#قمر_تحكي
حطيت الشوكة من يدي بعد ماكليت آخر قطعة.. ماحسيتش بروحي كيفاه كملتها لكل وحدي تالمون كانت بنينة..هزيت راسي وين شفتو يغزرلي ومركز معايا..تبسمتلو وشفتو ك مد يدو..هز منديل قربو مني ومسحلي يحكي
ليث :" كل مرة تاكل شكلاطة لازم توسخ روحك"
هزيت بكتافي نحكي
انا:" المهم كليت لي نحبو خلي نتوسخ "
ضحك وبقى يمسحلي اول ما حط من يدو غزرتلو نحكي
انا:"ليث..لبارح امنة فلحفلة قتلي راو تسجيلات العام للجديد بش يوفا موعدهم بعد يومين وانا لتو لا مشيت "
ضيق عيناه فيا يحكي
ليث:"وانت شبيك ممشيتش ؟"
انا:"نسيت فكرت مزال وقت بش يوفاو..تنجم تهزني ليوم ..ولا كان تاعب خلي غدوة "
هزلي براسو لا يحكي
ليث:" لا لازم نمشيو ليوم خاطر غدوة بش نرجع نخدم "
انا:"باهي فهمت"
اشرلي بعينيه يحكي
ليث:"هيا خلينا نقومو مالا '
هزيتلو براسي باهي وقمت معاه..لمينا لماعون مع بعضنا وطلعت للبيت دخلت للسالدوبان ريقلت أموري وحضرت ساكي..لبست فاست خفيفة وتلفت لقيتو حاظر هو زادة كان لابس شوميز زرقة خلات لون عيناه يظهر اكثر..تبسمت وقربت منو حاسة روحي نحب نغزرلو..عضيت على شفايفي كيف تلفتلي يحكي
ليث:"سيبون كملت"
عديت بعينيا عليه نحكي
انا:"اي كملت..وانت ؟
ليث:"اي.. هيا خلينا نمشيو"
شديت ف يديو وهبطنا مع بعضنا سكر لباب وطلعنا فلكرهبة..خدمها وشد الثنية..تلفتت وين شفتو يسوق ساكت.. بقيت نغزرلو مابعدتش عينيا من عينيه حسيت روحي متوحشتو عاللخر كيما حسيت روحي ندمت اني مسمعتوش قبل وحلينا لمشكلة..بقيت حارمة روحي منو وانا كنت بش نموت بوحشو..تنهدت كيف تفكرت انو بش يرجع يخدم صحة راسي خلاتني نتحرم من ايامات كان بش يعديهم جنبي..مديت يدي وشديتو من يدو لي كانت على المقبض نحكي
انا:"ليث..انت بلحق بش ترجع غدوة تخدم؟"
تلفتلي وهزلي براسو اي يحكي
ليث:"لازم نرجع غدوة..علاش فما حاجة؟"
عوجت شفايفي نحكي
انا:"هأه..اما انا متوحشتك نحبك تبقا معايا "
ضحك وعدا بيدو على لحيتو يحكي
ليث:"والله انت فوت على روحك الفرصة.. كهو انا معادش نخدم عند روحي بش نزيد ونقص الايام كيما نحب"
عقدت بحواجبي على كلامو نحكي
انا:"كيفاه معادش تخدم عند روحك!"
ليث:"ريت قداش فاتك وانت قالبة خليقتك..صارو برشا حاجات وانت لا خبر"
دورتلو بكلي وعقدت بحواجبي نحكي
انا:"شصار ليث امان قلي!"
ليث:"بش نسكر لبيرو"
حليت عينيا على وسعهم مصدومة نحكي
انا:"شنوة ؟؟علاش ..شصار ؟"
هزلي براسو لا يحكي
ليث:"مصار شي..اما بش نخدم مع عم مصطفى.. منجمش نشد البيرو وامور الشركة"
انا:"مافهمتش..علاش بش تخدم مع عمي !"
ليث:"عمي تعب قمر معادش ينجم يسير أمور الشركة وحدو وخاصة بعد مامات صاحبو لي كان يدو ليمين.. انا مشيتلو حكالي انو معادش منجم..قتلو تو نجي انا نشد لخدمة عليك "
رجعت استويت ف قعدتي وغزرتلو نحكي
انا:"فهمت..يعني انت تحب تعاونو"
ليث:"هذا اقل شئ نجم نعملو على خاطر عمي..خيرو سابق عليا..هو كان ديما يحاولني نشدلو لخدمة وانا كنت ديما نتهرب..اما لمرة هاذي حسيت بلحق تعب"
كبست على يدو وتبسمتلو نحكي
انا:" محلاك ليث..انت ديما تخمم فالناس لقراب ليك..اماانت تحب تخدمها الخدمة هاذي..منعرفش انا حسيتك تحب للمحاماة؟!"
ليث:"اي عادي..معنديش مشكلة.. وبش ننقل بيرويا للشركة يعني نصير محامي الشركة وممكن مرة على مرة نشد قضية..وهكا نرتاح"
بوزت شفايفي نحكي
انا:"بالله تو هكا تصير مشغول برشة ومعادش نلقى فيك وقت "
ضحك وقرصني من خدي يحكي
ليث:"خلي بش تتوحشني"
ضحكت وبقيت سارحة فكلامو متوقعتش انو بش يصير يخدم مع عمي..اما زادة فرحت خاطرو بش يعاون عمي أصلا هوما كأنو بو وولدو هكا نطمن على ليث مع عمي اكثر..فقت من سرحتي كيف وقف الكرهبة يحكي
ليث:"هيا حبي أهبط ..انا نوصل عند عمي نحكي معاه شوي ونرجع .كان كملت بكري اطلبني"
قربت بستو من خدو نحكي
انا :"باهي ياروحي "
هزيت راسي معاه كيف شدني من يدي يحكي
ليث:"قمرر..رد بالك تحكي مع الكلب هذاكا كان لقيتو...انا حسابي مزال معاه..اما هاني نبهتك انت وقت تشوفو ابعد عليه واطلبني نجيك"
هزيتلو براسي باهي نحكي
انا:"باهي ليث..اما برحمة امك متحكيش معاه.. منحبش تصير مشكلة جديدة "
غزرلي على جنب يحكي
ليث:"اهبط هيا"
بلعت ريقي بالسيف وهبطت..غزرتلو كيف خدم لكرهبة شد الثنية.. بقيت نمشي ونخمم في كلامو حسيت روحي خفت كان يقابل مهدي ويتعارك معاه..نعرف ليث مش بش يعدي لموضوع هكاك..فقت من سرحتي على صوت امنة تحكي
امنة:"صباح الخير قميرة "
تبسمت وقربت منها بستها نحكي
انا:"صباح النور..شحالك؟"
امنة:"لباس ..هيا فيسع خلينا نسجلو قبل استراحة لفطور وبعد نرجعو نتقابلو خاطر وخرنا"
هزيتلها براسي باهي ومشيت منين انا نقرا..كملت التسجيلات الكل وخرجت..بقيت نمشي ونلوج فساكي على تاليفوني لي كان ينوقز..وقفت كيف ضربت فشكون هزيت راسي وين ريتو هو قدامي..تبسم على جنب وضحك يحكي
مهدي :"او شوف شكون هنا..لقطوسة لهاربة قلي راجلك لقاك ولا مزال ؟"
قحرتلو نحكي
انا:"ابعد من قدامي"
شهقت بالقوي اول ماشدني من يدي وجبدني معاه ورا الشجرة لي كانت بجنبنا يحكي
مهدي :"اشبيك مزروبة ؟ولا خايفة يجي لمسيو يلقاك معايا..ريتو كيف وصلك قبيل "
جبدت يدي منو وحليت عينيا فيه نحكي
انا:" انت كيفااه تمد يدك وتكركرني ورااك هكااا شمفكر رووحك..ومادام ريتو وصلني شعندك تحكي معايااا"
ضحك وعدا بعينيه عليا يحكي
مهدي:هههه جيست حبيت نعرف كيفاه رضاك لمرة هاذي ..رجع كتبلك حاجة اخرى باسمك ؟..ظاهر فيك كرامتك تباع وتتشرا بلفلوس..وانا نسأل كيفاه نجم يخليك معاه وهو محكوم عليه بعشرين عام..طلع لمسيو كاتبلك املاك"
حليت عينيا على كلامو وقحرتلو نحكي
انا:" ماريتش ما ارخصص مننك والله..ابعدننيي شمدخلك فحيااتيي"
شهقت كيف رجع شدني وكبس على يدي القاوي لين حسيت بظوافرو تغرسو فلحمي..قرب وجهو من وجهي علخر يحكي
مهدي:مش وحدة **** كيفك تحكي معايا هكاا.. ساعة علاش تغششت؟..مدام كلشي عندك يتحل بلفلوس شرايك نعملو خرجة انا وانت مقابل مبلغ باهي؟"
ضحك وغمزني.. رجع يحكي
مهدي:"شرايك..قلي قداش تحب وانا مستعد ندفع؟"
بعدت وجهي وحاولت نفك روحي منو..ضربتو بيدي لخرى على صدرو نحاول ابعد فيه نحكي
انا:" كللببب..ماككشش رااجل..... "
حليت عينيا على وسعهم مصدومة من الكف لي ضربني بيه..لحظتهاا حسيت بدني رجف ودموع تجمعت ف عينيا من لوجيعة غير مطعم الدم لي حسيت بيه بين شفايفي..جبدني من يدي يخض فيا ويحكي
مهدي:" *** انت كيفاه تحكي معايا هكاااا..تو نوريك رجال شتعمل"
دمعة سخونة هربت من عيني من لوجيعة لي حسيتها من الضربة غير الخوف لي حسيتو منو ف اللحظة هاذي..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
