#فريحة_تحكي
تبسمت على جنب وانا نتفكر ف وجهها وحالتها كيفاه خليتها مصدومة.. طلعت ف اول تاكسي عرضتني وعطيتو عنوان الدار.. تكيت بظهري لتالي وحطيت يدي على كرشي.. غمضت عينيا وانا نتخيل ف شنوة بش يصير تو.. الي عملو فيا ليث مستحيل كان نعديه بالساهل ومستحيل نخلي قمر تاخذو نعرف بعد عملتي هاذي بش نخسرو جملة اما المهم منخليهش يتهنا معاها مهما يصير.. حليت عينيا على صوت التاكسي الي وقفت.. خلصتو ونزلت فيسع ودخلت للدار.. رميت ساكي على جنب وطول دخلت للصالة ترميت عالفوتاي تسطحت.. حسيت روحي دايخة ماتوقعتش للحبالة تتعب هكاا.. فقت من سرحتي على صوت امي.. ريتها كيف قعدت بجنبي و قحرتلي تحكي
هي :" شعلمت؟"
بلعت ريقي وقمت تقعدت.. رجعت شعري لتالي نحكي
انا :" سايي تصرفت و خبرت مرتو ب حقيقة الي صار لكل ماتخافش "
غزرتلي على جنب تحكي
هي :"مالا قتلي مانخافش ؟؟"
علات ف صوتها شوي ورجعت تحكي
هي :" مانخافش وقت نراه جاي بش يعرس بيك ياللا.. مش على اخر عمري بش نربي ولد حرام تفهممم فيااا.. لازمك تتصرف اكثر من هكااا "
نفخت بالشوي نحكي
انا :" باهي امي باهي..اما شعندي نعمل ..انشالله هو يرضا يستعرف بصغيرو "
هي :" انشالله "
قمت من بلاصتي وغزرتلها نحكي
انا :" بش نطلع نرتاح شوي "
هزتلي براسها باهي من غير حتى كلمة.. عطيتها بظهري وطلعت لبيتي.. ترميت على فرشي وحشيت راسي ف المخدة.. غمضت عينيا بالقوي وين استرجعت الي صار لكل.. من النهار الي حليت عينيا ولقيت روحي بجنبو وحياتي تقلبت.. رغم قهرتي وغزولي من الساقط هاذاكا .. اما حاسة روحي مرتاحة شوي خاطر لقيت حل اخر بش نقلب بيه حياة ليث .. تنهدت بالشوي اول ماتفكرت كل شي من جديد
#فلاش_باك
ايامات عديتهم وانا مسكرة على روحي ف البيت كان دموعي نازلين.. فكرة انو الساقط لآخر مسني خلاتني نعيف روحي رغم انو نعرف الي صار برضاياا اما وقتها كنت ف عالم آخر.. تنطرت من بلاصتي اول ماحسيت بخواطري دارت..دخلت فيسع لسال دوبان وبقيت نتقيئ وراء بعضو.. غسلت فمي ووجهي وقمت وين حسيت بدوخة غريبة سيطرت علياا.. استندت بيديا عالحيط وبقيت نمشي بالشوي بالشوي.. ريت امي كيف قربلتي تجرلي شدتني من مرفقي تحكي
هي :" فريحة شبي بنتي "
انا :" م..مانعرفش امي.. ح..حاسة روحي تاعبة برشة "
هي :" ايجا ارتاح شوي "
هزيتلها براسي باهي من غير حتى كلمة.. اول ماقدمت شوي حسيت الفشلة غلبتني ودخت اكثر.. شدتني اكثر وكبست علياا تحكي
هي :" لا لا لازمك نمشي لطبيب تشوف حالتك.. شوف وجهك كيفاه صار.. هياا شد فيا خلينا نمشيو "
تكيت بظهري عالحيط وبقيت نستنى فيها لين حضرت روحها وجابت ساكها وخرجنا.. طلعنا ف التاكسي وشدينا ثنية الطبيب.. مسافة الطريق ووصلنا نزلت بالسيف ودخلت طول للطبيب.. حكيتلها عالاعراض الي نحس فيهم وامي قدامي تغزرلي.. قمت من بلاصتي مع الطبيبة وين بقات تكشف عليا وانا خايفة مش فاهمة شنوة مرضي..عقدت بحواجبي مستغربة كيف ريتها تبسمت.. غزرتلي وغزرت للامي تحكي
الدكتورة :" مبروك المدام حبلة.. جايك حفيد ف الثنية "
حليت عينيا على وسعهم اول ما سمعتها وين حسيت بسطل ماء بارد تكب فوقي.. جمدت ف بلاصتي ماعرفتش شنعمل ولا شنقول من الصدمة الي حسيتها.. هزيت عينيا بالوقت وغزرت للامي الي شدت ف الكرسي ووجهها حمار تحكي
هي :" ح..حبلة ؟ ك..كيفاه حبلة.. متأكدة دكتوره"
الدكتورة:" اي متأكدة حبلة ف الأسبوع الثالث "
حطيت يدي على كرشي بالوقت وين حسيت بغصة شدتني غير خوفي من امي.. بدني رعش كيف ريتها قربتلي ورمات ساكي ف وجهي تحكي
هي "' قوم تحرك "
استويت حوايجي وقمت معاها وخرجنا بعد ما خلصنا الطبيبة.. طلعنا ف التاكسي وشدينا ثنية الدار.. ثنية كاملة وانا خايفة من سكوت امي بقيت نغزر لساقيها الي ترعش و يداها المكبوسة.. عضيت على شفايفي من الخوف والغزول الي حسيتو من الكلب لآخر والي عملو فياا.. الوحلة الي فيها انا تو من جرتو مش عارفة كيفاه بش نتصرف ف الفرخ الي حاملتو منو.. فقت من سرحتي على صوتها تحكي
هي :" اهبط قدامي "
بلعت ريقي بالسيف ونزلت.. دخلت وراها لدار نكركر ف ساقياا بالسيف.. ريتها كيف قربتلي وحلت عيناهاا فياا.. الأرض رجت بيا اول ماهزت يداهاا ولفتني بكف.. حطيت يدي على خدي وشديت دمعتي بالسيف نحكي
انا :"ا..امي .... "
قصت عليا كيف علات ف صوتها تحكي
هي :" سكرر فمك.. تو تفهمني وتحكيلي الي صار.. من شكون حبلة ف الحرام يا كلبة.. هاذي تربيتي ليك.. اول مرة سامحتك على عملتك من الواطي ريان وتو ترجع تسلم ف روحك مرة اخرررى.. من شكوووون حبلة تكلممم "
عديت بعينيا عليها وبقيت ثواني ساكتة نخمم شنعمل.. خذيت نفس طويل نحكي
انا :" م..من.. من.. من ليث "
حلت عيناها فيا وغزرتلي تحكي
هي :" كيفاه؟؟؟ من ليث ؟ وقتاه صار الشي هذا؟؟ مش قتلي تعاركتو وطردك ؟"
هزيتلها براسي اي نحكي
اتا:" اي اي اما الي صار هذا قبل مايطردني.. اصلا هذا السبب الرئيسي الي خلاه يطردني أنو خذا الي حاجتو بيه روماني يا امي "
غمضت عينيا بالقوي وطرشقت بالبكاء.. حسيت روحي تحصرت ومالقيتش حل اخر.. خاطر كان امي تعرف من أيوب ممكن تقت-لني.. ريتها كيف قربتلي شوي وشدتني من يدي تحكي
هي :" ايجا اقعد واحكيلي كل شي من الاول بش نفهم ونعرفو كيفاه نتصرفو ف المصيبة هاذي.. يزي من لبكا '
مسحت دموعي وقعدت بجنبها.. عطاتني كاسة ماء شربت وغزرتلها نحكي
انا :" مش قتلك انو مرتو هبلت.. ليلتها هو جاء تاعب وبقى يحكي معااياا وقضى معاياا ليلة وكيف قتلو نحبو يخليها ويعرس بيا ضربني ومشا ..و .. وبعد هز مرتو ومشى لفرانسا بش يداويها وخلاني.. وانا منجمتش نقلك خفت منك..خاطر ماتوقعتش بش نحبل اصلا هو رماني ونساني كانو ماعمل شي "
ريتها كيف رست على سنيها وقحرتلي تحكي
هي :" مالا ضربك الساقط ..تو نوريه .. انت تسكر فمك وخليني انا نخمم.. تو خليه يرجع من السفر ووقتها نحلوها. بش يعرس بيك غصب عليه ورجلو فوق راسو "
انا :" منظنش هو لاصق في مرتو ؟"
هي :" مش بكيفو ..بش نخليه يستعرف بصغيرو ويصلح الي عملو "
شديتها من يداها وبستها منها نحكي
انا :" عيشك امي ربي يخليك لياا "
جبدت يداها مني تحكي
هي :" اما مازال حسابك يافريحة.. قوم تو مانحبش نرا منظرك "
هزيتلها براسي باهي وطلعت طول لبيتي.. عديت بيدي على وجهي وطرشقت نبكي ..نعرف كذبتي مش بش طول وتتكشف اما ملقيتش حل غير هاذا تو ..حطيت يدي على كرشي وبقيت نخمم ف كلام امي كيما بقيت نخمم ف الكلب لآخر من جرتو هو انا وصلت لهناا يكب سعدو.. اما مستحيل نعديهالو مش انا فريحة الي يعمل فيا هكا.. نزلت على طراطيش صوابعي بش امي ماتسمعنيش.. هزيت ساكي وخرجت فيسع.. جبدت تاليفوني وحطيت رقمو وطلبتو.. شوي وقت ورد علياا يحكي
ايوب :" فروحتي "
كرمشت وجهي حسيت روحي عايفتو وعافية صوت.. نحكي
انا :" وينك تو ؟"
أيوب :" هاني ف ****** "
أنا :" طرس غادي هاني جايتك "
علقت عليه ماخليتوش يجاوبني.. طلعت ف التاكسي وشديت الثنية ليه.. مسافة الطريق ووصلت.. نزلت فيسع ودقيت الباب شوي وقت وفتحلي يضحك.. حطيت يدي على صدرو ودزيتو من قدامي ودخلت.. سكر الباب وراه وغزرلي يحكي
أيوب:" شبي الزين على عصابو "
رميت ساكي عالارض وقربتلو ضربتو بكف على قوة جهدي.. حل عينيه فيا يحكي
أيوب :" *** شنوة الي عملتو تو؟ كيفاه تهز يديك علياا تحب نكسرهالك "
عليت ف صوتي شوي نحكي
انا :" جرب مسني مرة اخرى كانك راجل وتو تشوف فريحة شنوة تعمل فيك "
أيوب:" لباس انت جاية هادة عليااا ؟ شبي *** هالنهار "
انا :"تحب تعرف شبيني ؟؟؟ انا حببببلة يااا سي الشباب.. حبلة منك "
حل عينيه فيا وبقى يغزرلي ساكت.. تبسمت على جنب نحكي
انا :" تكلم عاد وينو صوتك.. من جرتك انا هازة ولد حرام كان تعرف امي تو تقتلني "
عدا بعينيه عليا وتبسم باستهزاء وين دمي زاد فور اكثر.. عطاني بظهرو وترمى عالفوتاي حط ساق على ساق وغزرلي يحكي
أيوب:" شوف شريفة بنت الفاضل الي جاية تحاسب فياا.. جاية تستشرف علياا وهي الي كانت ناوية تعدي ليلة ف أحضان ليث.. كان جيت حبلة منو راك طايرة من الفرحة تو ونسيت انو ف الحرام.. اما معاياا انا وليت خايفة من امك.. برا اضحك على بوهالي اخر عيش بنتي "
رسيت على سنيا بالقوي نحكي
انا :" زايد واطي وساقط.. صحيح كنت بش نخلي ليث يمسني اما عالاقل برضاياا مش كيفك استغليييت الوضع وحطيت كسرتك عليا "
أيوب:" والله كان برضاك زادة.. مانحكيلكش كيفاه كنت متفاعلة معاياا.. ليث فلت عليه ليلة ب الف ليلة "
قربتلو شوي نحكي
انا :" تفوووه عليك ماتجيش راجل "
شدني من يدي وجبدني.. قعدني بجنبو وغزرلي يحكي
أيوب:" فروحتي ماتخلينيش نغزل عليك من بكري وانا متحملك اما ماتختبرش صبري اكثر من هكاا.. وزيد ممكن لحكاية هاذي تكون ف صالحك وقتها تو تجي وترحم على والداياا وتعطيني بوسة من فوق "
عديت بعينيا عليه نحكي
انا :" ك..كيفاه ف صالحي "
هز بحاجبو يحكي
أيوب:" ساهلة..ارمي التهمة على حبيب قلبك ليث.. امشي قول لمرتو راني حبلة من راجلك.. هي الله الله ماتاثقش فيه خلى تزيد تسمع هكاا تو ترميه على طول يداهاا وتصدقك انت "
انا :" وكان ماتصدقنيش ؟"
أيوب:" بش تصدقك.. ماتنساش التصاور الي عندك.. هاذوكم كافيين بش يخليو حتى ليث يصدق هههه "
عقدت بحواجبي مستغربة نحكي
انا :" يعني انت ناوي ترمي صغيرك ؟"
ضحك يحكي
أيوب:" صغيري؟؟ كان نسيت لي انا مطلوب للعدالة.. صغير شنوة لي بش نخمم فيه"
انا:"حتى انا منحبش نجيب صغير هذا "
ايوب:"انت كمل بيه خطتك وبعد نزلو على روحك"
عديت بعينيا عليه وبقيت نخمم ف كلامو انا اصلا سايي حصلت وقلت للامي انو من ليث.. قمت من حذاه وقحرتلو نحكي
انا :" كلامنا ماوفاش هناا..خليني نحسبها مليح وبعد انا الي نقرر مش انت "
ضحك على جنب وهزلي براسو باهي.. هزيت ساكي وخرجت من حذاه.. طريق كامل عديتو نمشي ونخمم فكلام أيوب.. ممكن بلحق هاذي فرصتي.... على هذاكا انا بش نعمل كل شي ونستغل لحكاية هاذي المهم ليث وقمر ميتهناوش ببعض...
VOUS LISEZ
#ليس_ذنبي ❤️🔥
Roman d'amour" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
