#ليس_ذنبي ❤️‍🔥

ليس ذنبي حلقة الثانية

الحلقة الثانية :

يحيــى يحكي :
و أخير وصلت .. توحشت البلاد توحشت ريحتها وناسها الطيبين توحشت عايلتي وصحابي اما الي حاسو ما كان حتى شي قدام وحشي لقميرة توحشت ريحتها البنينة و كلامها الي كالعسل كلامها الي يضمدلي جروحي توحشت غزرت عينيها الي تطيرني لسابع سما .. توحشت براءتها الي قد ماتكبر تبقى فيها توحشت هبالها و تفوريخها .. نستنى في اللحظة الي تولي فيها مرتي و حلالي نستنى في اللحظة الي بقيت نحلم بها 13 سنة نحلم بيها ملي عمري 15سنة .. 13 سنة و انا معا قمر ربيتها و تربيت معاها .. كانت هي اختي و بنتي و صاحبتي و حبيبتي حبيتها مالصغرة و حبها كبر معايا ... و اليوم جا النهار الي كملت فيه الستاج و بش نبدا فيه الخدمة .. النهار الي استنيتو و تمنيتو اني نخدم و نعرس بقميرة و نطير بيها و نحققو احلامنا معا بعضنا

هبطت مالتران غزرت يمين و يسار مالقيتهاش كسبة سمعت الكلام المرة هاذي و ماجاتش كبرت الفرخة و لات تسمع كلام راجلها .. ضحكة ف سري و هزيت التاليفون بش نكلمها و نقلها راني وصلت .. نوقز التاليفون مرة و ثنين و ثلاثة و ماهزتش .. حسيت بالخوف في قلبي اول مرة قمر ما تهزش عالتليفون .. زربت ف خطواتي نحب نوصل فيسع للحومة بش نراها .. وقفت تاكسي و انا مازلت شاد التاليفون نستنى فيها تكلمني .. حسيت بالثينة طوالت كان لقيت راني جنحت و وصلتلها ..
وا خيرا وصلت تعديت لدار قمر قبل ما نتعدى لدارنا مايهمني في حد كان في قمر اني نطمن علاها و نراها ..اول مادقيت الباب حلتلي خالتي حسنة نقزت عليا تبوس وتعنق و انا عينيا تلوج على قمر الي ما خرجتش مش من عوايدها هكا مستانسة تبدا في راس النهج واقفة تستنى فيا كنت نراها هي اول واحدة.
" خالتي حسنة ياخي قمر ويني "
هزت راسها متعجبة " شنية وينها ؟؟ ياخي ماعرضتكش ؟ "
حسيت بدني فور ورعش "وين تعرضني ؟؟ "
«قمر جاتك للمحطة بش تعرضك خرجت من قبيلة "
" فاش تحكي يا خالتي مالقيتهاش وزيد نكلم فيها ما تهزش عالتليفون " ما ستنيتهاش تجاوبني رميت الساك من يدي وخرجت نجري نلوج عليها نسمع في خالتي حسنة تصيح وانا مش معاها جملة همي الوحيد أنى نلقى قمر كنت نلوج و الف حكاية جات في مخي زعمة شصارلها؟؟
تعدات سوايع و قمر مفماش حاسس روحي بش نهبل .. في لحظة دارهم تعبات بالعباد و الناس الكل متحيرة .. خالتي حسنة و امي يبكيو و انا حاسس روحي بش نهبل ماعرفتش شنية نعمل حاسس راسي بش يطرشق من التخمام دورت البلاد الكل و ريحتها مافماش .. ياريتها سمعت كلامي ياريتها لا خرجت .. اما هذا الكل ما يهمش تو المهم نلقاها و تكون لباس كان تصير حاجة لقمر انا نموت ما عنديش القوة اني نعيش من غيرها ..
فقت من سرحتي على صوت عم محسن يتكلم " يا وليدي ما تخافش اكيد بش نلقاوها و تكون لباس... هانا مشينا للمركز و علمناهم اكيد بش يلقاوها "
" ما نجمش ما نخافش يا عم محسن .. شوف قداه الوقت تو و هي مافماش .. زعمة ويني ؟ راني بش نهبل "
" سبق الخير وليدي قمر طفلة باهية وربي  اكيد معاها و بش ترجعلنا لباس"
" انشالله يا عم محسن انشالله .. انا هاني خارج نزيد نلوج مانجمش نبقى هكا مربع يدي "
" محمد .. مهدي براو مع يحيى لوجو معاه ماتخليهوش وحدو "
" باهي عم محسن تهنى"
خرجت و حاس روحي بش تخرج الدنيا الكل فليتها و شي .. حسيت روحي تخنقت الدنيا ضياقت بيا و ظلامت في عينيا مانجمتش ناخذ نفس و قمر مش معايا ... حاسس روحي ضايع و مش عارف ثنيتي و قمر بعيدة
النهار بدا يطلع و شي ما تبدل .. درت السبيطارات و المراكز الكل و مالقيتهاش .. الفكرة الوحيد الي سيطرة على مخي انها تكون تخطفت.
#سمرعياري 🍓