#ليس_ذنبي ❤️‍🔥

حلقة 35

الحلقة 35

قمر تحكي

اول ما كلمني ليث في التاليفون و قلي الي هوما توقفو حسيت بالدنيا مش سايعتني من الفرحة .. الاحساس الي حسيتو لحظتهااا عندي قدااه علييه .. لأول مرة بعد الي صاارلي نبكي دموع الفرحة نبكي من غير وجيعة في قلبي .. غمضت عينيا و تنفست .. حسيت روحي خذيت نفس و انا مرتاحة .. الخنقة الي كانت ماكنة فيا تلاشت كيف سمعت لخبر .. احساسي يقلي هاذي هي البداية .. بداية حياتي الجديدة .. بداية جروحي الي بش تتلم و تبرا .. بداية ثنيتي الي بقيت نحلم بيها طول الفترة هاذي ..نتمنى انو النهاية تكون في صالحي انا و فرحتي تكمل ..
اول ما كملت كلامي مع ليث مشيت نجري و نقز لخالتي عنقتها بالقوي نحكي " توقفو يا خالتي .. وقفوهم حتى نهار الجلسة الأولى.. ليث تو كلمني "
بعدت عليا و حاوطتلي وجهي بيداها الزوز ضحكتلي تحكي " الحمدالله ياا ربي .. هاذي البداية و النهار الجلسة بش يتعداو للحبس طول تو تشوف قميرة "
تبسمتلها و هزيتلها براسي اي نحكي " انشالله يا خالتي هذا الي يصير.. مانيش مصدقة حاسة روحي بش نطير من الفرحة .. انشالله يتحاسبو يا ربي و نرتااح.. انشالله الكابوس هذا يوفااا على قريببب "
باستني من خدي و بعدت علياا تحكي " بش يتحاسبو و في أقرب وقت و بش ترتاح يا روحي .. خلي ثيقتك في ربي كبيرة .. "
دورت راسي عالباب الي تحل ودخول ليث .. قرب بخطواتو ناحيتنا كان يغزرلي و يتبسم .. رجعتلو التبسيمة خذيت نفس قربتلو شوي نحكي " ليث .. احكيلي شنوة صاار بالضبط و شنوة بش يصير تو اماان قلي ؟ "
عقد حواجبو غزرلي يحكي " بالشوية علياا .. خوذ نفس قمر "
هبطت راسي من الحشمة من غير مانجاوبو هزيت عينيا معاه كيف ضحك يحكي " هيا نقعدو و تو نحكيلك كل شي بالتفصيل .. امشي قدامي "
عضيت على شفايفي نحكي "ب ..باهي "
سبقتوو لصالة قعدت هزيت راسي نغزرلو كيفاه نحا الفازت متاعو و قعد قدامي عدا بيديه على شعرو و غزرلي يحكي "اليوم الصباح عيطولهم الاثنين .. خذاو افدتهم اما الزوز نكروو .. و رغم هذا هوما توقفو لنهار الجلسة "
رغم فرحتي الي كنت حاستها اما مانجمتش نغلب الخوف الي هد عليا وقتها هبطت دمعة من عيني نحكي " و .. و كيف يبقاو ناكرين هكاا .. ينجمو يخرجو بعد الجلسة ؟؟ ليث شنوة بش نعملو تو قلي ؟؟؟"
قرب مني و قعد بجنبي يحكي "ماتبكيش شنوة تفاهمنا احناا ؟؟ احنا تو بش نمشيو للمحامية متاعك الي كانت لاهية بالشكوى اول مرة "
غزرتلو مستغربة " جيدااء ؟؟ علاه مش انت بش تتلهى بالقضية ليث ؟؟"
هزلي براسو لا يحكي "لا قمر مش انا .. مانجمش خاطر ايهم كان الموكل متاعي و زيد هوما يقربولي و انت تعرف .. هذا ينجم يأثر بالسلب على رأيي القاضي "
هبطت راسي في القاعة من غير مانجاوبو و هزيتلو براسي باهي حط يديه فوق يديا يحكي "اغزرلي قمر .. حتى كان مش انا المحامي متاعك هذا ما يبدل شي .. انا بش ناقف معاك و بش نخدم مع جيداء بش نكون وراها و نتبعهاا اما من بعيد .. تفاهمنا ؟"
" بااهي تفاهمنا .. و تو شنوة بش يصير بالضبط ؟"
"تو ماشين لجيداء .. انا طلبتها الصباح و قابلتها في المحكمة و خليتها هي بش تتصرف .. برا حضر روحك فيسع بش نمشولها مع بعضنا "
هزيتلو براسي باهي وطلعت لبيتي نجري حضرت روحي و هبطت نلقاه يستنى فيا لبرا .. اول ماوصلت حذاه حلي باب الكرهبة بش نطلع .. غزرتلو مستغربة نحكي
" خالتي مش جاية معانا ؟؟"
" لااا .. قالت الي هي بش تكمل تنقل دبشكم من الفيرمة لهناا "
" اه .. اي نسيت لحكاية هاذي "
" تحب نخليو غدوة نمشيو ؟ تستنى رفيقة حتى تكمل .. شقولك؟"
" لااا .. خلينا نمشيو ليوم .. نحب لحكاية هاذي توفا فيسع "
طلعنا في الكرهبة و شدينا ثنية لجيداء .. الثنية هاذي انا شديتها قبل و تراجعت فيسع علاها .. اما المرة هاذي مستحيل كان نتراجع .. عندي الف سبب يخليني نشد صحيح الف سبب يخليني نكمل و مانرجعش بالتوالي .. ثنية كاملة عديناها و احنا ساكتين .. اول ماوصلنا تلفتت لليث الي يحكي " وصلنا قمر .. حاضرة ؟"
" حاضرة اكثر من اي مرة "
تبسملي و هبطنا من الكرهبة اول مادخلنا للبيرو عرضتنا جيداء في الباب تحكي " مرحباا قمر .. شنحوالك "
قدمت ناحيتها و مديت يدي سلمت علاها نحكي
" عسلامة مدام جيداء .. الحمدالله عيشك "
" اول ماكلمني سي ليث و حكالي انك بش تعاود تشكي باهم فرحت .. قرارك هذا هو الصحيح .. ورد بالك ترجع تتنازل المرة هاذي "
غزرت لليث و رجعت غزرتلها نحكي " مستحيل كان نتنازل المرة هاذي "
"فرحتني .. هيا ندخلو للبيرو و نحكيو بالقدا "
دخلنا معاها و قعدنا قدامها .. هزيت راسي مع ليث الي غزرلها يحكي " شنوة صاار بعد ماخليتك في المحكمة ؟"
" حكيت مع النائب العام .. بش يخرج قرار بخروج لجنة مختصة بش تحقق في مكان الحادثة مع قمر "
مع كلمتها حسيت قلبي خظ بالقوي فكرة اني بش نرجع غادي خلات بدني يرعش و ريقي ينشف .. بلعت ريقي و قاومت رعشة شفايفي نحكي " لا.. لازم انا نمشي ؟؟"
تلفت لليث كيف غزرلي يحكي " بالطبيعة لازم قمر .. هذا الكل تابع الإجراءات "
ميلت راسي و غزرتلو نترجى فيه بعينيا نحكي " امان  انا مانحبش نرجع غادي .. مانحبهاش لبلاصة هاذيكا ليث اماان تصرف "
" مانجمش نتصرف اما تو نمشي معااك مستحيل نخليك تمشي وحدك .. قمر لازمك تتقوى على روحك شوي .. هذا الكل بش يعاونك انت في القضية "
هزيتلو براسي باهي و تلفت لجيداء نحكي " وقتاه بش نمشي .. ؟؟"
"النهارين هاذم .. انا بش نكلمك تهنى "
عديت بيديا على شعري حاولت نهدي روحي شوي غزرتلها نحكي " و شنوة اخر بش يصير ؟؟"
قامت من بلاصتها و قربتلي قعدت بجنبي تحكي
" و لازمك زادة تتعدا على طبيب الشرعي "
حليت عينيا فيها غزرتلها مستغربة نحكي "شنوة ؟؟"
" هذاكا للازم .. لازمك تقابل طبيبة تشوفك و تعدي علييك .. التقرير الي بش تعطيهولك مهم ياسر "
لحظتها حسيت روحي حشمت من الموقف الي تحطيت فيه هبطت راسي و هبطو دموعي معاه .. حطت يداها فوق يدي تحكي "قمر هذاكا اللازم صدقني .. و بعدها بش تقابل أخصائي نفسي .. بش يحكي معااك و يشوف طبيعة وضعك النفسي .. كل كلمة بش تقولها مهمة ياسر .. التقارير الي بش يحضرو مهمين لسير القضية .. التقارير هاذم و افادتك النائب العام بش يعديهم للقاضي و بناء علاهم هوما هو بش يقرر .. نعرف كل شي صعيب عليك اما تحمل شوي .. احننا بدينا من جديد رد بالك تتراجع .. خمم في نهاية هذا الكل قمر.. مع الدليل الي عندك اكييد القضية بش تكون في صالحك انت  "
مسحت دموعي و غزرتلها نحكي " و.. وقتاه بش يصير هذا ؟"
"اليوم .. انا حاولت نسرع في الامور.. اليوم  بش تقابل الطبيبة .. و غدوة بش تبدا مع الخصائي النفسي .. و اول ما يتم تحديد الموعد مع اللجنة انا نكلمك .. "
بقيت ساكتة مانجمتش نجاوبها .. الي طلبتو مني ماكنتش حاضرتلو .. رجوعي للبلاصة هاذيكا .. و اني نتعدا عند الطبيبة حاجات فوق طاقتي رغم القوة الي نظهرها ديما فما حاجات مانجمش نتحملهم .. تلفتت لليث يحكي " و موعد الجلسة يطول زعمة؟"
"لاا .. انا بش نحاول نخليه قريب .. اول مانكملو كل شي و نكونو حاضرين .. يتم تعين موعد ماتخافش .. و تو قمر لازمك تمشي لطبيبة .. انا حاولت بش الموعد يكون ليوم اماا كان حاسة روحك مش حاضرة خلي نهار اخر ميسالش "
عضيت على شفايفي نحكي " لاا ح.. حاضرة خلي توفا لحكاية هاذي "
" باهي ياسر .. نحبك تكون قوية و ماتنساش انا معاك و بش نربحو القضية هاذي "
تبسمتلها بسيف و قمت من بلاصتي نحكي " نعرف .. عيشك "
سلمت علاها و خرجت نجري سبقت ليث للكرهبة .. حسيت روحي مانجمتش نغزرلو .. خرج وخلط عليا شدينا ثنيتنا لطبيبة .. ثنية كاملة و انا مدورة بوجهي نغزر من الشباك .. حسيت دقات قلبي قوات مع الكرهبة الي وقفت .. هبطو دموعي كيف سمعت ليث يحكي
" وصلنا.. قمر كان ماتنجمش خلي نهار اخر .. حد ما ينجم يغصب عليك حاجة تو "
تلفتلو ودموعي هبطو اكثر نحكي بالشهقة معاه " خايفة ليث .. مانحبش نتحط في الموقف هذااا "
" ماتخافش انا معاااك .. انساه الموقف هذا خمم كان في شنوة بش يصير بعدو .. خمم انك بش تربح القضية و تبعد عالشي هذا الكل .. باهي ؟"
هزيتلو براسي و هبطنا من الكرهبة .. اول ما دخلت عرضتنا الطبيبة سلمت علينا و غزرتلي تحكي " حاضرة قمر ؟؟"
هزيتلها براسي اي من غير حتى كلمة قدمت معاها من غير مانتلفت لليث .. اول مادخلت للبيت وريت الكرسي شدتني غصة في حلقي وخرت بخطواتي حبيت نهرب من هناا اما مانجمتش .. هبطو دموعي على صوتها تحكي " هياا قمر .. اطلع ماتخافش "
كركرت ساقيا بسيف و طلعت في الكرسي .. تاكيت براسي لتالي و حليت ساقيا .. غمضت عينيا و صوت بكايا قوى .. تمنيت كان راني مت و ماعشتش الموقف هذا .. حسيت اللحظه هاذي طوالت و تعدات كانها دهر  .. حليت عينيا اول ماسمعتها تحكي " كملنااا"
لحظتها بدني خاني مانجمتش نقوم قوتي الكل وفاات .. تقويت على روحي و قمت لبست دبشي و هبطت روبتي و خرجت اول ما ريت ليث وقفت في بلاصتي مانجمتش نقربلو شديت بيديا عالحيط و يدي لخرى حطيتها فوق صدري نبكي .. دموعي عمالها تزيد كانت حاجة اقوى مني مانجمتش نوقفها .. قرب مني ليث يجري  شدني من مرفقي يحكي " قمر يزي من البكا .. علاه هكاا عاملة في روحك "
دورت راسي و طلعت عينيا فيه نبكي من غير حتى كلمة .. لحظتها حل يديه ناحيتي و جبدني عندو عنقني و دور يديه على ظهري بقى يمسح عليه و على شعري يحكي
"اششش..  ساي وفااات .. لحظة و تعدات انسا الي عشتو لداخل .. نعرف صعيبة علييك اما كل شي تعدا تو .. امسح دموعك "
غمضت عينيا على كلامو من غير مانقاومو و لا نبعدو نحكي " غاضتني روحي .. تمنيت كان متت يا ليث .. "
بعدني عليه و طلعلي راسي يحكي " معادش تحكي هكااا .. انسى الموت و انسى الدموع .. هذا الكل كابوس و انت بش تفيق منو .. امسح دموعك و هي نمشيو من هناا "
اول ما بعدت عليه حسيت بالدنيا دارت بيا و راسي رزن .. بدني ترهوج و التصويرة صارت ضبابة في عينيا .. شديت فيه غمضت عينيا و بقيت نرد في النفس .. شدني من يديا فيسع قبل مانطيح يحكي " قمر شبيك ؟؟"
" ح.. حاسة روحي دايخة .. مانجمش نتحرك ليث "
اول ماكملت كلامي حسيت كان بيديه الي حملتني و كبست علياا .. رغم الي كنت حاستو قاومت عينيا الي بش تتغمض و هزيت راسي معاه نغزرلو كيف كان يغزرلي يحكي " هاني معاك .. نوصلو للكرهبة اشرب و ارتااح .."
حطيت راسي على كتفو غمضت عينيا مانجمتش لا نجاوبو و لا نبعدو عليا حسيت روحي عاجزة بش نرد الفعل .. اول ماوصلنا حل الباب و قعدني عطاني دبوزة الماء شربني و بلي وجهي شوي يحكي " شنوة تحس في روحك تو ؟"
تكيت راسي لتالي نتنفس و نحكي "لباس.. خير شوي "
"تحب نهزك لطبيب ؟؟"
" لااا .. امان ليث نحب نروح و نرقد .. حاسة روحي تاعبة "
" باهي .. غمض عينيك و حاول ترتاح حتى نوصلو لداار"
عملت كيف ما قلي من غير مانجاوبو .. مافقتش بالثنية و لا وقتاه وصلنا .. رقدت من غير مانحس على روحي .. حسيت كان بيد ليث الي تطبطب عليا و يحكي بالشوي " قمر .. قمر فيق .. هانا وصلنا "
حليت عينيا فيه شوي شوي نغزرلو عديت بلساني على شفايفي و هزيتلو براسي باهي قبل مانهبط شدني يحكي " تنجم تمشي .. متاكدة حاسة روحك لباس ؟"
" لباس و الله اما نحب نرقد كهو "
"باهي .. هيا اهبط ارتااح "
هزيتلو براسي باهي و هبطت نتحرك بسيف اول مادخلنا لدار عرضتنا خالتي تحكي " وينكم لتو ؟؟ " قربت مني و حطت يداها على خدي تحكي " قمر شبيه وجهك اصفر و حالتك هكا ؟؟ ليث شباها ؟؟"
حطيت يدي فوق يداها الي على خدي نحكي " لباس يا روحي .. تعبت شوي من الثنية في الكرهبة كهو "
" باهي برا ارتاح حتى نحضرلك حاجة تأكلها "
"باهي " بعدت علاها و قدمت بخطواتي ناحية الدروج بش نطلع اما وقفت على صوتها كيف قربت مني تحكي " اهوكا دبشك طلعتهولك .. تلقا كل شي في بيتك حاضر "
بستها من خدها نحكي " ربي يخليك ليا خالتي "
طلعت للبيت اول مادخلت ترميت عالفرش و غمضت عينيا بش نرتاح بقيت هكاكا حتى سمعت لباب تحل و ريتها داخلة في يداها الطبق قعدت حذايا تحكي " هيا قوم لازمك تاكل حاجة و احكيلي شقتلك جيداء و بعد ارقد ارتاح "
هزيت روحي و قعدت جنبها نحكي " قتلي الي لازمني نرجع للبلاصة هذيكا مع لجنة بش يحضرو تقرير و بش نقابل أخصائي نفسي زادة بش يشوف حالتي .. قتلي التقارير الي بش يحضرو مع الدليل الي عندنا .. بش يعاونونا "
"حقها قمر ..فكرتني في الدليل .. الشركة وين خبيتها انت ؟؟ كيف فرغت بيتك مالقيتهاش "
تنطرت من الفرش وقفت قدامها غزرتلها نحكي " كيفاه ما لقيتهاش؟؟ كانت في الصندوق الي فوق الطاولة بجنب فرشي "
" لااا الصندوق فارغ .. انا فرغت كل شي .. كيف ما لقيتهاش قلت يمكن انت جبتها معاك اول مانقلنا هنا "
حسيت روحي توترت عديت بيديا على وجهي عليت في صوتي نحكي " خااالتي .. انا كيف جيت هنا ما جبت شي معايا .. انت جبتلي حوايجي .. انا من نهار موت امي ماعفستش الفيرمة .. كيفااااه تضيع ؟؟ انا متاكدة خبيتها في الصندوق.. كيف..."
قصت على كلامي الفكرة الي هدت في راسي .. حسيت الدنيا ظلامت قدامي نسيت الدوخة و التعب و خرجت نجري من البيت .. ماتلفتش لخالتي الي كانت تنادي عليا .. مشيت نجري لبيتو حليت الباب بالقوي من غير ما نستأذن.. دخلت نلقاه راقد اول ما شافني هز روحو و قام من الفرش قربلي يحكي " شفما قمر .. شبيك داخلة هكا ؟؟ لباس ؟؟"
بلعت ريقي و كبست على يديا نحكي " الدليل الي عندي مالقيتوش .. ضااع .. خالتي مالقاتوش كيف نقلت الدبش "
" متاكدة ؟؟ زيد شوف مع دبشك وين عندو يمشي "
" انت الي بش تقلي وين عندو يمشي ؟؟؟"
هز راسو معايا و حل عينيه فيا يحكي "شتقصد ؟؟"علا في صوتو و صاح اكثر يحكي " قتللللك شتقصد حل ** فمك "
" نقصد الي فهمتو .. الشركة كانت في بيتي و انا متاكدة ما هزيتهاش .. انت بش تقلي ويني سي ليث "
شدني من يدي بالقوي و قحرلي بعينيه الي كانو شاعلين  يحكي " انت عارفة روحك فاش تحكي ؟؟ شاكة فياا انا هزيتها ؟؟؟"
عليت في صوتي نحكي " اييي .. شاكة فيييك انت .. كيف ماكذبت عليا تنجم تعمل اكثر من هكاكا.. انت الوحيد الي دخلت للفيرمة غيرنااا "
بعد عليا كبس بيديه على رقبتو و بقى يدور في البيت من غير حتى كلمة قربت منو وقفت قدامو نحكي
" ليث .. قولي كان انت الي هزيتها  .. رد بالك تكذب عليااا و لا تخبي عليااا المرة هاذي .. قلي الي انت غلطت وقتها و عطيتها لدار خالك .. ماتخلينش كالمهبولة هكااا "
قربلي و شدني من زنودي قربني للحيط و قرب وجهو قدام وجهي النفس متاعو كان يضرب فيااا صدرو كان يتهز و يتحط من الغش.. غزرلي في عينيا يلهث ويحكي " خساااارتك .. بعد الي عملتو الكل .. جاية وواقفة قدامي تحكي هكااا " علا في صوتو يحكي
" انااااا صحييييح كذبت اما ما سرقتش  ..مانيش سااقط لهدرجة .. كذبت و غلطت و استعرفت بغلطتي.. اما المرة هاذي انت الغالطة للا قمر انا ماعطيت شي لدار خاالي "
حطيت يديا على صدرو نضرب فيه " و علاه بش نصدقك ؟؟ اه علاه بش نصدق كلام واحد كيفك .. هذا الكل صدفة ؟؟ البارح نعرف انك منهم و اليوم نعرف انو الشركة تسرقت .. و تحبني نصدقك ؟؟ تحبني نعطي فيك الثقة و كل شي داير بيا يخليني نشك فيك..  يخليني نزيد نكرهك و نعيفك .. قاعدة نلعن في الظروف الي حطتك في ثنيتي انت وياهم "
تهزيت و تحطيت على يدو الي ضربها عالحيط برشة مرات يحكي " سسكررر فمك .. سكررر فمك "
هز يدو و ضربني على راسي بصبعو يحكي " خلي اللحظة هاذي في راسك رد بالك تنساها .. رد بالك تنسى كلااامك هذااا .. رد بالك قمر .. و بش نعاود نقولهالك انا مانيش سارق فهممممت ؟؟ و مانيش جبااان كيف نغلط نستعرف و نطلب السماااح و انت تعرف هذااا ملييح .. اما المرة هاذي غير المرة لخرى .. ما تستناش مني حتى مبرر و متستناش نطلب منك السماااح و ماتستناش مني حتى ردة فعلللل"
"صدقني من اللحظة هاذي معادش نستنى منك في حتى شييي .. كل مانستناك تخليني نغرق اكثررر ..و انت الي رد بالك تنسى كل لحظة خليتني نندم فيها اني صدقتتك .. رد بالك تنسى الي خليتني نعيشو نهارتها و اليووم .. نكرهك ليث نكرهههك و خليتني نكره روحي الي كل مرة تاثق فييييك.. و ماتستناش مني نصدقك و نامنلك مرة اخرى .. من اللحظة هاذي انت حتى شي بالنسبة ليااا "
"بااهي وجهي من اللحظة هاذي معادش تراااه .. انت زادة حتى شي بالنسبة ليااا .. بيناتنا القضية و اول ماتوفي كل حد يشوف ثنيتو .. اول ما يوفى كل شي اخرررج من حيااتي  "
" احسسسن ... هذا الي نتمناااه اني معادش نشوفك .. و بش نخرج من حياتك تهنى ماعندكش فكرة قداه نستنى في النهاار هذااا "
بقا يغزرلي من غير حتى كلمة رخف يديه من فوقي عطاني بظهرو و خرج يجري .. خلطت وراه نصييح
" اهرررب و رد بالك ترجع المرة هاذي .. خاطرني مش بش نصدقك مهما تعمل .. رد بالك توريني وجهك مرة اخرى.. نكرههههك "
غمضت عينيا عالباب الي تهد من تسكيرتو .. هبطت و قعدت في الدروج بقاو كان دموعي الهابطين.. حسيت روحي تهديت من الي صاار اليوم و زادت عليا الحكاية هاذي.. في لحظة كل شي تهد مرة اخرى.. في لحظة ندمت اني صدقتو مرة اخرى .. حاسة روحي نتخبط في الف فكرة .. لكلام الي قلتو و الي سمعتو من عندو وجعني و قسملي قلبي طروف ..خايفة لا نكون ظالمتو.. اما كل شي ضدو .. كل شي مخليني نشك فييه .. مفما شي يخليني نصدقوو .. مانجمش نغمض عينيا عالي صااار و صاير تو ..الي عشتو معاه لليوم خلاني بين المد و الجزر .. اما انا تو تاكدت انو ليث انسان عمري مانجم نامنلو بش يبقى انسان غامض في حيااتي و عمري لا نحس بحاجة ناحيتو بخلاف الشك و الحيرة .. بش نحاول نبعد علييه على قد مانقدر .. كذبت على روحي وصدقت  الي هو صار من عايلتي و انجمو نكونو صحااب نهار من نهارات ..اما الي صااار اكدلي انو  ثنيتنا عمرها ما بش تكون وحدة .. و كل شي ضد فكرة انو طريقنا يتلاقى .. الدنيا عمرها ما بش تجمع ليث بقمر مهما يصير ..