#ايوب_يحكي
ايامات عديتهم وانا هارب من بلاصة لبلاصة..اخر اخبار سمعتها انو الشرطة قبضت على شطر الرجال الي كانو معاياا ورجعو لبنات لاهلهم..و من وقتهاا وانا متخبي ف مستودع عند جماعة نعرفهم خفت لا يكونو حكاو كل شي..ايامات وانا على عصابي مش عارف شنوة نعمل و لا كيفاه وصلت للحال و مش عارف اصلا كيفاه بش نخرج و نكمل الي بديتو..رغم كل شي صار انا مازلت عند كلمتي بش نخلص على ليث مهما يكلفني الأمر.. بش نخليه يتحاسب على وجودي هناا بين لمجرمة تو.. غير خسارتي الي كلفتني برشة فلوس مع العرف الجديد..
عديت بيديا على وجهي وقمت من بلاصتي..بقيت نغزرلهم كيفاه متجمعين مع بعضهم يحكيو..حاسس روحي فديت من وجودي بيناتهم ف هالبلاصة..تهزيت وتحطيت على صوت الڤاراج الي ضرب..غزرتلهم نحكي
انا:" ياخي تستناو ف شكون ؟"
غزرلي واحد منهم يحكي
هو :" مانعرفش.. برا انت تخبى و انا تو نتصرف "
هزيتلو براسي باهي من غير حتى كلمة و عطيتو بظهري دخلت للبيت الي كانت على جنب..دوب سكرت الباب وبقيت نغزر بالشوي نشوف ف شكون..للحظة خفت لا تكون الشرطة عرفت بلاصتي..ضيقت عينيا كيف سمعت صوت طفلة.. ريتها كيف دخلت وبقات تحكي مع واحد فيهم..وقتها حسيت روحي اطمنت شوي كيما بقيت نتسال ف شكون الي جاية لهناا..حليت الباب وخرجت قدمت شوي وين ريتها اكثر..حليت عينيا على وسعهم وانا نشوف فيهاا قدامي..صحيح عندي فترة مليحة ماريتهاش اما مستحيل نغلط فيهاا..هي بيدها خطيبة ريان الي حكيت معاها قبل وقت الجلسة..اخر معلومات جاتني انها صارت تخدم عند ليث..تبسمت على لفكرة لي جاتني وقربت اكثر.. غزرت للطفل الي نعرفو اشرتلو بعينيا نحكي
انا :" ايجاا هناا "
قربلي وهزلي براسو بمعني شفماا..اشرتلو بيديا نحكي
انا :" شتعمل الطفلة هاذي هنا ؟"
هو :" مانعرفش..جات تسأل على " الزڤو " قالت بيناتهم خدمة "
عقدت بحواجبي مستغرب نحكي
انا :" شنوة الخدمة الي بينها و بين الزڤو ؟؟"
هو :" مانعرفش "
انا :" باهي اسمعني مليح..نحبك تمشي ومن غير مايفيقو بيك.. تسجلي كلامهم.. وتو نعطيك حقك "
تبسم يحكي
هو :" باهي شوي ونرجعلك "
بقيت نغزرلها كيفاه دخلت معاه للبيت الي كانت متركنة ولاخر وراهم يسجل..قعدت بعيد شوي نستنى فيهم يكملو وفرد وقت نخمم شنوة عندها خدمة مع الزڤو هذا واحد مجرم و فاسد..هي علاش حتى تجي لهناا..قريب الساعة وهوما يحكيو حسيت روحي توترت..هكاكا وغزرت للي بعثتو بش يسجل رجع حذايا..قعد بجنبي وجبد التاليفون..تبسم على جنب يحكي
هو :" والله الطفلة هاذي طلعت مجرمة اكثر من الزڤو "
هزيت بحاجبي نحكي
انا :" شتقصد ؟"
هو :" اسمع وحدك وانت تو تفهم "
ريتو كيف فتح التاليفون و الفوكال وين سمعت صوتهاا تحكي
فريحة :" انا جبتلك لفلوس الي طلبتهم لكل.. المهم نحبك تعمل الي طلبتو منك.. تخلص علاهاا..نحب قمر تسقط الي ف كرشهاا.. نحبهاا تترعب وتعيش ف الخوف..مانيش انا بش نعلمك خدمتك ولد حومتي "
علاء :" و مش خايفة من عرفك كان يفيق بيك ؟"
فريحة :" كيما قتلك هاذي خدمتك انت عاد.. ليث مالازموش يوصللكم..انت بش تضربها وتغبر.. ماتخليهوش يلقاااك..ووقتها انا بش نتصرف مع عرفي "
علاء :" باهي فريحة.. احسب لحكاية تنفذت "
فريحة:" عيشك زڤو "
سكرت التاليفون و انا مصدوم من حديثهم..ماتصورتش انو فما غيري حاقد علاهم و ممكن اكثر مني..على هذاكا مستحيل كان نفلت الفرصة هاذي..فرصة جاتني لغاية عندي ومنها هي انا بش نكمل الي بديت فيه.. فكيت من يديه التاليفون نحكي
انا :" هذا بش يبقى عندي شوي "
هو :" اي و الفلوس ؟"
قمت من حذاه نحكي
انا :" اصبر.. قتلك تو نعطيك مانيش هارب عليك..هاني مازلت متظيف حذاكم "
كبست عالتاليفون وخليتو وخرجت لبرا.. بقيت نستنى فيهاا حتى تخرج..تخبيت وراء الحيط هكاكا وريتها خرجت..قدمت وراها نحكي
انا :" مرحبا مرحبا.. شوف شكون عنا "
تهزت وتحطت وتلفتتلي..حلت عيناها فيا تحكي
فريحة :" ش..شفما؟"
هزيت بحاجبي نحكي
انا :" شنوة فروحة.. ماتقولش انك نسيتني فيسع هكاا ؟"
عدات بعيناها علياا مربوثة تحكي
فريحة:" ل لا ..تفكرتك.. تفضل شتحب؟"
قربتلها شوي وضيقت عينيا فيها نحكي
انا :" نحب نحكي معاك..ميسالش ؟"
فريحة:" نظن مبقاتش حاجة نحكيو فيها "
تبسمت على جنب نحكي
انا :" والله حتى انا مشى ف بالي هكاا..قبل ماا... "
حليت التسجيل الي فيه صوتهاا وقدمتو قدام وجهاا نحكي
انا :" قبل ما نسمعك شنوة تحب وعلاش جيت هناا "
ريتها كيف حلت عيناها فيا ووجهها تقلب مشى لون وجاء لون..رمشت عيناها برشة مرات تحكي
فريحة :" انا..انا .... "
هزيت بحاجبي نحكي
انا :" انت ظاهر فيك ناقمة على مرت عرفك..و لا وحدة كيفك شنوة يجمعهاا ب واحد كيف الزڤو غير انو بش ينتقملهاا "
عدات بعيناها علياا تحكي
فريحة :" انت شتحب تو ؟"
انا :" نحبك تسمعني.. بالك هكاا نوصلو لحل مع بعضناا.. خاطر حتى انا مانكذبش عليك..ناقم شوي "
هزت بحاجبهاا وتكلمت فيسع تحكي
فريحة :" على قمر ؟"
ضحكت وحكيت على لحيتي نحكي
انا :" اي تنجم تقول "
فريحة :" باهي نسمع فيك "
اشرتلهاا براسي نحكي
انا :" خلينا نبعدو من هنا "
هزتلي براسها باهي من غير حتى كلمة و تبعتني على جنب..قعدنا عالطاولة الي كانت لبرا وغزرتلي تحكي
فريحة :" قول الي عندك "
ميلت راسي نحكي
انا :" كيما قتلك انا نحب نتعاونو.. كان انت تحب توصل لغايتك خليني نقلك راك ف الثنية الغالطة..طريقة تفكيرك غاالطة..ليث ب تاليفون واحد ينجم يعرف شكون الي ضرب مرتو و سقطهاا.. ووقتهاا المناظر الي لداخل هاذم بش يجبدوك.. قدام كف واحد يبيعوك و انت تخسر "
عدات بعيناها علياا وبقات تغزرلي حايرة..ريتها كيف كبست على يديها تحكي
فريحة :" اي شنعمل مالا ؟"
انا :" حط يدك ف يدي..كان تسمع مني..صدقني مانخليك تبعد قمر على ثنيتك على طووول "
فريحة:" و كان نقول لا ؟"
تبسمت على جنب نحكي
انا :" ساهلة تقول لا.. التسجيل يوصل لعرفك ووقتهاا انت تخرج بيدك على راسك.. و ب فضيحتك زادة "
عدات بيداها على وجهها ونفخت بالقوي تحكي
فريحة :" ب.. باهي.. اما نتفاهمو قبل "
انا :" اكيد بش نتفاهموو.. اما قبل نحب نعرف شبينك وبين مرتو..علاش تحب تعمل فيها هكاا ؟"
فريحة :" مايخصكش "
هزيت بحواجبي نحكي
انا :" والله..مدام بش نصيرو شركاء.. لازمني نعرف ونخمم كان انجم ناثق فيك و لا لا "
غزرتلي على جنب تحكي
فريحة :" انا نحب ليث..ونحبو يبعد علاهاا.. على هذكاا خلينا متفقين انا مانحبكش تضر ليث "
هزيتلها براسي باهي نحكي
انا :" باهي..باهي مانضروش..هو ليث يعشق مرتو.. و كان احناا ضرينا مرتو وقتها انا بش نكون انتقمت منو..يعني ماتخافش عليه.. تو نخليهولك و تفاضى بيه وريڤل جوك معاه "
كبست على وجهها وغزرتلي درا كيفاه تحكي
فريحة :" و..وكيفاه بش تعمل هكا ؟"
انا :" استنى مني تاليفون و انا تو نخبرك كيفاه "
هزتلي براسها باهي من غير حتى كلمة ووقفت.. كبست على ساكها تحكي
فريحة :" انا لازمني نمشي تو.. نستناااك "
وقفت معاهاا وهزيت يدي قدامهاا وين هي حطت يداها ف يدي صافحتني..تبسمت على جنب نحكي
انا :" فرحت اني شفتك "
جبدت يداهاا مني وعدات بعيناها علياا من غير حتى كلمة..وخرت بخطواتها لتالي وبعدت علياا فيسع.. رجعت قعدت وباقي عينيا عليهاا كيفاه تمشي بسرعة.. تبسمت على جنب من الفرحة الي حسيتهاا تو..فرصة جاتني على طبق من ذهب..لا خططت و لا خممت.. على هذاكاا لازمني نعرف كيفاه نستغلهاا مليح ومانضيعهاش من بين يدياا حتى نوصل لغايتي.. اني نخلص على ليث....
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
