حلقة 98
#رفيقة_تحكي
ريتو كيف عطانا بظهرو وخرج..حسيت قلبي شوي و خرج معاه من الخوف الي حسيتو اللحظة هاذي..بقيت شادة مصطفى وين حسيت برعشة بدنو من الغش غير صوت انفاسو الي كانت مسموعة..بلعت ريقي غزرتلو نحكي
انا :" سايي مصطفى هاو مشى.. وسع بالك "
نطر يديه مني وغزرلي.. حل عينيه فيا و علا ف صوتو يحكي
مصطفى:" انت شمنزلك هناا ؟؟ علاش جاية مادة وجهك "
انا :" انا.. انا"
تهزيت وتحطيت كيف قص علياا و صاح يحكي
مصطفى :" انت شنووووة ؟؟ "
انا :" انا نزلت بش نشوف ف بالي ليث جاء والله.. ك دخلت مافيباليش هو "
مصطفى :" و ك ريتو هو علاش بقيت مادة منظرك هنا؟"
حسيت بغصة شدتني ف حلقي من كلامو معاياا.. رسيت على سنيا بالقوي نحكي
انا :" مصطفى ماتحكيش معاياا هكاا "
هز يديه ف وجهي يحكي
مصطفى :" لااا نحكي.. ك ريتو هو علاش حتى تاقف بيناتنا "
انا :" وقفت بيناتكم بش مانخليكش تطيح لمستواه.. هو جاء يستفز فيك ووصل للي حب عليه..ماتعطيهوش الفرصة هاذي انت "
هز بحاجبو يحكي
مصطفى :" مش انت بش تقلي شنوة نعمل.. ريتو كيفااه يحكي علييك.. كيفاه تحبني نسكتلووو.. مراتي رااك "
انا :" لا نقلك شتعمل.. مدامك راجلي انت زادة "
قربتلو شوي وحطيت يدي فوق صدرو نحكي
انا :" مصطفى.. امان رد بالك تعمل حاجة.. شيهمك فيه امااان.. رد بالك تضيع روحك على خاطرو.... "
مصطفى:" رفيقة انت ماتدخلش.. خليك بعييدة عالحكايات هاذم.. هاني نبه عليك مازالت تعاود الي صاار تو حسابك معاياا "
انا :" لااا ندخل.. يزي ما كل مرة تهددني انك بش تحاسبني.. كان ماتحبش تخمم فياا و لا ف روحك خمم ف ولدك عالاقل.. محمود واحد كل••ب.. نخاف لا يضرك مصطفى "
غمضت عينيه بالقوي و رجع حلهم يحكي
مصطفى:" ماعندو مايعملي "
انا :" لا عندو ما يعمل.. محمود مايخافش ربي.. شوف كيفاه ضحى بعيلة اختووو.. شوف كيفاه قت••ل عيلتك.. شوف كيفاه فرط ف بنتوو.. هذا الكل وتقلي ماعندو مايعمل "
هزيت يدي ومسحت دمعتي الي نزلت ورجعت نحكي
انا :" مصطفى افهمني امان.. راني مانحبش نرجع نعيش نفس لخسارات هاذم.. مانحبش ولدي يتيتم كيف ليث.. خمم ف هذا الكل و خلي كل شي وراك.. كان فما حساب خليه يتحاسب بالقانون.. اما حكاية الثأر هاذي اخطاك منهاا مصطفى امان "
عد بيديه على وجهو وغزرلي يحكي
مصطفى:" كان جاء فما قانون راو تحاسب من قبل.. مش يبقى عايش و مازال مفرعن علينا هو و ***** ولدوو "
انا :" باهي مالا شنوة بش تعمل ؟؟ بش تقت••لو ؟؟"
مصطفى :" انا نعرف شنعمل.. و مرة اخرى نقلك خلييييك بعييدة.. مانحبش وجهك يقابل وجهوو "
تبسمت على جنب نحكي
انا :" شوف انا ف شنوة نحكي و هو ف شنوة يحكي..ياخي انا علاش حتى نقابل وجهو كان مش على خاطرك "
هزيت بحاجبي نحكي
انا :" و لا تطلعش تخمم كيف المرة الي فاتت اني متوحشتو "
كبس على وجهو لين حمار..حل عينيه فيا على وسعهم حتى شرارتهم وصلتني.. علا ف صوتو أكثر يحكي
مصطفى :" *** فااااش تخرف انت "
انا :" والله انا نقول ف لكلام الي انت قلتو.. انا نوصي فيك بش ماتقربلوش خاطر خايفة عليك و انت شوف ف شنوة تحكي "
هز بصبعو ف وجهي يحكي
مصطفى:" رفيقة اطلع لبيتك.. خلي هالليلة تتعدا على خير.. مانحبش نسيب غشي فيك "
انا :" باهي هاني طالعة.. و انت خليك هكااا خلي غشك يعميك هكاا "
عطيتو بظهري و طلعت للبيت نجري.. بقيت ندور هكاكا مش عارفة شنعمل.. حسيت روحي غزلت منو.. و فرد وقت حاسة بالخوف عشش فيااا.. مانيش عارفة شنوة مازال بش يصير أكثر من هكاا..طيف محمود حاستو بش يبقى بيناتناا طول عمرنا..حسيت روحي متت قدام كلامو علياا قدام مصطفى..خلاني نعيف روحي ونندم اني سلمتلو فيهاا..مكافاهوش اني من وراه خسرت عيلتي و بنتي ومازال يحبني نخسر اكثر من هكا..بقيت هكاكا نخمم مانعرفش قداه تعدا وقت..قربت تفقدت كرم وين لقيتو راقد..مديت يدي وحطيتهاا فوق يديه بوستو منهاا وفرد وقت نخمم فيه هو..مانجمش نزيد نخسرو هو كيما خسرت بنتي قبل..مستحيل كان انجم نتحمل خسارة ك هاذي من جديد..حسيت قلبي وجعني اول ماتفكرت شصار قبل..اما مستحيل نخلي الي صار يتكرر ك نعرف شنعمل..
تلفتت وراياا على صوت الباب الي تحل..ريت فاطمة كيف دخلت تحكي
فاطمة :" مدام رفيقة لعشاء حضر "
هزيتلها براسي باهي وتبسمت نحكي
انا :" باهي فاطمة يعطيك الصحة.. هاني جاية "
خرجت وسكرت الباب..غطيت كرم و بدلت حوايجي ونزلت..ريتو كيف كان قاعد فوق الطاولة ومنزل راسو يتعشى..قربت حذاه وقعدت مقابلتو.. نزل الشوكة وهز راسو معاياا وغزرلي يحكي
مصطفى:" كرم رقد ؟"
هزيت كاسة الماء وخذيت رشفة منهاا..رجعتها وبديت نتعشى من غير مانجاوبو..سمعتو كيف تنهد يحكي
مصطفى :" رفيقة نحكي معاااك "
غزرتلو على جنب نحكي
انا :" سمعتك.. أي رقد "
مصطفى:" باهي مالا خليناا نحكيو شوي "
هزيت بحاجبي نحكي
انا :" شنوة مازال عندك ما تقول هكاا قلت كل شي قبيلا "
قام من بلاصتو وقرب قعد عالكرسي الي بجنبي..عدا بعينيه عليا وحط يديه على خدي بعدلي خصلات من قصتي لتالي يحكي
مصطفى:" رفيقة يزي من التصرفات هاذم.. نعرف انك مغششة مني و خايفة.. اما انا نوعدك انو ما يصير شي..لا لياا و لا ليكم..مانحبكش تخاف يا روحي "
حطيت يدي فوق يديه الي كانت على خدي نحكي
انا :" انا خايفة عليك والله.. كان تصيرلك حاجة انا نموت مصطفى "
تبسم يحكي
مصطفى:" اللطف عليك من الموت..ماتخافش ماعندو مايصيرلي "
انا :" باهي مالا اوعدني تبعد عليه و ماترجعش تقربلو جملاا "
عدا بعينيه عليا يحكي
مصطفى :" باهي "
انا :" لاا ماتقولش باهي.. قلي نوعدك "
تنهد بالقوي يحكي
مصطفى :" باهي نوعدك "
تبسمت وقربتلو حطيت راسي على صدرو وين هو دور بيديه علياا وجبدني عندو اكثر..غمضت عينيا نحكي
انا :" عيشك مصطفى ربي يخليك ليا"
باسني من راسي يحكي
مصطفى :" ويخليك لياا.. ايا كمل عشاك "
انا :" باهي "
بعدت عليه ريتو كيف رجع لكرسيه و بقى يتعشى ساكت.. ف اللحظة هاذي بالذات حسيت روحي مش منجمة انزل عينيا من عليه..لقيت قلبي يضرب بقوة مش عارفة السبب حتى كيف طمني انو وعدني اما حسيت بالخوف رجع سكن فياا..خفت لانفقد اللحظات هاذم و نرقد و نقوم مانلقاش مصطفى حذاياا...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
