حلقة 88
#ليث_يحكي
ايامات تعداو من اخر مرة قابلت فيها عمي و رفيقة .. كلام رفيقة اخر مرة حسيتو زاد ضيعني .. مشى ف بالي بش نتحصل على اجابة منها و على طريقها نلقى اختي .. يخي لقيت روحي قدام حكاية اخرى .. لا عارف منين و لا وين نبدا .. تفكيري الكل صار ف الموضوع هذاا .. مش عارف كان هي بعيدة و لا قريبة .. مليحة و لا تاعبة .. على قد ما فرحت انو فرد من عيلتي حي .. على قد ما خفت .. خايف لا نكون نجري وراء سراب و ف الاخير مش بش نلقى شي ..
كملت الخدمة الي كانت تحت يدي وخرجت .. طلعت في كرهبتي و شديت الثنية للفاك .. حكاية اختي ماخلاتنيش ننسى حكايتها هي .. شوي وقت ووصلت .. كان لازمني نتاكد من حكاية السخطة لي طلعلي .. خاطر لحكاية مدخلتش لمخي جملة .. خايف لا تكون لعبة اخرى مسقصدينها بيها .. مهما كان وضعنا وكانت بعيدة عليا .. بش تبقى حمايتها مسؤوليتي ..
راكيت الكرهبة ونزلت .. دخلت للفاك و قدمت ناحية ييرو المدير .. دقيت الباب ودخلت .. قدمتلو ومديا يدي صافحتو نحكي
انا :" بونجور سي خالد "
خالد :" بونجور سي ليث .. تفضل اقعد "
اشرلي بيديه عالكرسي .. قعدت مقابلو و غزرتلو كيف يحكي
خالد :" كيفاه انجم نعاونك ؟"
انا :" بصراحة انا ليوم هنا نحب نحكي معاك بخصوص الطالبة قمر بن منصور "
خالد :" اي تفضل "
انا :" عرفت انك طلبت منهااط بش تساعد شكون .. حبيت نعرف علاش هي بالذات "
خالد :" صحيح انا طلبت منها هكا .. مدموازال قمر طفلة متفوقة و حبيتها تعمل الخير فيه "
هزيت بحاجبي نحكي
انا :" متفوقة ؟؟ كيفاه عرفت هذاا و هوما مازالو حتى مبداوش امتحانات .. المهم .. نحب نشوف ملف الطالب هذا"
بقيت نغزرلو كيف تربث و دخل بعضو .. هبط راسو و بقى يشوف ف الاوراق الي عالبيرو .. ضيقت عينيا فيه نحكي
انا :" سي خالد ؟ فما مشكلة ؟"
غزرلي و هزلي براسو لا يحكي
خالد :" لا مفما حتى مشكلة .. اما بصراحة الطالب مش مسجل عندنا .. هو مازال لبرا و على قريب بش يكون معاناا وقتها بش يسجل "
بقيت نسمع فيه و مش مستوعب كلاموو .. عليت ف صوتي نحكي
انا :" شنوة المهزلة هاذي ؟ تطلب من طالبة عندكم انها تساعد واحد مش مسجل عندكم و ماتعرفو عليه حتى شي .. مخليها تحكي معاه و انت ما عندك عليه حتى معلومة "
حسيت روحي كرزت كيف شفتو دخل بعضو من جديد .. عدا بيديه على وجهو و غزرلي يحكي
خالد :" اهدى سي ليث .. لحكاية و ما فيها انو خوه جاء و طلب مني نعاونوه .. خاطرو مريض و لازم يدخل ف جو مع صحابو و يفهم الدروس قبل ما يجي .. انا ريتها خدمة انسانية مش اكثر "
قمت من بلاصتي ووقفت قدامو .. رسيت على سنيا نحكي
انا :" باهي مدامها خدمة انسانية .. انشالله كلامك يطلع صحيح .. "
كملت كلامي و عطيتو بظهري .. خرجت من بيروه و انا حاسس الدم طالعلي .. بعد كلامو حاسس انو شكي بش يطلع ف محلو و انو الطالب هذاا و راه حكاية .. و انا بش نعرفها شنوة .. ماحبيتش نفهم المدير اني شكيت .. بينت اني صدقت كلامو مانحبش يخبرهم وياخذو حذرهم .. نحب نعرف شكون لي وراها اما بطريقتي .. هزيت تلفوني وبعثت ميساج لمازن ..
اول ما خرجت منزالفاك .. ريتها كيف كانت واقفة تضحك مع صحاباتها .. بقيت واقف نغزرلها مانجمتش نبعد عينيا من علاهاا .. حسيت روحي ضعت في ضحكتها قداش توحشتها وتوحشت الايامات لي قضيتهم معاها .. الدم جمد في عروقي كيف ريت شكون قرب منها جبدها على جنب ويحكي معاها .. استغربت كيف شفت وجها حمار وربثتها وقتها فهمت الي فما شي .. بقيت واقف نغزرلها عديت يدي على وجهي وهديت روحي .. بعد ما ذكرت كلامها متاع اخر مرة .. مجبيتش نعمل مشكلة اخرى .. انا نعرف امتا بش نحاسبها على هاذا الكل .. قدمت بخطواتي بش نمشي لكرهبتي .. سمعت صحبتها كيف نادتلها تحكي
" قمر.. شوف خوك هوني "
ريتها كيف تلفتت في سع وحلت عيناها من الصدمة .. قدمت مني صحبتها ومدت يدها تحكي
" مرحبا .. اخر مرة منجمناش نحكو انا اميرة .. انا وقمر صحبات "
خليت يدها معلقة في السما وعطيتها بظهري ومشيت
.. رجعت سمعتها تحكي
" شبيه خوك .. ياسر مضروب في روحو "
تبسمت على جنب و بقيت نمشي .. اول ما وصلت قدام كرهبتي تلفت على صوتها
قمر :" ليث "
دورت راسي نغزرلها كيف كانت تنهج من وراء مشيتها المزروبة .. سرحت فيها وفي شعرها لي كان يتطاير مع النسمة .. خدودها لموردين .. و شفافها الحمر .. تبسمت كيف ريت تراس العضة الي مازالت عليهم .. نزلت بعينيا نغزر لروبة الباج لي كانت لابستها والفاست البيضة لي فوقها .. منعرفش علاش حسيتها حلات اكثر .. كل مرة نراها نحسها متغيرة .. كل مرة نضيع فيها اكثر .ط.. فقت من سرحتي كيف وقفت قدامي تحكي
قمر :" شبيك تغزرلي هكا .. علاش جيت "
هزيتها وحطيتهاوقربت فتحت باب للكرهبة بش نطلع ..
تلفت كيف جبددتني من يدي تحكي
قمر :" قاعدة نحكي معاك "
هزيت بحاجبي وغزرتلها نحكي
انا :" نعم شتحب ؟"
قمر :" علاش جيت لهوني .. مش قتلك ابعدني .. ياخي شبيك لاحقني انت "
انا :" والله الجامعة هاذي مفيهاش كان انت "
غمزتها وبقيت نغزرلها كيف قحرتلي تحكي
انا :" مالا علاش جيت .. اصلا علاش كذبت عليهم وقتلهم لي انت خويا ؟"
تبسمت وقربت منها جبدتها من يدها وتكيتها على الكرهبة .. طبست ناحيتها و دورت بعينيا على وجها..
قمر :" ا.. ابعد شتعمل ..هبلت تو يشوفوني معاك "
هزيت يدي و حطيتها على خدها عديت بصبعي على شفتها لتحتانية نحكي
انا :" خلي يشوفونا بش يفهمو لي مانيش خوك .. خاطر انا "
قربت اكثر منها وحطيت خشمي على خشمها نحكي
انا :" ما قلتهم شي... فهمت"
شفتها كيف رمشت عيناها برشة مرات و بلعت ريقها بالسيف .. هزت يديها وحطتهم على صدري بش تبعدني .. شديتها منهم وهزيت عينيا غزرتلها ..
قمر :" ليث ابعد.. الناس تغزرلنا "
ددورت راسي غزرت للناس لي رايحة جاية ورجعت غزرتلها تبسمت على جنب نحكي
ليث :" شعندي فيهم انا .. كل واحد لاهي مع روحو "
رست على سنيها تحكي
قمر :" لييييث "
تبسمت وهزيت يدي عديتها على شعرها .. خذيت خصلة منو وقربتها من خشمي .. حسيت روحي تروهجت من ريحتها و من قربها الي يخليني نضعف وننسى كل شي صار و صاير بيناتناا
انا :" تعرف لي توحشتك .. توحشت كل شي فيك "
قمر :" ليث يزي"
انا :" باهي قلي ساعة .. لي كنت واقفة معاه شكونو وشيحب منك تو نسيبك "
قمر :" ياخي انت كل مرة نقابلك فيها بش تقعد تحاسب فيا "
انا :" لازمك تتعود .. مدامك تابعتني "
قمر :" مانيش تابعتك .. ياخي انت مهبول ولا تتهوبل "
انا :" ايه هبلت بيك يا روحي تو تقلي ولا نبوسك هوني "
قمر :" ش .. شنوة ؟"
انا :" الي سمعتو يا روحي "
قمر :" ياخي انت شبيك .. صحاباتي يغزرولنا يزي عاد "
قربت وجهي منها اكثر و غزرت لشفايفها نحكي
انا :" متكثرش الهدرة .. اختار تحكي ولا نبوسك هنا .. منين تعرفو .. وشكان قاعد يقلك .. قالك الي انت عجبتو مش هكا .. ويحبك تصوحبو .. وانت كيف عادتك تصدق الي يجي "
ريتها كيف قحرتلي وتبسمت على جنب تحكي
قمر :" ايه يقرا معايا من بكري .. و شافني في الحفلة وعجبتو برشا وقالي يحب ياخو فرصة معايا .. و اي صدقتو علاش منصدقوش.. شناقصني انا "
خذيت نفس حاولت بيه نظبط اعصابي خاطر نعرف لي هي قاعدة تستفز فيا .. هزيت بحاجبي نحكي
انا :" انت ناقصة قمر ناقصة برشا .. خاطرك .. "
قصت عليا كيف ضحكت تحكي
قمر :" ههه .. خاطرني مغتصبة مش هكا ؟"
هزيت يدي على كلمتهاا وحطيتها على فمها .. هزيتلها براسي لا نحكي
انا :" هذا لي قاعد نقول فيه .. انت ناقصة .. ناقصة ذكاء .. ناقصة حداقة .. متفكرش بمخك... مشاعرك لي تتحكم فيك.. واحد راك في حفلة .. وجاك من ثاني يوم يقلك لي انت عجبتو .. يقرا معاك الوقت هاذا لكل .. مقالكش لكلمة هاذي .. معنتها هاذا واحد عجبو بدنك كهو .. ويحب يتسلى .. الامور واضحة برشا قمرتي .. انت لي متحبش تخدم مخك .. كيف الطالب لي قاعدة تعطيه في الدروس .. وانت ما تعرف عليه شي .. الطالب مش مسجل في جامعتكم اصلا .. ابعد عليه فيسع "
نحيت يدي من على فمها ورجعت نحكي
انا :" يزي متعامل الناس كيف تربيت خاطر مش الناس لكل صادقة كيفك "
ريت دموعها كيف كانو محصورين في عينيها .. تبسمتلي تحكي
قمر :" متخافش .. اصلا انت اكثر واحد خلاني نفقد ثقتي في الناس .. وبالنسبة لزكريا .. انا نعرفو بالباهي ومنيش محتاجة نصيحتك..على الاقل انا نعرف لي قاعدة نعاون في واحد مريض ومش بش ينجم ياذيني"
نفخت بالقاوي .. وعطيتها بظهري نحكي
انا :" مفماش فايدة معاك ..انا نحكي لمصلحتك... وانت رافضة تفهمني خاطر مشكلتك معايا"
قمر :" حد ما قالك اهتم بيا وبمصلحتي .. ابعدني ومعادش تلوج ورايا .. هاذيكا مصلحتي .. خاطر انت بالذات اكثر حد اذاني كان فما حد لازمني نبعد عليه هو انت "
كبست عالبونية متاعي من وراء حديثهاا .. حسيت روحي بش نطرشق في اي لحظة .. خديت نفس وجدبتها من يدها نحكي
انا :" باهي للا .. هاني ماشي ... ومتنساس لي قتلك عليه خدم مخك شوي .. وريت لبنات هاذوكم تبعد عليهم جملة "
قحرتلي وهزتني وحطتني تحكي
قمر :" والله لا تحشمها مزال عندك عين وتملي عليا في اوامرك "
انا :" حط في بالك لي كيف نعرسو الشلة هاذي بش تبعد عليهم جملة .. منحبش نراهم ... كان لزم نبدلك الجامعة "
حلت عيناها فيا وعلات في صوتها
قمر :" سيبننني ... ياااخي عرس شنوة شقاعد تخرف انت "
تبسمت على جنب و طبست علاهاا نحكي
انا :" شبي حبي متغشة .. علاش تحب تكبرها .. صحاباتك هاذو ما معجبونيش ... مدامني راجلك بش تسمع كلامي "
جبدت يداها مني وقحرتلي تحكي
قمر :" زاايدد متحشمش على روحك .. كان تكون اخر راجل منيش بش نعرس بيك "
هزيت يدي حطيتها على خدها وغزرتلها في عينيها نحكي
انا :" وراسك ما تكون كان مرتي .. وعلى قريب زادة .. وقتها ما نحاسبك على عمايلك لكل يا قمر .. من **** تاع رامي لل**** متاع ليوم ..وما نكسرلك الراس هاذا وقول ليث ما يعملهاش "
طبست بستها من خدها نحكي
انا :" هيا رد بالك على روحك حبي "
خليتها واقفة باهتة فيا و طلعت ف الكرهبة .. غزرتلها من لبلار لقيتها مازالت واقفة تغزرلي ..رميتلها بوسة ف الهواء .. وقتها فاقت و عطاتني بظهرها .. عديت بيدي على شعري نضحك .. خدمة الكرهبة و شديت الثنية لمازن .. ثنية كاملة و انا نخمم فيهاا حسيت قربي ليها و حديثي معاهاا ريحني رغم جونا الي كان مكهرب اما اي حاجة منهاا نحسها تفرهدني ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
