حلقة 77
#محمود_يحكي
بقيت واقف قدام الشباك نغزر للكراهب ماشية جاية .. سارح في الي صار .. ايامات تعداو على الحكم الي صدر .. الحكم ماصدرش في حق ولدي كهو .. صدر في حقي انا زادة و حكم عليا بالخسارة .. خسرت برشا حاجات من جرت عملتو .. و من جرت خيانة ليث ليا انا .. حتى الانتخابات الي بقيت سنين نحضرلها انسحبت منها .. اما ميسالش الانتخابات مش وسيلة بش نقوي بيها اسمي .. اسمي الي قوا و طلع السنين هاذي الكل .. مش بالساهل يطيح و يتهد .. المال و القوة الي عندي تخليني قادر على كل شي .. شي ما يصعب علياا .. و بيهم هوما بش نخرج ولدي .. صحيح مانجمتش نخرجو راسو مرفوع كيف ماتمنيت .. اما المهم انو بش يخرج .. و نبعدو منها و اول مانطمن عليه انو بخير .. وقتها لعبي الصحيح بش يبدا معاهم واحد واحد .. و اولهم ليث .. مانعرفش علاه تبسمت كيف تفكرت بوه .. نفس الغرور .. نفس غزرة التحدي .. نفس الشخصية .. كان مزيج بين القوة و العاطفة .. اما وينو هو تو .. العاطفة عمرها ما تخلي الانسان يربح في اي حرب يقدم علاها .. كيف ما خسر هو قبل بش نخلي ولدو يعيش نفس الخسارة .. و الرابح الوحيد بش يكون انااا .. قلبي الي عفست عليه سنين لتالي و خليتو يصير حجر هو الي كان مصدر قوتي .. خلاني قادر نعمل كل شي من غير مانخمم مرتين .. و انا تو قادر نخرج ولدي و بش نعمل كل شي على خاطرو ..
فقت من سرحتى على باب البيرو الي دق و تحل .. هزيت راسي مع السكريتار تحكي " سي محمود الدكتور وصل "
هزيتلها براسي باهي نحكي " خليه يتفضل " تلفتت و رجعت لكرسي متاعي .. ريتو كيفاه دخل ووقف قدامي .. اشرتلو بيدي نحكي " تفضل سي كريم اقعد "
تبسملي و قعد قدامي .. غزرلي يحكي " سي محمود انا حاضر "
تبسمت على جنب نحكي " باهي يااسر .. بش تمشي تو وتفهم ايهم شيعمل بالضبط .. نحب ولدي يخرج الشهر الجاي على اقصى حد .. ماتخافش انا بش نسهلك كل شي .. المهم نحب التقرير حاضر "
" باهي سي محمود .. كان تحب نجم نعملو تو "
هزيتلو براسي لا نحكي " لا .. نحب كلشي يكون مقنع وحقيقي .. مانحب حد يشك في حاجة "
" باهي فهمت عليك "
قمت من بلاصتي نحكي " باهي تفضل .. الكرهبة تستنى فيك اللوطة بش توصلك .. نحبك تقابل ايهم وتفهمو .. وقلو بوك من بعد بش يتعدا ويقلك على الباقي "
بقيت نغزرلو كيفاش خرج .. رجعت ترميت عالكرسي كملت الخدمة الي كانت بين يديا وخرجت .. طلعت في الكرهبة و شديت ثنية الحبس .. اول ما وصلت لعندو .. حسيت عصابي فلتت مني .. كيفاه وصلني للبلاصة هاذي منعرفش .. حميتو من الصغرة كنت نخاف عليه من كل شي .. علاش مانمجش يكون كيف ليث ..
هبطت من الكرهبة ودخلت .. شوي ولقيتو جا وجهو مايتفسرش .. وقف قدامي و ضرب بيديه عالطاولة يحكي " بابا شنوة لي عملتو انت ؟؟"
اشرتلو بعينيا نحكي " اقعد ساعة "
علا في صوتو يحكي " مااانيش قااعد .. ملقيتش طريقة اخرى تخرجني بيها من هنا غير هاذي .. بش تحبسني مع المجانين ؟؟"
حليت عينيا فيه و صحت نحكي " قتتتلك اقعد متهبلش* "
ريتو كيفاه قعد .. هبط راسو و ساقيه كانت ترعش .. هديت روحي شوي و غزرتلو نحكي " كان جيت تخمم وعندك شوية عقل .. متوصلش روحك لهنا .. حتى المجانين واعقل منك .. وتو تسكر فمك مكانش نخليك تتعفن هنا حياتك الكل .. وحلها وحدك وقتها كان تنجم "
هز راسو غزرلي ووطى في صوتو يحكي
" باهي بابا سامحني .. انا مانجمتش نتقبل الكلام لي قالو الطبيب "
" الي قالو الطبيب .. بش تعملو حبيت ولا كرهت مفماش طريقة اخرى بش تخرج من هنا .. بعد شهر بش يخرج التقرير الطبي .. انو بسبب الصدمة والحبس فقدت عقلك .. بش نستعمل واسطتي ونخليهم ينقلوك في اسرع وقت للمصحة بش تتحمل غادي ايامات ... نحب كلشي يكون مقنع والكل يصدق لي صار وقتها بش نخرجك وتكون حر .. اما بش تكون ميت "
عقد حواجبو يحكي" ك .. كيفاه ؟؟؟"
" انا بش ندبر راسي و بش نعلن موتك للكل .. هكا لا الشرطة ولا حتى حد غيرهم ماهو بش يبقا وراك .. بش تعيش بهوية جديدة "
عدا بيديه على وجهو و رجع غزرلي باهت يحكي
" بابا شقاعد تقول انت .. شنوة بش نعيش كأني ميت ؟؟"
هزيت بحاجبي نحكي " والله كيف ما سمعت .. خاطر كان تخرج هكاكا الكل بش يبقا وراك .. ومصيرك بش يكون يا لموت يا لحبس وانت اختار وقتها .. تعيش بشخصية جديدة ولا ندفنك بجنب ام قمر؟؟"
شفتو وجهو كيف صفار و هرب عينيه من قدامي .. رجعت نحكي " تذكرتها مش هكا .. نظن ليث مش باش يغيب عليه انك صاحب العملة .. حتى اني عرفت انو لوج على الجنانيني لي سكتتو امك .. وقتها لعوام بش يتضاعفو عليك و تخزز في الحبس ... هذا اذا مامتش قبل سي ولدي "
تنهد بالقوي يحكي " ب .. باهي بابا باهي .. بش نعمل لي قتلي عليه الكل اما خرجني من هوني امان فيسع "
هزيت روحي وقفت غزرتلو نحكي " هاذي اخر فرصة ليك.. نفذ كلام الطبيب و نتقابلو بعد شهر .. غلطة مانحبهاش .. وقتها بس ننساك جملا و لا انا و لا امك نشوفو وجهك .. فهمت ؟"
اول ما كملت كلامي خرجت و خليتو وراياا .. مانجمتش نبقى نغزرلو و نحكي معاه اكثر من هكا .. قد مانكبس و نتقوى عليه .. يبقى ديما ولدي و خايف عليه .. حمايتو هي مسؤوليتي .. طلعت في الكرهبة و المرة هاذي شديت ثنيتي لايوب .. بش نعرف شصاير مع ليث بالضبط .. وقيت بش نبدا نخمملو في حسابو .. وحسابو بش يكون كبير برشا المرة هاذي .. بالنسبة ليا هو عدويا الأول صار .. نسيت رابط الدم و اختي و كل شي .. بقيت متفكر كان عملتو فيااا و خيانتو ليااا .. الي بش نخليه يدفع حقهم ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
