#ليس_ذنبي ❤️‍🔥

حلقة 66-67

حلقة 66

قمر تحكي

تعداو ايامات على مرواحي من المزرعة .. نهار الجلسة قرب .. و كل ما يقرب هو كل ما خوفي يزيد .. يمكن المرة هاذي حاسة بخوف اكثر من المرة الي فاتت .. مانيش مستعدة بش نعيش الي صار اخر مرة .. وزيد غياب ليث الفترة هاذي زاد وترني .. معادش فاهمتو .. كل مرة يقرب و يرجع يبعد .. كل يوم و انا نسال في روحي نفس السوال .. شنوة صاار ؟ .. من يوم ما روحنا من المزرعة خرج و مارجعش .. حستو تقلق من حاجة و انا مش عارفتها شنوة .. حتى كيف يطلب .. يطلب كان خالتي .. يسالها علينا و يعلق .. و حتى كيف يجي .. يعطي القضية لرجال و يرجع يمشي من غير ما يدخل لدار .. قداه من مرة حبيت نكلمو .. اما خفت نقلقو .. و اصلا لازمني نتعود على غيابو .. هو عندو حق يتصرف هكااا .. حب يعاوني و يعطيه الصحة في هذا .. و بش يجي وقت و يرجع لحياتو بعد ما يوفى كل شي .. عمري ما ننسالو معرفو هذاا .. و من بعدو لازمني ناقف على روحي و نشوف حياتي ..
هزيت روحي شوي من الفرش وقمت .. خذيت دوش وريقلت اموري كيف ما جاء .. اصلا ما عيني في شي .. خرجت من البيت و هبطت .. لقيت خالتي حضرت لفطور و قاعدة تستنى فيا .. قربتلها بوستها من خدها نحكي " صباح الخير خالتي "
هزت راسها معايا تحكي " صباح النور بنتي " عقدت بحواجبها و كملت تحكي " شبيه وجهك اصفر ؟؟ لبااس"
قعدت مقابلتها نحكي " لباس خالتي .. متقلقة شوي خاطر وقت الجلسة قرب "
تبسمتلي تحكي " ماتخافش يا روحي.. احنا معاااك.. ماتنساش "
تبسمتلها وهزيتلها براسي باهي .. ترشفت شوي من قهوتي ورجعت غزرتلها .. عضيت على شفايفي نحكي
" خ.. خالتي ليث ماجاش ليوم ؟؟"
" اه فكرتني .. طلبني قبيلا شوي .. قال بش نحضرو رواحنا.. بش يجي يهزنا .. ماشين لمصطفى عارض علينا ليوم "
حسيت قلبي خظ بالقوي مانعرفش علاه فرحت لهالدرجة خاطرني بش نشوفو .. عديت بلساني على شفايفي نحكي " ب.. بلحق خالتي بش نمشيو لعمي مصطفى؟"
هزتلي براسها أي تحكي " اي بنتي "
تبسمتلها نحكي " والله جات في وقتها .. حاسة روحي مخنوقة حتى انا "
" هياا كمل افطر .. و برا حضر روحك .. ميجيش تمشي هكااا "
هزتلها براسها باهي نحكي " اي اي خالتي "
حسيت بروحي بش نطير من الفرحه خاطر بش نخرج شوي .. من وقت مرواحي من المزرعة وانا شادة الدار .. وزيد ماشين لعمي مصطفى و .. وليث هو الي بش يوصلنا ..
قمت من بلاصتي و طلعت نجري لبيتي .. وقفت قدام لخزانة نختار في حوايجي .. مانعرفش قداه بقيت هكاكا و انا نشوف .. حاسة روحي متوترة .. خليت لحوايج و مشيت نشيح في شعري الي بقى مبلول .. اول ماكملت قمت بش نرجع نختار دبشي .. اما وقفت كيف سمعت صوت كرهبة .. مشيت لشباك نجري بش نشوف .. تبسمت كيف ريت ليث جاء .. خليت كل شي و خرجت من البيت نجري .. خرجت لبرا ريتو كيفاه دخل و يحكي مع الرجال .. قدمت بخطواتي ناحيتو اما ريتو كيفاه رجع عطاني بظهرو و خرج من الجنينة للشارع الرئيسي .. لحظتها خفت لا يرجع يمشي من غير ما نراه .. اما ريتو ما طلعش في كرهبتو .. قدمت شوي بش نشوفو وين ماشي .. ريتو كيفاه شق الطريق من الجهة لأخرى.. و مشى للكرهبة كانت واقفة قريبة من دارنا .. دق عالبلار .. شفت واحد هبط من الكرهبة من الزوز الي كانو راكبين ووقف قدام ليث .. بقيت نغزر لليث الي يحكي معاه .. مانعرفش علاه خفت لحظتها .. خرجت نجري من الفيلا للكياس و قربت ناحيتهم .. سمعت ليث يحكي " شتعملو هنااا ؟؟"
هو:" نستناو في شكون "
شفتو كيفاه حك على لحيتو يحكي " مالا قتلي تستناو في شكون ؟؟ " تبسم على جنب و رجع يحكي " وقداه عندكم تستناو ؟"
هو:" من شوي جينا "
ضيق عينيه فيه يحكي " يظهرلي طول عليكم برشا مش هكاا .. مش عيب عليه يخليكم تستناو الوقت هذا الكل "
هو:" ميسالش "
" انا غاضني حالكم .. برشا عليكم شهر تستناو"
قص عليه الراجل وغزرلو على جنب يحكي " مادخلش روحك انت "
شفت ليث كيفاه كبس وجهو و رس على سنيه .. عروق رقبتو قريب يطرشقو يحكي " مالاا قتلي ماندخلش روحي ؟؟؟"
ماخلاهوش يجاوبو .. هز يدو وضربو في وجهو على قوة جهدو .. حطيت يدي على فمي ووخرت خطوتين لتالي .. حسيت قلبي خظ بالقوي و بدني ترخف .. عرفت الي الرجال هاذم يحبو على حاجة ووراهم حكاية .. بقيت نغزر لليث كيفاش يضرب فيه من غير ما وقف .. هكاكا و صاحبو هبط من الكرهبة قرب لليث .. رجع ضربو حتى هو لين خلاه يطيح .. لحظتها بالحق خفت من ليث .. كانو مش نفس الشخص الي نعرفو .. كان يضرب فيهم بطريقة وحشية .. متاع واحد مستعد يقتل و ما يهمو في شي .. كل مرة نرا وجه جديد فيه .. و الوجه هذا خلاني نترعب اكثر من اي مرة .. غمضت عينيا معادش انجم نشوف اكثر .. حسيت روحي شوي و ندوخ من منظر الرجال كيفاه صاار .. تلفت لرجال الي خرجو من الفيلا يجريو ناحية ليث بش يتدخلو .. اما هو صاح علاهم و منعهم .. بقى يضرب في الرجال .. حسيتو بش يقتلهم .. فرغ غشو الكل فيهم .. الدم كان خارج منهم من كل بلاصة .. كانو دايخين و بدنهم معادش فيه .. وقتها حسيت روحي معادش انجم نسكت اكثر .. مافقتش بروحي كيفاه صحت نحكي "ليييث يزززي "
علي كلمتي تلفتلي و هز راسو معايا .. عينيه وساعو اول ما شافني .. غمض عينيه بالقوي ورجع يغزر للرجال يحكي " بر ادخل هاني جايك "
حطيت يدي عالسور شديت فيه .. حسيت ساقيا فشلو مانجمتش ندخل كيف ما قلي .. بقيت كان نغزر بعينيا ليه كيفاه تحول بالطريقة هاذي .. هبط لراجل و شدو من خناقو وقربلو يحكي " بش تمشي لل***** الي بعثك وتقلو سي ليث يسلم عليك وحسابنا بعد المحكمة بش نسكرووه"
هز روحو ووقف كيف تلفت و لمحني كيفاه كنت واقفة نرعش و دموعي محصورين .. قحرلي عينيه كانت شاعلة و حمر عاللخر .. حسيت ريقي وحل في حلقي من الخوف منو .. قرب مني وهز يديه في وجهي يحكي " مازلت هوني انت ؟"
بقيت نغزرلو مانجمتش ننطق حتى كلمة.. حسيت لكلام هرب مني .. عض على شفتو التحتانية وكبس على يدو بالقوي يحكي " شتعمل هوني حل فمك ؟"
" ليث ا .. ا "
قص عليا كيف صاح في وجهي يحكي " شمجيييب *** هوني تكلم " تهزيت و تحطيت كيف علا في صوتو اكثر يحكي " براااا ادخل برااا"
عطيتو بظهري و جريت .. دخلت لدار .. تعديت لصالة .. بقيت نرد في النفس الي حستو تقطع عليا .. عينيا حسيتهم تخنقو من الدموع الي تملاو فيها .. حسيت بيه كيف دخل يهد .. غزرتلو كان وجهو مقلوب قرب مني وشدني من مرفقي يحكي " شمخرج *** انت اه .. انا شوصييييتك .. مش قتلك معادش تخرج منها الدااار .. مش قتلك الجنينة ومعاااادش تعتبها بلا علمي اه .. احكي " هز يديه و ضربني على راسي يحكي " راااسك هذا شفيه ؟؟"
نطرت يدي منو نحكي " ماتصيحش علياااا "
حل عينيه فياا يحكي " باااش نصيح .. خاطرك متفهمش .. *** مرة وحدة اسمع لكلام "
عليت في صوتي نحكي " مااانيش بش نسمع .. باهي هكاااا .. انت شمدخلللك فياااا "
هز صبعو في وجهي يحكي " اسمعني .. شاد روحي بالسيف علييك .. سكر فمك و تعمل الي نقلك عليييه .. ماعندش خلق بش نلعب معاااك "
هزيت بحاجبي نحكي " اسمعني انت .. ماتجيش تفرغ غشك فيااا فهمت ؟؟ انت هبلت اليوم ظاهرلي .. كنت بش تقتل الرجال لبرا و تو جاء دوري اناا مش هكااا .. اصلااا كيفاش تضربهم بالطريقة هاذيكا ؟ ماخفتش تقتلهم .. مهما كان السبب مايستاهلوش تعمل فيهم هكاكا "
عينيه غماقت من الغش و قحرلي بعد من قدامي يحكي " براا لبيتك "
ربعت يدي نحكي " مانيش طالعة .. حتى تفهمني علاش ضربتهم هكاكا "
رجع تلفتلي يصيح " شمدخل *** فياااا .. اموري هاذي و انا نعرف شنعمل .. معااادش تدخل في حااجاات ماتخصكش "
جيت بش نحكي اما قص عليا كيف هز يدو وضربها عالحيط قدامي يحكي " قلت ل*** برا لبيييتك .. احسن مانستجرم فييك هالنهار "
ريت خالتي كيف دخلت تجري ناحيتنا تحكي " شبيكم شفما .. صوتكم واصل لشارع"
قربتلها نجري عنقتها نرعش و نحكي " خالتي ليث .. ليث ضرب الرجال لبرا .. كان بش يقتلهم "
شفتو كيفاش تلفتلي مغزل بقى يغزرلي.. تحشيت في خالتي اكثر هاربة من غزرتو .. رجعت نحكي ونبكي
"ضر.. ضربهم برشا والله .. وتوا قاعد يصيح عليا خاطرني قتلو سيبهم "
بقات تمسح على ظهري تحكي " اهدى بنتي خلينا نفهمو منو شصار بالضبط "
عدا بيديه على وجهو يحكي " رفيقة .. خليها تطلع لبيتها تو .. خاطر معادش عندي صبر لها .. ولا نقلك كيف تحضرو هاني لبرا "
طلعت عينيا نغزر لخالتي نحكي " شفت خالتي كيفاش يحكي معايا ؟؟" رجعت نغزرلو نحكي " علاش هارب تو .. كيف كل مرة تعمل هكاا و تهرب "
وقف في بلاصتو كبس عالبونية متاعو و يقحرلي .. تكلمت خالتي " بنتي يزي .. برا اطلع لبيتك .. خليني  بش نحكي مع ليث"
" علاش انا نطلع ؟؟ شيسخايل في روحو ياخي ؟" لحظتها هد عليا وجبدني من خالتي بالقوي دزني يحكي
" قلتلك اطلللع اطلللع .. ماااتخرجنيش من عقلي "
خرجت نجري من الصالة .. دموعي موقفوش .. يديا وجعتني من قوة جبدتو ..  مانعرفش علاش كل مرة يصيح عليا هكاا .. بقيت في بيتي نبكي شي من الشي لي شفتو .. وشي كيف عيط عليا و عملي هكاكا .. بقيت عالحالة هاكي حتى تعدا شوية وقت ولقيت خالتي دخلت عندي قعدت بجنبي تحكي " شبيها بنتي "
ترميت في حضنها نحكي " خالتي شفت كيفاش عيط عليا و كيفاه جبدني ؟"
طلعت يديها على شعري تحكي " باهي وانت ماكش غالطة ؟؟"
هزيتلها براسي لا  نحكي " انا معملت شي "
" كيفاش معملت شي .. الراجل منبه عليك متخرجش .. وفوق هاذا قالك ادخل ومسمعتش الكلام قمر "
مسحت دموعي بكف يدي نحكي " علاش حتى منخرجش .. شمدخلو فيا هو ؟"
" قمر يزي .. ليث ماهوش مانعك انك تخرج .. هو خايف علينا .. وانت راسك صحيح ومتسمعش لكلام "
بعدت علاها نغزرلها نحكي " تو انتي معاه ولا معايا؟"
هزت حواجبها تحكي " والله انا مع لحق .. وليث عندو حق .. تصور كان الرجال عملولك حاجة ؟؟"
ذبلت عينيا نحكي "هوما كانوا وا قفين قدام الدار وكهو .. مفما شي خالتي"
" لا مش واقفين وكهو .. فما شكون لي بعثهم يراقبونا.. فهمت عليا ..  ليث شاف الكرهبة يوم جا مصطفى.. وقالي من يومها وصى الرجال يتحققو منهم .. وزادة ظهرو اكثر من مرة في تسجيلات الكاميراا "
"وهو ضربهم وكان بش يقتلهم انت ماشفتوش يا خالتي "
" ايه يعطيه الصحة يستاهلو مدام باعثينهم الكلاب هاذوكم "
عضيت على شفايفي نحكي "و .. وكان قتل واحد فيهم "
تبسمت على جنب تحكي " خايفة عليه مالا ؟؟"
حسيت بغصة وحلت في حلقي و دموعي هبطت نحكي " خالتي يزي منيش خايفة عليه .. اصلا شيسخايل في روحو حتى يعاملني هكا و يتصرف معايا بالطريقة هاذي ؟"
دورت بيداها عليا ورجعت حضنتني مسحت على شعري تحكي " يزي عيش بنتي هو ميقصدش"
" لا يقصد انت متعرفوش ..هاذاك النهار زادة عيط عليا معادش نحب نشوفو و لا نسمع صوتو "
" وقتاه زادة عيط عليك ؟"
بلعت ريقي نحكي " كيف انت مشيت خالتي وخليتني معاه .. وقتها "
" ربي يستر شعملت زادة ؟؟"
هزيت راسي نغزرلها نحكي " خالتي تو انت واقفة ضدي؟؟"
" لا مش ضدك..  اما انا نعرف ليث مفماش منو ورزين ويخمم بعقلو .. مهوش بش يعيط عليك بلا سبة "
هبطو دموعي علي كلامها نحكي " والله هاذاكا لي صار.. ووعدني معادش باش يعاودها .. واهوكا عاودها.. كل مرة يعيط عليا و يوجعني.. مخيبو معادش بش نحكي معاه وقلو معادش يجي لنا باهي خالتي ؟"
" تو انت معادش يعجبك ليث .. نسيت شعمل على خاطرك ؟؟"
هزيت بكتافي نحكي " ايه معادش يعجبني و معادش بش نسامحو ومنحب حتى شي منو زادة.. خليه يبعدني "
" اما انت غلطت قمر .. وقفت وتصيح في وجهو .. وتحاسب فيه علاش ضرب رجال .. لي كان ممكن انهم يضرونا"
" هو لي عيط عليا قبل يا خالتي "
بعدتني علاها تحكي " والله انت بلحق كيف صغار .. لي يغلبك يجي يحاسبني.. تو قوم هاو يستنى فينا "
تكيت عالفرش نحكي " منيش ماشية اناا"
عقدتت بحواجبها تحكي " كيفاش ماكش ماشية؟ ميجيش عيش بنتي .. كل حاجة في بقعتها.. تو مصطفى يتغشش منك "
" هأه ميتغشش.. تو نكلمو و نقلو بش نزورو مرة أخرى.. انت امشي انا تاعبة ونحب نرقد تو "
" الراجل عارضنا قمر كيفاش تحبني نمشي وحدي ؟"
طلعت لغطا فوقي نحكي " خالتي يزي بلحق معينيش .. نحب نرقد تو "
قامت من حذايا تحكي " باهي هاني خارجة ..ربي يهديك وكهو "
شفتها كيفاه خرجت وسكرت لباب .. حسيت روحي غزلت من كلامها كيفاش تعطيه الحق وقتلي هو غالط ..
سمعتهم كيفاش يحكيو قدام باب بيتي
ليث : "وينها معادش وقت ؟"
رفيقة:" قالت متحبش تجي وقاعدة تبكي "
ليث: "ماهيش بش تبطل العادة هاذي متاعهاا؟؟"
رفيقة:" عيش ولدي نعرف لي هي غالطة ..اما وسع بالك معاها ..قمر هكا متعرفش تتصرف مازلت صغيرة "
ليث:" باهي رفيقة باهي هاني مسعو بالي علخر "
رفيقة:" ليث امان"
ليث:" شنووة؟؟ متغزرليش هكا رفيقة .. منيش بش نحكي معاها .. من غير ما تحاول "
رفيقة:"عيش ولدي .. على خاطري "
مكني لعصب من كلامو.. عوجت شفافي نحكي وحدي
" محسوب انا بش نحكي معاه و لا قاتلة روحي بش تحكي معاياا "
هزيت راسي عالباب الي تحل .. شفتو دخل و قربلي ..
هزيت روحي و نطرت لغطا من فوقي نحكي " شتحب .. شتعمل هنااا ؟"
قحرلي يحكي " قوم البس معادش وقت "
هزيتلو براسي لا نحكي  " لااا .. مانيش جاية "
علا في صوتو يحكي " لاااا بش تجي ومانيش نشاور فيك .. سمعتني ؟"
حليت عينيا فيه نحكي " يااااخي انت شنوة اه ؟؟ كل شي عندك يجي بالعياط؟  كل شي لازم يمشي كيف ما تحب و على كيفك انت ؟؟"
" اي كل شي بش يمشي كيف ما انا نحب..  وتو قوم البس"
" مانيش قايمة و مانيش لابسة "
ريتو كيفاه قدم ليا و جبدني من يدي طبس علياا لين صار وجهو في وجهي يحكي " اسمعني يا فرخة .. راني مازلت موسع بالي معاك عاللخر .. بش تلبس ولا نتصرف"  نطرلي يدي وبعد عليا ورجع يحكي " تحرك يلاااا"
" بش تستنا برشا " هزيتلو بحاجبي وتبسمت على جنب
هز بحاجبو يحكي " تلبس ولا نجي انا نلبسك ؟؟"
هربت عينيا من عليه.. حسيت بوجهي فور .. نطقت بسيف نحكي " ز.. زايد متحشمش "
" علاش بش نحشم ؟؟ مرتي راك ولا نسيت؟؟ " غمزني وتبسم على جنب 
عضيت على شفايفي نحكي " س.. ساقط و ماتحشمش "
قربلي و حل عينيه فيا يحكي " شقلت ؟ ما سمعتكش؟؟"
حسيت روحي تربثت منو .. عديت بلساني على شفايفي نحكي " ما.. ما قلت شي "
غزرلي على جنب يحكي " تحرك البس ..هاني نستناك لوطة .. ورد بالك تبطى "
خرج وسكر الباب وراه هدو .. نفخت بالقوي .. حسيت روحي فديت منو .. مسقطو كيفاش يقلي هكا .. اصلا كيفاه يتعامل معايااا هكااا .. كل مرة يوعدني و يرجع يخلف بوعدو .. و المرة هاذي خالتي في صفو .. حسسوني الي انا غالطة وقتلي انا ماعملت شي .. تصرفت هكاكا من خوفي .. هزيت روحي بالسيف و قمت بش نحضر روحي .. النشاط الي قمت بيه الصباح الكل مشى .. مانعرفش شنوة لبست و لا كيفاه حضرت روحي و هبطت .. نلقاه واقف يستنى فياا .. هز راسو قحرلي و خرج وخلاني وراه .. تصرفاتو هاذم يوتروني و يخليوني نفد منو .. ندمت اني كنت نستنى فيه .. خرجت لقيتو طلع في الكرهبة .. تلفت لخالتي نحكي
" خالتي اطلع انت من قدام .. انا بش نطلع من تالي "
ريتو كيفاه غزرلي على جنب ورجع غزر قدامو .. طلعت من غير مانحكي حتى كلمة .. ثنية كاملة و انا ماهزيتش عينيا فيه ..   بقيت سارحة في الي صار .. و في وضعي مع ليث.. كل مرة تصير لحكاية هاذي و كل مرة نرا وجه جديد ليه .. معادش عارفة شنعمل معاه و لا كيفاه نتصرف ..
🌸🌸