حلقة حادية عشر
#قمر تحكي
سكرت باب الفيلا و خرجت نجري .. نسمة قوية ضربتني بردتلي النار الي شعلت فيا اول ما ريتو .. غمضت عينيا بالقوي نهدي في روحي عديت بيديا على رقبتي حاولت ناخذ نفس اما شي حسيت روحي مازلت مخنوقة .. بمجرد اني شفتو و قربت منو حسيت روحي رجعت لليلة هذيكا .. عاودت عشتها بكل تفاصيلها .. كلام امو بقى يتعاود في وذنيا .. قداه غاضتني روحي و سخفت عليها .. رخصوني لدرجة اني تمنيت الموت .. طرف القوة الي لميها و مشيت بيها بش ناقف قدامهم طاحت من اول مواجهة صارت .. كان مش خالتي رفيقة يمكن راني ضعت بيناتهم اكثر ما انا ضايعة .. بقيت نمشي ساكة مش حاسة بشي حتى خالتي رفيقة الي شدتني من مرفقي و تمشي معايا مش حاسة بيها.. حاسة روحي فدنيا أخرى وحدي دنيا قاعدة نتخبط فيها .. بقيت نمشي و مانيش عارفة ثنيتي فقت من سرحتي على خالتي الي وقفتني و غزرتلي تحكي " وين ماشية ؟"
بلعت ريقي حاولت نتكلم اما الكلام الكل ضاع بين شفايفي تقويت على روحي نتكلم " ن نحب نمشي لداري .. دااري انا و يحيى"
قصت عليا تحكي " خلي مرة أخرى عيش بنتي .. علاه تحب تكمل على روحك "
شديتها من يديها و غزرتلها نترجى فيها بعينيا نتكلم " امان خالتي امان هزني غادي "
تبسمتلي و هزتلي براسها باهي
بقينا نمشيو .. و انا سارحة مخي بقى يهز فيا و يجيب كل مرة نتفكر حاجة .. لقيت روحي معادش عندي حتى ذكرى باهية نكبش فيها وتخليني نحب الدنيا .. كل شي باهي تفسخ من اليلة هاذيكا .. هزيت راسي نغزر لحومتي .. حومتي الي خرجت منها فرحانة انقز خاطرني بش نقابل حبيبي .. رجعتلها ليوم وانا مكسورة الجناح و انا ذليلة راسي في القاعة مانجمتش نغزر للعباد الي كلاوني بعينيهم .. دمعتي هبطت على صوت همساتهم عليا .. كلامهم الي خلاني نتمنى كان الأرض تتشق و تبلعني .. مكانتش عندي الجراة الكافية بش نواجههم و نقلهم راو خاطيني .. شي اقوي مني.. ارحموني و حاسبو الي عمل فيا هكا مش تحاسبوني انا.. شدتلي خالتي يدي و كبست عليا هزيت عينيا فيها و دمعة هبطت مني .. دمعة وحدة مقهورة ملي صاير فيها .. وحدة حد مارحمها .. هوما مايعرفوش انا شنية عشت و مازلت عايشة .. مايعرفوش انا فاش نحس اني انا قاعدة نموت بالشوية بالشوية .. حد ما حاول يجي و يخفف عليا كلهم حكمو عليا قبل ما يسمعوني .. اول ما وصلت قدام الدار وقفت بقيت نغزرلها حسيت بغصة وحلت في حلقي تفكرت يحيى و وعدو ليا .. وعدو انو بش يبقى شادلي يدي مهما يصير .. خلف وعدو في لحظة ومشى من غير مايتلفتلي حتى بشطر عين .. حليت الباب ودخلت .. على دخلتي حسيت روحي تخنقت ودموعي هبطو اكثر، بدني رعش على نرا فيه .. كل شي كان مكسر .. كل حاجة انا اخترتها و حبيتها مكسرة .. مكسرة كيفي انا تو .. احلامي الكل تهدت .. في اللحظة هاذي عرفت انو انا انسانة ماعادش عندها الحق بش تحلم .. بقيت ندور في الدار وندور في عينيا على كل تركينة فيها .. كل تركينة تخيلت روحي فيها مع يحيى .. تخيلت عيشتي معاه كيفاه بش تكون .. حبنا الي بش نعيشوه هنا .. وصلت لبيت النوم الي اخترناها مع بعضنا الي كنت نستنى في النهار الي بش ندخللها عروسة .. لقيت تصويرتي انا و يحيى مقطعة طروف طروف .. حسيت قلبي تقطع معاها .. طحت على ركايبي هزيتها و عنقتها .. كيفاه هنت عليه .. كيفاه رضى فيا هكا .. علاش طيشني وراه و نسى كل شي .. رغم الي عملو فيا مازلت نحنلو.. متت من وحشي ليه حبو مازال فقلبي كيف اول مرة.. اما الحب هذا مش بش يشفعلو الي عملو .. عمري ما نسامح يحيى على خلاني نعيشو اليلة هذيكا .. اليلة الي ذلني و مارحمنيش فيها .. عطاني بظهرو و سلم فيا ..
هزيت راسي على خالتي رفيقة الي عنقتني بالقوي تحكي
" يزي عيش بنتي .. انساه .. يحيى مايستحقش دموعك .. بالوقت انت تو تبرى و تبرد اما هو بالوقت بش يندم وقول قالتها خالتي "
حطيت راسي على كتفها نبكي بالشهقة نخرج في الكلام بسيف و نحكي
" ك كيفاه بش ننسى يا خالتي كيفاه .. كيفاه بش بش ننسى الي عملو فيا .. كيفاه بش نتحمل الوجيعة هاذي "
مسحتلي على شعري تحكي
" بش تنسى الوقت ينسي و يداوي و تو قوم اقف على ساقيك و اخرج و انت هازة راسك .. انسى غزرت لعباد و كلامهم .. انسى يحيى.. انت من الحظة الي بش تخرج منها مالدار و الحومة هاذي .. بش ترمي كل شي وراك و تنساهم .. بش تبدى من جديد .. بش تخلي قمر الضعيفة هنا و تخرج بقمر جديدة"
قامت و قومتني معاها رميت طروف التصويرة في القاعة و عفست علاهم بساقيا و تعديت.. كيف ما عفس يحيى على قلبي و تعدي
خرجنا مالدار سكرت الباب و سكرت معاه كل لحظة و كل إحساس عشتو معا يحيى .. مالحظة هاذي بش ننساه كيف اهو نساني .. غزرت لدار اخر مرة و درت عطيتها بظهري شديت في خالتي رفيقة نمشي .. كل ما نبعد كل ما نرتاح .. خرجت مالحومة و انا متاكدة اني مستحيل نرجع كان وانا مرجعة حقي ثاني و مثلث و محاسبة كل واحد بكاني و قهرني
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
