حلقة 7
في نفس البلاد في فيلا كبيرة كانت واقفة قدام البلار تغزر للخدام في الجنينة من فوق لفوق .. تثبت في خدمتهم تحب كل شي يحضر على كيفها تحب حفلتها تكون اقل ما يقال عليها روعة .. ولدها روح من أمريكيا خذا الشهادة لازم تفرح بيه و ترفع راسها قدام معارفها .. ولدها لكسيبة فرحة بوه و دلول امو .. ولدها الي يطلب يلقاه .. كانت ترا في الدنيا فيه و راضية تضحي بالناس و بروحها على خاطرو .. ولدها الوريث الوحيد لعيلة بن سعيد ..
عيلة بن سعيد شكون مايعرفهمش .. اسمهم في البلاد أشهر من النار على العلم .. بن سعيد الي مالكين شطر البلاد و صوتهم مسموع .. الي ناس لكل تخاف منهم و يعملولهم الف حساب .. لقويين الي مايرحموش الي ياقف في ثنيتهم .. محمود بن سعيد رجل الأعمال الي اسمو معروف في البلدان الكل و مرتو للا وجيهة لمرا المزيانة القوية الي تعوض الف راجل و مايهدها شي و ولدهم سي ايهم .. ايهم بن سعيد .. اكيد تفكرتوه الاسم هذا .. ايهم ولدهم الوحيد المدلل الي ناس الكل تخدم فيه و هو كان ما يعجبو شي ..كان يرا الناس الكل خدام تحت ساقيه .. روح من أمريكيا بعد ماكمل قرايتو.. و الليلة الحفلة على شرف سي ايهم على شرف رجوعو .. رجوعو الي كان كيف الإعصار في حياة طفلة صغيرة.
الحلقة السابعة
#ايهم يحكي
غزرت لروحي في المرايا و تبسمت ..قاعد نغزر لراجل قوي راجل يملك الدنيا الكل، راجل ما عندوش كلمة مستحيل في قاموسو، راجل احلامو الكل تتحقق بكلمة منو و الي ياقف قدامي يلقاني كيف الاعصار ننهيه و نهدمو في ثانية مافماش قوة في الدنيا تنجم تدمرني مفماش مخلوق ينجم يلغي القوة متاعي انا ايهم بن سعيد الي الكل يعملو الف حساب .
لبست الكستوم و ريقلت شعري و خرجت مالبيت ..الحفلة بدات و الناس الكل يستناو .. نحب نهبط انا لخر نحب نرى نظرتهم ليا باعجاب و احترام هكاكا نحس روحي الي انا نملكهم الكل الي انا سيد الحفلة .. تلفت على صوت أمي و هي تتكلم " اشه اشه على ولدي .. محلا زينك يا بابا .. "
تبسمت على جنب و تكلمت بكل ثقة " نعرف امي .. و انت زادة ياسر محلاك كالعادة"
باستني من خدي و تكلمت " ههه هيا هيا اهبط الناس الكل يستناو فيك .. مل تنساش الليلة لازمك تتفاهم مع عيلة عبد الحق عالمناقصة بوك يواصي ويعاود هنينه و هو بعيد "
تنهدت في سري و تكلمت " تعرفني امي أمور الخدمة مانفهمش فيهم .. كيف يجي بابا تو يتفاهم معاه ولا كلم ليث.."
قصت عليا وصوتها يرعش وبدا يعلى " انت الي لازمك تاقف على الخدمة انت الوريث الوحيد للعيلة هاذي افهم"
نزلت على يدي مالغزول وعطيتها بظهري نتكلم " باهي امي باهي ماتكبشش عاد خليني عامل جو "
وقفت على صوتها ويديها الي تمس في رقبتي من تالي وتسال فيا بعينيها قبل صوتها " شنية الجروح هاذوم .. شكون خبشك .."
تربثت من سؤالها الي ما كنتش نتوقعو سؤالها الي رجعني لليلتين لتالي .. سرحت مع صوت الطفلة الي تصيح صوتها الي بقيت نسمع فيه كل مانرقد .. كل ما نغمض عينيا نتفكر عينيها الشهل الي تترجى فينا بيهم .. تفكرتها و هي تفارع فينا بقوة جهدها لين تهدت .. تفكرتها كيف خبشتني في رقبتي كيف طبست نبوس فيها..
حسيت بوجيعة في قلبي .. اما لا ما لازمنيش نضعف .. لازمني ننسى لحكاية كانو ماصار شي لحكاية هاذي مالازمنيش نحكيها حتى بيني و بين روحي ..
فقت من سرحتى على صوت أمي " قتلك شكون عملك هكاشصار ؟"
وخرت لتالي و بعدت عينيا عليها ما عرفتش شنية نجاوب .. خفت ..لأول مرة نخاف هكا .. خفت كان لحكاية تظهر و تكون هي سبب طيحت أيهم بن سعيد .
قحرتلي تتكلم بغش " تي تكلم حل فمك شبيك باهت"
بلعت ريقي الي حسيتو نشف في حلقي و تكلمت بربثة " شي امي شين نفدلك مع لولاد ياخي تجرحت "
" تبارك الله تو هذا لعب .." تكلمت و خلاتني و مشات
نفخت و هبطت في الدروج نجري ما نعرفش علاش سؤالها رهوجني خلاني ندخل بعضي بقيت واقف مع العباد اما مخي بعيد .. بعيد ياسر .. لأول مرة في حياتي نحس في قلبي وجعني و ضميري انبني .. اما لا لازم نقتل أي حاجة تخليني نحس و نضعف .. حكاية و وفات و الي صار صار .
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
