حلقة 85
#قمر_تحكي
ايامات عديتهم وانا نحاول ننسى كل شي صار .. تقويت على روحي ورجعت وقفت من جديد .. ركزت على قرايتي وبديت نستوعب ف الدروس ..
بديت اول خطوات ف حلمي .. وهذا الي خلاني نحس بروح جديدة تخلقت فياا ..
الفترة هاذي نجمت نكون صداقات جديدة .. تعرفت على امنة .. بنت خالتي فاطمة .. كانت في البلاد عند عمتها وكيف رجعت القراية جات .. عاملة تخصص في نفس جامعتي .. صرنا ديما مع بعضنا .. هي طفلة ياسر محلاهاا رجعت نضحك و نلعب معاهاا
مع الوقت فهمت لي دنيا عمرهاا لا تاقف على خاطر انسان واحد .. وفهمت معنى كلام خالتي مليح تو .. الوقت كافي بش ينسينا ف كل شي .. هذا الي صار معاياا تو .. نسيت كل شي و حياتي بدات من جديد ...
حليت عينيا على نهار كيف طلع .. هزيت روحي وقمت من فرشي .. تعديت لبيت البانو ريقلت اموري ونزلت لتحت .. تبسمت لخالتي كيف ريتها قاعدة تفطر .. خبر حبالتها حسيتو جاء ف وقتو .. خلاني نفرح انو عيلتي بش تكبر و يصير عندي خوات .. فرد وقت فرحتلها ليها هي زادة .. خالتي تستحق هذاا .. انها تعوض كل حاجة خسرتها وتبدا من جديد ..
قربتلها وبستها من خدها نحكي "شحالك خالتي .. خير شوي تو ؟ "
" لباس بنتي .. متخافش علياا "
قعدت بجنبها نحكي " لا .. هاك صرت ديما تاعبة .. امان خالتي ارتاح وانا نعملك لي تحب .. ميجيش تعب روحك "
تبسمت تحكي " عيش بنتي .. مانيش تاعبة يا روحي .. هذا الشي عادي في الحبالة .. تو كيف تجيب صغير تفهم "
قلبي خظ بالقوي على كلمتها .. الحاجة هاذي كنت نشوف فيهاا ياسر بعيدة عليا .. و تو مستحيل نخمم فيها .. بش نقرا وننجح .. ومعاد نخلي حد يدخل لحياتي ويجرحني .. بش نكمل ف ثنيتي وحدي ..
بقيت ساكتة .. هبطت راسي و بقيت نفطر .. شوي وريت امنة كيف جات .. قربت باستني تحكي " اهلا قمور .. صباح الخير خالتي رفيقة "
" صباح النور أمونة "
" صباح الخير بنتي شحالك "
" لباس عيشك خالتي "
" اقعد تفطر معانا "
" لا عيشك خالتي فطرت في الدار .. اما هاني بش نقعد نعملكم شوي جو "
ضحكت على كلامها و بقيت نغزرلها كيفاه تحكي و عاطية ماعندهاا .. آمنة طفلة ياسر تحكي وتفدلك تحسها ديما في فورمة .. وقبلها طيب .. لقيتها هي بعد خالتي ديما بجنبي ..
ريتها كيف غزرت لخالتي رفيقة تحكي " صحيح خالتي رفيقة .. انا سمعت بابا وايمن يحكو قالو مرت ليث توفات "
حليت عينيا فيها مالصدمة الي حسيتهااا .. ماتوقعتش جملة اني نسمع خبر هكا .. من يوم الي ريتو في المطعم اتقطعت اخبارو عليا .. حسيت روحي مش مصدقة الي سمعتو .. رغم اني منطيقهاش اما سخفت عليها .. رغم كلشي عمري ما تمنيت يصير شي يضرها هي معندها حتى ذنب .. هو لي حب يمشي ويخليني .. هزيت عينيا ف خالتي ..ريتها كيف غزرت لامنة بش تسكتهاا .. ورجعت غزرتلي بقات ساكتة .. وقتها فهمت الي هي كانت تعرف وخبات عليا .. وماحبتش امنة تحكي قدامي ..
بلعت اللقمة وهزت كاس الماء .. شربت منو وغزرتلنا تحكي " اي صحيح "
بقيت نغزر ساكتة مانجمت نحكي شي .. تلفت على صوت امنة تحكي " يااا .. مسكينة والله تسخف ما صارلهاش شهر معرسة .. اما ليث يستاهل والله كيف خلا قمر ومشى عرس بيها اهوكا ربي عاقبو "
هبطت راسي ساكتة .. تهزيت وتحطيت على صوت
خالتي فاطمة كيف عيطت على امنة
" اامنننة .. مش قتلك معادش تدخل في حاجات ماتخصكش قوم تو امشي للكوجينة "
" باهي امي ما قلت شي "
اول ما قامت وخرجت .. غزرت لخالتي نسال فيها بعينيا شنوة الي صار
" متغزرليش هكا بنتي .. مصطفى طلب مني مانخبركش "
" علاش متخبرنيش خالتي .. هي ربي يرحمها .. ليث معاد يعنيلي شي .. مايهمنيش شنوة يصير معاه "
كملت كلامي ورجعت هبطت راسي .. سمعتها تحكي
" امان بنتي متاخذش بخاطرك مني .. انا فرحانة خاطرك بديت حياتك من جديد على هاذاكا محبيتش نفكرك .. ونشغلك بالك بالحكاية هاذي خاصة انها ماتت مقتولة "
هزيت راسي عالكلمة وحطيت يدي على فمي .. حسيت قلبي خظ بالقوي على كلمتها .. عقدت بحواجبي نحكي " كيفاه خالتي .. شكون قتلها ؟"
" منعرفش والله "
هزيتلها براسي باهي و بقيت نخمم ف لحكاية .. فكرة انها تقتلت للحظة خلاتني نرجع نخمم ف ليث و نخاف عليه لا يصير فيه هكاكا .. عديت بيديا الزوز على وجهي حاولت نهرب اي فكرة تهد علياا تخصوو .. هو حتى شي بالنسبة ليااا .. فقت من سرحتي على صوت امنة تحكي " هيا قمر تاخرنا راهو "
قمت معاهاا وخرجنا .. طلعنا ف الكرهبة مع ايمن ..ثنية كاملة و احنا نحكيو كل مرة ف حاجة .. اول ما وصلنا للجامعة .. هبطنا و كل وحدة فينا مشات للكلاس متاعها ..
دخلت وشديت طاولتي كالعادة وحدي نغزر للبنات كيفاش لابسين .. وكيفاش يحكو ..
حسيت بيه كيف جاء وقعد بجنبي يحكي " صباح الخير .. شبيك ديما هكا تغزر وما تحكيش انت "
عوجت شفايفي نحكي " ماكش ترا فيا قاعدة وحدي .. تحبني نحكي مع لكراسي "
ريتو كيف ضحك وتكا بظهرو على الكرسي يحكي " باهي للا .. ما قلنا شي اما ايجا اقعد مع الجماعة .. تعرف عليهم "
هزيت بكتافي نحكي " لا رامي .. مش جوي نحب نقعد وحدي "
" معنتها انا مقلقك تو "
تبسمت وهزيتلو براسي لا ..
" باهي وريني شعملت في ال projet "
مد يدو و هز الاوراق بش يشوفهم .. خطفتهم منو نحكي" بلاهي سي رامي .. وانت شعملت في الدار ؟"
حك على جبينو يحكي " والله لبارح سهرت نسيتو جملة .. هات برك نشوف شبيك هكا وليت .. هاني انا عاونتك قبل "
ضحكت وعطيتو الاوراق نحكي " باهي اما هاذي اخر مرة ولا والله بش نخلي عمي يخبر بوك "
حل عينيه فيا يحكي " باهي اخر مرة "
تبسمتلو و هزيتلو براسي باهي .. بقيت نغزرلو كيفاه كان ينقل عليااا .. رامي ولد صاحب عمي .. هو الي عاوني هنااا و خلاني نتأقلم ف جوو .. هو زادة ياسر طيب و صاحب جو .. معاه نبدا على راحتي ..
سكتنا كيف رينا لبروف دخل .. بقيت مركزة بش نستعوب كل شي .. كملت الحصة متاعي وخرجت .. رامي خرج على بكري قال قلق مرضاش يكمل ..
بقيت نمشي وحدي في الفاك .. عرضتني امنة ووقفنا نحكيو " قمر كملت ؟"
" اي كملت وانت ؟"
" لا مزال ليوم بروقرامي شارجي علخر "
" باهي انا بش نروح نتلاقاو لعشية مالا "
خليتهاا وخرجت .. طلبت ايمن بش يجيني كيف ماوصاني عمي .. اول ماجاء طلعت معاه ورجعت للدار .. شوي وقت ووصلنا .. نزلت وقدمت للدار وقبل ماندخل وقفت على صوت العياط لي جاي من داخل الفيلا .. زربت ف خطواتي بش ندخل ونشوف شفما ..
اول مادخلت لقيت خالتي واقفة وهي معاهااا .. تصدمت من وجودها.. مافهمتش شنوة تعمل هنا و لا شنوة تحب مناا ..
ريتها كيف تلفت وغزرتلي تحكي " اهيكا شرفت للا .. قليي ولدي وينو ؟"
بقيت نغزرلها مش فاهمة شتقصد .. قربت مني وعلات في صوتها تحكي " الله لا يسامحك .. دمرت ولدي قبل و رجعت دمرتو توو "
غزرت لخالتي ورجعت غزرتلهااا .. حسيت روحي ضايعة بيناتهم مش فاهمة اصل لحكاية
" شبيك تغزرلي هكا .. من نهار الي رجعت ليحيى وهو متبدل .. و تو ريحتو مفماش .. هذا الكل من وراااك انت الله لا يوفقك "
قربت مني وشدتني من يدي بالقوي .. حركتها هاذي خلاتني نفيق .. نطرتلها بديها ودزيتها على قوتي للتالي نحكي "رد بالك تحط يدك عليا و تمسني .. تسمع فيا "
ضحكت على جنب " هاو طلع عندك صوت يا بنت حسنة .. ماغلطتش قبل كيف قلت لولدي يبعد على وحدة كيفك "
" سكر فمك .. تسمع فيا " هزيت صبعي في وجها نحكي
" رد بالك .. ردبالك تجبد امي مرة اخرى و لا تتعدا حدودك معايا .. كان مفكرة لي قدامك الطفلة الي من عام ذليتها وخليتها تهرب من حومتهاا راك غالطة .. وتو اخرج .. برا لوج على ولدك بعيد من هنااا "
" مانيشش خارجة .. حتى تنطق وتقلي ولدي وينو " "ولدك مانعرف عليه شي تفهم و لا لا .. انا مرجعتلوش بارادتي فهمتت هو لي هددني ... ودمرلي حياتي مرة اخرى .. برا لوج عليه لبرااا الله اعلم شعامل اخر و ساقك هنا معادش تحطهااا فهمت .. لا انت و لا ولدك تخممو ترجعو تدخلو لحياتي .. و تو اقلب منظرك من هناا "
علات ف صوتها تحكي " واللله مانشكي بيك .. مانرجعك تتمرمد ف المحاكم "
" كان عندك ريح .. مانيش خايفة منكم و تو لبرااا "
اول ما خرجت .. قربت لخالتي وغزرتلها كيف تحكي
" مالا مجننونة هاذي .. جاية تتبلى علينا "
" فكنا منها خالتي .. اصلا ماكانش لازم تدخلها "
" مدخلتهاش وراس بنتي . فاطمة مشات للسوق وانا اول ما فتحت الباب دزتني ودخلت "
دورت بعينيا عليها نحكي " انت مليحة مش هكا .. تكونش عملتلك شي ؟؟؟"
هزت يدها حطتها على خدي تحكي " متخافش بنتي انا لباس "
تلفتنا على صوت عم مصطفى كيف دخل يحكي
" شبيكم وقفين هنا والباب علاش محلول ؟"
ريت خالتي كيف قربت منو تحكي " والله ام يحيى كانت هنا وجات تعارك فيناا "
ضيق حواجبو بحكي " علاش شصار زادة ؟"
" منعرفش ولدها مش مبين .. قال احنا السبب وتعاركت مع قمر "
قرب مني عمي وحط يدو على شعري يحكي " انت لباس بنتي .. عملتلك حاجة؟؟"
" لباس عمي متخافش عليا "
" والله يا مصطفى كان تشوف .. قمر حطتها عند حدها" تبسملي يحكي " باهي بنتي اطلع ارتاح ومتخمم في شي "
هزيتلو براسي باهي وطلعت لبيتي .. بقيت نمشي ونجي نخمم ف كلامهاا .. جيتها حسيتها وترتني .. لا وزيد تدعي عليا .. وين نعرف عليه انا ولدها .. حتى كان صارلو شي الله لا يردو .. على عمايلو لمسخة .. خليني نرتاح منو شوي .. دخلت لبيت البانو حبيت ناخذ دوش نتفرهد بيه ونبرد بيه دمي .. اول ماكملت خرجت بدلت دبشي وهبطت للكوجينة بش ناكل حاجة .. بعد ماكملت .. كنت راجعة لبيتي اما وقفت على كلام عمي في الصالة مع خالتي " مصطفى .. يعني بلحق يحيى مش ظاهر ؟"
"اي .. من شوي عرفت من ليث لي هو عندو "
" شبيه ليث هبل .. كيفاش يخطف الراجل ؟؟"
" خطف شنوة رفيقة .. خلي يربيه يستهل "
" يهديك يا مصطفى وكان تصيرلو حاجة ؟"
" متخافش حكيت معاه .. مش بش يقتلو اما خليه يتربا بش معادش يعاود صنعتو "
كبست على يدي بالقوي كيف سمعت كلامهم .. مفهمتش شمدخلو ف الي صار .. مش قال هذا مايخصوش .. لا ومن تحت راسو .. السخطة امو جات تتبلا عليا وتعملي مشاكل من جديد .. مفهمتش علاش عاطي لروحو لحق يدخل غي حياتي .. اما انا نعرف كيفاش نحطو عند حدو .. و نخليه ينسى كل حاجة تهمني ..
طلعت نجري لبيتي .. بدلت دبشي فيسع ونزلت .. خبرت عمي لي بش نمشي نشري شوي كتب وهو سمحلي..
خرجت لبرا لقيت ايمن واقف قدام الكرهبة .. قريتلو نحكي " ايمن ؟؟"
" نعم "
" تعرف وين نجم نلقى ليث تو ؟"
" بالعادة يكون في بيروه الوقت هذاا "
" باخي تنجم توصلني ليه امان "
" باهي اطلع تو توصلك "
طلعت معاه وشدينا ثنية .. طريق كامل وانا نغزر من الشباك و نحكي بيني و بين روحي ف الكلام الي بش نقولهولو .. المرة هاذي بش نحطلو حد .. نحبو يبعد على ثنيتي جملا .. فقت من سرحتي على صوت الكرهبة كيف وقفت .. هزيت راسي و غزرت للبيرو متاعو .. نزلت وبقيت ندور بعينيا عالبلاصة .. هاذي اول مرة نجي لهناا .. ياسر محلاه و مذخم البيرو .. بقيت نغزر لأسمو الي كان مكتوب ف الواجهة .. خذيت نفس طويل ودخلت .. ريت السكرتيرة كيف غزرتلي
تحكي " تفضل مدام "
" ليث موجود "
" اي سي ليث موجود .. عندك موعد ؟"
" لا .. اما نحب نراه و توو "
" سامحني مدام .. هو بالعادة ما يستقبل حد بلا موعد "
" انا معرفتو "
" باهي دقيقة نسالو "
" خليك انا بش نسالو "
" اما ...."
قصيت عليها كيف مشيت ناحية بيروه و حليت الباب من غير استئذان .. ريتو كيف هز راسو معاياا وبقا يغزرلي مصدوم .. انا زادة بقيت نغزر لحالتو كيفاه كانت .. التعب كان باين عليه .. متوقعتش بس نراه بالحالة هاذي .. باين انو موت مرتو اثر عليه ووصلو للحالة هاذي .. يمكن هو بلحق حبهااا وخسارتها خلتو هكاا ..
قربتلو ووقفت قدامو نحكي " نحب نحكي معاك "
هز حاجبو يحكي " تفضل .. شتحب ؟"
" الي سمعتو صحيح .. انت لي خطفت يحيي ؟؟"
" عم مصطفى ف بالو بيك هناا "
ضربت بيديا على بيروه نحكي " هاذي حاجة ماتخصكش .. انا سألتك سوال انت خطفت يحيى ؟؟"
تبسم على جنب يحكي " اي انااا "
حسيت دمي فور من البرود متاعو .. حسسني كانو خاطف حيوان مش انسان ..
رسيت على سنيا نحكي " باهي تنجم تفهمني انت شمدخلك اصلا في الحكاية هاذي .. عاطي لروحك لحق بش تعاقبو "
" وانت .. بصفتك شنوة جاية تدافع عليه ؟"
" والله امو صباح جات وعملتلي مشكل سي ليث .. منحبش نتورط من جديد من تحت راسك "
ريتو كيف نزل راسو و شد الستيلو يكتب و يحكي
" كان كملت تنجم تمشي "
" لاااا منيش ماشية .. بش تسيبو اليوم فهمتني "
رجع غزرلي يحكي " ماانيش مسيبو .. قبل ما يتعاقب على لي عملو .. باهي هكااا "
" وانا مش بحاجة انك تعاقبوو .. كيف نحبوو يتعاقب نعرف شنعمل وحدي " ضحكت باستهزاء ورجعت نحكي " و قبل ما تحاسبو .. نظن حاسب روحك الاول خاطرك ما تفرق عليه شي "
غزرتلو كيف تكا بظهرو لتالي و ضيق عينيه فيا يحكي
" سي يحيى .. هو لي حرقلي داري على هذاكا هو بش يبقا في ضيافتي .. ارتحت تو .. مانيش خاطفو على خاطرك للا "
بقيت نغزلو مصدومة متوقعتش يحيى يكون وراالحريقة لي صارت في دار ليث .. عديت يدي على شعري نحكي " فما قانون .. كان جا كلامك صحيح تنجم تشكي بيه .. وهوما يعملو لواجب .. مش تحرق قلب امو عليه .. وترجع تورطنا في حكاية جديدة .. ربي لعالم وين ممكن توصل .. مرة وحدة اعمل حساب للناس لي ممكن تتضر من عمايلك ..."
بقا يغزرلي ساكت كاني ماحكيت شي .. ريتو كيف عوج راسو ودور وجهو للشيرة الاخرى يحكي " انا نعرف كيفاش ناخذ حقي وحدي"
تبسمت على جنب نحكي " صحيح ..نسيت لي انت متعود "
رجع تفلتلي فيسع و بقا يغزرلي من غير حتى كلمة .. هزيتو وحطيتو بعينيا نحكي " حتى اني مانستغربش كان مرتك تكون ماتت من تحت تخبيصك المسكينة....ياريت تحاول تبعد على ثنيتنا وتخلينا نعيشو بلا مشاكل"
كملت كلامي وعطيتو بظهري بش نخرج .. اول ما وصلت للباب وقفت على صوتو كيف ناداني
" قمر "
تلفتلو يحكي " ايهم مزال حي .. رد بالك على روحك "
حسيت قلبي خظ بالقاوي و ساقيا رعشوو شوي وكنت بش نطيح .. رجعت قربت وشديت في الكرسي بقيت نرد في النفس مرة و اثنين .. غزرتلو نحكي
" ش .. شقصدك بمزال حي .. م .. مش مات ؟"
قام من كرسيه وقرب مني .. هزلي براسو لا يحكي
" لا ..كانت كذبة بش يخليوه يخرج كهو "
حسيت قوتي خانتني لحظتهاا .. ترميت على الكرسي ساكتة .. فكرة انو لي عمل فيا هذا الكل مازال عايش وحر هدتني ف لحظة .. بعد الي عملو فيااا هو رجع حر و هرب من عقابو .. غمضت عينيا و دمعة سخونة هبطت على خدي .. حسيت بخوف قديم رجع تكمن فيااا من جديد .. سمعت صوتو يحكي " قمر انت مليحة ؟"
قرب مني و كان بش بشدني من يدي .. اما جبدتها في فيسع ..منحبوش يقرب مني و لا يمسني .. رجع جبد يدو .. بقا واقف يغزرلي ساكت .. هزيت يدي ومسحت دمعتي نحكي " من امتى لكلام هذا .. ن ..نقصد امتا عرفت انت "
" من مدة "
" باهي فهمت "
" ما تخافش قمر .. شي ما بش يصيرلك .. انا قتلك بش تاخذ حذرك اكثر كهو "
تبسمت على جنب وغزرتلو نحكي " والله انت اخر واحد يقلي لكلام هذا "
هزيت روحي وقمت بالسيف خرجت .. بقيت نمشي ونفكر في لكلام لي سمعتو .. خبر هروب ايهم وقع عليا كيف الصاعقة .. الخبر لي مكنتش عاملتو حساب و لا متوقعتو .. حسيت روحي رجعت لنقطة الصفر من جديد و لحكاية لقديمة بش ترجع تتفتح
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
