حلقة 50
يحيى يحكي
تعداو شهور على هروبي .. مع الوقت قلبي قسى معادش لا نحن و لا نندم بالعكس نحس في روحي ناقم .. بعد الي صار عفتها و عفت روحي .. منها هي انا بعدت على بلادي و دارنا و تحكم عليا نكمل حياتي وحدي في بلاد اخرى .. رجوعي صعيب ماعنديش الجرأة بس نواجه الناس بعملتها .. قمر معادش تعنيلي شي كان انها مجرد وحدة دمرتني ..
اول ما وصلت للمحكمة و تحل الباب مانجمت نغزر لحد كان لعيناها الي وساعت فيا .. صدمتها من وجودي بانت على وجهها .. خوفها ريتو ووصلني من غزرتها .. قدمت بخطواتي ناحيتها و تفاديتها .. كل سوال سمعتو علاها اجابتو كانت مدروسة عندي .. انا حالف بش نخلاها تخلص حق كذبها و حق الي عملتو .. كملت كلامي و قعدت .. بقيت نتبع فاها بعينيا .. ريتها كيفاه قدمت معاه للقاضي و كيفاه شدها و يهدي فاها .. ريتو كيفاه تبسملها و هي عيناها ضوات مع تبسيمتو .. التفاصيل هاذم خليتهم يترسخو في عقلي .. حفظتهم بش يكونو هوما الدافع الي يخليني نقدم للخطوة الي ناوي علاها .. حتى بعد الجلسة .. قربهم لبعضهم بان اكثر .. خوفو و لهفتو علاهاا خلاوني ننقم علييه هو أكثر منها .. خلاني في اخر لحكاية واحد ***** دارلي على خطيبتي و غلط معاها و انا كنت بوهالي بيناتهم .. اول ماخرجت من المحكمة ريتو كيفاه هازها و معنقها و هي كانت مسلمة بين يديه و حاشية راسها في رقبتو .. لحظتها حسيت بدمي فور .. و خذيت عهد على روحي بش ننهاهم الزوز .. و نوجعلهم قلبهم على بعضهم كيف ما وجعولي قلبي و حرقوني..
طلعت في الكرهبة و بعدت علاهم شديت ثنية حومتي لقديمة .. حومتي الي حلفت مستحيل كان نرجعلها و لا نعفسها مرة اخرى.. اما ليوم نلقا روحي قدامها و قدامي كل لحظة عشتها فاها مع قمر .. كنت نخاف علاها من روحي.. استحفظت علاها حتى من غزرت عينيا .. اما هي شعملت مشات ترمات في حضن راجل غريب .. مشات سلمت في شرفها و في بدنها معاااه .. هي من اللحظة هاذي صارت **** بالنسبة ليا ...
شديت فران و راكيت لكرهبة .. هزيت راسي نغزر لدارنا تفكرت كلامهم اخر مرة و كيفاه لزوني بش نبعد .. خذيت نفس و هبطت قدمت بخطواتي ناحية الباب .. حليتو دخلت .. بقيت نغزر لكل تركينة في الدار فقت من سرحتي على صوت امي كيف صاحت و ترمات عليا تحكي " يحيى يا روح امك .. توحشتك "
كبست علاها بيديا و خذيت نفس من ريحتها الي تحرمت منها اشهرة نحكي " انا زادة توحشتكم امي "
بعدت عليا و شدتني من يديا دخلنا لصالة و قعدنا .. قعدت بجنبي و حاوطتلي وجهي بيداها تحكي " علاه ما قتليش الي انت جااي ؟"
تبسمتلها نحكي " حبيت نعملها مفاجأة.. حبيت نفاجأ الناس الكل "
" بش تبقى هنا .. مش راجع تو مش هكااا ؟ خليني نشبع بيك شوي "
شديتها من يداها بستهم نحكي " تهنى مانيش راجع بالكل .. بش نبقى هنا من اليوم "
عقدت بحواجبها تحكي "و خدمتك ؟"
"خدمتي انجم نخدمها هنا في الفرع الي موجود في البلاد "
" علاه رجعت مش قلت تحب تبقى غادي؟"
عديت بلساني على شفايفي و خذيت نفس بالقوي نحكي " عندي خدمة هنا لازم نكملها .. حساب لازم نصفيه"
" حساب شنوة يحيى "
قمت من بلاصتي نحكي "تو تعرف مع الوقت .. خليني نخرج .. عندي ما نعمل تو "
بستها من جبينها و عطيتها بظهري و خرجت .. بقيت ندور في البلاد على ساقيا .. نغزر لكل بلاصة جمعتني بقمر .. صوتها و كلامها .. ضحكتها كلاهم تعداو قدام عينيا .. مانعرفش كيفاه ساقيا وصلتني قدام الدار الي كانت بش تجمعني بها .. غمضت عينيا و حاولت نحلها و ندخللها اما ما نجمتش حاجة اقوى مني منعتني .. انا خليتها اخر مرة مسكر علاها ورا الباب هذا و معادش انجم نحلو مرة اخرى .. قمر صارت ورايا هيا و ذكراها الكل ..
رجعت بخطواتي لتالي خذيت التاليفون طلبت النومرو بقيت نستنى حتى جاوبني نحكي " الو .. انا عملت كيف ما تفاهمنا .. مستحقك في حاجة "
" انت عملت هكا على خاطر روحك .. بش ترجع قيمتك و قدرك كراجل "
رسيت على سنيا من كلامو نحكي " نعرف .. و انا مش على هذا طلبتك .. قتلك نحب منك حاجة "
" ماتقليش فلوس ؟؟"
ضحكت على جنب نحكي " لااا تهنى .. حاجة اهم من لفلوس بالنسبة ليا "
" نسمع فيك "
خذيت نفس نحكي " نحب على عنوانها .. حاشتي بيه "
" باهي .. شوي و يوصلك ميساج "
علقت عليه و بقيت ندور حتى وصلني الميساج .. بقيت نغزرلو و نخمم في خطوتي الجاية .. طلعت في الكرهبة مرة اخرى و شديت ثنية العنوان المكتوب .. اول ما وصلت وقفت بعيد وبقيت نغزر للفيلا الي هي ساكنة فيها .. كبست عالفولون بيديا زوز من الغزول .. هي باعت شرفها على خاطر فيلا كيف هاذي بش تعيش في المستوى هذااا .. باعتني على خاطروو .. غمضت عينيا و كبست علاهم تكيت براسي لتالي نحاول نهدي في روحي اما مانجمتش ناار لاهبة فيا منها .. عاودت حليت عينيا عالصوت الي سمعتو .. ريتو هو .. بقيت نثبت فيه و في كل تفصيلة صغيرة فيه .. ريتو كيفاه يحكي مع الرجال المنشرين قدام الدار و طلع في الكرهبة و طاار.. كرهي ليه ما يقلش على كرهي لاها ..
اللحظة هاذي حسمت فاها قراري .. بش نكونلهم عزرائيل الي بش يخطف روحهم في ثنين .. بش نحاسبهم و نرجع قيمتي و قدري .. بش نرجع شرفي الي لطخوه هوما .. و خطوتي انا نعرف منين نبداها مليييح ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
