حلقة 14
#رفيقة_تحكي
من وقت خروجي من الفيلا و حالي ما كانش أحسن من حال قمر .. على قد ماتعدات السنين على قد ما نزيد نحقد عليه .. نحقد عالإنسان الي حبيتو ووهبتو حياتو وعمري الي كنت نرا الدنيا بعينيه هو، الي عطيتو ثيقتي ووقفت قدام الناس الكل على خاطرو .. دخلت للفيلا و ريت مرتو وولدو .. لحظتها عرفت انو انا الوحيدة الي خرجت خاسرة في الحكاية هو قدر انو يكمل حياتو من غير مايتلفت للماضي .. الماضي الي بقات نارو لتو شاعلة في جواجيا .. الماضي الي خطف مني بنتي قطعة مني و منو و خلاني من غير مستقبل.
ما استغربتش عملت ولدو، مدامو تربى عالشر و القوة متاع بوه.. بوه الي وصل حتى انو يقتل من غير ما ترمشلو عين.
يا رتني لا عرفتو و لا ضيعت عمري عليه .. يا ريتني انجم نبرى منو..
هبطت دمعة من عيني من الأفكار الي هدت عليا فرد المرة .. حطيت يدي على صدري نرجع في النفس هزيت روحي بشوي بش نمشي نتفقد قمر .. عندها قداه ماخرجتش من بيتها قد ماحاولت نخفف عليها و نبدللها جو مانجمتش وجيعتها مافماش قوة تنجم تنزعها من قلبها .. دخلت للبيت قربت منها كانت راقدة شعرها مسيب عالمخدة و خدودها حمر .. كانت كيف الملايكة كل ما نراها نحس رعشة في بدني محلاها كنت نتخيل فيها " رفيف بنتي " هزيت يدي و حطيتها على راسها نمسح عليها حسيتها بدات تتململ .. حلت عين و خلات عين مسكرة ضحكت على فازتها كانت كيف الطفلة الصغيرة بين يديا .. قرصتها من خشمها بشوي ونحكي " صباح الخير قمور .. شتحس في روحك اليوم ؟"
قامت شوي و هزت يداها لمت شعرها تبسمتلي تحكي " صباح النور خالتي .. الحمدالله لباس .. نحس فروحي خير شوي "
ضحكتلها و شديتها من يداها كبست عليها " و بش تولي خير ببرشة وراس بنتي .. نحبك ديما هكا تضحك .. الوجه هذا ما يواتيهوش البكا مانحبكش تطفى قمر"
حطت راسها على كتفي عديت يدي على ظهرها نسمع فيها تتكلم " محلاك خالتي .. قداه نحبك .. ربي بعثك بش تخفف عليا كان مش انت ماكنتش بش نهز روحي ونقاوم حتى شوي "
عينيا زغللت على كلامها حسيت قلبي دق و بش يخرج من بلاصتو مالفرحة زدت كبست عليها كان لقيت ندخلها بين ضلوعي نحكي " عيش بنتي ياربي حتى انا والله نحبك و حاطتك في مقام بنتي واكثر . عمري لا بش نسلم فيك.. انت هدية ربي ليا "
بعدت عليها ومسحت دموعي قمت نحكي " هيا قوم قوم لا تسمعنا حسنة تو تغير .. قوم اعمل دوش واخلط عليا بش تفطر فيسع عنا وين ماشيين"
هزت راسها معايا وقامت تغزرلي مستغربة" لوين ماشيين ؟؟"
تبسمتلها تبسيمة بش نطمنها نحكي" للمحامية .. جاء الوقت سايي، لازم نكملو الي بديناه.."
رمشت عيناها برشة مرات وهزتلي براسها باهي حسيتها دخلت بعضها و ماعرفتش شنوة تجاوبني
قربت منها وحطيت يدي على خدها نحكي " كان تحس في روحك مازلت مش حاضرة قلي .. ميسالش نمشيو مرة أخرى؟"
بلعت ريقها وغزرتلي في عينيا هزتلي براسها لا تتكلم " لا خالتي حاضرة .. لحق الوقت ومانيش بش نرجع حتى خطوة لتالي لازم نكمل"
تبسمتلها نحكي " مالا حضر روحك واخلط عليا"
.. خليتها تحضر في روحها سبقتها لبيت لفطور نلقى اختى حسنة قاعدة في الفيراندا وجها تاعب وسارحة قعدت حذاها نتكلم
" لباس حسنة .. شبيك؟"
" لا شي حاسة روحي تاعبة شوي كهو "
نعرفها تكابر و ماتحبش تحكي نعرف وجيعتها على بنتها الي بش تبقى كيف اللعنة تبع فيها حياتها الكل
حطيت يدي على كتفها طبطبت عليها بشوي نحكي " اللطف على اختى .. حاسة بيك والله، خلي كل شي للوقت، الوقت كافي بش يداوينا"
يا دوب تبسمت شوي تحكي" قمر فاقت والا مازالت "
" فاقت وهاي تحضر في روحها .. ماشين للمحامية اليوم"
هزتلي براسها باهي من غير لا تجاوبني دورت راسها تغزر للفراغ حسيت الحكاية قلقتها اما ماركزتش ياسر معاها. قمت على صوت قمر تحكي " هاني حضرت خالتي هيا نمشيو"
تلفتت نغزرلها كانت لابسة روبة تحت الركبة و سبادري .. شعرها لامتو لفوق وجهها صافي و محلاه .. الجروح الي فيه بداو يتلمو .. عينيها رغم الي كانو ذابلين اما محلاهم كبار وشهل .. قدمت حذاها نحكي " باهي عزيزتي "
تعدات من جنبي مشات لأمها عنقتها و باستها تحكي" ادعيلي امي ادعيلي ربي ينصرني علاهم و ناخذ حقي "
مسحتلها على شعرها باستها من جبينها " ندعيلك وراس بنتي ندعيلك .. كل خطوة انت تخطيها انا ندعيلك فيها "
تبسمتلها وتكلمت " هيا معانا علاه بش تبقى هنا وحدك"
" لا خليني في الدار مانحبش نخرج .. برا مع خالتك رفيقة انا مطمانة عليك معاها هي تعوضني "
قربت مني وشدتني من مرفقي خرجنا من الدار وشدينا ثنيتنا للمحامية .. هزيت راسي على صوت قمر
" تعرفها المحامية خالتي .. باهية زعمة؟"
" نعرفها .. محامية ناجحة ماتاخذش قضية و تخرج منها خاسرة .. "
هبطت عيناها تتكلم بصوت واطي " اكيد بش تتطلب برشة فلوس.. و انا ماعنديش خالتي و زيد بالك القضية تطوال شنية بش نعملو "
قصيت علاها ووقفت شديتها من خدها نحكي " ماتحط شي في بالك انا معاك ماتخمم في شي "
" اما .."
" اششش لا اما لا شي مش قلت الي انا كيف امك .. اسكت مالا الام و بنتها مابناتهمش فلوس "
كملنا طريقنا و احنا ساكتين .. كل وحدة فينا سارحة في دنيا أخرى.. ما حسيتش بثنية هزيت راسي عالبيرو الي وصلنالو
غزرت لقمر نحكي " حاضرة ؟"
هزتلي براسها أي برشة مرات و كبست على يدي بالقوي وصلتلي بيها كمية خوفها من اللحظة هاذي .. دخلنا و حكينا مع السكريتار بقينا نستناو شوي لين جاء الوقت ودخلنا.
قعدنا مقابلينها تبسمتلنا تحكي " مرحبا بيكم .. كيفاه انجم نعاونكم "
قمر هزت راسها معايا وغزرتلي غزرة عطاتني بها إشارة بش نحكي انا
غزرت للمحامية " جيداء"
جبدت نفس بالقوي و جمعت الحروف الي حاستهم تشتتو بين شفايفي نحكي "هاذي بنتي قمر .. ب بنتي تعرضت لعملية اغ اغتصاب من مدة .. واحنا عرفنا الي عمل هكا، نحبو نقدمو بيه شكوى.. جيناك بش انت تعاونا و نعرفو منك شنية لازمنا نعملو بالظبط"
شبكت يداها وهزت راسها معايا وتحكي بصوت ثابت " فهمتك .. اما قبل كل شي نحب نسمع الحكاية من لول من قمر "
غزرت لقمر الي هبطت راسها وعيناها دمعت في لحظة كبست عالروبة متاعها بيداها الزوز و بقات ترعش في ساقيها تحكي بالغصة " كـ كنت ماشية ب بش نعرض خاطيبي في المحطة .. ت تعديت علي سانية قريبة منا بش نخلط فيسع .. حسسيت بصوت كرهبة وقفت قدامي و زوز هبطو منها " خذات نفس بالقوي وشهقت تبكي " قربو مني الزوز و شدوني بسيف عليا هزوني لبلاصة متركنة .. حاولت نفلت منهم اما كانو.. كانو اقوى منى قاومتهم لين جهدي تهد .. صحت ياخي واحد فيهم سكرلي فمي .. بقيت نبكي ونفارع في الي طلع فوقي " سكتت وبكاها قوى " كنت نرا فيهم ينهشولي في لحمي مسو كل بلاصة فيا منا ومنا ومنا " بقات تعدي في يداها على بدنها الكل و ترعش دموعها كانو هابطين كيف الشتاء كملت تحكي" لين جات اللحظة الي عرفت فيها انهم خذاو مني شرفي وقتها غمضت عينيا و استسلمت .. نفس وحل في حلقي كيف حسيت بالدم بين ساقيا.. كملو عملتهم وقامو من فوقي .. قا قالو كلام عمري لا بش ننساه كلام تمنيت كان مت لحظتها و مانسمعوش، بقيت نغزرلهم يمشيو لين بعدو عليا خلاوني مرمية في الشارع الدنيا ظلمة وبلاصة خالية ماتلفتوليش وما انبهمش ضميرهم عالطفلة الي خلاوها صوت ضحكهم وصلني .. ضحكو على موتي قتلوني بالحيا .. غمضت عينيا و بعدها ما ماحسيت بشي فقت نلقى روحي في السبيطار .. لقاتني خالتي رفيقة وقتها " حطت يداها على صدرها وبقات ترد في النفس دموعها ماكفوش وجهها حمار و بدنها يرعش بكلو .. قربت منها عنقتها نهدي فيها " سمالله علي بنتي يزي امسح دموعك "
قامت جيداء قربت منا عطاتها كاس ماء بش تشرب وقعدت مقابلتها تحكي " يزي ما تبكيش ماتخافش .. انا بش ناقف معاك ونخليك تأخذ حقك منهم .. قتلي الي انت تعرف الي عمل هكا .. شكونو وكيفاه عرفت؟"
غزرتلها انا نحكي" وقتلي لقيت قمر لقيت بجنبها شركة طايحة كانت فيها تصويرة و منقوش عليها اسم .. وانا نعرف الإسم هذاكا .. ايهم بن سعيد ولد م محمود بن سعيد"
" هذا دليل قوي بش يعاونا في القضية صدقني يا قمر ومع شاهدت خالتي رفيقة كون متأكدة الي بش تربح القضية .. خذيت شهادة طبية مش هكا ؟"
هزتلها براسها أي ومسحت دموعها حسيت انو الروح رجعت فيها شوي و تنفست بعد كلام المحامية ..
" باهي ياسر .. تو اول حاجة بش نقدمو شكوي.. بش يخرج قرار انهم يتوقفوا الزوز وياخذو شهادتهم .. مع شهادتك انت وخالتي رفيقة .. ينجمو يبقاو في الحبس لين يوفا التحقيق و يجي وقت المحاكمة .. من هنا للوقت هذاكا قمر نحبك تكون قوية، محمود بن سعيد اسمو واصل في البلاد و قوي مانحبكش تخاف مهما يصير .. الحق اخرتو يظهر و العدالة تاخذ مجراها اكيد"
هزتلها براسها باهي وقامت وقفت حذاها غزرت لجيداء نحكي " وقتاه بش نقدمو الشكوى؟"
" ليوم .. خليها عليا انا بش نحاول نسرع في الأمور قد مانجم بش مانضيعوش وقت"
تبسمتلها " باهي يعطيك الصحة .. عنا ثقة فيك مدام جيداء "
سلمت علاها وشديت قمر الي كانت مهدودة تمشي بسيف كانت كل مرة تتذكر الي صار ترجع لنقطة الصفر والقوة الي تحاول تلمها تطيح في الماء. بقينا نمشيو وانا حاسة روحي مرتاحة شوي عكس الي كنت حاستو الصباح .. فكرة انو حق قمر بش يرجع و هوما يتحاسبو عطاتني الامل في غدوة .. غدوة الي بش يكون ضاوي في حياة قمر وحياتي رغم الي نعرف هوما بش يعملو المستحيل بش يسكتو قمر و يخوفوها اما انا مش بش نسمحلهم بش نكون انا العقبة الي واقفة في طريقهم .. بش نكتب نهايتهم بيدي اناو قمر.
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
