعد مقابلني يحكي
" باهي انا بش نحكي معاك بصراحة .. انا غايتي من الطلب متاعي اني نحمي قمر و نبعدها علاهم "
تبسمت على جنب نحكي " انت بش تحماها ؟؟؟ نسيت كلامك اخر مرة ؟ و اصلا كيفاه بش تحماها وانت معاهم "
" مانسيتش كلامي و لتو انا نادم عليه نادم على كل حاجة قلتها وعملتها .. مدام رفيقة انا نعرف الناس هاذم تو سنين ونعرف شنية ينجمو يعملو .. كيف ما خلاو قمر تتنازل بش يخليوها تعرس بريان و بش يخليوها زادة تبعد من هنا .. وحتى كان انت بش تاقف معاها صدقني قوتك مش بش تكفي بش يعملو المستحيل بش يبعدوكم من ثنيتهم يعفسو عليكم من غير ما يفكرو دقيقة "
كلامو صحيح انا زادة نعرفهم سنين و في كل مرة غايتهم هي الي تصير للحظة خفت كان كلامو يطلع صحيح ومانكونش قادرة على حماية قمر كيف ماوعدتها خفت لا نفشل المرة هاذي زادة كيف ما فشلت مع بنتي غمضت عينيا و عاودت حليتهم غزرتلو نحكي
" باهي نفرضو انا صدقت كلامك .. شنوة بش تعمل "
" اول حاجة بش نعرس بيها و نبعدها علاهم .. قمر كيف تولي مرتي مستحيل نخلي محمود يخمم انو يبعدها من هنا ويحرمها منكم .. و ثاني حاجة .. "
سكت و غزرلي في عينيا يحكي " ثاني حاجة بش نخلي قمر تاخذ حقها منهم .. التنازل مخلاش الحكاية توفى هنا .. بش نخلي الامور تهدا شوي وبعد الي نخمم فيه بش نعملو .. بش نخلي ايهم وريان يتحاسبو على عملتهم هاذي "
" علااه بش تعمل هذا الكل ؟؟ انت قمر ريتها مرتين كهو علاه بش تعادي ناس تعرفهم سنين على خاطرها .. تكونش عندك غاية اخرى سي ليث وبش تستغل حكاية قمر؟؟؟"
"صحيح ريتها مرتين اما كل مرة فيهم نرا قمر نحس روحي مسؤول عالي صار فيها نحس روحي سكتت عالحق وقتلي كنت انجم ناخذلها حقها من المرة الأولى .. و صدقني ما عندي حتى غاية و مستحيل كان نستغل قمر مهما يصير .. انا حطيت عهد على روحي اني بش نحميها و ناخذلها حقها .. خدمتي كمحامي تحتم عليا الشي هذا .. وبش نبقى وراء الحكاية هاذي لأخر نفس في عمري "
" باهي مسيو ليث انا بش نحاول نصدقك اما تأكد انا بش نبقى وراك و اللحظة الي نحسك فيها بش تضر قمر بش تلقاني في وجهك "
" مستحيل كان نضرها .. انا قلتلها عرسنا بش يكون عالورق و اول ما نطمان عليها بش نطلقها ونخليها تكمل حياتها الي تحرمت منها و هذا وعد مني ليك مدام رفيقة"
حسيت روحي اطمنت شوي من كلامو حاجة فيا تقلي صدقو وخليه يشد يد قمر بالك دواء قمر عندو بالك يعوضلها الي ضاع منها ويكون السبب في رجوع حقها بالك هو بش يكون اليد الي تمسح دموعها
عديت يديا على وجهي ورمشت عينيا نحاول نمنع في دموعي الي حسيتهم ملاو عينيا نحكي
" مسيو ليث .. مانخبيش عليك.. حالة قمر ماتعجبش الطفلة قاعدة تذوب كيف الشمعة قدامنا .. كان كلامك صحيح حاول انك تخلاها تاثق فيك .. خلاها تطمان انو فما شكون معاها .. الي تعدات بيه قمر مش شوي، الناس الكل سلمو فيها .. خطيبها و امها غير الضغط الي عاشتو من عيلة بن سعيد .. كان تحبني نصدقك وناثق فيك خلي قمر هي الي تصدقك وقتها بش تلقاني في صفك ومعاك و نحط يدي في يدك كان لزم و ناخذولها حقها منهم .. اوعدني انك ما تبكيهاش .. قمر تستحق انها تضوى من جديد و تتعدى الي صار فيها .. "
هزلي براسو باهي برشة مرات يحكي " نوعدك نخلاها تاقف مرة اخرى ورحمة بابا و امي لا نخلاها تبكي .. قمر من اليوم في مسؤوليتي انا .. كلكم في مسؤوليتي هي وانت و امها مستحيل نخلاهم يضروكم و يوجعو قمر بالطريقة هاذي .. غير انت صدقني و عاوني في الخطوة جايا "
تبسمتلو نحكي " انا معاك في اي خطوة المهم نرا بنتي لباس و تضحك "
قمت من بلاصتي قام معايا ووقف مقابلني، هزيت يديا بش نسلم عليه لأول مرة بش نحط يدي في يدو .. هزيت راسي معاه نحكي " فرحت اني حكيت معاك ونتمنى ما نندمش خاطر حطيت يدي في يدك و انشالله ما تخونش ثيقتي مسيو ليث"
" تهنى مداام .. بالوقت تو تتاكد انك مش بش تندم .. و تو تعرف انو من اللحظة هاذي ثنيتي تابعة ثنيتكم "
هزيتلو براسي باهي وخرجت من بيروه .. خرجت باحساس عكس الي دخلت بيه ،، فكرة انو خمم فيها و خمم ياخذلها حقها الي تنازلت عليه خلاني نصدقو و لو شوي .. حسيت بفرحة انو قمر لقات شكون خمم يحميها من غير مقابل وانو مازال فما خير في الدنيا .. واكيد الخير هو الي بش يربح في الأخير و الحق بش يظهر مهما يطول الزماان..
VOUS LISEZ
#ليس_ذنبي ❤️🔥
عاطفية" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
