#قمر_تحكي
شديت ف مريول ليث بالقوي اول ماحملني بين يديه وجرى بياا لداخل لكلينيك.. ضميت على شفايفي نكتم ف صرختي لي بش تخرج من عروش قلبي من قوة لوجيعة.. دمعتي نزلت على صوتو يحكي
ليث :" قمر هانا وصلناا ماتخافش ياروحي تحمل شوي كهو "
تكيت براسي على صدرو من غير حتى كلمة كان صدري طالع هابط غير عرّقي لي قاعد يتسرسب علياا.. غمضت عينيا بالقوي على صوتو يحكي
ليث :" مرتي قاعد تولد نزل علاهااا الماء "
الممرضة :" حطهاا مسيو هنااا "
اول مانزلني بش يحطني عالكرسي المتحرك.. شديتو من يديه ننهج ونحكي
انا :" ل..ليث ماتخلينيش امان.. را..راني خايفة امان"
كبس على يدي بالقوي يحكي
ليث :" ماتخافش ياروحي هاني معاك.. ماتخافش قمر "
تكيت بظهري لتالي اول ماحركت الممرضة بياا الكرسي لغرفة لولادة.. حطيت يدي لخرى فوق كرشي لي قاعدة تتقطع بالوجيعة.. غمضت عينيا بالقوي و رجعت حليتهم وقت صحت بالقوي نحكي
انا :" ااااه معاااادش أنجم... "
ليث :" تحمل قمر تحمل..مرتي قوية ماتخافش خمم كان ف اميرتناا الجاية"
نزلت بيديا على كرشي وين دموعي نزلو بالوقت من التعب غير الخوف لي بدأ يسيطر عليااا كل مانقرب اكثر لغرفة لولادة.. قلبي ضرب بقوة اول مادخلت للغرفة وعديت بعينيا عليهاا وين كبست اكثر على يد ليث بش نطمن بوجودو معايا.. تلفتت على صوت الممرضة تحكي
الممرضة :" مسيو استناهاا لبرا.... "
هزيتلهاا براسي لا وطرشقت بالبكاء نحكي
انا :" لا لا ليث امان خليك امان... "
ليث :" مانجمش نخلاهاا وحدها وهي خايفة هكاا "
الممرضة :" باهي تفضل معايا خليناا نحضروك انت زادة مدام حضرنا المدام "
هزلهاا براسو باهي وطبس قدامي.. مسحلي دموعي يحكي
ليث :" هاني معاك ماتخافش.. بش نكون بجنبك "
هزيتلو براسي باهي من غير حتى كلمة حسيت روحي تعبت ومعادش أنجم نحكي قاعدة كان نتنفس وراء بعضو.. اول مامشى ليث مع الممرضة.. دخلتني الممرضة الثانية للغرفة وحضروني..دقات قلبي ضربت ف صدري اول ماحطوني فوق الكرسي وحلولي ساقيااا.. هزيت راسي وغزرت لليث ك خلط عليااا نحكي
انا :" ليث ماتسيبنيش "
وقف بجنبي وشدني من يدي يحكي
ليث :" هاني معاك "
تلفتت على صوت الطبيبة تحكي
الطبيبة :" مدام ماتخافش اعمل كيما بش نقلك كهو "
كبست على يد ليث وين دمعتي نزلت.. سمعت صوت الطبيبة تحكي
الطبيبة :" خوذ نفس وادفع بالقوي "
خذيت نفس طويل ووخرت راسي لتالي.. نزلت على يد ليث ودفعت على قوة جهدي.. عضيت على شفتي اللوطانية وبقيت ندفع ونرتاح شوي كيما تقلي الطبيبة.. غمضت عينيا بالقوي وقت حسيت بروحي تعبت ومعادش أنجم غير انفاسي لي تقطعت.. سمعت الطبيبة ك رجعت تحكي
الطبيبة :" مسيو ماتخليهاش تغمض عيناهااا.. مدام شد روحك شوي.. وحاول تدفع مابقاش برشة هاني قاعدة نشوف ف البنوتة "
حليت عينيا على يد ليث لي مسحت على جبيني يحكي
ليث :" قمر حلّ عينيك ياروحي حاول تتحمل شوي "
هزيتلو براسي باهي وعديت بلساني على شفايفي لي شاحو.. خذيت نفس طويل ودفعت على قوة ماعطاني ربي..غمضت عينيا وصحت على قوة صوتي ف الدفعة الثانية.. قلبي ضرب بقوة وقت سمعت صوت بكاهاا.. لحظتهاا حليت عينيا ودوب هزيت راسي شوي وين لمحتهاا بين يدين الطبيبة.. دموعي نزلو وراء بعضهم مش مصدقة اني سايي ولدت وبنتي قدامي.. تبسمت بين دموعي نحكي
انا :" الحمدالله ياربي "
غمضت عينيا بالقوي و رجعت حليتهم على شفايف ليث لي تحطو فوق جبيني يحكي
ليث:" الحمدالله على سلامتك قمرتي "
تبسمت وتلفتت على صوت الطبيبة ك قربتلناا تحكي
الطبيبة :" الحمدالله على سلامتك مدام.. مشالله بنوتة مزيانة كيفك "
قلبي ضرب بقوة وقت ريتها بين يدين الطبيبة قريبة مني..تقويت على روحي ومديت يدي خذيتهاا من يدين الطبيبة وقت حطتهاا فوق صدري وين حسيت بفرحة نساتني ف تعب الدنياا لكل.. للحظة حسيت روحي مش مصدقة انو بنتي بين يديا..مشاعر تخلطو علياا ف اللحظة هاذي ماعرفتش نبكي ولا نضحك.. دقة جديدة تخلقت داخلي اول ماحطيت يدي علاهاا وبستها بوسة خفيفة من جبينهاا..عديت بعينيا عليها نشوف فيها قداه صغرونة ومحلاهاا.. غزرت لليث ك طبس باسهاا من جبينهاا يحكي
ليث :" اميرتي.. نوّرت حياة بوك ياروحي "
عديت بعينيا عليه وين دموعي نزلو بالوقت نحكي
انا :" ليث بنتناا جات..شوف محلاها "
دوب شدها من يداها وباسني من راسي يحكي
ليث :" هي محلاها خاطرها منك.. الحمدالله على سلامتكم الزوز قمرتي "
تبسمت ورجعت غزرتلهاا.. بستها بوسة خفيفة من يداها نحكي
انا :" ليث أسأل الطبيبة امان هي مليحة"
تلفتت على صوت الطبيبة تحكي
الطبيبة :" مليحة ماتخافش.. تو بش نزيدو نعملولهاا الفحوصات لكل وتخلط عليك "
قلبي ضرب بقوة اول ماقربت وهزتهاا من عندي وين حسيت روحي فقدتهاا فيسع وقطعة من قلبي بعدت عليااا.. بقيت نتبع فيهاا بعينيا مش مركزة مع الممرضة لي بقات تنظفلي اصلا ف اللحظة هاذي نسيت لوجيعة والتعب والدموع.. تفكيري لكل كان ف بنتي انها ترجع فوق صدري بش تحس بدافيااا.. اول ماكملتلي الممرضة هزتني لبيت أخرى.. بقيت نتبع فيها بعينيا وهي تركبلي ف السيرو..نحكي
انا :" ياخي بنتي وقتاه تجي ؟"
تبسمت تحكي
الممرضة:" دقيقة والصغرونة تكون عندك.. الحمدالله على سلامتك "
تبسمت نحكي
انا :" عيشك "
اول ماخرجت تلفتت ليث ك قعد بجنبي.. دور بيديه علياا وباسني من راسي يحكي
ليث :" كيفاه تحس ف روحك تو ؟"
تبسمت مع دمعتي لي طاحت نحكي
انا :" فرحانة ليث.. فرحانة برشة مانيش مصدقة اني ولدت وبنتي جات "
عدا بعينيه عليا وتبسم يحكي
ليث :" حتى انا فرحان قمرتي.. فرحتي مانعطيهاا لحد تو "
تكيت براسي على كتفو نحكي
انا :" حاسة روحي نعست.. وهوما لتو لا رجعولي بنتي.. ليث برا تفقدهاا امان وخلي عينيك علاها... "
قص علياا يحكي
ليث :" باهي هاني بش نمشي نشوفها ماتعبش روحك"
انا :" ليث راناا نسينا دبشهاا ف الدار.. ياخي شنوة بش يلبسوهاا.. نخاف تبرد "
ضحك وعدا بصوابعو على خدي يحكي
ليث :" مانسيناهمش.. جبت الساك الصغيرة اما أنت من لوجيعة مافقتش بياا "
عديت بعينيا عليه نحكي
انا :" باهي برا شوفها امان "
اول ماقام من حذاياا..غزرناا للباب لي تحل وين شفت الممرضة ك دخلت و بين يداها بنتي.. نزلت بيديا عالملحفة تقويت على روحي وقمت نغزرلهاا بلهفة.. قربتلي شوي تحكي
الممرضة :" الصغرونة جات "
مديت يدي خذيتهاا من عندها.. دوب ضميتها لصدري وطبست راسي نغزرلهاا كيفاه مغمضة عيناهاا.. عديت بعينيا عليها نحفظ ف ملامحها الصغرونة لي ترسمو ف قلبي.. قلبي ضرب بقوة وقت حطيت صبعي بين يداهاا الصغرونة وين هي كبست علياا شوي.. ضحكت وطبست بستهاا من راسهاا نحكي
انا :" عسلامة ياروح ماما.. عسلامة ياروحي "
شديت دمعتي بالسيف وهزيت راسي مع الممرضة نحكي
انا :" أنجم نرضعهاا ؟"
هزتلي براسها اي تحكي
الممرضة :" اي اكيد "
تلفتت على صوت ليث يحكي
ليث :" هي مليحة؟ "
تبسمت تحكي
الممرضة :" اي مليحة ماتخافوش.. وزنها طبيعي وكل شي لباس "
طبست راسي غزرتلهاا وتبسمت نحكي
انا :" الحمدالله ياربي "
الممرضة :" الطبيبة شوي وترجع تتفقدكم..الحمدالله على سلامتكم.. وتتربى ف عزكم "
انا :" عيشك "
اول ماخرجت غزرت لليث ك قعد بجنبنا..دور بيديه علياا وعدا بيديه لخرى على خدها الصغرون وين حلت عيناهاا شوي..ضحكت نحكي
انا :" صحة النوم ياروحي..."
غزرت لليث نحكي
انا :" شوف فاقت اول ماانت جيت.. حست بيك "
ضحك وطبس باسهاا من يداها يحكي
ليث :" بنت بوهاا بالطبيعة بش تحس بياا "
رجع باسهاا من يداها يحكي
ليث :" اميرتي انت.. نوّرت دنيتي ياروحي "
تكيت براسي على كتفو نحكي
انا :" ليث احنا لتو لا قررنا اسم.. بقيناا نختارو وماخترناش "
عدا بعينيه عليا ورجع غزرلهاا.. عدا بصوابعو على خدها يحكي
ليث :" شرايك ف اسم " ميار "... "
عضيت على شفايفي وغزرتلهاا.. تبسمت نحكي
انا :" محلاه عحبني برشة.. اما علاش اخترت هذا ؟"
غزرلي وقرب باسني من جنب شفايفي.. عدا بعينيه علياا يحكي
ليث :" ميَّار معناه ضو القمر.. انت دخلت حياتي وخليتها تنوّر بعد الظلام..وبنتناا تو بش تكون ضو لحياتنا "
شديت دموعي بالسيف وضحكت نحكي
انا :" ربي يخليك ليناا ليث "
كبس علياا وشد يداهاا يحكي
ليث :" ويخليكم انتوماا ليااا "
قلبي ضرب بقوة وقت ريتها بكات فجأة.. تلفتت على صوت ليث وين شفتو وقف من حذاياا يحكي
ليث :" شبيها تبكي ؟ نمشي نشوف الطبيبة... "
قصيت عليه ك ضحكت نحكي
انا :" لا لا اكيد جاعت.. هاني بش نرضعهاا تو "
عديت بعينيا عليه نغزرلو ك هزلي براسو باهي من غير حتى كلمة كان عينيه قاعدة تتعدا عليناا وخاصة على ميّار وين عرفتو خايف علاهاا.. تبسمت وطبست راسي.. نزلت شوي ف الروبة متاعي نحكي
انا :" سمالله على صغرونتي جاعت هي "
احساس غريب هيمن عليااا اول ماقريت صدري ليهاا وبدأت ترضع.. تبسمت مع دمعتي لي نزلت من قوة الاحساس لي حسيتو..بقيت نغزرلهاا مانجمتش نبعد عينيا من علاها.. قد ماتخيلت انو احساس الامومة محلاها مافيبالش هكاا..احساس خلق دقة جديدة داخلي.. خلاني نذوق ونتطعم فرحة جديدة عمري لا حسيتهاا..للحظة هاذي مانيش مصدقة اني صرت ام وبنتي بين يديا.. قمرتي لي بش تضويلي حياتي وتعوضني على سنين التعب..ف للحظة هاذي لقيت روحي نسيت انا شعانيت ف حياتي وقداش تعدا عليا.. وجودها بين يديا تو نساني شنوة خسرت قبل.. حسيت روحي كاني نولدت من جديد مع بنتي لي هي احلى هدية بعثهالي ربي يكفي انهاا من صلب ليث...
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
